2 Timoteo 1:7 - Dios Iwene

⁷ Jau Timoteo, Diosma iteda O̧'wo̧ Luwo̧nö iyinobe ökwödönö, ja̧danö jo̧ba Dios iyinökwema yedaboböma pjabatö̧kö̧, ju'wida pjabato̧ jo̧bama. Jau Timoteo, Dios O̧'wo̧ Luwo̧ma dujuluwachibanö dö̧jobö pjabato̧, ja̧danö ösödabikwawö dö̧jobö pjabato̧, ja̧danö jweinö omukwatö dö̧jobö pjabato̧ Dios O̧'wo̧ Luwo̧ma. Ja̧danö, jejenö pjabato̧obetjö̧, jwaikwöda ja̧bö kwö̧jo Dios ja̧bö kwö̧jobö iyinama Timoteo.

2 Timoteo 1:7 ပူးပေါင်းရင်းမြစ်များ

Proverbios 2:7

Ja̧danö, Isabenö Jo̧ma otiwanö omukwatö, jweinö yöba̧lö ju̧kwadönöma jwebebö yöbawö öbibo̧, jweinö omukwatö tjö̧jobö. Ja̧danö, otiwanö ja̧bö ju̧kwadönö tjöbeba̧lönö te'ada̧lo̧ Isabenö Jo̧ma.

Proverbios 8:14

Ju'wibi yöbawuju, isudada: —Ötjö, jweinö omukwatö ja̧kwawa wanekwachujuma jojodönö pjabatö jwebebö yöbawujusa. Ja̧danö, ötjöma jojodönö jweinö omukwatö otiwanö tjö̧jobö öbibujusa. Ja̧danö, ötjöma di̧ya sulojobö jö̧ba̧lö, di̧ya otiwojobö jö̧ba̧lö waisujusa. Ja̧danö, jwiinö juluwujusa ötjöma— yöbawuju jweinö omukwatö ja̧kwawa wanekwachujuma isudada.

Isaías 11:2

Jau, Isai itji̧ David itji̧ tupadanö jojoma yemidanö israel la'aka luwo̧ ö̧jakobe, ja̧danö Isabenö Jo̧ O̧'wo Luwo̧ma isabenö jo̧bakwö ö̧jakwo̧. Ja̧danö, Dios O̧'wo Luwo̧ jo̧bakwö ja̧nö, okwa jawa waisanö omukwatobö pjaatakobe, ja̧danö otiwanö otidakwa̧ yöbawö, inesö ujulu jo̧banö iyakobe, ja̧danö otiwanö Isabenö Jo̧nö öwaisobö pjaatakobe, otiwanö yebabinö Isabenö Jo̧nö ösödakobetjö̧.

Lucas 10:19

Jau chömöledö isabenö otiwanö chujulu chiyajabe ökwödönö, sulabedönö kwujuluwaduwobö, ja̧danö jejenö chiyobetjö̧, wene jwiinö a̧ko̧'dö̧nö ja̧tadöja, ja̧danö itiyunö ja̧tadöja, ja̧danö inesö kwöpöjojobi ujuluwököwö̧ja. Jau chömöledö, ökwödönö chujulu chiyobetjö̧, bakwo̧bi ökwödönö suli̧ öwaedoböma deobe, ja̧danö jejenö ökwödönö chiyi̧ma isabenö otiwobe chömöledö.

Lucas 15:17

Ja̧danö, jejenö a̧wi̧chi̧ lö̧jökwe ja̧nö, bajalianö jweinö omukwatinobe, ja̧danö jö̧a̧linobe itedada: Chabe'do ömöayedöma otiwanö tju̧kwa juna̧ladö, jobadöma u̧'yu̧kwibi̧nö kwadö, ja̧danö chabe'do ömöayedö otiwanö tjukwonö, ötjöma bai ja̧nö a̧wi̧chi̧tjö wotena.

Lucas 24:49

Ja̧danö chömöledö, Chabe'do yöbawö ujuninadanö Dios O̧'wo̧ Luwo̧nö ökwödönö tebachibö öjamatobö wetakobe. Jo̧kwajabetjö̧ jo̧banö wetenanö kabatö, Jerusalénnö ja̧nö Dios O̧'wo̧ Luwo̧ ichakwa̧ te'ada̧lö kwö̧jaduwo. Ja̧danö, Dios O̧'wo̧ Luwo̧ ökwödönö tebachibö öjamataja̧ ikena, Dios ujulu kwujuna̧laduwakwedöja, otiwanö kwedinaduwa jawa böjȩ bakwameachibanö yökawaduwakobetjö̧— jö̧ba̧lö yöawinobe Jesúsma.

Lucas 8:35

Yötjawiawö̧, edö tjichinobe jojodöma, ja̧danö Jesús ö̧jobe ichibö tjedinobe ajayinö o̧'wo̧ luwo̧nö sulabedö tjö̧jajökwenö. Ajayinö o̧'wo̧ luwo̧nö sulabedö tjö̧jajökwe o̧'wo̧ jwibö, kamijido̧ jwibö ö̧jinajayonö, o̧'wo̧ luwo̧nö sulabedö debo̧, otiwanö omukwato̧nö tjedinobe, ja̧danö kamijido̧ 'dubawo̧, Jesús öba a'o bo̧nö tjedinobe. Jejenö edö, jojodö yetjaibinobe, bite Jesúsma tijö jö̧ba̧lö.

Juan 14:27

Chi̧'yajabe okobema kwo̧'wo̧duwi ösöwanö kwö̧jaduwobö pjatatakwo̧sa. Jejenö pjatati̧ma kwo̧'wo̧duwi ösöwanö kwö̧jaduwobö pjatati̧, böjȩ jawamaökö. Tjo̧'wo̧ luwo̧ okwa jawa, ba̧kwȩlö̧jatebö ji̧ jawama. Chöba̧ja̧di̧ waisachadö, kwo̧'wo̧duwi tjo̧kekwaduwa, ja̧danö yekabiduwa.

Hechos 1:8

Jo̧kwaijayonö biya̧da, kwöwaisaduwobö yötawa. Ökwödöma Dios ujulu kwujuna̧laduwakobe, Dios O̧'wo̧ Luwo̧ ökwödö kwo̧'wo̧ luwo̧duwinö tebachibö öjamataja̧ ikena. Ja̧danö, ötjö yötawina wenema otiwanö yökawaduwakwedöja. Bemi Jerusalénnöbi, ju'wi okobe jwiinö Judea nijinöbi, Samaria nijinöbi yökawaduwakwedöja. Jelobe jelobebi böjȩ bakwameachibanö yökawaduwakwedöja— jö̧ba̧lijetö Jesúsma öba̧ja̧di̧ waisachadönöma.

Hechos 10:38

Ja̧danö, kwöwaisaduwa Diosma webijetö iteda O̧'wo̧ Luwo̧nö Jesús, Nazaretnö da̧peachinakwö ö̧jobö. Ujulubi iyijetö Diosma Jesúsnöma. Ja̧danö, Diosma Jesúskwö ö̧jobetjö̧, Jesúsma okobe jwiinö i̧'yobema otiwanö pjabatö 'yi̧jetö. Otiwanö otidiabijetö okobe deinö Awetja sulabenö ja̧inawö̧nöma, Diosma jo̧bakwö ö̧jobetjö̧.

Hechos 20:24

Jau chömöledö, usula chemawena Jerusalénbe chȩwa̧jobema. Yayonö Jerusalénbe chȩwa̧jocha. Jejenö Jerusaléntjö usula chemawitjö̧ma usula chemawena. Isabenö yöta̧la. Ötjöma böjȩnö chö̧ji̧ wame jawama ba̧wa̧lö̧jinö edökösa. Ja̧ jawa mikwawökö chömöledö. Biya̧da ba̧wa̧lö̧jinö edo̧sa chömöledö: Otiwa wene yötawoböda ba̧wa̧lö̧jökwesa. Dios jojodönö lȩlö̧jino edö tjö̧jibinö pjaatinobe, jö̧ba̧lö, yötawoböda ba̧wa̧lö̧jökwesa chömöledö. Jejenö Duluwo̧ Jesúsma ötjö yötawoböda weijatö. Jo̧kwaobetjö̧ jo̧ba yötawobö weinama ¿dakwö yötawököjö? Yöbawo̧sa chömöledö. Ötjöma wotenanö baibanö yötawocha Dios weinama— yöbawijetö Pabloma.

Hechos 21:13

Jejenö lȩdeabijayonö Pabloma jö̧a̧lijatö: —Kwubudekwabiduwatjö chömöledö. Jejenö kwubudekwabiduwobema jwiinö cho̧'wo̧ tjo̧tekwobe. Ötjöma Duluwo̧ Jesús ja̧ina yötawobetjö̧ jobetjö Jerusalénbetjö ötjönö do̧tjatitjö̧ma wainö do̧tjatakwo̧sa. Jesús ja̧ina yötawobetjö̧ kwabö lotjitjö̧bi wainö kwabö lotjakwo̧sa. Jejenö ötjönö baleditjö̧ma ötjöma, Jau kwatjö̧ma, do̧tjatena, kwabö lotjena, jö̧ba̧lo̧sa— jö̧a̧lijatö Pabloma.

Hechos 26:11

Okobe jwiinö judío jojodö yötjaweju okwa tebachö jobadönö kwakwachijatö, bakwo̧nökwena yötjawibobö, Jesúsnö chöpöjöda, jö̧ba̧lö. Jwiinö labinö 'yi̧achijatö jelobebi, jelobebi, ju'wedö tjitebobi, Jesúsnö ösödadö inia tjötjinö ja̧totö jö̧ba̧lö—jö̧ba̧lijetö Pabloma.

Hechos 26:25

Jejenö jö̧a̧liökwe Pabloma: —Ja̧maökö chuluwo̧ Festo. Cho̧'wo̧ jwibö̧kö̧sa. Jweinö yötawa, isabenö wenema.

Hechos 6:8

Esteban mikwo̧ma Dios pjaatinökwe. Jo̧bama Dios ujulu i̧sebö ji̧abijetö. Ja̧danö, jo̧bama jojodö tjeda̧lonö edajitjökö jawabi i̧sebö ji̧abijetö.

Hechos 9:22

Ja̧danö, ja̧ möletjö tupakwö 'ya̧nö Sauloma ajayinö yöawinatjö o̧penönö juluwachibö yöbawijetö. Damasconö ju̧kwadö judío jojodönö jweinö yöbawijetö, Dios jojodönö tjö̧jibinö pjaatobö yöbawö ujuninökwema, Jesúsda, jö̧ba̧lö. Jweinö yöawawö̧ jobadöma atadakwawa jwiinö ba̧jijadötö.

Romanos 5:5

Jau chömöledö, Diosma isabenö ökwödönö pjabato̧. Diosma öwaetjöda i̧sebinobe ökwödönö ile niebi̧ma chömöledö. Otiwa jawa mikwa jwiinö iyö, iteda o̧'wo̧ luwo̧nö iyinobe, ökwödö do̧'wo̧ luwo̧nö ö̧jobö. Ja̧danö, do̧'wo̧ luwo̧nö ja̧nö Dios ökwödönö ile niebi̧ma öba̧ja̧dobe ökwödönöma, Dios O̧'wo̧ Luwo̧ma chömöledö.

Romanos 8:15

Jau chömöledö, isabenö Dios i̧tji̧mubedösa babema. Baikwö yötawa: Ajayinöma, suli̧ ömöayedödanö dö̧jinobe, ¿jö̧tö? Ja̧danö, suli̧ ömöayedödanö ja̧nö, yedabinobe, ¿jö̧tö? Jo̧kwaijayonö, yedaboböma jwiobe yelösöda babema. Jau chömöledö, Diosma weinobe iteda O̧'wo̧ Luwo̧nö, ökwödö do̧'wo̧ luwo̧nö ö̧jobö. Ja̧danö, jo̧ba Dios O̧'wo̧ Luwo̧ma, Diosda i̧tji̧mu badibobö ja̧inobe. Ja̧danö, Dios i̧tji̧mu badibobö ja̧inobetjö̧, babema yebabökönö adebena Dabe'do Diosnö, Chabe'dowe jö̧ba̧lö.

1 Corintios 2:4

Ja̧danö, ökwödönö chöba̧ja̧dena, ja̧danö ökwödönö yötawenama, böjȩ jojodö waisanö yötjawi̧danöma böjȩ jawa waisakwawa ji̧ jawa yötawijökötö. Wainö yötawijatö, öwaetjöda Dios O̧'wo̧ Luwo̧ ujulu i̧sebö yötawijatö.

Gálatas 5:22

Jo̧kwaijayonö Dios O̧'wo̧ Luwo̧ do̧'wo̧ luwo̧nö otidi̧ma wainö ji̧ chömöledö. Baikwö yötawa: Dios O̧'wo̧ Luwo̧ otidi̧ma chömöledö, biya̧: ösödabikwawi̧bi, tjo̧'wo̧ ösöwi̧bi, tjo̧'wo̧ luwo̧nö wene jwiinö ja̧kwawabi, tjo̧'wo̧ 'dibachibö ja̧kwawabi, jojodönö dösölö̧jinö ja̧danö otiwanö ja̧awabi, jö̧tja̧li̧danö ja̧awabi,

Colosenses 1:8

Ja̧danö jo̧bada ichö ökwödönö yöawinobe Dios O̧'wo̧ Luwo̧ pjaatawö̧ Colose jojodöma ösödabikwawö ju̧kwadötö jö̧ba̧lö.

Hebreos 2:15

Ja̧danö chömöledö, Jesús midawö woenama ökwödönö Awetjatjö 'döbebö pjaatinobe, ba̧kwȩlö̧jatebö Diostjö 'da̧bachibö woawatjö dö̧jibinö. Chömöledö, ökwödöma okobe jwiinö dö̧ji̧ma yebabinöda ji̧abinadösa, wodakwa̧ omukwatö. Ja̧ yedabi̧tjö dö̧jibobö yelösöda jwiinobe. Jejenö yebabinö dö̧jobetjö̧ Awetja ka̧lenasonö yö̧bebö ujuninawö̧da ji̧nadösa chömöledö. Jo̧kwaijayonö Jesúsma, ökwödö dumusidi̧ midawö woena Awetjanö ujuluwinobe, ökwödö jo̧batjö dö̧jibinö pjabatö. Ja̧danö, babema yebabökönöda ju̧kwadösa chömöledö, Jesúsma Awetjanö ujuluwinobetjö̧.

1 Pedro 1:22

Ja̧danö chömöledö, ökwödöma ida̧ökö isabenö wene ösödö kwidichawinaduwobetjö̧, kwömöledöduwi Jesúsnö ösödadönö ösödadöja, yöne dömöledö jö̧ba̧lö. Jo̧kwajabetjö̧ jwaikwöda tupakwönönö ösödabikwawö kwö̧jaduwo chömöledö,

1 Juan 4:18

Chö̧ja̧wo̧dö, jejenö Dioskwö bakobe dötewinö 'ya̧nö, jo̧ba ösödi̧danö dö̧ja̧wo̧dökwö ösödabikwawö dö̧jobetjö̧ Dios ile niebi̧ma waisadösa. Jejenö waisö Dios lȩekwa yöawakwa̧ möle omukwatö yebaböködösa. Jo̧kwaijayonö bakwo̧ Dioskwö dötewinö 'yö̧kö̧, ja̧danö ö̧ja̧wo̧dönö ösödökönö jo̧ma ina wajwibo̧ Dios ile niebi̧ma. Ina Dios jo̧ba ö̧jobö ösödi̧ma wajwibo̧. Jo̧bama Dios ile niebi̧ öwaisokobetjö̧ ina Dios lȩekwa yöawakwa̧ möle omukwatö yelösöda yebabo̧, Lȩebakwo̧sa, jö̧ba̧lö.