2 Reyes 3:27 - Dios Iwene

²⁷ Jobekwö balediökwe, Moab la'aka luwo̧ma iteda itji̧ abönö pöe, jo̧ba ikena la'aka luwo̧ baibo jö̧ba̧lo̧nö do̧batö, kwabö juwö iyinobe ösödökwe o̧'wo jawanö, öpöjojodötjö ö̧jibakobetjö̧. Comunidad tjöekwemi wame, öwawinö jobekwö kwabö juwö iyinobe Moab la'aka luwo̧ma, ja̧danö iyaja̧ edö dameakwö tjöpöjödinobe Israel jojodöma, inesö labi̧, jö̧ba̧lö. Jemi ikenama, ölakwabikwawö kabatibö, idöda tjitebobe tjȩwa̧jinobe.

2 Reyes 3:27 ပူးပေါင်းရင်းမြစ်များ

Génesis 22:13

Ikenama Abrahamma jemi tupakwö edemi obejama sȩakanö i'yekanö akwachibajo̧ ji̧jetö. Jo̧ba ö̧jobekwö 'ya̧nö jebatö do̧batö ichejebijetö juwö iyawemi otidajobekwö. Jobetjö obejanöda 'wibebö lobö juwö iyijetö, Diosnö ösödö. Abrahamma itji̧ Isaac imidawo jö̧a̧laja̧ma balekwo̧nö juwö iyijetö Diosnö.

Génesis 22:2

Ja̧danö, Diosma webijetö Abrahamnö: —Abraham, ökwö kwitji̧ Isaacnö, jo̧dawo̧nö, ile nikebökwenöma e'ewö 'ya̧wi Moria nijibe. Jobe mö'ösa'otjö, ökwönö chi̧sebakwa'otjö, juwö iyawobekwö 'ya̧wi. Jobetjö kwitji̧nö, ökwösobu ebawinö ö̧kwö̧la̧ 'wibebö loköbajökwenö juwö kwiyo, ötjönö ösödö— webijetö.

1 Reyes 20:13

Ja̧ baledemi ja'ötjö, Dios yöawi̧ yöbawadötjö bakwo̧ma, israel la'aka luwo̧ Acab öba a'o ichibö yöawinobe, —Baikwö yöawobe Isabenö Jo̧ma, –Idö inesö ba̧jȩkwadö ölakwabikwawadönö kwedobe, jö̧tö? Baikwö yötawakwö, babe möle jobadönö kwujuluwobö chiyakwo̧sa, ja̧danö jejenö chiyiökwe, ötjönö kwöwaisachibakwo̧ja, ötjöma Isabenö Jo̧sa, —jö̧ba̧lö, Dios yöawi̧ yöawinobe Acabnö.

1 Reyes 20:28

Ja̧danö, Dios yöawi̧ yöbawo̧ma Israel la'aka luwo̧ öba a'o ichibö, yöawinobe: —Baikwö yöawobe Isabenö Jo̧ma, –Siria jojodöma ötjönö yötja̧lajabe, -Isabenö Jo̧ma mösa'iju jȩmi nijinöda ja̧nö juluwo̧, wabekoemi deobe Isabenö Jo̧ma, jobetjö ujuluwökena, -jö̧ba̧lö yötja̧linobe. Jo̧kwajabetjö̧, jejenö yötja̧linobetjö̧, jobadönö kwujuluwobö chiyakwo̧sa, bidö inesö bajȩkwadönö kwujuluwobö chiyakwo̧sa, ötjönö kwöwaisachibakobetjö̧, isabenö ötjödasa Isabenö Jo̧ma, —jö̧ba̧lö Isabenö Jo̧ yöawi̧ yöawinobe Acabnö.

1 Reyes 20:43

Jejenö yöa̧liökwe, israel la'aka luwo̧ma dameakwö, o̧'wo sulinö ewa̧jinobe, itebo comunidad Samariabe.

2 Reyes 3:26

Jobekwö balediökwe, Moab la'aka luwo̧ma edö öwaisachibinobe, —Ötjönö tjujuluwobeta, —jö̧ba̧lö. Ja̧danö, jobetjö döibajotö jö̧ba̧lö, Edom la'aka luwo̧ ö̧jemi badeibö, dötjibajotö jö̧ba̧lö mebibö tjölakwabikwawinobe, tjötjösawemi baledö dötjibajakobetjö̧, jo̧kwaijayonö waekwinobe.

Deuteronomio 12:31

Jau chömöledö, jobadö tjösödinadanöma kwösödaduwoko kwuluwo̧duwi Isabenö Jo̧ Diosnö chömöledö, baikwö yötawa: Jobadö tjösödawö̧nö ösödö ja̧tji̧ma, jwiinö suli̧ jawa ösödö ja̧badö, inesö suli̧ Isabenö Jo̧ öpöjödi̧ jawa. Jau chömöledö, isabenö jwiinö sulabenö ja̧bö tjösodobe o̧'wo jawa tjösödawö̧nö, idöda tji̧tji̧munöbi juwö tjiyobe, tjösödawö̧nö̧ iyawa baibanö chömöledö, jobadö tjösödi̧danö kwösödaduwoböma kwisakwaduwoko, la'akatjöda.

Jueces 11:31

isabenö chujuna̧litjö kwabö juwö chiyakwo̧sa. Amonitas jojodönö juluwajo̧, wene jwiinö chejube chichibobö pjakatitjö̧ma, cheju apjudetjö ajayinö labebo̧nö kwabö juwö chiyakwo̧sa, ökwö kwitea baibanö, ja̧danö jwiinö ubinö iyawa baibanö, kwabö juwö chiyakwo̧sa, —jö̧ba̧lö yöbawö ujuninobe.

Jueces 11:39

ja̧danö jawo̧dö du̧ju̧taja baledibajenama, jabe'do ö̧jobekwö jȩwa̧bijinobe. Ja̧danö, ajayinö yöbawö ujuninadanö, Jeftema itjijunö kwabö juwö iyinobe Diosnö. Ja̧danö, Jefte itjijuma la'akatjöda iso̧kwö jö̧jinokobe. Ja̧danö, ja̧ baledina omukwatö, o̧ba bakwabakwena israel jojodötjö ya̧dö ina tjilekwamunö emöködöma tjubudekwobe, Jefte itjijunö omukwatö. O̧ba bakwabakwena, ö'wejemu jawa möle baledibanö kwebachö tjubudekwobe, Galaad niji jojo Jefte itjijunö omukwatö.