2 Samuel 17:23 - Dios Iwene

^23-24 Ja̧danö, pebibajadö, Davidbi jo̧bakwö kwebachadöbi tupakwö Majanayin comunidadbe tji̧'yinobe. Ja̧danö, Ajitofel waisanö lȩebaja̧ Absalon a̧ja̧kwiökökwe, Ajitofelma öwaisinobe, Davidnö ujuluwobö omukwati̧ waekwakobe jö̧ba̧lö. Jo̧kwajabetjö̧ ajwi bulu oma'anö wanawaka wanajo̧, bulunö wa̧nö ȩwa̧jinobe itebo comunidad Guilobe. Jobe ichibö, woaja̧ ikena jawa ömöledönö weinobe, ö'wö batibaja̧ ikenama chitea jawa baikwö ja̧baduwi jö̧ba̧lö. Ikenama, webajo̧, nubawö ö'wö baibinobe. Ikenama ömöledöma Ajitofelnö tjödinobe, abe'donö tjödinemi ötölanö. Ja̧danö, Absalonma israel jojodö ölakwabikwawa jojodökwö Jordan ojwe peibinobe, Davidnö lubö.

2 Samuel 17:23 ပူးပေါင်းရင်းမြစ်များ

2 Samuel 15:12

Jejenö 'ya̧jo̧, Hebrontjö Absalonma kwabö juwö Diosnö iyinobe. Ja̧danö, jobe Hebronnö ö̧jonö, ju'wibi ja̧inobe, bakwo̧ waiso̧nö jwöinobe, Guilo comunidad jojo Ajitofel mikwo̧nö, Guilotjö ichö, Absalonnö la'aka luwo̧ baibakwa̧ jawa pjaatobö. Jo̧ba Ajitofelma, jwiinö waiso̧, ja̧danö ajayinö Davidnö pjabatina, otiwanö ja̧akwa̧ öwaisobö. Ja̧danö, ajayitjö bajalekwönönö Absalonnö ösödadöma tjö̧ba̧jekwachinobe, Davidnö kabatibö Absalonnöda la'aka luwo̧ baibanö tjujunobö omukwatadöma.

2 Samuel 15:31

Mösa'o önöchonö, ju'wedö Davidnö yötjawinobe, —Waiso̧ Ajitofelbi Absalonnö pjaatobe, kwö̧bemi Absalonda la'aka luwo̧ ö̧bobö, —jö̧ba̧lö. Yötjawökwe, Davidma Diosnö aebinobe, —Isabenö Jo̧, ökwönö ateba, Ajitofel waisanö yöawi̧ma, waisakwawa jwii̧ yöawakwawa baibanö a̧bulewi̧ baibanö pjakatobö, —jö̧ba̧lö.

2 Samuel 16:23

Ja̧ möle okobe deinö Ajitofelnö tjomukwatinobe, Ajitofelma jwiinö waiso̧, Dios waisanö yöawi̧danö jwaikwöda waisanö yöbawo̧ Ajitofelma, jö̧ba̧lö. Jobekwö tjomukwatinobe Davidbi, Absalonbi, ja̧danö ba̧kwelöjatebö Ajitofel lȩekwa yöawi̧danö ja̧biatjinobe.

2 Samuel 17:22

Jejenö yötjawiökwe, Davidma juluwanö a̧la̧ibö peibinobe, jo̧babi okobe deinö jo̧bakwö kwebachadöbi. I̧yada yöteda petjibinobe, ja̧danö dewachakwa̧ abönö, okobe deinö bakwo̧bi ö̧ji̧bökönö Jordan ojwe petjibinobe.

1 Reyes 16:18

Jejenö balediökwe, Zimrima edö öwaisachibinobe, chöpöjojo Omrima chitebo Tirsa comunidad ujuluwajabe, jö̧ba̧lö, jokwajabetjö̧ inesö la'aka luwo̧ eju okwa, 'diinö tjöekwemi okwa tebachö, o̧do juwö lobö, itedada juwawö loinobe.

2 Reyes 20:1

Ja̧ möle jenanö, la'aka luwo̧ Ezequiasma jwiinö 'dö̧achinobe, ö'wö baibo jö̧a̧lenanö. Ja̧danö, Dios yöawi̧ yöbawo̧ Isaiasma ichibö yöawinobe, —Baikwö yöawobe Isabenö Jo̧ma ökwönö, –Juluwanö ö'wö bakibakwo̧ja, bi̧ya kwö'wöchi̧tjö kwö̧bibajökakwo̧ja, jo̧kwajabetjö̧ ö'wö bakibaja̧ ikena jawa webö yökawo kwömöledönö, —jö̧ba̧lö yöawinobe Isaiasma.

Diosnö ösödo̧ Job mikwo̧ usula emawina jawa 31:3

Dios wei̧ a̧ja̧kwöködöma, suli̧ waekwi̧ jawa emadö, sulabenö ja̧badöma söbebö loawa jawada emadö, jö̧tö. Ja̧ jawa chemapji jö̧ba̧lö, otiwanö Dios wei̧ a̧ja̧kwö chö̧jijatö.

Proverbios 16:18

Ja̧danö, ju'wibi yötawa: Bakwo̧ma itedada omukwatena, ötjödasa ju'wedötjö bajalekwönönö waiso̧ma, jö̧ba̧lö. Isabenö yötawa: Ötjödasa waiso̧ma, jö̧ba̧lö, omukwato̧nöma ju'wi mölȩ jwiinö labi̧ jawa baledakwo̧. Ja̧danö, ju'wibi yötawa: Bakwo̧ma ju'wedönö nijakwönönö edö omukwatena, bidöma mikwawöködö jö̧ba̧lö. Isabenö yötawa: Jobekwö omukwato̧ma ju'wi mölȩ itedada usulaso̧da ö̧jakwo̧.

Proverbios 19:3

Ja̧danö, ju'wibi yötawa: Isabenö, bakwo̧ jweinö omukwatökönö ö̧jobetjö̧ itedada wene jwöbekwo̧. Jobekwö jo̧banö wene nöinö baledena iteda jawaijayonö Isabenö Jo̧nöda o'wo̧ sulinö edö labinö jwöbeba̧lo̧, ökwöda jawa, jö̧ba̧lö.

Isaías 38:1

Ja̧ möle jenanö, la'aka luwo̧ Ezequiasma jwiinö 'dö̧achinobe, ö'wö baibo jö̧a̧lenanö. Ja̧danö, Dios yöawi̧ yöbawo̧ Isaiasma ichibö yöawinobe, —Baikwö yöawobe Isabenö Jo̧ma ökwönö, –Juluwanö ö'wö bakibakwo̧ja, bi̧ya kwö'wöchi̧tjö kwö̧bibajökakwo̧ja, jo̧kwajabetjö̧ ö'wö bakibaja̧ ikena jawa webö yökawo kwömöledönö, —jö̧ba̧lö yöawinobe Isaiasma.

Mateo 27:5

Ikenama Judasma tjiyina balada jobe Dios eju okwa nijibe ikwö loinobe, ja̧danö jobetjö labebajo̧, nubawö ö'wö baibinobe.