2 Tesalonicenses 3:4 - Dios Iwene

⁴ Ja̧danö, Duluwo̧nö do̧'wo̧ döwana̧lobe, isabenö ökwödö Tesalónicanö ju̧kwadönö pjabato̧ jö̧ba̧lö, wedina jawa ja̧bö kwö̧jaduwobö. Ja̧danö, tupakwöbi jejenö pjaatakwo̧ jö̧ba̧lö Duluwo̧nö do̧'wo̧ döwana̧lobe chömöledö.

2 Tesalonicenses 3:4 ပူးပေါင်းရင်းမြစ်များ

Mateo 28:20

Ja̧danö, jobadö 'yabayedö chöba̧ja̧di̧ waisachadönö ba̧ja̧daduwi, okobe jwiinö ökwödönö wetinama, jobadöbi ja̧bö tjö̧jakobetjö̧. Ja̧danö chömöledö, isabenö ökwödökwö chö̧jakwo̧sa, böjȩ 'dö̧ibenanö kabatö— jö̧ba̧lö weinobe Jesúsma.

Romanos 15:14

Chömöledö, chedemi kwömöledöduwinö ida̧ökö otiwanö ösödadöja, ja̧danö chedemi ida̧ökö waisadöja ökwödönö yötawaja̧ma. Ja̧danö, chedemi ida̧ökö waisadöja biya̧ jawa ju'wedönöbi yökawaduwo jö̧ba̧lö.

Romanos 15:18

Jau chömöledö, tabada̧lökönö yötawa ötjö chotidinama, jo̧kwaijayonö ötjöda chotidinamaökö, Cristo ötjönötjö otidinada yötawa chömöledö. Judío jojodöböködönö yöbawöbi, i̧seböbi yötawijatö Dios iwene, jobadöbi Dios wei̧ ja̧tjo jö̧ba̧lö.

Romanos 2:7

Bakwainö otiwanö ja̧badönöma, jwaikwöda Dios ösödi̧da ja̧badönöma, ba̧kwȩlö̧jatebö ja̧kwawa iyakwo̧ Diosma. Jobadöma jwaikwöda Dios ösödi̧ jawada ja̧badö, Diosma jobadönö jö̧a̧lakobetjö̧, Bidöma otiwadö, suli̧ jwibadö, jö̧ba̧lö. Ja̧danö, Dios ösödi̧ jawada ja̧bö ba̧kwȩlö̧jatebö ja̧kwawa isakwadö jobadöma. Ja̧danö, Dios ösödi̧ jawa ja̧bö ba̧kwȩlö̧jatebö ja̧kwawa tjisakwobetjö̧, ja̧da iyakobe Diosma, jwaikwöda tjisakwobetjö̧.

1 Corintios 14:37

Ja̧danö, baikwö yötawaduwakwö chömöledö, ökwödötjö bakwo̧ Aaa, Dios yöawi̧ yöbawo̧sa̧ jö̧ba̧lö omukwatitjö̧ma, ja̧danö Aaa, ju'wi ja̧bö chö̧jo jö̧ba̧lö Dios iyinökwesa jö̧ba̧lö omukwatitjö̧ma, chiwȩyudaja̧ a̧ja̧kwö ösödo jö̧a̧lobe chömöledö, isabenö Duluwo̧ wei̧ jö̧ba̧lö.

1 Corintios 7:19

Jau chömöledö, bakwo̧ ötade bajalesado̧ 'wibekwo̧ ö̧jitjö̧böbi, 'wibekwö̧kö̧ ö̧jitjö̧böbi, bakweminö 'ya̧, tjötade bajalesado̧ 'wibekwö loawama mikwawokobetjö̧. Jau chömöledö, Dios wei̧ a̧ja̧kwö ja̧awada mikwawi̧ma, tjötade bajalesado̧ 'wiekwamaökö.

2 Corintios 2:3

Jau chömöledö, ökwödönö yötawo jö̧ta̧linama, kwialu wȩyudö wetijatö, ökwödökwö ja̧nö cho̧'wo̧ tjo̧achapji jö̧ba̧lö. Jau chömöledö, ökwödöma chösödawö̧ chömöledöja, ja̧danö ökwödönö chedenama, cho̧'wo̧ ösöwachibobö jo̧be, ¿jö̧tö? Jo̧kwaijayonö juluwanö ökwödönö edö chi̧'yinatjö̧ma, ökwödönö jwetebobetjö̧ bakobe do̧'wo̧ tjo̧acho jö̧a̧linena chömöledö, ja̧danö jejenö omukwatö, ökwödönö jwebebö kwialu wetijatö. Jau chömöledö, ökwödönö chöwaisa, yötawi̧ ösödadöja jö̧ba̧lö, ja̧danö jejenö omukwatö jwebebö chiwȩyudijatö, ja̧ edinö jwekekwaduwobö. Jau chömöledö, dediakwawakwa̧ abönö jejenö jwekekwaduwitjö̧ma, dediakwawenama do̧'wo̧ tjo̧achobö jwiakobe. Ja̧danö jobekwö chomukwatobetjö̧ kwialuda wȩyudö wetijatö, dediakwawenama jwaikwöda do̧'wo̧ ösödachibanö dö̧jakobetjö̧.

2 Corintios 2:9

Jau chömöledö, belö ökwödönö wȩyudö wetijatö, jo̧ba sulabenö ja̧binanö lȩkebaduwobö. Jejenö chiwȩyudenama, weti̧ kwa̧ja̧kwaduwojobö jö̧ba̧lö chiwȩyudijatö, okobe jwiinö weti̧ a̧ja̧kwö ja̧köbaduwojobö jö̧ba̧lö, ja̧danö otiwanö weti̧ a̧ja̧kwö ja̧köbinaduwobe chömöledö.

2 Corintios 8:22

Ja̧danö chömöledö, Titobi, jelo̧ yöta̧lajökwekwö kwiteboduwibe i̧'yakobe, kwiyaduwakwa̧ balada jawa pjabatö, ja̧danö jelo̧nöbi wedakobe jobadökwö i̧'yobö chömöledö, döjawo̧ Jesúsnö ösödo̧nö. Jo̧banö döwaisa, isabenö Dios wei̧ otidobö ösödo̧ chömöledö, ba̧kwȩlö̧jatebö jejenö ösödi̧ i̧sebiainobetjö̧. Jo̧bama ökwödönö a̧ja̧kwinobe, Corintio jojodöma tjömöledö Jerusalénnö ju̧kwadönö pjatjatobö ösödadö jö̧ba̧lö. Jejenö a̧ja̧kwö, o̧'wo̧ ösöwachibanö a̧ja̧kwinobe, ja̧danö ajayinö ösödinatjö bajalekwönönö, nöinö ja̧ pjaatobö ösödobe, Corintio jojodöbi otiwanö pjabatadö jö̧ba̧lö.

Gálatas 5:10

Jo̧kwaijayonö, ötjöma Duluwo̧nö cho̧'wo̧ wana̧lö chö̧jobe chömöledö, isabenö ökwödönö pjaatakwo̧ ötjö chomukwati̧danö ökwödöbi kwomukwataduwo jö̧ba̧lö, ja̧danö ökwödönö suli̧ waedö sulabenö yöbawo̧nö lȩebakwo̧ jö̧ba̧lö.

Filipenses 1:6

Jau chömöledö, Diosda ökwödönö otiwa jawa kwo̧'wo̧ luwo̧duwi jawa jamatö otidinama, ¿jö̧tö? Ja̧danö chöwaisa, jamatö otidina jawama, Diosma okobe jwiinö otidö kaatakobe jö̧ba̧lö. Ja̧danö, Jesucristo yemidanö ichakwa̧ möle baibenama ja̧ okobe jwiinö kwo̧'wo̧ luwo̧duwinö otidi̧ma kaatakwawakobe chömöledö.

Filipenses 2:12

Jo̧kwajabetjö̧ ökwödönö yötawaja̧danö ja̧bö kwö̧jaduwo chösödawö̧ chömöledö. Isabenö belö ökwödökwö chö̧jayima, ötjö yötawi̧danö ja̧bö kwö̧jinaduwobe chömöledö, ja̧danö ja̧tjö bajalekwönönö babe jelobetjö wȩyudö yötawi̧ ja̧bö kwö̧jaduwo chömöledö. Ja̧danö, Diosnö otiwanö yebabinö ösödö, jwaikwöda Duluwo̧ Dios wei̧ ja̧bö kwö̧jaduwo, Dios kwö̧jibaduwinö ja̧ina kwi̧sebaduwakobetjö̧.

2 Tesalonicenses 3:12

Jejenö ja̧bö ju̧kwadönö Duluwo̧ Jesucristo iminö baikwö ba̧ja̧dö wedobe ökwödönö chömöledö: 'Wi̧inö ja̧nö, idöda tjotidawa otidö tjö̧jo jö̧ba̧lö, böjȩnö ja̧nö tjukwakwa̧ kwakwawama idöda otidö tjemobö.

2 Tesalonicenses 3:6

Chömöledö, ökwödö Jesúsnö ösödadötjö ju'wedö tjuju̧kwobe, döba̧ja̧dina a̧ja̧kwökönö 'dö̧wekwachibö ju̧kwadöma. Duluwo̧ Jesucristo iminö wedaduwakwö, okobe deinö jejenö ja̧bö ju̧kwadö Jesúsnö ösödadötjö 'da̧bachibö kwö̧jaduwo jö̧ba̧lö.

Filemón 1:21

Ökwönö chöwaisökweja Filemón, isabenö atebi̧danö otiwanö ja̧bo̧ja jö̧ba̧lö, ja̧danö jejenö chöwaisobetjö̧ ökwönö chiwȩyudajabe, isabenö Filemónma atebaja̧danö otiwanö ja̧akwo̧ jö̧ba̧lö, ja̧danö isabenö atebaja̧tjö bajalekwönönöbi otiwanö ja̧akwo̧ jö̧ba̧lö.