2 Tesalonicenses 2:8 - Dios Iwene

⁸ Jemi ikenama inesö sulabo̧ Awetja ömöayo̧ma ichibakobe chömöledö, jo̧kwaijayonö Duluwo̧ Jesús ichenama, yöba̧löda jo̧banö kwabö loakwo̧, ja̧danö dejatinö ujulunö jo̧banö söbebö loakwo̧.

2 Tesalonicenses 2:8 ပူးပေါင်းရင်းမြစ်များ

2 Samuel 23:7

Ja̧danö jakajaye baledi̧danö baledakobe jobadö sulabedönö. Sȩaka juwö loakwo̧ma, 'dii jawatjö otikwa jawanö, palapinöö̧kö̧, otokwötenöö̧kö̧ sobö pukwebö, sȩaka ubinö juwö lobo̧, ja̧danö jejenö juwö loi̧danö, Diosma söbebö lobö lȩebakobe sulabedönö, —jö̧ba̧lö iwȩyudinobe Davidma, bajaleapo i̧wȩyudinama.

Diosnö ösödo̧ Job mikwo̧ usula emawina jawa 4:9

Jau Job, sulabenö ja̧tji̧ökwe, Dios lȩebi̧tjö debö tji̧'yakwedö, jobadönö ödameakwobetjö̧, debö tji̧'yinö söbebö lobo̧ Diosma, jö̧tö? Ja̧danö ökwönö baledi̧ma, ja̧dajiobe Job.

Isaías 11:4

Jo̧ba lȩebakwa̧ma, jojodönö wainökwena edöma lȩebökakwo̧, jweinö Dios wei̧danö lȩebakwo̧. Jweinö bakweminö lȩekwa yöawakwo̧, jwibadöbi, ju'wedö sulabenö ja̧tja̧jawö̧bi öba a'o tjichibenama, mikwawöködö jö̧ba̧löma öpöjödökakwo̧, jojodönö bakweminö edö, isabenö lȩekwa yöawo jö̧a̧li̧danö lȩebakwo̧. Isabenö otiwanö lȩebakwo sulabedönöma, jweinö lȩekwa yöbawö, sulabenö ja̧badönö kwabö lotjobö weakwo̧, debö tji̧'yakobetjö̧.

Isaías 30:28

O̧'wo emapjoma, ojwe okwatibö söbebö loödödanö ichejekwapjo, tjulume'a ichibanö da̧kwinö okwatibödöma, ja̧danö tjitebotenia jojodö döpöjojodönö ujuluwakwo̧. Jobadönö juluwö, chabö loakobobe tjitebotenia jojodönö, jwiinö söbebö loawaka chabö loawakanö. Ja̧danö kabayudö jweba̧laka tjaanö anö, jobadönö öbibö, söbebö loawemibe öibakwo̧.

Daniel 11:36

Tupakwö yöawinobe ángelma: —Jo̧ba Siria la'aka luwo̧ma iteda ösödi̧danö ja̧akobe. Ja̧danö yöa̧lakobe, ötjöma okobe deinö diosbedötjö bajalekwönönö juluwo̧sa jö̧ba̧lö, ja̧danö jojodö tjöbajale jalaka baibanö Okobe Jwiinö Juluwo̧ Diosnöbi sulabenö yöa̧lakobe, mikwawö̧kö̧, ujulu jwibo̧ jö̧ba̧lö. Ja̧danö jejenö sulabenö ja̧ijayonö, ina iteda ösödi̧danö ja̧obö ja̧kobe, Dios jo̧banö lȩebobö badedö ujunina möle badekwachenanö kabatö, ja̧danö ja̧ mölema, Diosma jo̧banö dameakwö labinö lȩebakobe.

Daniel 7:25

Ju'wibi jo̧bama sulabenö Diosnö yöa̧lakobe, ja̧danö Diosnö ösödadönö sulabenö ja̧akobe, usula tjemawinö. Ja̧danö Dios weina pjiesta jawa möle balewö loobö isakwakobe, ja̧danö Dios jojodönö wei̧bi balewö lobö wainö weobö isakwakobe. Ja̧danö Diosma weakobe, wa̧pötakwa o̧biabi, ju'wi o̧ba ja'öbi Diosnö ösödadönö ujuluwobö.

Daniel 7:26

Jo̧kwaijayonö bajalianö Diosma lȩekwa yöawobö öbamatakobe, ja̧danö lȩekwa yöbawö, jo̧ba ujulu 'döebakobe, ja̧danö jo̧banö jwiinö söbebö loakobe.

Daniel 8:25

Jo̧bama waisanö omukwatö, ba̧jekwadönö omöna yöa̧lakobe, ja̧danö jejenö, ujulu nöamachibanö ja̧akobe, ja̧danö isabenö ju'wedötjö bajalekwönönö juluwo̧sa jö̧ba̧lö omukwatakobe. Jojodö tjo̧'wo̧ söba̧lö, bitekwö wene jwibadösa jö̧ba̧lö tjö̧jemi ja'ötjö, juluwanö jobadönö söbebö loakobe. Ja̧danö, jojodönö ujuluwi̧danö, inesö la'aka luwo̧ Dios ujulutjö ö̧jibobö isakwakobe, Diosdanö juluwo̧sa jö̧ba̧lö. Jo̧kwaijayonö, Diosma jo̧banö söbebö loakobe, ja̧danö jejenö söbebö loenama, böjȩ jojodö jo̧banö kwabö lotjökakobe, Diosda jo̧banö söbebö loakobe.

Mateo 13:19

—Ödebiya mananö meaja̧ ödebiya badekwachi̧ma, Dios la'aka luwo̧ ö̧jakwa̧ wene tja̧ja̧kwijayonö otiwanö a̧ja̧kwöködönö badekwachobe. Ja̧ wene tja̧ja̧kwenama, inesö sulabo̧ma ichö ja̧ wene jobadötjö 'döebobedanö ichejekwa, tjomajadenö pokwapji jö̧ba̧lö.

Mateo 13:38

Ja̧danö, öbatjo badekwachi̧ma, böjȩ badekwachobe, ja̧danö otiwade ödebiya badekwachi̧ma, webö yöbawo̧ Dios ömöledönö badekwachobe. Ja̧danö, sula'wo jawasa'ye badekwachi̧ma, inesö sulabo̧ Awetja ömöledönö badekwachobe,

Mateo 16:27

Jau chömöledö, ötjö jojo baibanö jeminökwema, Chabe'do Dios ujulunö chömöayedö ángelesdökwö yemidanö chichocha, ja̧danö jejenö chichenama, lȩbebö chichocha, jojodö ja̧tjaja̧ mikwa baibanö.

Mateo 16:28

Ja̧danö, isabenö yötawaduwakwö, ökwödö ötjökwö ju̧kwadö chöba̧ja̧di̧ waisachadötjö ju'wedö tjuju̧kwobe, wotjakwa̧ abönö ötjö jojo baibanö jeminökwe yöbawö webö chö̧jakwa̧ tjedakwedöma— jö̧ba̧lö yöawinobe Jesúsma.

1 Corintios 1:28

Jau chömöledö, böjȩ jojodö, Aaa, bidöma sulabedö, döpöjödawö̧, mikwawöködö jö̧ba̧lö jojodö tjomukwatawö̧nö omudawinobe Diosma. Jau chömöledö, jobadönö omudawinobe Diosma. Ja̧danö jojodö, Aaa, bidöma inesö otiwadö, luwedö jö̧ba̧lö tjomukwatawö̧nö mikwawöködö batjibanö ja̧inobe.

2 Tesalonicenses 2:3

Jejenö omöna yötja̧li̧ma ja'yubebi ösödökönaduwi chömöledö, baikwö yötawa: 'Dö̧ibaji̧ möle okobe deinö böjȩ jojodöma Diosnö tjöpöjödakobe, jo̧ba wei̧ da̧ja̧kwökö jö̧ba̧lö. Jesúsma yemidanö ichökakobe ja̧ möle baibenanö kabatö, ja̧danö inesö sulabo̧ Awetja ömöayo̧, Dios ökwöla nöolanö ikwö loakwo̧ma öwawachenanö kabatö.

1 Timoteo 6:14

wetakwö, wainö Dios ökwönö wei̧danö ja̧bö ja̧wi, ja̧danö okobe jwiinö ökwönö wetaja̧ma jwaikwöda ja̧bö ja̧wi, Duluwo̧ Jesucristo yemidanö öwawachenanö kabatö.

2 Timoteo 1:10

Ja̧danö babema ja̧ omukwatö ujunina wene ökwödönö i̧sebinobe, dö̧jibinö pjabato̧ Cristo Jesús ichinenama. Jau Timoteo, Cristo Jesúsma woawa ujulu söbebö loinobe, ja̧danö otiwa jawa wenetjö isabenö ja̧kwawa, ba̧kwȩlö̧jatebö ja̧kwawa ökwödönö i̧sebinobe.

2 Timoteo 4:1

Kwöwaisa Timoteo, Cristo Jesúsda wobinadönöbi, ina yaba̧ladönöbi yöawakwo̧, ja̧bö tjö̧jina otiwojobö sulojobö jö̧ba̧lö, ja̧danö yöbawajo̧ lȩebakwo̧, ¿jö̧tö? Jau Timoteo, 'dö̧ibaji̧ möle, böjȩtjö yöbawö weobö ichenama, jejenö yöawakwo̧ Cristo Jesúsma, ja̧danö ja̧ omukwatö Dios öba a'otjöbi, Cristo Jesús öba a'otjöbi baikwö wetakwö:

2 Timoteo 4:8

Ja̧danö, jejenö ja̧bö chö̧jiökwe, chuunö chubutjawakwaka, sulabe jwibadö tjubutjawakama, ida̧ökö mölejȩbe te'ada̧lö jo̧be, 'dö̧ibaji̧ möle Duluwo̧ chuunö öwanenanö kabatö. Jau Timoteo, Duluwo̧da sulabe jwibo̧ inesö lȩekwa luwo̧ma, ja̧danö ja̧ mölema, Duluwo̧ma ja̧ka inesö otiwaka ötjönö iyö öwanakobe. Jo̧kwaijayonö sule ötjönödamaökö, okobe deinö Duluwo̧ ichakwa̧ ösödö te'ada̧ladönöbi iyakobe ja̧ mölema.

Tito 2:13

Jau Tito, ina böjȩnö dö̧jayi, do̧'wo̧ wana̧lö dite'ada̧lobe, isabenö Dios jö̧a̧lina möle badekwachakobe jö̧ba̧lö, inesö otiwa möle, ökwödö dö̧jibinö pjabato̧ la'aka Dios Jesucristoma iteda ujulu i̧sebenama.

Hebreos 10:27

Chömöledö, bakwo̧ Jesúsnö kabatibajo̧ sulabenö ja̧ena, ja̧ sulabenö ja̧i̧ma Diosma söbebö lookobe. Jo̧bama ju'wi möle Dios öba a'ö ja̧nö Dios labinö lȩbebö yöawi̧ a̧ja̧kwakwo̧, yelösöda. ¡Ayö! Diosma jwiinö ölabikobe jo̧banö, Jesúsnö kabatibö sulabenö ja̧bö jo̧nöma. Jo̧banö i̧sebakobe iteda jwiinö ölabi̧, ökwöla jwiinö tubi̧danö ölabi̧ma. Ja̧ Dios jwiinö ölabi̧ma jo̧ba öpöjojodönö juwö loakwola tubi̧danö ölabi̧. Chömöledö Dios jwiinö ölabi̧ma ¿ökwödönö i̧sekwobö dösödiji̧? Döpöjöda. Labobe yelösöda. Jo̧kwaobetjö̧ jweinö omukwatö Jesúsnö ösödö kwi̧'yaduwo, jo̧banö kabatibökönö.

1 Juan 2:13

Ja̧danö, ökwödöma kwo̧'wo̧ luwo̧duwinö kwöda̧peachaduwobe chö̧ja̧wo̧dö. Ja̧danö, ökwödö da̧peachadönö yötawa, Isabenö ökwödöma Jesús, la'akatjöda ji̧nanö waisadöja, jö̧ba̧lö. Ja̧danö, ökwödö möayedö tjujuluwi̧danö kwo̧'wo̧ luwo̧duwi okwanö kwujuluwaduwobe chö̧ja̧wo̧dö. Ja̧danö, ökwödö möayedö tjujuluwi̧danö juluwadönö yötawa, Sulabo̧ Awetjanö juluwinadöja, jö̧ba̧lö. Isabenö böjanö wȩyudö yötawa chi̧tji̧mu, Dabe'do Diosnö waisadöja, jö̧ba̧lö.

1 Juan 3:12

Damötjö ji̧na Caín iteda öjawo̧nö o̧'wo̧ sulinö edinadanö kwedaduwoko chö̧ja̧wo̧dö. Jo̧ba öjawo̧nö kwabö lobinama Awetjakwö dötewinö 'yi̧na. Ja̧danö, abebö cha̧ja̧kwaduwakwö. ¿Tajawedö kwabö loinada Caínma öjawo̧nöma? Biya̧ chö̧ja̧wo̧dö: Caínma sulabenö ja̧bö ö̧jinobe, Dios wei̧ma a̧ja̧kwökönö. Ja̧danö, Caín öjawo̧ma otiwanö, Dios wei̧ a̧ja̧kwö ö̧jiökwe o̧'wo̧ sulinö edö kwabö loinobe Caínma öjawo̧nöma.

1 Juan 5:18

Chö̧ja̧wo̧dö döwaisa. Dios i̧tji̧mu babibinadöma suli̧ jawa ja̧bö 'yö̧ködö. Ja̧danö, Dios Itji̧ Jesúsma jobadö Dios i̧tji̧mu babibinadönö Awetjatjö tjöbeba̧lö te'ada̧lo̧, Awetjama jobadönö jelobekwö tjomukwatobö öibökönö.

Apocalipsis 1:16

Ja̧danö, ömamu öwaisobekwöchobesamunö si̧li̧'i̧dönö jelemutjö du̧ju̧tajanö do̧ba̧lö jo̧nö. Ja̧danö, aatjöbi isa̧pi̧ ödöapi̧, bakwachobekwödanö sȩapi̧ laebijatö. Ja̧danö, öbabi, ja̧wo̧ dewinö jwiinö dejati̧danö dejato̧.

Apocalipsis 13:5

Ja̧danö, ojwe okwatjö labebajo̧ma jwiinö sulabenö yöba̧lo̧, Ötjödasa inesö la'aka luwo̧, jö̧ba̧lö. Ja̧danö, Diosma labebajo̧nöma jejenö sulabenö yöa̧loböma kaatibokobetjö̧, ojwe okwatjö labebajo̧ma jojodönö webö ba̧nö, ja̧wo̧dö cuarenta y dosnö luwanö jenanö bo̧.

Apocalipsis 19:15

Ja̧danö, Dios Iwene ötjabökwe aatjö isa̧pi̧ ödöapi̧, bakwachakwadanö sȩapi̧ aatjö laebi̧pi̧ chedijatö. Ja̧pi̧nö okobe deinö böjȩnö ju̧kwadö, jelobebi jelobe Diosnö öpöjödadönö ujuluwakwo̧, Dios Iwene ötjabökwema. Ja̧danö, ujuluwajawö̧nöma webö ö̧jakwo̧, iteda inesö ujulunö, iteda wei̧ ja̧tjoböma. Yelösöda, bakwo̧bi jo̧banö ujuluwakwo̧ma deobe. Ja̧danö, jo̧bama Juluwo̧ Dios jwiinö ölabi̧ i̧sebö, uba ochiju tjöja̧takwi̧danö öja̧takwo̧ Diosnö öpöjödadönöma.

Apocalipsis 2:16

Jo̧kwaobetjö̧ ökwödötjö jelobekwö omukwatadönö baikwö weta: Jelobekwö kwomukwatuduwi̧ kabatibö balewachaduwi. Kwöbalewachaduwökötjö̧ma, kwö̧jaduwobekwö labinö chi̧'yakwo̧sa, ökwödönö chitichakwobö chisa̧pi̧nö, chaatjö laebapi̧nö.

Apocalipsis 20:10

Ikenama Diosma Awetjanö, jojodönö ba̧kwȩlö̧jatebö suli̧ waedö yöba̧lo̧nöma, do̧batö töbebö loobe chedijatö, ökwöla nöola okwa. Jobema, ju'wedö du̧ju̧tajanö ajayinö töbebö loinemi. Ojwe okwatjö labebinanöbi ajayinö töbebö loinemi jemima. Ja̧danö, omöna yöba̧linanöbi, Ötjöma Dios yöawi̧ yöbawo̧sa, jö̧ba̧lö, yöba̧linanöbi, ajayinö töbebö loinemi jemima, ökwöla ubola okwama. Jobema tiibökönö, tubinö yelösöda ubobe, azufre mikwi̧ ubi̧ tubi̧ma. Ja̧danö, jobadö wa̧medukwama, ba̧kwȩlö̧jatebö labebökönö, mölebi yö̧tebi inia tjötjinö baledawö̧.