Colosenses 3:15 - Dios Iwene

¹⁵ Ja̧danö, kwömöledöduwikwö wene jwiinö kwo̧'wo̧ luwo̧duwi ösöwachibanö kwö̧jaduwo chömöledö. Ja̧ kwo̧'wo̧ luwo̧duwi ösöwachibanö kwö̧jaduwi̧ma, Cristotjö ichi̧ chömöledö. Ja̧danö, kwömöledöduwi Cristonö ösödadökwö kwo̧'wo̧ luwo̧duwi ösöwachibanö kwö̧jaduwo jö̧ba̧lö, Diosma ökwödönö jwöinobe, Cristo iteba'o bakwa'o bakibaduwanö. Ja̧danö, Diosnö kwösödaduwo chömöledö, otiwanö pjabato̧ja jö̧ba̧lö.

Colosenses 3:15 ပူးပေါင်းရင်းမြစ်များ

Isaías 26:3

Ökwönö omukwatö jo̧nö, otiwanö teada̧lo̧ja duluwo Dios. Ökwönö o̧'wo wa̧na̧lö ösödö ö̧jobetjö̧, bakwainö wene jwiinö ö̧jobö pjabato̧ja.

Isaías 27:5

—Ju'wibi chösödena, sȩakadanö ichejekwadöbi, ju'wi sula'wodanö ichejekwadöbi, chöbatjo öpöjojodö tjö̧ji̧ kabatibö, chömöayedö batjibanö tjichobö chösödena. Ölakwabikwawa kabatibö, ötjökwö wene jwiinö tjöjakwa̧ yöbawö tjujunobö chösödena, —jö̧ba̧lö wanedö yöa̧lobe Diosma.

Isaías 57:15

Jau, baikwö yöa̧lobe inesö mööjȩ mölejȩnö jo̧, ba̧kwelöjatebö jo̧, Suli̧tjö Ödö Jo̧ jö̧ba̧lö mikwo̧ Diosma: Ötjöma inesö möemi, suli̧tjö ödö jȩmi jo̧sa. Jo̧kwaijayonö ju'wibi, bakwo̧ sulabenö ja̧bina, o̧'wo tjo̧bekwö, —Sulabo̧ mikwawö̧kö̧sa, —jö̧ba̧lo̧kwöbi jo̧sa. Jo̧bajayo̧kwö jo̧sa, o̧'wo ujuluwachibanö pjatatakobetjö̧, sulabenö omukwataja̧ kabatibö balewachajo̧nö omajade ujuluwachibanö pjatatakobetjö.

Isaías 57:19

Jau, otiwanö tjo̧'wo ösöwachibanö pjatatocha, tjo̧'wo ösöwachibanö ötjönö lo̧tjenanö baibanö. Ötjö Isabenö Jo̧ma baikwö yöta̧la: Chö̧jelö ödö ju̧kwadönöbi, yöne ju̧kwadönöbi, okobe deinö chömöledönö jobekwö pjatatakwo̧sa, wene jwiinö otiwanö tjö̧jakobetjö̧, ja̧danö tjö̧bibajinö otidö lotocha.

Juan 14:27

Chi̧'yajabe okobema kwo̧'wo̧duwi ösöwanö kwö̧jaduwobö pjatatakwo̧sa. Jejenö pjatati̧ma kwo̧'wo̧duwi ösöwanö kwö̧jaduwobö pjatati̧, böjȩ jawamaökö. Tjo̧'wo̧ luwo̧ okwa jawa, ba̧kwȩlö̧jatebö ji̧ jawama. Chöba̧ja̧di̧ waisachadö, kwo̧'wo̧duwi tjo̧kekwaduwa, ja̧danö yekabiduwa.

Juan 16:33

Ja̧danö, babe yötawaja̧ma kwo̧'wo̧ luwo̧duwi tjo̧bekwökönö kwö̧jaduwobö yötawajabe. Chömöledö, böjȩnö ja̧nö usula kwemawaduwakobe. Jo̧kwaijayonö, kwo̧'wo̧duwi̧ ösöwanö kwö̧jaduwo, ötjöma böjȩnö jawa okobe jwiinö chujuluwobetjö̧— yöawinobe Jesúsma öba̧ja̧di̧ waisachadönöma.

Romanos 1:21

Jobadö, Diosnö öpöjödadönöma yötawaduwakwö chömöledö: Diosnö tjöwaisijayonö jo̧banö ösödöködö, ökwöma Duluwo̧ Dios, jö̧ba̧lö. Ju'wibi, Diosma jobadönö otiwanö pjaatijayonö, pjaataja̧ yelösöda omukwatöködö. Jemi tupakwö, Diosnö omukwatökönö, sulabe jawada, böjȩ jawada omukwatadö. Ja̧danö, okobe jwiinö tjomukwati̧ma, sulabenö omukwatadöda babibadö.

Romanos 14:17

Jau chömöledö, Dios ömöayedö dö̧ji̧ma kwakwawa jawamaökö, owawa jawamaökö. Ju'wida chömöledö, Dios ömöayedö dö̧ji̧ma. Dios O̧'wo̧ Luwo̧ma ökwödönö ja̧inobe, sulabe jwibadö badibanö, ja̧danö tupakwöbi pjaatobe ökwödönöma. Jau chömöledö Cristonö ösödadö dömöledökwö wene jwiinö dö̧jobö, do̧'wo̧ ösöwanö wene jwiinö dömöledökwö dö̧jobö pjabato̧ Dios O̧'wo̧ Luwo̧ma. Ja̧da Dios ömöayedö ja̧kwawama chömöledö.

Romanos 15:13

Chömöledö, Diosma ökwödönö pjabato̧, Aaa, isabenö Dios jö̧a̧linadanö otiwanö ja̧akwo̧, jö̧ba̧lö domukwatobö. Jo̧banö ateba, kwo̧'wo̧ luwo̧duwi ösöwachibanö kwö̧jaduwobö, wene jwiinö kwö̧jaduwobö. Ja̧danö, jo̧banö kwösödaduwobetjö̧, jejenö kwö̧jaduwobö pjaatakwo̧ ökwödönöma chömöledö. Ja̧danö Dios O̧'wo̧ Luwo̧ ökwödönö pjaatobetjö̧, tupakwö kwo̧'wo̧ kwöwana̧laduwakwedöja, isabenö Dios jö̧a̧linadanö ja̧akwo̧ jö̧ba̧lö.

Romanos 5:1

Ja̧danö, ökwödö Jesúsda dö̧jibinö pjabato̧, jö̧ba̧lö dösödiökwe, Diosma jö̧a̧linobe, Chedemi bidöma suli̧ jwibadö, jö̧ba̧lö. Jejenö jö̧a̧linobetjö̧, wene jwibadö otiwanö dö̧jobe Dioskwö. Ja̧ wene jwibadö dö̧ji̧ma, Duluwo̧ Jesucristoda ja̧ina.

1 Corintios 10:17

Jejenö bakwapja̧tjö bakobe dukwobetjö̧, ba̧jekwadö dö̧jijayonö bakwa'o badibobedanö ichejekwa, okobe deinö bakobe bakwapja̧tjöda dukwobetjö̧.

2 Corintios 4:15

Jejenö omukwatö, usula demawijayonö kabatibökönö jwaikwöda yöbawö dö̧jobe chömöledö. Jau chömöledö, okobe jwiinö usula demawi̧ma, ökwödönö pjadatotö jö̧ba̧lö usula demawobe, tupakwönönö ba̧jekwadö jojodönö Dios mikwa jwiinö otiwanö iyenama, otiwanö iyo̧ja jö̧ba̧lö ba̧jekwadö Diosnö tjösödakobetjö̧, ja̧danö okobe deinö Diosnö otiwanö tjomukwatakobetjö̧.

2 Corintios 9:11

Jau chömöledö, baikwö labebö lobö yötawa: Diosma otiwanö ökwödönö iyobe, a̧'dȩlökönö pjabatö kwiyaduwobö, ja̧danö kwiyaduwi̧ Jerusalénnö ju̧kwadö Jesúsnö ösödadönö diyenama, Diosnö ösödakwawa baibakobe, otiwa jö̧ba̧lö.

Efesios 4:16

Ja̧danö, ökwödö okobe deinö jo̧ba iteba'obedöma, ba̧jekwadö dö̧jobe, jojo iteba'onö nöinö ji̧danö. Iteba'onöma nöinö jo̧be, iwe'ijubi. Ja̧danö, iwe'iju otiwanö bakweminö 'yo̧bö u̧yu̧ki̧ju junekwemibi jo̧be. Ja̧danö jo̧be ökwödö Jesús iteba'obedöma. Ju'wedö Jesúsnö ösödadökwö bakweminö pjabatakwawö di̧'yobö jojo u̧yu̧ki̧ju junekwi̧danö junekwadösa. Ja̧ma ¿dakwö jö̧ba̧lö jö̧a̧lobeda? Biya̧, chömöledö: Bakwo̧nökwena otiwanö pjabatö ja̧nö, bakwo̧ jelo̧nö pjabatö, bakwo̧ jelo̧nö pjabatö, ja̧danö dö̧jitjö̧ma otiwanö bakweminö dichibakwedösa, do̧'wo̧ luwo̧ma. Ja̧danö tupakwö juluwachibanö 'ya̧nö döda̧peachena, do̧'wo̧ luwo̧ma. Ja̧danö, bakwo̧nökwena ösödanö pjabatakwawanö dotiditjö̧ma, do̧'wo̧ luwo̧ma jemi tupakwö bakweminö dichibakwedösa, jojodönö jwiinö ösödakwawanö.

Efesios 4:4

Chömöledö, ökwödöma bakwaso jojodödasa do̧'wo̧ luwo̧ma. Bakwa'odanö babibinadösa, Jesúsda iteba'obedösa. Ja̧danö, bakwo̧da Dios O̧'wo̧ Luwo̧da tebachibö öjamatinawö̧sa. Ja̧danö, ökwödöma Dios bakwainö jwöinawö̧sa, iteda iyakwa̧ dite'ada̧lobö, iteda yöbawö ujunina, Otiwa jawa chiyocha, jö̧ba̧lö, yöbawö ujuninama. Chömöledö, dite'ada̧lakwa̧ma, bakwöta jawada, Dios iyakwa̧da bakwainö te'ada̧ladösa.

Efesios 5:1

Jo̧kwaobetjö̧ chömöledö, Dios ösödawö̧ i̧tji̧mu bakibinaduwobetjö̧ jo̧badanö ja̧duwi.

Efesios 5:20

Jejenö lo̧bö Diosnö kwösödaduwo ba̧kwȩlö̧jatebö, jwiinö sulabenö baledenabi, otiwanö jenabi. Jesucristoma ökwödö kwuluwo̧duwiobetjö̧, Diosnö kwösödaduwo, Dabe'do ökwönö dösöda, otiwanö pjabato̧ja, jö̧ba̧lö.

Colosenses 1:12

ja̧danö kwo̧'wo̧ ösöwanö ja̧nö Dabe'do Diosnö kwösödaduwakobetjö̧, otiwanö pjabato̧ja jö̧ba̧lö. Jau chömöledö, Dios ömöledöma, mölejȩbe ja̧nö Dios iyi̧tjö tjemakwedö, ¿jö̧tö? Ja̧danö, Dabe'do Diosma ökwödönö ja̧inobe, ja̧ jawa demo jö̧ba̧ladö badibanö.

Colosenses 2:7

Wanedö yötawa chömöledö: Jo̧batjö pokwö kwö̧jaduwobe ichejekwa, jo̧kwajabetjö̧ kwö̧jaduwi̧ bö'diama 'diinö jo̧banö do̧ba̧lö kwöda̧peachaduwo, jo̧banö jwaikwöda ösödö kwö̧jaduwakobetjö̧. Jau chömöledö, jejenö ökwödönö tjöba̧ja̧dinadanö kwö̧jaduwo, ja̧danö jwaikwöda Diosnö ösödö kwö̧jaduwo, otiwanö pjabato̧ja jö̧ba̧lö.

Colosenses 3:17

Jau chömöledö, okobe jwiinö yöka̧laduwi̧ma, Duluwo̧ Jesús jawa i̧sebö yöka̧laduwo, ja̧danö okobe jwiinö ja̧köbaduwi̧ma, Duluwo̧ Jesús jawa i̧sebö ja̧köbaduwo. Ja̧danö, Jesús pjaatinobetjö̧, ba̧kwȩlö̧jatebö Dabe'do Diosnö kwösödaduwo, Otiwanö pjabato̧ja, jö̧ba̧lö.

1 Tesalonicenses 5:18

okobe jwiinö baledi̧ma, Diosnö kwösödaduwo, otiwanö pjabato̧ja jö̧ba̧lö. Jejenö ökwödö Cristo Jesúsnö dötewadö kwö̧jaduwobö ösödo̧ Diosma.

1 Timoteo 2:1

Ja̧danö, Jesúsnö ösödadönö weawa yötawa Timoteo, Jesúsnö ösödadönö weköbobö. Jesúsnö ösödadönö ajayi weti̧ma biya̧, Jesúsnö ösödadöma Diosnö atjebobö jo̧be. Ja̧danö, Jesúsnö ösödadö jwibö tjö̧jenama, Diosnö atjebobö jo̧be iyobö. Ja̧danö, ju'wedö jojodönö atjebobö jo̧be, Dios jobadönö pjaatobö. Ja̧danö, Diosma otiwanö iyinobetjö̧, jo̧banö atjebobö jo̧be, otiwanö pjabatö kwiyajabe jö̧ba̧lö. Ja̧danö, Jesúsnö ösödadöma Diosnö atjebobö jo̧be okobe deinö jojodönö pjaatobö.

1 Timoteo 6:12

Cristonö ösödö dö̧ji̧ma, ölakwabikwawadanö ji̧, döpöjojo ö̧jobetjö̧, ja̧danö otiwanö ölakwabikwawö ja̧wi, ba̧kwȩlö̧jatebö ja̧kwawa kwujuna̧lakobetjö̧. Jau Timoteo, Diosma ökwönö jwöinobe, ba̧kwȩlö̧jatebö ja̧kwawa kwujuna̧lobö, ja̧danö ba̧jekwadö jojodö tjöba a'otjö ja̧nö otiwanö yökawijatö Cristonö kwösödi̧ma.

Hebreos 13:15

Ja̧danö chömöledö, ju'wi Diosnö iyö dumusidi̧ midawama jwiobe. Jesús iteda iyawinada jo̧be. Jejenö ji̧jayonö babe mölema ökwödöma Diosnö diyi̧danö juna̧ladösa, Jesús imidawinobetjö̧. Ja̧danö ¿tajida babe Diosnö diyi̧ma? Biya̧ chömöledö: Babe böjȩnö ja̧nö, Diosnö diyi̧ma jo̧banö ba̧kwȩlö̧jatebö abebö, ösödö, Dios ökwöma jwiinö otiwo̧ja, jwiinö pjabato̧ja, jö̧ba̧lö, dö̧ji̧.

Apocalipsis 7:12

Ja̧danö, Diosnö ösödö yötja̧li̧ cha̧ja̧kwijatö: —Jau, bidö, dewi̧ odo̧ 'dubawadöma jweinö yöba̧ladö Diosnöma. Jau, jö̧tja̧li̧danö Diosma jwiinö otiwo̧. Diosma jwiinö dewinö dejato̧, jwiinö waiso̧, otiwanö pjabato̧. Ja̧danö, jwiinö mikwawo̧obetjö̧ jo̧banö dösödoböma jo̧be. Okobe jwiinö badekwachobö yöbawo̧. Jwiinö juluwo̧ Diosma— jejenö jö̧ba̧lö, ángelesdö mölejȩbe ja̧nö Diosnö ösödö yötja̧li̧ma cha̧ja̧kwijatö.