Deuteronomio 1:31 - Dios Iwene

³¹ Ja̧danö, jojodö deobe kwekachaduwonö, kwuluwo̧duwi Isabenö Jo̧ Diosma ökwödönö öbibö e'ewinobe ichejekwa, bakwo̧ iteda itji̧nö öbibö apjö̧alobedanö, jö̧tö? Okobe jwiinö kwekachaduwi̧ma, otiwanö teada̧lö öibinobe, baikwö kwichibaduwenanö kabatö, jö̧tö? Isabenö otiwanö teada̧lö ölakwabikwawo̧ kwuluwo̧duwi Diosma chömöledö.

Deuteronomio 1:31 ပူးပေါင်းရင်းမြစ်များ

Éxodo 19:4

Ökwödöma ökwödöda kwöbajaleduwinö kwedaduwijatö Egipto jojodönö ötjö, Isabenö Jo̧ labinö lȩtebi̧ma. Ja̧danö, kwedaduwijatö ökwödönö chite'ada̧li̧ma, baikwö ötjö chö̧jobekwö kwichaduwobö öbibö. Wanedö yötawa: Bole itji̧ ajayinö apatjö labebö köa̧lena abe'doma otiwanö ite'ada̧lobe, itji̧ köa̧lobe teebe kö̧ba̧lö owo̧jo̧pi̧ya jebata̧lö. Jejenö itji̧ me'dawachibö meenama abe'do o̧wo̧jo̧pi̧yanöda mebö wamato̧. Ikenama abe'doma itji̧ wamato̧nö otiwanö e'ewö ȩwa̧jo̧ iteda o̧wo̧jo̧pi̧yanö. Jejenö ötjöma ökwödönö te'ada̧lö ötibajabe, Egipotjö labebö baikwö, ötjö chö̧jobekwö kwichibaduwobö.

Isaías 40:11

Jo̧ba Diosma iteda ömöledönö otiwanö iteada̧lakwo̧, obejadönö teada̧lo̧ iteda ajwimunö iteada̧li̧danö. Obejadö tji̧tji̧munö emö, apjö̧alö e'ewobedanö, ja̧danö ajwi̧mu metu'wo ja̧dönö dösölö̧jinö öibi̧danö otiwanö iteada̧lakwo̧ Diosma, iteda ömöledö Juda jojodönö.

Isaías 63:9

Isabenö okobe jwiinö usula emawö tjö̧jitjö̧, Diosda jobadökwö ja̧nö pjaatinobe. Jau, sule ömöayo̧nöda webö, —Chömöayo̧ angel, tjö̧jibinö pjabati, —jö̧ba̧lödamaökö, iteda da'dödökwö ja̧nö, tjö̧jibinö pjaatinobe. Jo̧bada ile nibebö, lȩlöinö edö pjabatinama, ja̧danö okobe jwiinö damötjö kwetjachinama, jo̧bada a̧la̧pedö kweatinobe.

Hechos 13:18

Ikenama cuarenta o̧biya jenanö, jojodö deobe kwebachö ji̧abijadötö. Jobe kwebachö ju̧kwö Dios wei̧ tja̧ja̧kwököjayonö Diosma jobadönö kabatibökönö ina te'ada̧liabijetö, da'dödöminenöma— Pablo yöbawijetö—.

Deuteronomio 32:6

Ökwödöma wajwibadö omukwatöködödanöbedöja chömöledö, baikwö yötawa: Isabenö Jo̧ma kwabe'doduwibo̧, jo̧bada ökwödönö otidinobetjö̧, ja̧danö ju'wibi ökwödönö otidajo̧, kwiteboduwisaso juluwaso bakibaduwanö ujuninobe, jö̧tö? Isabenö otiwanö pjaatinobe chömöledö, ja̧danö jejenö pjaatiawö̧ balekwa mikwa jo̧banö kwöpöjödaduwobö otiwenaji̧? Sula chömöledö, jo̧banö kwösödaduwo jö̧ba̧ladöja.

Deuteronomio 8:5

—Isabenö kwomajadeduwinö kwöwaisaduwobö jo̧be chömöledö, tjabe'dodö tji̧tji̧munö ba̧ja̧dö jwetjebi̧danö, kwuluwo̧duwi Isabenö Jo̧ma ökwödönöbi jwebebö ba̧ja̧do̧, jö̧ba̧lö.