2 Samuel 15:31 - Dios Iwene

³¹ Mösa'o önöchonö, ju'wedö Davidnö yötjawinobe, —Waiso̧ Ajitofelbi Absalonnö pjaatobe, kwö̧bemi Absalonda la'aka luwo̧ ö̧bobö, —jö̧ba̧lö. Yötjawökwe, Davidma Diosnö aebinobe, —Isabenö Jo̧, ökwönö ateba, Ajitofel waisanö yöawi̧ma, waisakwawa jwii̧ yöawakwawa baibanö a̧bulewi̧ baibanö pjakatobö, —jö̧ba̧lö.

2 Samuel 15:31 ပူးပေါင်းရင်းမြစ်များ

2 Samuel 15:12

Jejenö 'ya̧jo̧, Hebrontjö Absalonma kwabö juwö Diosnö iyinobe. Ja̧danö, jobe Hebronnö ö̧jonö, ju'wibi ja̧inobe, bakwo̧ waiso̧nö jwöinobe, Guilo comunidad jojo Ajitofel mikwo̧nö, Guilotjö ichö, Absalonnö la'aka luwo̧ baibakwa̧ jawa pjaatobö. Jo̧ba Ajitofelma, jwiinö waiso̧, ja̧danö ajayinö Davidnö pjabatina, otiwanö ja̧akwa̧ öwaisobö. Ja̧danö, ajayitjö bajalekwönönö Absalonnö ösödadöma tjö̧ba̧jekwachinobe, Davidnö kabatibö Absalonnöda la'aka luwo̧ baibanö tjujunobö omukwatadöma.

2 Samuel 16:23

Ja̧ möle okobe deinö Ajitofelnö tjomukwatinobe, Ajitofelma jwiinö waiso̧, Dios waisanö yöawi̧danö jwaikwöda waisanö yöbawo̧ Ajitofelma, jö̧ba̧lö. Jobekwö tjomukwatinobe Davidbi, Absalonbi, ja̧danö ba̧kwelöjatebö Ajitofel lȩekwa yöawi̧danö ja̧biatjinobe.

2 Samuel 17:14

Jejenö yöa̧liawö̧, Absalonbi, okobe deinö israel jojodö Absalonkwö ju̧kwadöbi a̧ja̧kwö, —Otiwa, —jö̧ba̧lö yötja̧linobe, —Bite Husay waisanö yöa̧laja̧ma, Ajitofeltjö bajalekwönönö waisanö yöa̧lajabe, —jö̧ba̧lö, ja̧danö yöa̧laja̧danö ja̧tjobö omukwatö tjujuninobe. Jo̧kwaijayonö jejenö Husay yöa̧li̧ tjösödi̧ma, Isabenö Jo̧ omukwatö ujuninadanö baledinobe. Isabenö Jo̧ma, Ajitofel waisanö yöa̧li̧ tjöpöjödobö weinobe, Diosma Absalonnö lȩebobö omukwatö ujuninobetjö̧.

2 Samuel 17:23

Ja̧danö, pebibajadö, Davidbi jo̧bakwö kwebachadöbi tupakwö Majanayin comunidadbe tji̧'yinobe. Ja̧danö, Ajitofel waisanö lȩebaja̧ Absalon a̧ja̧kwiökökwe, Ajitofelma öwaisinobe, Davidnö ujuluwobö omukwati̧ waekwakobe jö̧ba̧lö. Jo̧kwajabetjö̧ ajwi bulu oma'anö wanawaka wanajo̧, bulunö wa̧nö ȩwa̧jinobe itebo comunidad Guilobe. Jobe ichibö, woaja̧ ikena jawa ömöledönö weinobe, ö'wö batibaja̧ ikenama chitea jawa baikwö ja̧baduwi jö̧ba̧lö. Ikenama, webajo̧, nubawö ö'wö baibinobe. Ikenama ömöledöma Ajitofelnö tjödinobe, abe'donö tjödinemi ötölanö. Ja̧danö, Absalonma israel jojodö ölakwabikwawa jojodökwö Jordan ojwe peibinobe, Davidnö lubö.

2 Samuel 17:5

Jo̧kwaijayonö, Ajitofel yöa̧li̧ ösödijayonö, Absalonma yöa̧linobe, —Husaynöbi jwöbaduwi, jo̧ba waisakwawa ji̧ lȩekwabi da̧ja̧kwobö, Ajitofel omukwati̧danö omukwatojobö jö̧ba̧lö.

2 Samuel 17:7

Abebö a̧ja̧kwökwe, Husayma, —Chedemi babe Ajitofel yöa̧laja̧danö ja̧köboböma otiwökena, baikwö labebö lobö yötawa:

Diosnö ösödo̧ Job mikwo̧ usula emawina jawa 5:12

—Ja̧danö ju'wibi, suli̧ tjöwaedotö jö̧ba̧ladö suli̧ tjöwaedakwa̧ waisanö omukwatö tjujunijayonö, otiwanö tjöbeba̧lö pjabato̧ Diosma, omukwatö tjujunaja̧ badekwachinö suli̧ tjöwaedapji jö̧balö.

Isaías 19:3

—Egipto jojodö waisanö omukwatö tjujunaja̧ma waekwobö wetocha, ja̧danö waekwiawö̧, tjo̧'wo tjo̧bekwö tjö̧jakwedö, –Ayö, dakwö ja̧dakwajö, –jö̧ba̧lö. Ja̧tjakwa̧ tjöwaisachibotö jö̧ba̧lö, o̧'wo jawa tjösödawö̧nöbi atjebakwedö, jadanö ö'wö babibinadö tjo̧'wo luwo̧nö abebö tja̧ja̧kwotö jö̧ba̧lö, mea boawa otidadönöbi, ju'wedö ö'wö babibinadö tjo'wo luwo̧nö yöbaladönöbi abebö tja̧ja̧kwakwedö.

Isaías 44:25

Ötjöma tupakwö baledakwa̧ yöbawadösa jö̧ba̧lö omöna yötja̧li̧ waekwobö webo̧sa. Ötjöma baledi̧ edö yadakwö baledakwa̧ yöba̧ladö tabakwö tjö̧jobö webo̧sa. Ja̧danö waisadö waisanö yötjawi̧ balewö lobo̧sa waisakwawa jwii̧ yöawakwawa baibanö balewö lobo̧sa.

Juan 13:18

Ja̧danö, ökwödötjö okobe deinöma yötawökö. 'Da̧batö chujuninawö̧nöma chöwaisawö̧. Jo̧kwaijayonö ökwödötjö bakwo̧ ötjönö iyö loakwo̧ma. Jo̧bama benada bo̧, Dios iwene damötjö yöawinadanö badekwachakobetjö̧. Baikwö yöawobe Dios iwenema: Bakwo̧ ötjökwö kwo̧ma ötjönö iyö loakwo̧, jö̧ba̧lö, yöawobe Dios iwenema, damötjö tjiwȩyudinama.

1 Corintios 1:20

Ja̧danö, jejenöobetjö̧, böjȩ jojodötjö waisadöma, ¿isabenö waisadötjobeji̧? Ja̧danö, nöinö waisachadöma ¿isabenö waisadötjobeji̧? Ja̧danö, nöinö ba̧nö yöa̧lakwawa luwedöma, ¿isabenö waisadötjobeji̧? Jobadöma isabenö waisadömaökö chömöledö. Diosma baikwö i̧sebinobe chömöledö, böjȩ jojodö: Aaa, biya̧ma waisakwawa ji̧ jö̧ba̧lö tjomukwati̧ma, isabenö waisakwawa jwii̧ jö̧ba̧lö.

Santiago 3:15

Isabenö bakwo̧ ju'wedönö o̧'wo̧ luwo̧nö sulabenö edö, ja̧danö, ö'wiawö edö, ja̧danö, iteda ösödi̧da omukwatö, Ötjödasa, jö̧ba̧lö, omukwato̧ma Dios öibökökwe. Jo̧bama Awetjada öibökwe, jelobekwö sulabenö omukwatinö öibökwema. Waisanö omukwatö̧kö̧. Ja̧danö, böjȩ jawa ösödadö tjomukwati̧da omukwato̧, Diosnö wajwibadö tjomukwati̧danö.