2 Samuel 23:5 - Dios Iwene5 Jobekwö yöawajabe Diosma, la'aka luwo̧ otiwo̧nö, ja̧danö, jejenö jo̧be, Dios öba a'otjö israel jojodönö yöbawö chö̧ji̧ma. Jo̧kwajabetjö̧, otiwanö israel jojodönö yöbawö chö̧jiökwe, Diosma isabenö ja̧akwa̧ wene yöbawö ujunajabe ötjönö, ba̧kwelöjatebö ja̧kwa̧ yöbawö junawama. Yöbawö ujuni̧ma, okobe jwiinö otiwanö labebö lobö yöawajabe, la'akatjöda balewö loawa jwii̧ wenema. Isabenö ötjönöbi chi̧tji̧mu tupadanö jojodönöbi pjaatakwa̧ wene yöbawö ujunajabe, ja̧danö ja̧ badekwachobö inesö chösödi̧ badekwachinö isabenö ja̧akwo̧ Diosma, la'akatjöda ökwödönö pjabatöma kaatakwawökakobe. အခန်းကိုကြည့်ပါ။ |
2 Samuel 23:5
41 ပူးပေါင်းရင်းမြစ်များ
Jo̧kwajabetjö̧, jejenö ja̧köbi̧tjö̧, baikwö yötawakwö tupakwö baledakwa̧ma: Dios wei̧ma mikwawökö ji̧ jö̧ba̧lö, Hitita jojo Urias ilekwonö 'döbebö, kwilekwo bajibanö kweminobetjö̧, bemi tupakwö kwi̧tji̧mu tupadanö jojodötjö ba̧kwelöjatebö ölakwabikwawa ja̧kobe, —jö̧ba̧lö Dios yöawi̧ yöawinobe Natanma Davidnö.
Ja̧danö, ba'ali tjujunena, Absalonma iteda ömöayedönö weinobe baikwö: —Amnonnö eda̧lö kwiteada̧laduwo, ubasobu o̧'dobu owa̧lö, 'dukwachökwe baibenanö kabatö. Ja̧danö, ökwödönö, –Amnonnö kwabaduwi, –jö̧ba̧lö wetenama, yebabökönö jo̧banö kwabö loköbaduwo. Jejenö wetenama, yekabiduwa, wene ökwödönö baibobö jwiena, ötjö kwuluwo̧da jejenö kwabö loköbaduwobö wetobetjö̧. Jo̧kwajabetjö̧ kwujuluwachibaduwanö yebabökönö jo̧banö kwabö loköbaduwo, —jö̧ba̧lö weinobe Absalonma, ömöayedönö.
Jejenö yöawiökwe, la'aka luwo̧ Davidma Dios eju okwa tebachö, Isabenö Jo̧ öba a'o öbamatinobe. Ja̧danö, bamatajo̧, yöa̧linobe, —Chuluwo̧ Isabenö Jo̧ Dios, ötjöma mikwawö̧kö̧sa, ja̧danö chömöledöma mikwawöködö, ida̧ökö pjakataja̧danö pjakatoböma. Isabenö pjakato jö̧ka̧li̧tjö jwiinö bajalekwönönö pjakatajabe ida̧ökö chuluwo̧.
Ja̧danö, ja̧ möle jenanö, baikwö baledinobe: David ilekwo Jaguit mikwuju jitji̧ Adonias mikwo̧ma, inesö la'aka luwo̧ baibobö omukwatinobe. Jo̧ba Adonias mikwo̧ma, David itji̧ Absolonnö 'yaebaja̧ ikena 'yaebinökwe, ja̧danö wamenö jwiinö otiwo̧ ö̧jinobe Adonias mikwo̧ma. Ju'wibi, abe'do David la'akatjöda jwebebö yöawinökökwe Adoniasnöma, la'akatjöda jo̧banö jwebebö, —Sulabenö ja̧köba, tajawedö jejenö ja̧köbobeda, —jö̧ba̧lö la'akatjöda abebö a̧ja̧kwö yöbawiainokobe. Ja̧danö, ötjöda inesö la'aka luwo̧ batibakwo̧sa jö̧ba̧lö, ölakwabikwawadö tjuluwo̧ Joabkwöbi, Diostjö jojodötjö ö'weje pjabato̧ Abiatarkwöbi yöa̧lakwawinobe, jo̧ba ömöayedö babibö, la'aka luwo̧ baibanö pjatjatobö. Ju'wibi, koluka eminobe, jadanö kabayudönö wa̧nö ölakwabikwawadönöbi, ömöayedö jo̧banö tjöbeba̧lö teada̧ladö cincuentabedönöbi weinobe, inesö la'aka luwo̧ kweachi̧danö kweachakobetjö̧.
Jejenö 'da̧batö chujunenama, baikwö wetakwö Jeroboan: Isabenö okobe jwiinö ökwönö weti̧ kwa̧ja̧kwobö ja̧kobe, -Baikwö ja̧bö kwö̧jo, -jö̧ba̧lö ökwönö weti̧ a̧ja̧kwö, chösödi̧danö ja̧bö kwö̧jo. Jau, chömöayo̧ David a̧ja̧kwö ö̧jinadanö, ökwöbi jwaikwöda ja̧bö kwö̧jobö weti̧bi, ju'wi weti̧bi kwa̧ja̧kwobö ja̧kobe, ja̧danö otiwanö a̧ja̧kwö kwö̧jitjö̧ma, isabenö ökwökwö ja̧nö otiwanö pjatatakwo̧sa. Jau Jeroboan, chömöayo̧ David otiwanö a̧ja̧kwö ö̧jitjö̧, itji̧mu tupadanö jojodöbi otiwanö luwedö 'diinö tjö̧jobö 'da̧batö chujunajabe, ja̧danö jo̧ba a̧ja̧kwinadanö ökwöbi a̧ja̧kwö kwö̧jitjö̧ma, bakwainö ökwönöbi pjatatakwo̧sa, kwitji̧mu ba̧kwelöjatebö israel luwedö 'diinö tjö̧jakobetjö̧.
möayedödanöbedö waisanö omukwatobö pjabatö yötja̧linada ösödö, labinö yöa̧linobe jojodönö: —Chabe'doma ömöki̧ jawa kwotidaduwobö weinobe, jokwaijayonö ötjöma ja̧tjö bajalekwönönö ömöki̧nö kwotidaduwobö wetakwo̧sa. Ja̧danö ju'wibi, chabe'do ökwödönö lȩebitjö̧ bajalekwönönö labinö lȩtebakwo̧sa, baikwö wanedö yötawa, Chabe'do ökwödönö lȩebenama, ba̧kwelöjatebö kwakwabajitjadanö ökwödönö kwakwainobe, jo̧kwaijayonö ötjö kwakwachakwa̧ma, itiyu ömadeba ji̧ kwakwaakanö ökwödönö kwakwachakwo̧sa, —jö̧ba̧lö labinö atadinobe Roboanma.
Isabenö Dios lȩebakwawö̧ israel jojodönö, ja̧danö wanedö yötawa, David abe'do Isai itji̧mu tupadanö jojodö tjö̧ji̧danö wanekwachowi towi jubö loakobe, sule towi la'akada ji̧binö. Jo̧kwaijayonö, jemi ikenama, ja̧ Isainö wanekwachowi towi la'akatjö, yayinö pokwö laebakobe, ja̧danö pokwaja̧ ikenama, yemidanö otiwanö wa̧ja̧kobe.
Chömöledö, yadakwö baledakwa̧ma baikwö wanedö yötawaduwakwö, israel jojodö otiwanö tjö̧ja̧kwa̧ma: Jacobnö wanekwachowi towima, bö'diya otiwanö yutinö ja̧kwowi, ja̧danö israel jojodönö wanekwachowi towima otiwanö bo̧akobe, ja̧danö öjiyama otiwanö pjoawakobe, ja̧danö waji̧ma otiwanö wa̧jakwowi, waji̧tjö bö̧jȩ su̧'be baibenanö baibanö.
Yadakwö Isabenö Jo̧ma yemidanö israel jojodönö pjaatakwo̧. Ja̧ möle Israel niji pokwi̧ma, jwiinö otiwanö pokwakobe. Ja̧danö, jejenö otiwanö pokwiawö̧, israel jojodötjö ji̧binadöma tjo̧'wo ösöwanö tjö̧jakwedö, —Ditebo israel niji pokwi̧ma, jwiinö otiwanö pokwobe, otiwanö kwakwawa dujuna̧lobö, —jö̧ba̧lö.
Isabenö jwaikwöda ile 'di̧bebö chösödakwujuja, baikwö wanedö yöta̧la: Mösa'iju pjolachibö laebitjö̧bi, mösa'iju pjei̧ o'iju tjö̧bawö meitjö̧bi, ökwönö ile 'di̧tebi̧ma la'akatjöda katatibökakwo̧sa. Ökwönö yöbawö chujunajabe, dösölö̧jinö pjabatö chö̧jakwa̧ wenema, ja̧danö ja̧ yöbawö chujunina wenema la'akatjöda söbebö loawökakobe, jö̧ba̧lö ötjö Isabenö Jo̧, ökwönö lȩlöjinö edo̧ma yöta̧lakwö.
Teada̧lönö a̧ja̧kwalö, chöjobekwö kwichaduwo chömöledö. Otiwanö kwa̧ja̧kwaduwo, tupakwö 'yaka̧laduwakobetjö̧. Jau, ötjönö kwa̧ja̧kwaduwitjö̧ma, ökwödökwö bakobe dösölö̧jinö dö̧jakwa̧ jawa yöbawö chujunocha, 'dö̧ibajökö ji̧ yöbawö junawama. Jau, damötjö Davidnö yöbawö chujunijatö, jwaikwöda 'dö̧bibajökönö jo̧banö ösödö chö̧jakwa̧ma, ja̧danö ökwödönöbi Davidnö yöbawö chujuninadanö yöbawö chujunena.
Baikwö laebobe Isabenö Jo̧ yöa̧li̧ma chömöledö: Ötjö Isabenö Jo̧ma, jweinö lȩekwa jawa ösödo̧sa. Ötjöma naukwakwawabi, ju'wi sulabenö ja̧awabi öpöjödo̧sa. Jo̧kwajabetjö̧ ju'wedö tjitebokwena jojodö jobadönö sulabenö ja̧tjina omukwatö, jweinö lȩekwa wetakwo̧sa, balekwa mikwa otiwanö chömöledö israel jojodönö tjiyobö wetakwo̧sa. Ja̧danö ötjöma chömöledö israel jojodökwö ba̧kwelöjatebö pjatatakwa̧ wene yöbawö chujunocha.
Chömöledö, Diosma Jesúsnö yemidanö tjeachajinö ja̧bijetö yemidanö ö'wöchökönö. I̧lȩdo̧ okwa tjödajökwenöma, a̧tjȩo 'dolobökönö tjeachajinö ja̧bijetö Diosma. Ja̧ baledakwa̧ma Diosma ajayinö yöbawijetö iwenenö. Baikwö laebobe Dios iwenetjö: Davidnö yöbawö chujunina wenema, isabenö jo̧banöbi, jo̧batjö tupadanö jojodönöbi otiwanö pjatatakwo̧, jö̧ta̧li̧ wenema, jö̧ta̧li̧danö otiwanö pjatatakobe ökwödönöma, jö̧ba̧lö laebobe Dios iwenetjö, Dios Davidminetjö tupadanö jojodönöbi pjatatakobe, jö̧ba̧lö, jö̧a̧linama— yöbawijetö Pabloma—
Chömöledö, Duluwo̧ Jesúsma ökwösobu ebawinö iteda Diosnö iyawö midawö ö'wö baibinobe. Ja̧danö, jo̧bama midawö ö'wö baibena, Dios 'yayi̧ balekwa yöbawö ujuni̧ma jamatö 'yi̧nobe. Chömöledö, Jesús ökwösobu ebawinö ö'wö baibiökwe, Dios 'yayi̧ balekwa yöbawö ujuni̧ jamatö 'yo̧bö, Diosma Jesúsnö wobajaletjö yemidanö tjeachajinö ja̧inobe. Ja̧danö, tjeachajinö ja̧inökwenöma ökwödönö la'aka te'ada̧lo̧ baibanö 'da̧batö ujuninobe Diosma, iteda a̧jwi̧mu o̧bȩja̧dödanöbedönö la'aka te'ada̧lo̧ baibanö. Ja̧danö chömöledö Diosnö, do̧'wo̧ luwo̧ okwa wene jwiinö badibobö pjabato̧nö ateba ökwödönöma. Jo̧banö ateba ökwödönö pjaatobö iteda ösödi̧da ja̧bö kwö̧jaduwobö. Ja̧danö, jo̧banö ateba ökwödönö pjaatobö Jesucristo ujulunö kwo̧'wo̧ luwo̧duwi okwanö otiwanö Dios ösödi̧danö balewachinadö bakibaduwobö. Isabenö chömöledö, Diosnö ba̧kwȩlö̧jatebö dösödaduwo, Jo̧bada, jö̧ba̧lö. Ba̧kwȩlö̧jatebö dösödaduwo, Jwiinö juluwo̧, jwiinö otiwo̧, jö̧ba̧lö. Chömöledö, biya̧ yötawi̧ma isabenö ji̧ jawa yötawa.
Ja̧danö chömöledö, ökwödöma Diosnö do̧'wo̧ wana̧lö te'ada̧ladösa, Isabenö Dios yöbawö ujuninadanö badekwachakobe, jö̧ba̧lö. Jo̧kwaobetjö̧ Diosnö do̧dati̧danö do̧batö jwaikwöda 'ya̧dösa, jo̧banö do̧'wo̧ wana̧lö. Wanedö yötawa chömöledö. Ökwödö disowima tjolanö nönö nubö dönobe, a̧li̧ isuwokobö. Ja̧danö, a̧lachi'bo nuda'boma otiwa'bo, 'dia'bonöda nudobe. Chömöledö ökwödö jejenö 'dia'bonödanö ja̧dösa Dioskwö, iteda yöbawö ujunina wene do̧'wo̧ wana̧lö. Jejenö do̧'wo̧ wana̧lö döwaisobe, Bakwo̧ ökwödönö pjabato̧ma ö̧jobe, jö̧ba̧lö, Jesúsda. Jejenö döwaisobetjö̧ Diosnö do̧'wo̧ wana̧lö dite'ada̧lobe. Ja̧danö chömöledö, Jesús ökwödönö pjabato̧ma, böjȩtjö Diosnö la'aka iyadö Dios ö̧jineju okwa tupasȩko̧ tetjachinadanö teachinobe Dios mölejȩbe ö̧jobekwö. Jau chömöledö, sawana'wo tjöekwemi o̧pe Diosnö iyö tetjachinadanö Jesúsma teachinobe Dios mölejȩbe ö̧jobekwö.
Ja̧danö, ökwönöbi, kwitji̧mu tupadanö jojodönöbi kabatibö, ökwö kwö̧jinemi, balekwo̧nöda kabebö chujunakwo̧sa, isabenö otido jö̧a̧li̧danö otidakwo̧nöma. Jo̧bama isabenö okobe jwiinö chösödi̧danö, ja̧danö chomukwati̧danö otidö ö̧jakwo̧, ja̧danö jo̧banö iteda i̧tji̧mu tupadanö jojodönö chiyocha, jo̧badanö otiwanö tjotidakwedönöma. Jau Eli, jobadöma ba̧kwelöjatebö omudawö chujunajökwe la'aka luwo̧ öba a'otjö otidö tjö̧jakwedö.
Ja̧danö kwöba a'otjö wene chujuna̧li̧ omukwatökönö söbebö loköbobö atebakwö chuluwo̧. Jau chuluwo̧, chöwaisakwö, ökwöma Isabenö Jo̧ wei̧ otidö, jo̧ba öpöjojojodönö ölakwabikwawö jo̧ja jö̧ba̧lö, ja̧danö ju'wibi chöwaisa, jejenö wei̧danö ölakwabikwawö kwö̧jiökwe, Isabenö Jo̧ma isabenö ökwönöbi, kitji̧mu tupadanö jojodönöbi ujunakobe, inesö la'aka luwedö kwö̧jaduwinö. Ja̧danö chöwaisa chuluwo̧, Dios ökwönö pjaatobetjö̧, ina kwö̧jayi bakwo̧bi ökwönö suli̧ öwaedobö jwiakobe.
ကြော်ငြာတွေ