Tjöpöjojodö tjujulutjwö Isabenö Jo̧ tjö̧jibinö pjaatinawö̧ jamabenö Sion mösa'obe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧bibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, Isabenö Jo̧ pjaatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö.
2 Tesalonicenses 2:16 - Dios Iwene16 Chömöledö, Dabe'do Diosma otiwa jawa mikwa jwiinö iyö ökwödönö ile niebinobe, ja̧danö ba̧kwȩlö̧jatebö do̧'wo̧ ösöwachibanö pjaatinobe, ja̧danö jo̧banö otiwanö do̧'wo̧ döwana̧lobö pjaatinobe. Jo̧ba Dabe'do Diosbi, Duluwo̧ Jesucristobi အခန်းကိုကြည့်ပါ။ |
2 Tesalonicenses 2:16
46 ပူးပေါင်းရင်းမြစ်များ
Jobekwö pjakatakwo̧ja duluwo̧ Isabenö Jo̧, ja̧danö tjö̧jibinö pjakatajawö̧ma tjitebobe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧ibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, pjakatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö, jö̧ba̧lö adebakwö duluwo̧ Isabenö Jo̧.
Ajayinö jwibadö ja̧nö, tabakwö ji̧nadöja, jo̧kwaijayonö ja̧ mölȩ otiwanö kwujuna̧laduwakwedöja, abönö pöe ju'wedötjö bajalekwönönö dötölatajanö emi̧danö kwemaduwakwedöja. Ajayinö ju'wedö otiwanö tjomukwatököwö̧ ji̧nadöja, jo̧kwaijayonö ja̧ möle kwo̧'woduwi ösöwanö kwö̧jaduwakwedöja, —Otiwanö tjomukwatawö̧sa, —jö̧ba̧lö. Jau chömöledö, kwiteboduwi nijinö ja̧nö, abönö pöe dötölatajanö ujuna̧li̧danö otiwanö kwö̧jaduwakwedöja, ja̧danö ba̧kwelöjatebö 'dö̧ibajökönö kwo̧'woduwi ösöwachibanö kwö̧jaduwakwedöja.
Ja̧danö, Dios mönö öbaledina tjomukwati̧ pjiesta möle baledakwa̧ abönö möle yi̧bena baibena Jesúsma omukwatinobe, Tjo̧wi̧ böjȩtjö labebö Chabe'do ö̧jobe chȩwa̧jakwa̧ma lekwökö, jö̧ba̧lö. Jo̧bama iteda öba̧ja̧di̧ waisachadö batjibakwedönö ile nibebö ji̧ainobe, ajayinö ichinatjö tupakwö baibanö. Ja̧danö, jobadönö jwiinö ile niebi̧ma i̧sebö, midawö woakwo̧ Jesúsma.
Diosma okobe deinö böjȩnö ju̧kwadönö jwiinö ile niebobetjö̧ itji̧nö iteakwo̧nöda weinobe böjȩkwö. Ja̧danö, itji̧ iteakwo̧nö weinobe, jo̧banö ösödadöma, Bitema dö̧jibinö pjabato̧, jö̧ba̧lö, ba̧kwȩlö̧jatebö tjuju̧kwobö Dioskwö. Ja̧danö, jobadönö Dios lȩebi̧tjö baledökönö ba̧kwȩlö̧jatebö tjuju̧kwakwedö Dioskwö.
Ja̧maökö chömöledö. Ökwödöma döwaisa. Duluwo̧ Jesúsma ökwödönö lȩlö̧jino edö dö̧jibinö pjabatijetö. Ja̧danö, jobadö judío jojodöböködönöbi Duluwo̧ Jesúsma bakwainö pjabatijetö, tjö̧jibinö pjabatö. Jejenö ji̧tjö̧ma ¿tajawedö wainö ja̧tjobö weköbaduwobö jö̧ka̧laduwa, Moisés weina tja̧ja̧kwoböma?— jejenö jö̧ba̧lijetö Pedroma.
Jemi ikenama Apolosma: —Acayabe yöbawö chi̧'yobö jö̧ta̧la— jö̧ba̧lijetö. Jejenö jö̧a̧liawö̧ Éfesonö ju̧kwadö Jesúsnö ösödadöma ösödijadötö, Jau 'ya̧wi jobetjö yökawo, jö̧ba̧lö. Ja̧danö, jobadöma kwialusöja wȩyudijadötö Acayanö ju̧kwadönö, Apolos jobe ichena otiwanö tjösödobö. Ikenama Apolosma Acayabe 'ya̧jo̧ otiwanö yöbawö pjabatijetö jobe ju̧kwadö Jesúsnö ösödadönöma, Dios lȩlö̧jino edawö̧ Jesúsnö ösödinadönöma.
Ja̧danö, Dios Abrahamnö chiyocha jö̧a̧lenama, Abraham Dios yöawi̧ ösödiökwe jö̧a̧linobe. Moisés iwȩyudina ja̧iökwema jö̧a̧linokobe. Jau, mikwa jwiinö otiwa jawa iyö, chiyocha jö̧a̧linobe. Ja̧danö, Dios jö̧a̧linada mikwawi̧ma, jojodö otiwanö ja̧tji̧maökö. Jo̧kwajabetjö̧, Dios jö̧a̧linada mikwawobetjö̧ jweinö döwaisa, Diosma isabenö Abraham i̧tji̧mu tupadanö jojodönö iyakobe, jö̧a̧linadanö. Jobadö Abraham i̧tji̧mu tupadanö jojodöma ¿didöda chömöledö? Sule jojodö ja̧bö tjö̧jo jö̧ba̧lö ¿Moisés iwȩyudina ja̧badödaji̧? Jobadömaökö, jo̧ba Dios yöawi̧ ösödinadanö ösödadöda Abraham i̧tji̧mu tupadanö jojodö chömöledö. Jau chömöledö, ökwödö okobe deinö Abraham ösödinadanö Dios yöawi̧ ösödadöma, Abraham i̧tji̧mu tupadanö jojodöbedösa.
Ja̧danö isabenö ökwödöma jwaikwöda Cristonö kwösödaduwobö jo̧be, 'diinö pjolachibökönö kwö̧jaduwobö jo̧be chömöledö, otiwa jawa wene a̧ja̧kwö kwo̧'wo̧ kwöwana̧laduwi̧ wenema kabatibökönö chömöledö. Jau chömöledö, ja̧ otiwa jawa wene, böjȩ bakwameachibanö jojodö tja̧ja̧kwi̧ wenetjö ömöayo̧danö babibinasa chömöledö, ja̧ wene yöbawö chö̧jo jö̧ba̧lö.
Chömöledö kabatökönö Diosnö ösödö adebobö jo̧be, ökwödönö pjaatinobetjö̧. Jau chömöledö, ökwödöma Duluwo̧ ile niebawö̧ja, ja̧danö Diosma la'akatjöda ökwödönö omudawö ujuninobe, kwö̧jibaduwobö. Ja̧danö, Dios O̧'wo̧ Luwo̧ ujulunö ökwödönö 'da̧batö ujuninobe, iteda ömöledö bakibaduwanö, isabenö wene kwösödaduwobetjö̧.
Ja̧danö, Dios omudawö ujuninawö̧nö chöba̧ja̧dobe, Diosnö tjo̧'wo̧ wana̧lö tjomukwatobö, Aaa, isabenö ökwödöma ba̧kwȩlö̧jatebö ja̧kwawa dujuna̧lakwedösa, Dios jö̧a̧li̧danö, jö̧ba̧lö tjomukwatobö. Ja̧ ba̧kwȩlö̧jatebö ja̧kwawa dujuna̧lakwa̧ wenema omöna yöba̧lö̧kö̧ Diosma yöbawö ujuninobe, ina böjȩ otidakwa̧ abönö.
Isabenö chömöledö, Dios ajayinö wei̧, Dios wei̧ Moisés iwȩyudinama, jojodönö pjaatokobe Dioskwö suli̧ okobe jwiinö jwibadödanö tjichibobö. Jo̧kwaobetjö̧ Diosma yöbawö ujuninobe ju'wi wene, jwiinö mikwawi̧ wene, ajayinö weinatjö o̧penönö mikwawi̧ wenema. Ja̧ balekwa yöbawö ujuninatjö Diosma yöawobe, Tjo̧wi̧, jojodö ötjökwö suli̧ okobe jwiinö jwibadödanö tjichibobö jo̧be, jö̧ba̧lö. Isabenö chömöledö, Dios balekwa yöbawö ujuni̧ma ajayinö yöbawö ujuninatjö o̧penönö mikwawi̧, ökwödönö okobe jwiinö pjabatö.
Ja̧danö chö̧ja̧wo̧dö, dö̧ja̧wo̧dönö ile nibebö dö̧ji̧ma ¿dakwö ja̧bö dö̧jobeda? ¿Ti i̧sebinada döwaisachibanö, Ja̧da ile nibebö ja̧kwawa, jö̧ba̧lö? Jesúsda chö̧ja̧wo̧dö. Jesúsma ökwödönö ile nibebö, ökwödö diminö dusula dumusidi̧ midawö ö'wö baibinobe. Chö̧ja̧wo̧dö, ökwödöma Jesús ile nibebö ö̧jinadanö, okobe jwiinö iyö, ökwödöbi dö̧ja̧wo̧dönö pjabatö, ile nibebö dö̧jobö jo̧be, debö di̧'yitjö̧bi.
Ja̧danö, Jesucristoma ökwödönö lȩlö̧jino edobö chösöda, kwo̧'wo̧ luwo̧duwi ösöwachibanö kwö̧jaduwobö. Jesucristoma Dios omukwati̧ jweinö yöbawo̧. Ja̧danö, jo̧bama wobinadötjö abönö tjebachajina. Ja̧danö, okobe deinö böjȩ la'aka luwedönö webö jo̧ Jesucristoma, inesö la'aka luwo̧obetjö̧. Chömöledö, Jesúsma ökwödönö jwiinö ile nibebo̧. Jo̧bama iteda ökwösobu ebawinö imidawinobetjö̧, sulabe wei̧ a̧ja̧kwökönö, otiwanö dö̧jobö jo̧be.
A̧ja̧kwaduwitjö. Kwo̧'wo̧ tjo̧kekwaduwa ökwödönö inia tjököbaduwinö ja̧badönö, judío jojodönöma. Jobadö tjo̧'wo̧ luwo̧ okwanö chöwaisawö̧. Jobadöma judío jojodö tjöbötjachinajayonö, judío jojodöböködödanö babibinadö tjo̧'wo̧ luwo̧nöma, Dios ömöledö batjibinokobetjö̧. Awetja ömöayedöda babibinadö, jo̧ba wei̧ a̧ja̧kwö. Chömöledö, ju'winö ökwödö kwöba a'oduwi ichö, tju̧yu̧ju̧ki̧junö bamatö, tjuu nijakwö bȩbachibö tjubudekwobö ja̧takwo̧sa jobadönöma. Ja̧ mölema jobadöma, ökwödönö edö waisachibö tjubudekwakobe,¡Ayö! Isabenö bidöma Dios ile niebawö̧, jö̧ba̧lö.
ကြော်ငြာတွေ