2 Reyes 8:7 - Dios Iwene

⁷ Ja̧danö, ju'wi möle, Eliseoma Siria niji la'aka comunidad Damascobe i̧'yinobe. Ja̧ möle, Siria la'aka luwo̧ Ben Adadma, 'dö̧achinobe, ja̧danö a̧ja̧kwinobe, —Dios yöawi̧ yöbawo̧ Eliseoma, Damascobe ichibajabe, —jö̧ba̧lö.

2 Reyes 8:7 ပူးပေါင်းရင်းမြစ်များ

Génesis 14:15

Jobe ichibö ömöayedönö wainökwena tji̧'yobö webijetö, la'aka luwedö tjuju̧kwobekwö, yö̧te. 'Ya̧jadöma juluwijadötö jobadö la'aka luwedönö, tjömöayedö guardia luwedönöbi, dötjibajinö. Ja̧danö döbibajadönö lubijadötö ödö, Hoba ichibanö, Damasco u'dakwö.

1 Reyes 11:24

Hadad Ezer ö̧jelö döbibajo̧, ju'wedö la'aka luwo̧nö öpöjödadönö o̧ko̧kodinobe, iteda ömöayedö batjibanö, ja̧danö jobadökwö jelobekwena naukwabinö tjölakwabikwawinobe. Jemi ikenama, Davidma Soba la'aka luwonö Hadad Ezernö ujuluwinobe, jadanö juluwajo̧ ölakwabikwawa jojodönö kwabawö loinobe. Jejenö balediökwe, Rezonma Damasco comunidadbe i̧'yinobe, ja̧danö ichibiawö̧, jobe ju̧kwadöma Rezonnö tjujuninobe, siria niji la'aka luwo̧ baibanö.

1 Reyes 13:1

Ja̧danö, jobe iyobö ö̧jemi ja'ötjö, Isabenö Jo̧ weökwe Dios yöawi̧ yöbawo̧ bakwo̧ma Juda nijitjö ichajo̧ ichibinobe Betelbe, Jeroboan ina iyawöte badeibö ja̧nö, iyobö ö̧jemi ja'ötjö.

1 Reyes 15:18

Jejenö balediökwe, baikwö ja̧inobe Asama, iteda eju lödawȩko̧ okwa ji̧ orobi, platabi o̧ko̧kodinobe, jadanö okobe jwiinö Isabenö Jo̧ eju lödawȩko̧ ji̧ orobi, platabi o̧ko̧kodinobe, jadanö ko̧ko̧dajo̧ iteda ömöayedönö iyö weinobe, e'ewö tji̧'yobö Damasco comunidadbe, Siria niji la'aka luwo̧ Ben Adad itebo comunidadbe, jadanö ichibajadö, la'aka luwo̧ Ben Adadnö iyö Asa yöa̧li̧ jo̧banö yötja̧lobö baikwö:

1 Reyes 20:1

Ja̧danö, Siria niji la'aka luwo̧ Ben-adadma, iteda ömöayedö ölakwabikwawa jojodönö o̧ko̧kodinobe, israel jojodönö ölakwabikwawö ö̧jakobetjö̧. Ju'wedö tjitebokwena la'aka luwedö treinta y dosbedö la'aka luwedöma, Ben-adad ömöayedö tjö̧jinobe, jadanö jobadöbi, tjömöayedö ölakwabikwawa jojodöbi, tjajwimu kabayudönöbi öbibö, tjiteaka kolukiya ichejebö, Ben-adadkwö tji'yinobe Samariabe. Samariabe ichibajadö, comunidad tjötjösawinobe, jadanö comunidad tjujuluwobö metjibinobe.

1 Reyes 20:34

Jejenö lȩlöjinö ediökwe, Ben-adadma Acabnö yöa̧linobe, —Acab, chabe'do kwabe'dokwö ölakwabikwawö 'döebina comunidadbiyama, ökwönö tjetatakwo̧sa. Ja̧danö ju'wibi yötawakwö, damötjö chabe'doma ökwödö siria jojodö ditea iyawemi otidinobe, kwitebo comunidad Samariatjöma, jö̧tö? Ötjö chitebo comunidad Damascotjö ökwöbi kwotidobö wetena, jobetjö ökwödö israel jojodö kwiteaduwi mikwanö kwiyaduwakobetjö̧, —jö̧ba̧lö yöa̧linobe. Yöa̧liökwe, ösödinobe Acabma, ja̧danö bakobe pjabatakwawö tjö̧jakwa̧ wene yöbawö tjujuninobe, Acabbi, Ben-adadbi. Ikenama, Ben-adad ȩwa̧jobö webö loinobe, ja̧danö wene jwiinö itebobe ȩwa̧jinobe.

2 Reyes 1:2

Acab ikena la'aka luwo̧ma, Acab itji̧ Ocozias mikwo̧ma, israel niji inesö la'aka luwo̧ ö̧jinobe. Ja̧danö ju'wi möle, itebo comunidad Samarianö ja̧nö, eju mösȩko̧nö ö̧jemi ja'ötjö, ventanasa'do 'daobe meinobe Ocoziasma, jwiinö inia tjöbo̧ baibanö. Jo̧kwajabetjö̧, inia tjöbo̧ ja̧nö, baledakwa̧ öwaisotö jö̧ba̧lö, iteda ömöayedönö weinobe, —Filisteo jojodö tjitebo comunidad Ecron jojodö tjösödökwe Baal Zebubnö abebö a̧ja̧kwö kwi̧'yaduwo, bi̧ya inia tjöbo̧ chö̧ji̧tjö̧ chö̧bibakwojobö jö̧ba̧lö yötjawakobetjö̧, —jö̧ba̧lö. Ja̧danö weawö̧, abebö tja̧ja̧kwotö jö̧ba̧lö tji̧'yinobe.

2 Reyes 2:15

Jobekwö baledi̧ tjedinobe Jericonö ju̧kwadö Dios yöawi̧ yöbawadöma, ja̧danö badeibö Eliseonö tjedenama, edö yötja̧linobe, —Aaa, ajayinö Dios ujulutjö Elias ujuna̧linama, Eliseoda ujuna̧lobe babema, —jö̧ba̧lö. Ja̧danö Eliseo ichobekwö 'ya̧wibö, öba a'o bȩbachibö tjöbamatinobe, —Duluwo̧ja, —jö̧ba̧lö.

2 Reyes 5:20

Eliseo ömöayo̧ Giezima yöa̧linobe itedada, —Chuluwo̧ Eliseoma Naaman iyi̧tjö emo jö̧a̧lajabe, midökönö jo̧ba siria jojo ȩwa̧jobö weoko jö̧a̧lajabe. Iyobö ichejebajayonö, emö̧kö̧ chuluwo̧ma. Jo̧kwaijayonö ötjöma isabenö iyi̧tjö chemakwo̧sa, Isabenö Jo̧ öba a'o, isabenö yöta̧la, ökömanö ö'öbakwawö, iyi̧tjö chemakwo̧sa, —jö̧ba̧lö.

2 Reyes 6:12

Yöa̧liökwe, ömöayedötjö bakwo̧ atadinobe, —Chuluwo̧ la'aka luwo̧, ökwödö kwömöayedötjö bakwo̧bi pjabatöködösa Israel la'aka luwo̧nö, baikwö labebö lobö yötawakwö baledi̧ma: Dios yöawi̧ yöbawo̧ Eliseoma Israel nijinö jo̧, ja̧danö jo̧bada okobe jwiinö yöka̧li̧ jawa yöbawo̧ Israel la'aka luwo̧nö. Jau chuluwo̧, kwabȩko̧nö ja̧nö yöka̧li̧ jawabi waiso̧ Eliseoma, ja̧danö Israel la'aka luwo̧nö yöbawo̧, —jö̧ba̧lö atadinobe.

2 Reyes 6:24

Jemi ikenama, ja'yubenö lekwajabetjö̧ Siria la'aka luwo̧ Ben Adad mikwo̧ma, okobe deinö ömöayedö ölakwabikwawa jojodönö o̧ko̧kodinobe, ja̧danö ko̧ko̧dajo̧, Israel niji la'aka comunidad Samariabe 'ya̧nö, tjötjösawinobe, israel jojodönö tjujuluwobö.

2 Reyes 8:6

Yöawökwe, jobujunö abebö a̧ja̧kwinobe, ja̧danö baledina jawa yöjawinobe. Jemi ikenama la'aka luwo̧ma iteda ömöayedötjö bakwo̧nö weinobe, —Bisu jiteainama, okobe jwiinö tjekatobö otidi, ajayinö jujuna̧lina yemidanö jujuna̧lakobetjö̧. Ja̧danö nijidamaökö, jöbatjonö pokwina mikwawi̧bi tjekatobö wetakwö, lajebina möletjö, babe möle baibanö jöbatjo pokwina mikwawi̧bi tjekatojö, —jö̧ba̧lö weinobe.

Isaías 7:8

Jau, chöba a'otjö juluwöködö jobadö bö̧je luwedöma, baikwö yöta̧la: Siria nijitjö la'aka comunidadma, sule Damasco comunidadda, ja̧danö Damasco comunidad la'aka luwo̧ma, sule Rezin mikwo̧da. Ja̧danö israel niji baikwö yöta̧la, ja'yubeda lekwajabetjö̧ tjöpöjojodöma söbebö lotjakobe israel nijima, israelsaso ötjabawö̧ma deinö baibanö.

Hechos 17:6

Jo̧kwaijayonö Pablo, Silas debijadötö. Detjiawö̧ Jasónnöbi, ju'wedö Jesúsnö ösödadönöbi do̧batibö tötöbö 'yi̧jadötö la'aka luwedö tjuju̧kwobekwö. Jobe ichibö la'aka luwedönö labinö yöba̧lijadötö: —Duluwedö, belö ömadöma du̧ju̧taja tjichijatö baima. Jobadöma bai tjichakwa̧ abönö jelobebi, jelobebi 'ya̧jadö jojodö tjölakwabikwawinö yöbawinadö. Babema jelobe sulabenö yötjawinadanö yöbawö tjichijatö bemi comunidadnö.

Deuteronomio 33:1

Ja̧danö, Dios ömöayo̧ Moises ö'wö baibakwa̧ abönö, israel jojodönö yöawinobe, Dios jobadönö pjaatakwa̧ jawama,

Jueces 16:2

Jejenö ichibiawö̧, Gaza comunidad jojodöma tja̧ja̧kwinobe, —Sansonma ditebo comunidadbe ichajabe, —jö̧ba̧lö. A̧ja̧kwajadö, ko̧ko̧kwö tjiteada̧linobe Gaza comunidad ömadöma, yȩayi a̧la̧ibenama, jo̧banö kwabö lotjobö. Tjomukwatinobe, —Yȩayi dewachenama, comunidadtjö laebobö a̧la̧ibakobe Sansonma, ja̧danö laebobö jö̧a̧lenada jo̧banö kwabö lodakwedösa, —jö̧ba̧lö, jo̧kwajabetjö̧ mebibökönö, yö̧te baledibanö 'wi̧inö tjiteada̧linobe comunidad apjudetjö.