Deuteronomio 10:18 - Dios Iwene

¹⁸ Ja̧danö löyödönöbi, tji̧lekwamu wobekwinadönöbi tjöbeba̧lö pjabato̧, ju'wedö jobadönö sulabenö ja̧tja̧pji jö̧ba̧lö. Ja̧danö ju'wibi jelobetjö ichajadönö ösödö pjabato̧, tju̧kwa kwakwawabi, tjitea ka̧miji̧do̧bi iyö.

Deuteronomio 10:18 ပူးပေါင်းရင်းမြစ်များ

Éxodo 22:20

Ja̧danö, ju'wi wanedö yötawa. Bakwo̧ma o̧'wo jawa tjösödökwenö ösödinö iyitjö̧ma jo̧banö kwabö lotjobö jo̧be. Ja̧danö, isujunöbi jenanö. Ötjö, Isabenö Jo̧nöda ösödinö kwiyaduwobö jo̧be.

Éxodo 22:21

Ju'wi wanedö yötawa: Jelobetjö ichinadönö, kwiteboduwinö ju̧kwadönö sulabenö ja̧köbaduwoko, ja̧danö, usula tjemawinö weköbaduwoko. Kwomukwataduwo: Ökwödöbi jelobetjö ichinadö kwö̧jinawobe Egiptonö.

Éxodo 22:22

Ja̧danö, ju'wi wanedö yötawa: Jilekwe woinokonö, ja̧danö tjemu abe'do, ojo'do debo̧nö, debujunö usula tjemawinö weköbaduwoko.

Éxodo 22:23

Yötawaduwakwö: Jobadönö usula tjemawinö weköbaduwitjö̧ma, jobadö ötjönö jwötjeba̧li̧ a̧ja̧kwö pjatatakwo̧sa.

Isaías 1:17

Otiwa jawa ja̧bö ja̧kwawa kwöwaisachibaduwo, ja̧danö jweinö lȩekwa weköbaduwo. Ju'wedö sulabenö ja̧tja̧wö̧nö pjabatö, tjo̧'wo ösöwachibanö pjakataduwo. Löyödöbi, tjilekwamunö wobekwinadöbi lȩekwa luwedö tjöba a'o tjö̧jenama, tjöbeba̧löjönö pjakataduwo, jobadönö suli̧ tjöwaedapji jö̧ba̧lö, yöawobe Diosma.

Mateo 5:45

Jejenö ja̧köbaduwo, mölejȩbe jo̧ kwabe'doduwi i̧tji̧mu otiwanö ja̧bö tjö̧ji̧danö otiwanö ja̧bö kwö̧jaduwakobetjö̧. Jau chömöledö, kwabe'doduwima, sulabedönöbi, otiwadönöbi pjabatö bakweminö möle jawo̧nö idejatobö webo̧, ¿jö̧tö? Ja̧danö, sulabenö ja̧badönöbi, otiwanö ja̧badönöbi pjabatö, ojwiyo o̧bobö webo̧, ¿jö̧tö? Jau chömöledö, kwabe'doduwima okobe deinö jojodönö pjabato̧.

Hechos 14:17

Jejenö ujunibinajayonö Diosma iteda pjaati̧ma ba̧kwȩlö̧jatebö i̧sebijetö. Jo̧kwaobetjö̧, israel jojodöböködö, wainö sulabenö ja̧bö ju̧kwadöma Diosnö wajwitjijayonö jo̧ba otiwanö pjaati̧ma edijadötö. Ja̧danö ¿ökwödöja? Babebi Dios otiwanö pjaati̧ma kwedaduwobe. ¿Tajida jo̧ba pjaati̧ma? Biya̧: Ojwiyo o̧bi̧ weobe kwujuninaduwi̧ pokwobö, ju'wi möle kwukwaduwakwa̧ma. Ja̧danö, otiwanö kwö̧jaduwobe, kwakwawa kwanö, Dios pjaati̧ma. Ja̧danö, kwo̧'wo̧duwi ösöwachibanö kwö̧jaduwobö pjaatobe Diosma. Jau, damötjöbi Diosma iteda pjaati̧ma i̧sebinobe. Ja̧danö, babebi i̧sebobe Diosma iteda pjaati̧ma ökwödönöma. Jo̧kwaobetjö̧ jo̧banöda kwösödaduwo, ökwödönömaökö— yöbawijadötö Pablo, Bernabé.

Deuteronomio 27:19

Ja̧danö, –Diosma weobe, jelobetjö ichajadönöbi, löyödönöbi, tjilekwamu wobekwinadönöbi pjadatobö, jo̧kwajabetjö̧ Dios wei̧ a̧ja̧kwökönö jobadönö suli̧ waedadönö lȩebakwo̧ Diosma, –jö̧ba̧lö Levisaso jojodö labinö yötjawobö ja̧kobe, ja̧danö yötjawiawö̧, –Jau, amen, –jö̧ba̧lö okobe deinö jojodö tjatadobö ja̧kobe.