Deuteronomio 16:1 - Dios Iwene

¹ Tupakwö yöawinobe Moisesma: —Chömöledö, kwöwaisaduwa, damötjö kwuluwo̧duwi Isabenö Jo̧ Dios ökwödönö Egipto nijitjö lakebaduwinö pjaatinenama, ajayi jawo̧ Abib jawo̧nö lakebaduwinö pjaatinobe, jö̧tö? Jau chömöledö, Abib jawo̧nö, yö̧te ja'ö jobetjö lakebaduwinö öibinobe, jo̧kwajabetjö̧ ja̧ baledina omukwatö, ba̧kwelöjatebö o̧ba bakwabakwena Abib jawo̧nö Dios mönö öbaledina omukwatakwawa ba'ali kwujunaduwo.

Deuteronomio 16:1 ပူးပေါင်းရင်းမြစ်များ

Éxodo 12:51

Ja̧ mölema Isabenö Jo̧ma Israel jojodönö Egiptotjö latjebinö pjabatijetö, okobe deinö bakwasokwenanöma.

Éxodo 13:3

Ja̧danö, Moisésma yöba̧lijetö Israel jojodönöma: —Babe möle, Egiptotjö lakebaduwi̧ mölema ba̧kwȩlö̧jatebö kwomukwataduwo, Isabenö Jo̧ma Egipto jojodö usula emawö kwotidaduwobö wetji̧tjö kwö̧jibaduwinö pjaatobetjö̧. Iteda ujulu i̧sebö Isabenö Jo̧ma Egiptotjö lakebaduwobö pjaatobetjö̧ ba̧kwȩlö̧jatebö̧ kwomukwataduwo. Jo̧kwaobetjö̧ bakwȩlö̧jatebö bite ja̧wo̧ badekwachena ba'ali kukwaduwo 'ye'yeachö̧kö̧ pankwö.

Éxodo 13:4

Ökwödöma, bite ja̧wo̧, Abib mikwo̧, Egiptotjö lakebaduwakobe.

Éxodo 23:14

Ina webijetö Isabenö Jo̧ma: —Bakwöta o̧bakwena ba'ali wa̧pötakwa kwujunaduwo, ötjönö ösödö.

Éxodo 23:15

Ajayinö ba'ali pan 'ye'yeachö̧kö̧ ba'ali, jö̧ba̧lö, mikwobe. Egiptotjö lakebaduwakwa̧ abönö wetinadanö, ja̧ ba'ali kwujunaduwo bakwöta o̧bakwena, abib mikwo̧ ja̧wo̧nö. Jo̧ba ja̧wo̧nö Egiptotjö lakebaduwinobetjö̧ jo̧ba ja̧wo̧nö kwujunaduwo pan 'ye'yeachö̧kö̧ ba'alima. Ja̧danö, ja ba'alima jelemutjö dötölataja mölȩ baledibanö ba'ali. Pan 'ye'yeachö̧kö̧da kwukwaduwobö jo̧be ja̧ ba'alima. Ja̧danö, ötjönö ösödö ja̧ ba'ali kwanö ichadöma iyawa kwichejebaduwo, ötjönö ösödö kwiyaduwobö.

Éxodo 34:18

Ina webijetö Isabenö Jo̧ma Moisésnöma: —Imiamekwena, pan 'ye'yeachö̧kö̧ ba'ali kwanö kwujunaduwo. Ja̧danö, Abib mikwo̧ ja̧wo̧ Egiptotjö lakebinaduwobetjö̧ jo̧ba ja̧wo̧ kwujuno ja̧ ba'alima. Ja̧danö, ja̧ pan 'ye'yeachö̧kö̧ ba'alima jelemutjö dötölataja mölȩ baledibanö pan 'ye'yeachi̧kwö kwukwaduwoko, Egiptotjö lakebinaduwa weti̧danö.

Lucas 2:41

Ba̧kwȩlö̧jatebö o̧bakwena Jesús ojo'dobi, abe'dobi Jerusalénbe 'yi̧atjinobe, Dios mö öbaledina ömukwatö pjiesta jobetjö tjujunobö.

Juan 2:13

Ida̧ökö, judío jojodö, Dios damötjö, mönö öbaledina omukwatö pjiesta tjujuni̧ yöneawachobetjö̧ Jesúsma Jerusalénbe i̧'yinobe.

Juan 5:1

Jemi ikenama, judío jojodö pjiesta tjujuni̧ möle baibobetjö̧ Jesúsma Jerusalénbe i̧'yinobe.

Juan 6:4

Ja̧ mölema, judío jojodö pjiesta tjujuni̧ möle ida̧ökö yöneawachinobe, Dios mönö öbaledina omukwatö pjiesta mölema.

Deuteronomio 16:2

Ja̧ ba'ali kwujunaduwakwa̧ma baikwö labebö lobö yötawa: Isabenö Jo̧ma kwiteboduwitjö ju'wi comunidad omudawö ujunakobe, iteda eju comunidad baibanö. Ja̧danö, ökwödöma kwajwimuduwitjö pakayaö̧kö̧, obejaö̧kö̧ jobe Dios omudawö ujuninelö kwuluwo̧duwi Isabenö Jo̧ Diosnö kwabö juwö kwiyaduwakwedöja Abib jawo̧nö, mönö öbaledina omukwatakwawa iyawa baibanö.