Ajayinö Isabenö Jo̧ jojodö sulabenö omukwatö ja̧tji̧ öpöjödi̧ma baikwö laebobe: Bakwo̧ma omukwatobe, a̧a̧a̧, ötjöma ju’wedönötjö̧ bajalekwönönö otiwo̧sa, jö̧ba̧lö. Jobekwö omukwato̧nöma jwiinö öpöjödobe Isabenö Jo̧ma. Jemi ikena Isabenö Jo̧ öpöjödi̧ma baikwö laebobe: Omöna yöba̧lo̧nö jwiinö öpöjödobe Isabenö Jo̧ma. Jemi ikena Isabenö Jo̧ öpöjödi̧ma baikwö laebobe: Sulabenö ja̧bö̧kö̧nö kwabö lobo̧nö jwiinö öpöjödobe Isabenö Jo̧ma.
2 Timoteo 3:2 - Dios Iwene2 Jojodöma idödada ösödabikwawö tjö̧jakobe, ja̧danö jwaikwöda balada tjösödakobe, ja̧danö otiwadösa jö̧ba̧lö tjomukwatakobe, ja̧danö ju'wedötjö bajalekwönönöbedösa jö̧ba̧lö tjomukwatakobe. Ja̧danö, ju'wedönö sulabenö yötja̧lakobe, ja̧danö tjabe'dodönö tja̧ja̧kwökakobe, ja̧danö iyawa edö otiwanö iyajabe jö̧ba̧löma tjösödökakobe, ja̧danö Diosnö omukwatökönö sulabenö ja̧bö tjö̧jakobe. အခန်းကိုကြည့်ပါ။ |
2 Timoteo 3:2
43 ပူးပေါင်းရင်းမြစ်များ
—Jobekwö ötjö Diosnö omukwatökönö sulabenö yöa̧li̧tjö̧, baikwö yöta̧lanö Asiria la'aka luwo̧nö: Bakwo̧ o̧tomo'anö towibiya juenama, o̧tomo'a jö̧a̧lenaji̧, –Ötjö o̧tomo'ama ötjönö do̧ba̧lö jubo̧tjö bajalekwönönö juluwo̧sa, –jö̧ba̧lö jö̧a̧lenaji̧? Ja̧danö löawakama, –löbo̧tjö bajalekwönönö mikwakasa, –jö̧ba̧lö yöa̧lenaji̧? Kwöwaisaduwa, ja̧maökö, jö̧tö? Jojoda ö̧sö̧'a kabebo̧ kwabo̧ma, ö̧sö̧'ama la'akatjöda jojodönö kabebö kwaö̧kö̧'a, towitjö otikwö̧'a ö̧sö̧'ama la'akatjöda towitjö otikwöködönö kaebö̧kö̧'a, jö̧tö? Jo̧kwaijayonö, ite Asiria la'aka luwo̧ma, sule chitea ö̧sö̧'adanö ichejekwijayonö, ötjönö omukwatökönö, –Ötjöda juluwo̧sa, –jö̧ba̧lö sulabenö omukwato̧.
Tupakwö yöawinobe ángelma: —Jo̧ba Siria la'aka luwo̧ma iteda ösödi̧danö ja̧akobe. Ja̧danö yöa̧lakobe, ötjöma okobe deinö diosbedötjö bajalekwönönö juluwo̧sa jö̧ba̧lö, ja̧danö jojodö tjöbajale jalaka baibanö Okobe Jwiinö Juluwo̧ Diosnöbi sulabenö yöa̧lakobe, mikwawö̧kö̧, ujulu jwibo̧ jö̧ba̧lö. Ja̧danö jejenö sulabenö ja̧ijayonö, ina iteda ösödi̧danö ja̧obö ja̧kobe, Dios jo̧banö lȩebobö badedö ujunina möle badekwachenanö kabatö, ja̧danö ja̧ mölema, Diosma jo̧banö dameakwö labinö lȩebakobe.
Ju'wibi jo̧bama sulabenö Diosnö yöa̧lakobe, ja̧danö Diosnö ösödadönö sulabenö ja̧akobe, usula tjemawinö. Ja̧danö Dios weina pjiesta jawa möle balewö loobö isakwakobe, ja̧danö Dios jojodönö wei̧bi balewö lobö wainö weobö isakwakobe. Ja̧danö Diosma weakobe, wa̧pötakwa o̧biabi, ju'wi o̧ba ja'öbi Diosnö ösödadönö ujuluwobö.
Ja̧danö jejenö atadajo̧ Jesúsma tupakwö yöawinobe: —Chömöledö, te'ada̧lönö kwö̧jaduwo, jwaikwöda kwemaduwotö jö̧ba̧lö isakwö kwö̧jaduwapji jö̧ba̧lö. Jau chömöledö, ju'wedö tjomukwatena nöinö chujuna̧litjö̧ma otiwanö chö̧jena, jo̧kwaijayonö ja̧maökö. Isabenö ja̧kwawa mikwawi̧ma, nöinö tjujuna̧li̧ jawadamaökö chömöledö— jö̧ba̧lö.
Jo̧kwajabetjö̧ baikwö wetaduwakwö: Kwöpöjojodönö kwösödaduwo, ja̧danö jobadönö otiwanö ja̧köbaduwo. Jojodönö kwitea kwöbalewaduwenama, tupakwö tjetjatakwa̧ omukwatökönö kwöbalewaduwo, tjetjatökötjö̧ma jo̧kwada jö̧ba̧lö. Jau chömöledö, jejenö ja̧bö kwö̧jaduwiökwe, Diosma isabenö otiwanö ökwödönö iyakwo̧ mölejȩbetjö. Ja̧danö, ju'wibi yötawaduwakwö, jejenö ja̧bö kwö̧jaduwitjö̧ma kwi̧sebaduwena, Isabenö okobe jwiinö juluwo̧ Dios i̧tji̧mu otiwadösa, jö̧ba̧lö, Kwabe'doduwi ja̧i̧danö bakwainö ja̧köbaduwobetjö̧. Jau chömöledö, Diosma sulabenö ja̧badönöbi, otiwanö iyaja̧ ösödinö omukwatöködönöbi dösölö̧jinö pjabato̧, jo̧kwajabetjö̧ jo̧ba pjaati̧danö pjakataduwenama, Dios i̧tji̧mu otiwadösa, jö̧ba̧lö kwi̧sekwaduwobe.
¿Kwomukwataduwiji̧? Damötjö jelo̧, Teudas mikwo̧, bena ji̧jetö. Jo̧bama otiwanö ichejekwi̧ yöba̧lö, Ötjöma waiso̧sa, la'aka luwo̧sa, jö̧a̧liawö̧, cuatro cientos jenanö jojodöma, iteda ömöayedö baibanö jo̧bakwö kwebachijadötö. Ja̧danö, ju'wi möle, jelo̧ kwabö lobijetö jo̧banöma. Debö i̧'yajabe okobema, jo̧ba ömöayedöbinadöma jo̧kwada wainökwena babibö kabatibijadötö jo̧ba yöawinama.
Jo̧kwaijayonö, omukwatökönaduwi, Aaa, Dios tjebö loinawö̧nötjö o̧penönö otiwadösa, jö̧ba̧lö. Aaa, otiwadösa, jö̧ba̧lö kwomukwataduwoböma jwia chömöledö. Baikwö wanedö yötawa: Towi bö'diama, towi öjabiyatjö i̧dȩlu̧ emokobe, ¿jö̧tö? Sule towi öjabiyada towi bö'diatjö i̧dȩlu̧ emobe, ¿jö̧tö? Ja̧danö, ökwödöma towi öjabiyadanö ichejekwadöja, towi bö'diadanömaökö. Jo̧kwajabetjö̧, Aaa, otiwadösa, jö̧ka̧laduwoböma jwia chömöledö.
Jau chömöledö, Cristoma okobe deinö pjabatö midawö woinobe, ökwödö jo̧banö ösödadöma, jo̧ba ösödi̧danö ja̧bö dö̧jakobetjö̧. Jau chömöledö, ökwödöda dösödi̧danö ja̧bö dö̧joböma jwiobe, sule dö̧jibobö pjabatö midawö wobina ösödi̧da, midawö wobajo̧ tjebachajina ösödi̧da ja̧bö dö̧jobö jo̧be. Jau chömöledö, jo̧bada ökwödönö ja̧kwawa iyinobetjö̧, jo̧ba ösödi̧da ja̧bö dö̧jaduwo.
Jo̧kwajabetjö̧, ajayinö kwösödinaduwa jawa kakatibaduwo chömöledö. Wanedö yötawa: Sulabenö kwösödaduwi̧bi, sulabenö ja̧köbaduwi̧bi kwabö loköbaduwo chömöledö. Jau chömöledö, kwi̧lȩkwa̧muböködökwö ja̧awabi, ja̧danö sulabenö alewakwawabi, ja̧danö sulabenö 'da̧'da̧akwawa kwösödaduwi̧bi, ja̧danö sulabe jawa kwösödaduwi̧bi, kakatibaduwo chömöledö. Ja̧danö ökwöda kwemotö jö̧ba̧lö ösödakwawabi kakatibaduwo chömöledö, ökwöda kwemotö jö̧ba̧lö ösödakwawama, o̧'wo̧ jawa ösödakwawi̧danö ichejekwobetjö̧.
Ja̧danö, baikwö domukwatobö jo̧be: Dios weina Moisés iwȩyudinama, otiwanö ja̧badönöma weinokobe, sulabenö ja̧köbaduwa jö̧ba̧lö. Dios yöawi̧ a̧ja̧kwökönö sulabenö ja̧badönö weinobe, ja̧danö Diosnö öpöjödadönöbi, Dios weökö jawa ja̧badönöbi, Diosnö öpöjödö Diosnö sulabenö yöba̧ladönöbi, tjabe'donö tjojo'donö kwabö lobadönöbi, ju'wedönö kwabö lobadönöbi,
Jau Timoteo, baikwö wanedö yötawa: Balada ösödakwawama, sulabe bö'diadanö ji̧, ja̧danö balada ösödakwawatjö, nöinö suli̧ pokwobedanö ichejekwa. Ja̧danö, ju'wedö nöinö balada tjujuna̧lobö tjösödobetjö̧, Cristonö ösödö dö̧ji̧tjö 'da̧bachibö tji̧'yajabe, balada tjujuna̧lobö isakwö. Ja̧danö, jejenö 'da̧bachibö tji̧'yajabema, kabatökönö jwiinö o̧'wo̧ tjo̧achadö tjuju̧kwobe.
Jobadö wainö yöbawadöma, Aaa, waisadösa, jö̧ba̧lö tjomukwatijayonö, wajwibadö jobadöma. Ja̧danö, sulabe jawa tjösödoko jö̧tja̧li̧ jawama ösödadö. Baikwö ösödadö jobadö wainö yöbawadöma, ölakwabikwawa jawa ösödadö, ja̧danö jwöjwötjakwawobö ösödadö jojodö yötja̧li̧ma, biya̧ma baikwö jö̧ba̧lö laebobe, baikwö jö̧ba̧lö laebobe jö̧ba̧lö. Jejenö ölakwabikwawö jwöjwötjakwawobetjö̧, ju'wedö isabenö wene wajwibadö, tjomukwati̧ bakwainö sulabenö omukwatadöma ö'wiabinö tjedobe jojodönöma. Ja̧danö, jojodönö jwöjwötjakwawobe, ja̧danö ju'wedönö sulabenö yötja̧lobe. Ja̧danö, jojodö ja̧tji̧ tjedököjayonö, ju'wedönö sulabenö tjomukwatobe sulabenö ja̧badö jö̧ba̧lö. Ja̧danö, kabatökönö ölakwabikwawö jwöjwötjakwawobe jobadö bakwainö sulabeda omukwatadöma. Ja̧danö, ju'wibi tjomukwatobe, Aaa, Diosnö ösödakwawama, nöinö böjȩ jawa juna̧ladö badibobö ji̧, jö̧ba̧lö.
Chö̧ja̧wo̧dö, Dios iwenetjö iteda wei̧ma nöinö laebobe, ökwödö dö̧jobö wei̧ma. Ja̧danö, okobe jwiinö Dios wei̧tjö o̧penönö mikwawi̧ wei̧ma biya̧: Ökwödödada ile nikekwaduwakwawi̧danö kwömöledöduwinö ile nibebö ja̧duwi, jö̧ba̧lö. Isabenö chö̧ja̧wo̧dö, jejenö Dios wei̧ a̧ja̧kwö kwö̧jaduwitjö̧ma otiwanö omukwatö kwö̧jaduwena.
Jo̧kwaijayonö Diosma ökwödönö pjaatobö juluwo̧ ökwödö dösödi̧da omukwatö junibö dö̧jobö. Chö̧ja̧wo̧dö, Diosma ökwödönö pjabatö ujuluwobe ökwödö sulabe dösödi̧ma. Isabenö chö̧ja̧wo̧dö, Dios pjaati̧ma ökwödö sulabenö dösödi̧tjö o̧penönö juluwobe. Jejenöobetjö̧ Dios iwenetjö baikwö laebobe: Diosma, Luwedösa, jö̧ba̧lö, omukwatadönö ölakwabikwawö jo̧. Jo̧kwaijayonö, Jo̧kwadabedösa, jö̧ba̧lö omukwatadönö lȩlö̧jinö pjabato̧. Jejenö laebobe Dios iwenema. Chö̧ja̧wo̧dö, Luwedösa, jö̧ba̧lö, domukwataduwoko. Jejenö omukwatökönö dö̧jiökwe Diosma lȩlö̧jino edö pjaatakwo̧.
Ja̧danö ökwödö te'ada̧lakwawa luwedötjö ina möayedödanö ju̧kwadöma damöbedönö kwa̧ja̧kwaduwo. Ja̧danö, okobe deinö ökwödönö baikwö yötawa, möayedödanö te'ada̧lakwawa luwedönöbi, damö te'ada̧lakwawa luwedönöbi: Te'ada̧lakwawa luwedö kwö̧jaduwijayonö, labinö webökönö bakwo̧nökwena pjabatakwawö kwö̧jaduwo, chömöledö tjömöayo̧danöbo̧sa jö̧ba̧lö. Jau chömöledö, jejenö omukwatö kwö̧jaduwobö jo̧be, Dios iwene baikwö laebobetjö̧: Diosma otiwadösa jö̧ba̧lö omukwatadönö ölakwabikwawö ö̧jobe, jo̧kwaijayonö otiwadösa jö̧ba̧lö omukwatöködönö lȩlö̧jinö pjabato̧, jö̧ba̧lö.
Ja̧danö chömöledö, ida̧ökö i̧sebinadanö isabenö ökwödönö sulabenö yöbawadönö lȩebobö waiso̧. Jau chömöledö, jobadöma sulabenö 'da̧'da̧akwawa ösödö jwaikwöda sulabenö ja̧bö tjuju̧kwobe, ja̧danö Dios wei̧ öpöjödö tjuju̧kwobe, jo̧kwaijayonö Dios lȩebi̧tjö dötjibajökakwedö. Jau chömöledö, damötjö ji̧nadö jojodönö lȩebinadanö, ökwödönö sulabenö yöbawadönöbi ite'ada̧lobö waiso̧ Diosma chömöledö, lȩebakwa̧tjö dötjibapji jö̧ba̧lö. Jau chömöledö, jobadö sulabenö yöbawadöma, tjujuluwököjayonö, Aaa, juluwadösa, jö̧ba̧lö omukwatö, yebabökönö sulabenö yöba̧ladö ángelesdö juluwadönöma, idö ángelesdöma sulabedö jö̧ba̧lö.
Jau chömöledö, jobadö sulabenö yöbawadöma tebonö ju̧kwadö omukwatöködödanö tjichejekwobe. Jau chömöledö, tebonö ju̧kwadöma, omukwatöködö, idöda la'akatjöda a̧dekwanö tjöwaisi̧ jawada ja̧badö, ¿jö̧tö? Ja̧danö, jobadö tebonö ju̧kwadöma, ju'wi jaye ja̧tjoböma bötjachibinöködö, sule 'daliwanö tjö̧lajibobö bötjachibinadö, ja̧danö jelo̧ kwabö loobö bötjachibinadö, ¿jö̧tö? Jobadö sulabenö yöbawadöbi ja̧danö chömöledö, okobe jwiinö wajwitji̧ jawama, omukwatökönö sulabenö yöba̧ladö. Ja̧danö tebonö ju̧kwadönö söbebö lotji̧danö, Diosma jobadönö söbebö loakobe.
Ja̧danö ju'wibi yötawa jobadö tjo̧'wo̧ jwibadö sulabenö yöbawadönö chömöledö. Jobadöma labinö waisadösa yöba̧lö, iya̧nö Dios iwene a̧ja̧kwö sulabenö ja̧bö ja̧kwawatjö ji̧bajadönö yötjawobe, böjȩ jojodö sulabenö tjösödi̧ma otiwa jö̧ba̧lö, ja̧danö jobadönö ötjibobedanö ichejekwa, 'daliwanö tjö̧libobö. Jejenö sulabenö ötjibobe jojodönö chömöledö, jo̧kwajabetjö̧ Diosma isabenö jobadönö lȩebakobe.
Jobadö sulabenö yöbawadönö baikwö yöta̧la: Diosnö sulabenö yöba̧ladö, ja̧danö ju'wibi jojodönö tjo̧'wo̧ sulinö yöba̧ladö, ja̧danö ju'wibi idöda sulabenö tjösödi̧ jawa isakwö ju̧kwadö, ja̧danö ju'wibi otiwo̧sa jö̧ba̧lö labinö yöba̧ladö, ja̧danö ju'wibi idöda tjemotö jö̧ba̧lö jojodö tjösödachibanö yöba̧ladö.
Ikenama, ojwe okwatjö sulabo̧ laebobe chedijatö. Jo̧bama uubiya jö̧kwe, jelemutjö doyulatajanö. Ja̧danö, ö'yekiyabi jö̧kwe, domulataja jawa ökiya. Ja̧danö, jo̧bama, bakwakakwena butjawa ökiya butjawo̧, la'aka luwo̧ ubutjawi̧danö butjawa ökiyama. Ja̧danö, uubiya bakwayukwena imibiya sulabenö wȩyukwo̧, Diosnöda ötjabi imibiya, Ötjöda Diossa, jö̧ba̧lö, imi wȩyukwo̧.
Ja̧danö, inawiyadanö ji̧, öwiyawi̧ ömöki̧ öwiya, labinö mölejȩbetjö tjoduwobe chedijatö, yelösöda, ömöki̧ öwiya. Bakwawama jojo ömöki̧danö ömöki̧ öwiya. Jejenö jwiinö inia tjötjinö balediawö̧ jobe ju̧kwadöma Diosnö jwiinö tjölabobe, Sulabo̧, jö̧ba̧lö, chedijatö. Döpöjödökwe, jwiinö yeabikwa jawa ja̧bo̧, ökwödönöma, jö̧ba̧lö, tjölabobe chedijatö.
Ja̧danö, tubinö, dejatinö ujuwawö̧ma, tjomukwati̧ tjöbalewacho jö̧tja̧li̧jayonö tjomukwati̧ balewachöködönöda chedijatö, Diosnö sulabenö yöba̧lö. Dios lȩebi̧ edö, ¡Ayö! Diosma jwiinö juluwo̧, jo̧banö domukwati̧ döbalewacho, jö̧ba̧lö, tjomukwati̧ tjöbalewacho jö̧tja̧lijayonö tjomukwati̧ma balewachökönö ina Diosnö öpöjödö, Sulabo̧, döpöjödonö, sulabenö inia tjödinö webo̧, jö̧ba̧lö, tjöpöjödobe chedijatö.
ကြော်ငြာတွေ