Deuteronomio 1:8 - Dios Iwene8 Jau, damötjö kwa'dödö Abrahamnöbi, Isaacnöbi, Jacobnöbi yöbawö chujunijatö, jobadönöbi, tjitji̧mu tupadanö jojodönöbi ja̧ niji isabenö chiyakwa̧ wenema, ja̧danö yöbawö chujunina badekwachinö isabenö ja̧ niji kwemaduwobö chujunajabe. Jo̧kwajabetjö̧, jobe 'ya̧nö, kwiteboduwi baibanö ja̧ niji emö, jobe kwö̧jaduwobö badekwachajabe, –jö̧ba̧lö weinobe Diosma, Sinai mösa'otjö, —jö̧ba̧lö Dios yöawina jawa yöawinobe Moisesma. အခန်းကိုကြည့်ပါ။ |
Deuteronomio 1:8
39 ပူးပေါင်းရင်းမြစ်များ
Ja̧danö, kwömöledöma ju'winö, lekwe o̧biya, cuatrocientos o̧biya jenanö baibajena yemidanö tjetjachajakobe baikwö, Canaán nijibe. Ja̧ mölema bemi Canaánnö ju̧kwadö amorita mikwadönö lȩtebakobe. Jobadö lekwe sulabenö ja̧bö tjuju̧kwakwedö. Ja̧danö, sulabenö ja̧tjemitjö o̧penönö sulabenö ja̧bö tjuju̧kwena ötjöma bajaliyanöma lȩtebakwawö̧. Ikenama, lȩtebaja̧ okobe kwömöledöma yemidanö tjetjachakobe baikwö— yöbawijetö Isabenö Jo̧ Diosma Abramnö.
Jejenö baledena mölema Isabenö Jo̧ Diosma yöbawö junijetö iteda iwenema Abramnö, baikwö: —Abram, biya̧ chiwene ökwönö yöbawö chujuna: Bemi nijima ökwötjö tupadanö jojodönö chiyakwo̧sa, tjitebo baibanö. Ja̧danö, okobe jwiinö niji Egipto ojwetjö Éufrates ojwe mikwödö, nöödö ichibanö chiyakwo̧sa ökwötjö tupadanö jojodönöma— yöbawö junijetö—.
Ja̧danö, kwiteboduwi chiyakwemima jalobe, u'dakwöchobe o̧pesobu duwobutjö a̧li̧kwöchobekwö o̧pesobu mediterraneosobu mikwobu ichibö. Jao, kwiteboduwi chiyakwemima jalobe, ja̧wo̧ meobe Sinai mejetjö ja̧wo̧ laebobekwö Éufrates ojwe mikwödö ichibö. Ökwödöma okobe deinö jobe ju̧kwadönöma kwujuluwaduwobö pjatatakwo̧sa, jobadönö a'dewö lobö, ökwödö kwiteboduwida baibanö.
Isabenö Jo̧ma Moisésnö webijetö: — Moisés, jojodönö, Egiptotjö öbibö lakebinawö̧nö betjöma öbibö kwi̧'yo damötjö̧ Abrahamnö, Isaacnö, Jacobnö ötjöda chiwene yöbawö chujuninemikwö. Jobadönö ötjöda chiwene yöbawö chujunijatö. Bemi nijima ökwötjö tupadanö jojodönö chiyocha, jö̧ba̧lö. Jobekwö kwömöledönö öbibö kwi̧'yo.
ja̧danö lekwe möle ja̧ kwiteboduwinö wene jwiinö kwö̧jaduwakobetjö̧. Jau chömöledö, ja̧ niji kwa'dödönö yöbawö ujuninobe Isabenö Jo̧ma, jobadönöbi, tji̧tji̧mu tupadanö jojodönöbi ja̧ inesö otiwemi, ajikwakwawedöbi otiwanö tjöbötjachemi, ja̧danö batjobi otiwanö wa̧jemi niji iyobö, jo̧kwajabetjö̧ jo̧ba wei̧ a̧jakwö kwö̧jaduwo, lekwe möle otiwanö jobe kwö̧jaduwakobetjö̧.
Jau Sijon, Esau itji̧mu tupadanö jojodö Seirnö ju̧kwadö döbaledobö wetjinadanö, ja̧danö Arnö ju̧kwadö Moabitas jojodö döbaledobö wetjinadanö, kwitebo ö'wejenö döbaledobö adebakwö, Jordan ojwe pebibö, duluwo̧ Isabenö Jo̧ Dios ökwödönö iyakwa̧ nijibe dichibenanö kabatö, ¿jejenö döbaledobö weköbakwa̧ji̧? –jö̧ba̧lö yöbawadönö wetijatö.
Ja̧danö chuluwo̧, jejenö weköbi̧ a̧ja̧kwö chö̧jiökwe, mölejȩbe inesö otiwemi kwö̧jelö, nijakwö ökwödönö kwedobö atebakwö, ja̧danö ökwödö kwömöledö israel jojodönö pjabatö, ditebo niji otiwanö pokwobö weköbobö ateba. Jau chuluwo̧ Dios, da'dödönö yöbawö kwujunina badekwachinö, inesö otiwemi, batjo otiwanö wa̧jemi, ja̧danö ajikwakwawedönö otiwanö tjajikwemi niji kwiyinobe, ja̧danö jemi tupwakwö ökwödönö pjabatö, kwiyina niji otiwanö pokwinö pjakatobö atebakwö, –jö̧ba̧lö akebaduwonö, —jö̧ba̧lö yöawinobe Moisesma.
Ja̧danö ja̧ möle Diostjö jojodötjö tjö̧'da̧de pjabatö otido̧ ö̧jobekwö 'ya̧nö, yökawaduwonö: –Isabenö Jo̧ma da'dödönö yöbawö ujuninobe, bemi niji ökwödönö iyakwa̧ wenema, ja̧danö bi̧ya bemi niji pokwaja̧ iyö, babe möle duluwo̧ Isabenö Jo̧ Dios öba a'o i̧sȩbö yötawobe, yöbawö ujunina badekwachinö iyinobe, ja̧danö isabenö yöbawö ujuninadanö iyaja̧ nijinö chitebo baibanö chö̧jobe, –jö̧ba̧lö.
—Isabenö Jo̧ otiwanö pjaatakwawö̧ja isabenö nöinö juna̧ladö bakibaduwanö. Kwitji̧muduwibi tjö̧ba̧jekwachobö pjaatakwawö̧ja, ja̧danö kwajwimuduwi pakayadö tjö̧ba̧jekwachobö pjaatakwawö̧ja, ja̧danö kwöbatjoduwi wa̧ji̧ nöinö wa̧jö̧ ba̧jekwachobö pjaatakwawö̧ja. Jau chömöledö, damötjö̧ Isabenö Jo̧ma kwa'dödönö yöbawö ujuninobe, kwiteboduwi niji ökwödönö iyobö, ja̧danö wei̧ a̧ja̧kwö kwö̧jaduwitjö̧ma, ja̧ nijinö otiwanö kwö̧jaduwobö pjaatakwo̧.
Ja̧kwawa jawa omudawö, kwuluwo̧duwi Isabenö Jo̧ Diosnö ile nikebaduwo chömöledö, ja̧danö jo̧banö 'diinö do̧ba̧lö, wei̧ a̧ja̧kwö kwö̧ja̧duwo. Jo̧batjöda ichi̧ chömöledö, ja̧kwawa kwö̧jaduwi̧bi, lekwe möle kwö̧jaduwakwa̧bi, jo̧kwajabetjö̧ jo̧banö 'diinö do̧ba̧lö kwö̧jaduwo, Isabenö Jo̧ kwa'dödö Abrahamnöbi, Isaacnöbi, Jacobnöbi yöbawö ujunina nijinö kwiteboduwi baibanö lekwe kwö̧jaduwakobetjö̧, —jö̧ba̧lö yöawinobe Moisesma, israel jojodönö.
Jejenö yöbawajo̧, Moisesma Josuenö jwöinobe, ö̧jobekwö ichobö, ja̧danö okobe deinö jobe ko̧ko̧kwadö israel jojodö tjöba a'otjö, Moisema jo̧banö yöawinobe: —Josue, yebabökönö kwujuluwachibanö kwö̧jo, ökwöda bidö israel jojodönö Isabenö Jo̧ iyakwa̧ nijibe ökibakobetjö̧. Jau Josue, Isabenö Jo̧ma tja'dödönö yöbawö ujuninobe, jobadönö niji iyakwa̧ jawama, ja̧danö ja̧ yöbawö ujunina jawa badekwachinö ökibakwo̧ja, ja̧ niji tjitebo baibanö tjö̧jenanö.
Jejenö i̧sȩbö, Isabenö Jo̧ma Moisesnö yöawinobe: —Bi̧ya ökwönö chi̧sȩbaja̧ nijima, Abrahamnöbi, Isaacnöbi, Jacobnöbi yöbawö chujunina niji, –Kwitji̧muduwi tupadanö jojodönö chiyakwo̧sa, –jö̧ba̧lö. Ja̧danö, ja̧ chiyakwa̧ niji kwöbajaleduwinö kwedobö wetajabe, jo̧kwaijayonö jobe kwichibanö pekiboböma wetökö, —jö̧ba̧lö yöawinobe Moisesnö.
Moises ina yöawinobe israel jojodönö: —Jobekwö Dios ökwödönö pjaatina jawa yötawajabe chömöledö. Ja̧danö, babema baikwö yötawaduwakwö: Ökwödönö chö̧ba̧jadobe Dios ökwödönö wei̧, ja̧bö kwö̧jaduwobö wei̧ma. Ja̧ chöba̧ja̧di̧ jawama otiwanö a̧ja̧kwö kwö̧jaduwo, ina 'yaka̧laduwayi Dios iyakwa̧ nijibe tekachaduwakobetjö̧, ja̧danö kwiteboduwi baibanö kwemaduwakobetjö̧. Jau chömöledö, kwa'dödö tjösödinökwe Isabenö Jo̧ Diosma ja̧ niji iyobe, jo̧kwajabetjö̧ isabenö jo̧ba wei̧ a̧ja̧kwö kwö̧jaduwo.
Tupakwö yöawinobe Moisesma: —Chömöledö, kwuluwo̧duwi Isabenö Jo̧ Diosma kwa'dödömine Abrahamnöbi, Isaacnöbi, Jacobnöbi yöbawö ujuninobe, isabenö ökwödö israel jojodönö niji iyakwa̧ wenema, jö̧tö? Ja̧ yöbawö ujunina nijima, baikwö yötawa chömöledö, Ja̧ nijinö ida̧ökö otiwi̧ comunidadbiya jȩmi, jalobe comunidadbiyama. Ja̧ comunidad kwotidinaduwököjayonö, otiwanö jobe kwö̧jaduwobö ja̧kobe.
Tupakwö yöawinobe Moisesma, israel jojodönö: —Chömöledö, kwuluwo̧duwi Isabenö Jo̧ Diosma kwa'dödönö yöbawö ujuninobe, jobadönöbi, tji̧tji̧mu tupadanö jojodönöbi ile nibebö pjaatakwa̧ wenema, ja̧danö baikwö yötawaduwakwö: Ökwödönö yötawi̧ Dios wei̧ teada̧lönö a̧ja̧kwö kwö̧jaduwitjö̧ma, Diosma isabenö ökwödönö ile nibebö pjaatakobe, jobadönö yöbawö ujuninadanö.
Jau chömöledö, ökwödönö ile nibebö, otiwanö pjaatakobe. Kwö̧ba̧jȩkwachaduwinö, ba̧jȩkwadö kwitji̧muduwinö 'yakebaduwobö pjaatakobe. Ja̧danö kwöbatjiju otiwanö pokwobö pjaatakobe, nöinö kwakwawabi, ubasobubi, olivo o̧tesobubi kwujuna̧laduwakobetjö̧. Ja̧danö kwajwimu pakayadönöbi, obejadönöbi tjö̧ba̧jekwachobö pjaatakobe, ba̧jȩkwadönö kwajikwaduwakobetjö̧. Jau chömöledö, Diosma kwa'dödönö yöbawö ujunibe, niji ökwödönö iyakwa̧ wenema, ja̧danö wei̧ a̧ja̧kwö kwö̧jaduwitjö̧ma, jejenö otiwanö iyakwa̧ nijinö kwö̧jaduwobö pjaatakwo̧.
Baikwö yötawaduwakwö chömöledö, Isabenö Jo̧ ökwödönö ile niebobetjö̧, ja̧danö ökwödönö pjaatakwa̧ wene kwa'dödönö yöbawö ujuninobetjö̧, ökwödönö pjaatobö omudawö ujuninobe chömöledö. Jo̧kwajabetjö̧ Egipto niji la'aka luwo̧ Faraon ömöayedö kwö̧jinaduwelö ökwödönö laebinobe Isabenö Jo̧ma, iteda inesö ujulunö ökwödönö Egiptotjö öibinobe, Faraon ujulutjö kwö̧jibaduwinö.
Jau chömöledö, jobe kwi̧'yaduwakwa̧ma, ökwödö jawamaökö. Ökwödöda otiwanö ja̧bö kwö̧jaduwobetjö̧, ja̧danö ökwödöda jwaikwöda otiwanö kwomajadeduwinö omukwatö kwö̧jaduwobetjö̧ baledokobe, baikwö labebö lobö yötawa chömöledö: Damötjö̧ Isabenö Jo̧ma kwa'dödö Abrahamnöbi, Isaacnöbi, Jacobnöbi yöbawö ujuninobe, tji̧tji̧mu tupadanö jojodönö niji iyakwa̧ wenema. Ja̧danö, ju'wibi, ja̧ nijinö ju̧kwadöma jwiinö sulabenö ja̧bö tjuju̧kwobe. Jo̧kwajabetjö̧, ja̧ nijinö ju̧kwadö sulabenö ja̧bö tjö̧jiökwe, iteda kwa'dödönö yöbawö ujunina omukwatö, kwuluwo̧duwi Isabenö Jo̧ Diosma weakobe, ja̧ nijinö kwö̧jaduwobö.
Ja̧danö chömöledö, jejenö baledinobe da'dö Abrahamnö. Abrahamma Diosnö o̧'wo̧ wana̧lö, Dios yöawi̧ ösödö ite'ada̧linobe, Dios yöbawö ujuninadanö isabenö baledakobe, jö̧ba̧lö. Döwaisa. Diosma jweinöda yöba̧lo̧ ¿jö̧tö? Ja̧danö Abrahamnö yöbawö junö jö̧a̧linobe, Isabenö ökwötjö tupadanö jojodö tjöba̧jekwachinö batjibobö pjatatocha, jö̧ba̧lö. Ja̧danö chömöledö, Diosma ju'wi jawabi jö̧a̧linobe Abrahamnö yöbawö junö jö̧a̧lena. Diosma Abrahamnö wanedakwawö yöawinobe, Abraham, ötjö yöbawö junö jö̧ta̧li̧danö badekwachökötjö̧ma ötjöda jawa, jö̧ba̧lö. Ja̧danö ötjödada lȩtebakwawakwo̧sa, jö̧ba̧lö, wanedakwawö yöawinobe Diosma Abrahamnöma. Chömöledö Diosma jelo̧, jo̧banö lȩebakwo̧ deobetjö̧, Ötjödada lȩtebakwawakwo̧sa, jö̧ba̧lö, wanedakwawö yöawinobe. Chömöledö Dios jejenö yöbawö junö jö̧a̧lina omukwatö döwaisachibobö jo̧be, Dios yöbawö junö jö̧a̧li̧danö isabenö badekwachakobe, jö̧ba̧lö.
Ja̧danö, ju'wi möle Isabenö Jo̧ma angeldanö ichejekwo̧ Guilgaltjö i̧'yinobe Boquin comunidadbe, ja̧danö jobetjö israel jojodönö yöawinobe, baikwö: —Damötjö̧ ökwödö kwa'dödönö yöbawö chujunijatö, bemi canaan niji ökwödönö chiyobö, ja̧danö yötawinadanö ökwödönö Egiptotjö baikwö chichejebijatö, kwiteboduwi baibanö. Ja̧danö, niji ökwödönö iyö yöbawö chujunijatö, –Weti̧danö ja̧bö kwö̧jaduwitjö̧ma, ba̧kwelöjatebö yöbawö chujuninadanö pjatatakwo̧sa, –jö̧ba̧lö.
ကြော်ငြာတွေ