2 Tesalonicenses 1:7 - Dios Iwene7 Jo̧kwaijayonö ökwödö Tesalónicanö ju̧kwadönöbi, ökwödönöbi usula demawi̧tjö dö̧jibinö ja̧akwo̧ Diosma, Duluwo̧ Jesús mölejȩbetjö ichö öwawachenama. Jau chömöledö, Duluwo̧ Jesúsma iteda ömöayedö ángelesdö juluwadökwö öwawachö ichakwo̧. Ja̧danö, ökwölakwö ichakwo̧, အခန်းကိုကြည့်ပါ။ |
2 Tesalonicenses 1:7
51 ပူးပေါင်းရင်းမြစ်များ
Ja̧danö, ina cheda̧lonö, ju'wibi la'aka luwedö tjö̧ba̧kwaökiya tjujunobe chedatö, ja̧danö ajayitjö ji̧na Diosma tebachö öbamatobe chedatö. Jo̧ba ökamijido̧ma jwiinö bakwainö dewado̧ chedatö, ja̧danö öwö'yema, obeja öwö'yedanö bakwainö dewa'ye chedatö. Ja̧danö, iteaka ba̧kwawaka chedatö, kolukasa'o ja̧kama, ja̧danö iteaka ökwölanö ubobe chedatö, ja̧danö iteaka kolukasa'o ubobe chedatö.
Isabenö yöta̧la, babe ju̧kwadö sulabenö ja̧bö tjuju̧kwobe, Diosnö öpöjödö böjȩ jawada ösödö. Bakwo̧, ötjönö öpöjödinö jo̧ma baikwö baledakwo̧. Ju'winö ötjöma, jojo babibö öwabachinama, yemidanö böjȩkwö chichenama ötjönö öpöjödo̧nö ötjöbi chöpöjödakobe. Isabenö ju'winö, Dios dewinö dejatinö böjȩkwö yemidanö chichena, suli̧ jwibadö ángelesdökwö chichenama, ötjöbi jo̧banö edö chöpöjödakobe— yöbawijetö Jesúsma iteda öba̧ja̧di̧ waisachadönö.
Ina yöawinobe okobe deinö: —Isabenö yötawaduwakwö. Ju'winö mölejȩ po̧ibobe kwedaduwakobe. Ja̧danö, Dios ömöayedö ángelesdönö kwedaduwakobe, mölejȩbetjö böjȩkwö jwibachadönöma. Ja̧danö, böjȩtjö mölejȩbekwö kabekwachajadönöbi kwedaduwakobe. Ja̧danö, jobadö ángelesdö böjȩkwö ichö, ötjönö mebibö jamatadönö kwedaduwakobe. Ötjönö, jojo baibanö jeminökwenö mebibö jamatadö ángelesdönö kwedaduwakobe— jejenö yöawinobe Jesúsma jo̧bakwö ichinadönöma.
Ja̧danö, ju'wibi jo̧be chömöledö. Dios i̧tji̧mudobetjö̧, Diosma iteda i̧tji̧munö otiwa jawa iyakwa̧ma, ökwödönö ja̧ jawa iyakobe chömöledö. Ja̧danö, otiwa jawa Jesúsnö iyi̧tjöbi, ja̧danö ökwödönöbi iyakobe chömöledö, Jesúskwö bakobe dö̧jobetjö̧. Jau chömöledö, ina böjȩnö ja̧nö, Cristo usula emawinadanö, bakwainö usula emawadösa. Ja̧danö, tupakwö, mölejȩbe ja̧nö, Dabe'do Dios jo̧banö otiwa jawa iyakwa̧bi bakwainö ökwödönöbi iyakobe chömöledö.
Diosma jo̧banötjö okobe jwiinöbi okobe deinöbi otidinobetjö̧. Jau chömöledö, Cristonötjö Diosma okobe jwiinöbi okobe deinöbi otidinobe, mölejȩnö ji̧bi, böjȩnö ji̧bi, jojodö tjedi̧ jawabi, tjedökö jawabi. Cristonötjö Diosma okobe deinö luwedönö ujuninobe, böjȩ luwedönöbi, mölejȩ luwedönöbi. Jau chömöledö, Cristonötjö okobe jwiinöbi okobe deinöbi otidinobe Diosma, Cristo ösödi̧danö tjö̧jo jö̧ba̧lö.
Chömöledö, bakwo̧ Jesúsnö kabatibajo̧ sulabenö ja̧ena, ja̧ sulabenö ja̧i̧ma Diosma söbebö lookobe. Jo̧bama ju'wi möle Dios öba a'ö ja̧nö Dios labinö lȩbebö yöawi̧ a̧ja̧kwakwo̧, yelösöda. ¡Ayö! Diosma jwiinö ölabikobe jo̧banö, Jesúsnö kabatibö sulabenö ja̧bö jo̧nöma. Jo̧banö i̧sebakobe iteda jwiinö ölabi̧, ökwöla jwiinö tubi̧danö ölabi̧ma. Ja̧ Dios jwiinö ölabi̧ma jo̧ba öpöjojodönö juwö loakwola tubi̧danö ölabi̧. Chömöledö Dios jwiinö ölabi̧ma ¿ökwödönö i̧sekwobö dösödiji̧? Döpöjöda. Labobe yelösöda. Jo̧kwaobetjö̧ jweinö omukwatö Jesúsnö ösödö kwi̧'yaduwo, jo̧banö kabatibökönö.
Isabenö chömöledö, yötawaduwakwö. Ina babebi Diosma ösödobe jo̧bakwö ö'wachö döbamatobö, do̧'wo̧ luwo̧nö. Jo̧ba iwene, da'dödöminenö yöbawö ujunina wenema, Ötjökwö ö'wachö bamataduwi, jö̧ba̧lö, ina 'dö̧ibajinokobe. Ökwödönö babe ju̧kwadönöbi Diosma yöbawö ujuninobe ja̧ wene, jo̧bakwö do̧'wo̧ luwo̧nö ö'wachö döbamati̧ wenema. Jo̧kwaobetjö̧ tjöbeba̧lö̧jönö omukwatö di̧'yaduwo, Diosnö ösödö. Jau chömöledö, Diosma ökwödötjö bakwo̧nö edö, Chedemi ötjökwö ö'wachö bamatö jö̧kö̧ja, jö̧a̧lapji jö̧ba̧lö, jo̧banö ösödö tjöbeba̧lö̧jönö omukwatö di̧'yaduwo.
Jo̧kwaobetjö̧ chömöledö, ökwödöda dujulunö Dioskwö dichibobö domukwati̧ma kadatibaduwo. Ja̧danö Diosnö do̧'wo̧ wana̧lö, jo̧bakwö jwaikwöda di̧'yaduwo, jo̧bakwö ö'wachö bamatö dö̧jobö. Isabenö, jejenö di̧'yobö jo̧be chömöledö Diostjö 'da̧bachibö dö̧japji jö̧ba̧lö, jo̧bakwö ö'wachö bamatökönö. Jau chömöledö, jwaikwöda Dios wei̧ a̧ja̧kwö di̧'yaduwo da'dödömine tji̧'yinadanö di̧'yapji jö̧ba̧lö, jojodö deobetjö wobinadö, Dioskwö ö'wachö bamatinöködödanö.
Jo̧kwaobetjö̧, Dios iwenetjö jweinö yöawobe, babebi ökwödö Dios ömöledöma, Dioskwö do̧'wo̧ luwo̧ okwanö ö'wachö bamatö duju̧kwi̧ma jo̧be, jö̧ba̧lö. Chömöledö, Dios ajayinöma, jelemutjö bakwöta möle böjȩ otidö kaatakwawaja̧ ikena jelemutjö dötölajata möle ö'wachö öbamatinadanö ökwödöbi ba̧kwȩlö̧jatebö jo̧bakwö do̧'wo̧ luwo̧ okwanö ö'wachö bamatö duju̧kwi̧ma jo̧be. Jo̧kwaobetjö̧ jwaikwöda di̧'yaduwo chömöledö, Diosnö do̧'wo̧ wana̧lö, jo̧bakwö ö'wachö bamatö duju̧kwökapji jö̧ba̧lö.
Ja̧danö, woawatjö tjebachajo̧, Cristoma mölejȩbe kaekwajinobe chömöledö, ja̧danö jobe Dios öwaisobekwöchobe inesö la'aka luwo̧ ö̧bena öbamatinobe. Ja̧danö chömöledö, okobe deinö ángelesdötjöbi, böjȩ luwedötjöbi, mölejȩbe luwedötjöbi la'aka tjuluwo̧ma jo̧bada, Cristoda. Ja̧danö chömöledö, babe usula kwemawaduwijayonö, kwo̧'wo̧ ösöwanö kwö̧jaduwena, baledajadö ökwödöbi Dioskwö dö̧jakwedösa jö̧ba̧lö.
Ja̧ okobe jwiinö Dios yöbawö weobetjö̧ baledinobe chömöledö. Ja̧danö, babe ji̧ mölejȩbi, böjȩbi jo̧bada weobetjö̧ ina jo̧be chömöledö, tupakwö mölejȩbi böjȩbi Dios söbebö loenanö kabatö. Jau chömöledö, tupakwöda böjȩbi, mölejȩbi juwö söbebö lotakwo̧sa, jö̧ba̧lö Dios omukwatö ujuninobetjö̧, böjȩbi mölejȩbi te'ada̧lobe ichejekwa, inesö Dios böjȩ jojodö ja̧tji̧ otiwojobö sulojobö jö̧ba̧lö yöawakwa̧ möle baibenanö kabatö, ja̧danö Diosnö öpöjödadönö söbebö loakwa̧ möle baibenanö kabatö. Ja̧danö, ja̧ möle baibenama, Diosma böjȩbi mölejȩbi juwö söbebö loakobe chömöledö. Jau chömöledö, damötjö okobe jwiinö Dios yöawi̧danö baledinobe, jo̧kwajabetjö̧ ju'wibi döwaisobö jo̧be, Cristo yemidanö ichakwo̧ yöawinadanö isabenö ichakwo̧, ja̧danö isabenö jobadö sulabenö obadönö lȩebakwo̧.
Ja̧danö Sodoma comunidad ju̧kwadöbi, Gomorra comunidad ju̧kwadöbi, ö'öbö comunidad jobadö ja̧tji̧danö sulabenö 'da̧'da̧bakwawö ja̧badö, ja̧danö tjöpöjödo jö̧tja̧li̧ jawa sulabenö ösödadöma Dios lȩebi̧tjö tjeminobe, ¿jö̧tö? Jau chömöledö, ökwöla tiibokolama jobadönö söbebö loinobe, ja̧danö ja̧ jobadönö baledinama öwaetjöda i̧sebobe, jobadöjayedönö Dios isabenö lȩebakwawö̧ jö̧ba̧lö, ¿jö̧tö?
A̧ja̧kwaduwitjö, Jesucristo yemidanö ichakwa̧ wenema: Jesucristoma yemidanö ichakobe ojwiyo'wonö, okobe deinö tjedinö. Okobe deinö jo̧banö inia tjöinö tibatinadöma, jo̧ba ichobema tjedakwedö. Ja̧danö, böjȩ bakwameachibanö, okobe deinö bakwasokwena ju̧kwadö, Jesúsnö öpöjödadöma, jo̧ba ichobe edö yebabinö tjubudekwakwedö, jo̧ba lȩebakwa̧ omukwatö, jö̧ba̧lö laebobe Dios iwenetjö. Jau, chömöledö, biya̧ Dios iwenetjö yötawi̧ma isabenö baledakobe, Jesús yemidanö ichenama.
Ikenama iwene cha̧ja̧kwijatö mölejȩbetjö, baikwö: —Juan, biya̧ yötawi̧ wȩyudi. Babe möle, inia tjötji̧ baledi̧ möletjö tupakwö, Jesúsnö dötewinö ju̧kwadöma tjo̧'wo̧ ösöwanö tjö̧jakwedö— jejenö chiwȩyudobö wei̧ cha̧ja̧kwijatö. Ikenama Dios O̧'wo̧ Luwo̧ma jö̧a̧lijatö: —Jau, jweinö yöawa. Jobadöma, Jesúsnö dötewinö ju̧kwadöma tjo̧'wo̧ ösöwanö tjö̧jakwedö. Yelösöda, tjime'dawachibanö otidinadöma bajaliyanö tjö'wachibakwedö, otidökönö. Ja̧danö, jobadö mölejȩbenö ja̧nö böjȩnö otidiatjinama i̧sebakobe, Bidöma jweinö Jesúsnö o̧'wo̧ wa̧na̧lö 'yi̧nadö, jö̧ba̧lö— jö̧a̧lijatö Dios O̧'wo̧ Luwo̧ma.
Diosma, ömöledönö otiwanö ite'ada̧lakobe. Jobadöma belöma budekwabinö tjuju̧kwinajayonö, tjo̧wi̧, babema budekwaböködö. Ja̧danö, yemidanö wotjökakwedö. Ajayi suli̧ baledinama, la'akatjöda yemidanöma suli̧ma baledökakwawö̧. Ja̧danö, tjo̧'wo̧ tjo̧ebi̧bi yemidanöma baledökakwawö̧. Budekwöbi, nii̧bi niökakwawö̧ ajayinö baledinadanö— jö̧ba̧lö cha̧ja̧kwijatö.
Ikenama Jesús yöawijatö okobe deinö itenöda ösödadönöma. Baikwö yöawijatö: —Ötjöma Jesússa. Chömöayo̧ ángelnö, Juannö yöawobö wetinobetjö̧, tjo̧wi̧ta, kwa̧ja̧kwaduwobe. Ja̧danö, ötjöma Davidminetjö tupadanö jojosa. Ja̧danö, ötjöma sili'i jwiinö dejatinö dewo̧danö, yȩayi dejatö dewo̧danö jwiinö dejatinö dewo̧sa— jejenö Jesúsma yöawijatö okobe deinö jo̧banö ösödadönöma.
Ikenama ángelma yöawijatö ötjönö: —Juan, okobe jwiinö yötjawi̧ kwa̧ja̧kwaja̧ma, isabenö baledakobe, jweinö wene yötjawobetjö̧. Ja̧danö, Duluwo̧ Diosma ötjönö weijatö baledakwa̧ chi̧sebobö ökwönöma. Ja̧danö, okobe deinö Dios ömöayedö, baledakwa̧ yöneawachi̧ tjöwaisachibobö Duluwo̧ Diosma weijatö ötjönöma, ökwönö chi̧sebobö. Ja̧danö, Duluwo̧ Dios, iteda yöawi̧ yöbawinadö tjo̧'wo̧ luwo̧ okwa yöbawo̧ma, jo̧bada ötjönö webo̧, ökwönö chi̧sebobö.
Jejenö atjeba̧lökwe Obeja Itji̧danö Jo̧ma, jobadönö kamijido̧ dewado̧ iyö, yöawijatö: —Ina ja'yubeda lekwa. Kwite'ada̧laduwo. Ina ju'wedönöbi kwabawö lotjakobe, kwömöledöduwinö, Dios weina ja̧badönöma. Ökwödönö kwabawö lotjinadanö jobadönöbi kwabawö lotjakobe. Tjo̧'omanö 'dö̧tjibanö kwabawö lotjaja ikena, balekwa mikwa lȩtebakwo̧sa—yöawijatö Obeja Itji̧danö Jo̧ma.
ကြော်ငြာတွေ