2 Reyes 11:18 - Dios Iwene

¹⁸ Jemi ikenama, jobekwö yöbawö junajadö, okobe deinö jobe ju̧kwadö Juda jojodöma Baalnö ösödakwawejube 'ya̧nö, pjolö lotjinobe. Ja̧danö, Baalnö ösödakwawötebi, o̧'wo jawabi 'dabebö lotjinobe, ja̧danö Baaltjö jojodötjö ö'weje pjabato̧ Matan mikwo̧nö, ösödakwawöte a'otjö kwabö lotjinobe. Ja̧danö, ju'wibi tjöbeba̧lö eda̧ladönö ujuninobe Joyadama, Isabenö Jo̧ eju otiwanö tjötjeba̧lobö.

2 Reyes 11:18 ပူးပေါင်းရင်းမြစ်များ

1 Reyes 18:40

Ja̧danö, Eliasma jojodönö weinobe, —Okobe deinö Baal yöawi̧ yöbawadönö do̧bataduwi, jobadötjö bakwo̧bi döibapji jö̧ba̧lö, okobe deinö jobadönö do̧bataduwidönö, —jö̧ba̧lö. Weawö̧, jobadönö do̧tja̧tinobe, ja̧danö jemi ikenama Eliasma jobadönö öbibö i̧'yinobe Quison ojwebe, ja̧danö jobe ojwetjö, okobe deinö jobadö Baal yöawi̧ yöbawadönö kwabawö loinobe.

2 Reyes 10:21

Ja̧danö, Israel niji ba̧kwemeachibanö yöbawadönö weinobe, okobe deinö Baalnö ösödadö ichö tjo̧ko̧kokwobö, ja̧danö okobe deinö Baalnö ösödadö, bakwo̧bi deinö Samaria comunidadbe tjichibinobe. Ja̧danö, ichibajadö, Baalnö ösödakwaweju okwa tetjachinobe, Baalnö ösödakwaweju jwiinö su̧'bȩ baibenanö kabatö.

2 Reyes 10:25

Jemi ikenama, jwiinö ubinö iyawa juwajo̧, laebenama, Jehuma ölakwabikwawa luwedönöbi, ju'wedö tjöbeba̧ladönöbi weinobe, —Tebachö okobe deinö jobadönö kwabawö lobaduwidönö. Bakwo̧bi ö̧jiboböma webökönaduwi, —jö̧ba̧lö. Ja̧danö weawö̧, Baalnö ösödakwaweju okwa tebachö, okobe deinö jobadönö dȩdȩbö lotjinobe. Jemi ikenama, dȩdȩbö lobajadö, tjiteba'iju a̧petukwöchobe ikwö lotjinobe. Jemi ikenama, okwasȩko̧ okwa tetjachinobe.

2 Reyes 10:26

Tebachajadö, jȩko okwa jo̧, Baal o̧'wo jawa 'döbebö, latjebinobe, ja̧danö labebajadö, ökwölanö juwö lotjinobe.

2 Reyes 10:27

Jobekwö Baal o̧'wo jawa söbebö lotjinobe, ja̧danö Baalnö ösödakwaweju söbebö lotjinobe. Ja̧danö, Baalnö ösödakwawinejuma, yo'otjeju baibanö balewö lotjinobe, ja̧danö babe mölebi baibanö, yo'otjejuda jo̧be, ja̧ Baalnö ösödakwawinejuma.

2 Reyes 18:4

Jojodö möemitenia tjiyemi söbebö loinobe, ja̧danö o̧'wo jawa ösödakwawa o'iju 'dobö loinobe, ja̧danö Asera ötjabokonö ösödakwawa o'iju jubö loinobe. Ju'wibi, a̧ko'da o̧'wo jawa, broncetjö Moises otidinabi 'dabebö loinobe Ezequiasma. Jau, ja̧ Moises otidinama, Nehustan jö̧ba̧lö ötjabinobe israel jojodöma, ja̧danö sulabenö ja̧ Moises otidina ösödö, iyawa tjiyinobe, ja̧danö jobekwö sulabenö tjösödiökwe, 'dabebö loinobe Ezequiasma.

2 Reyes 23:10

Ju'wibi, tjösödökwe Molec ötjabökwenö iyawemi, Ben-hinom wabekonö ji̧ Tofet jö̧ba̧lö mikwemi iyawemima, Josiasma suli̧ öwaedinobe, jemi tupakwö juwedö tjitji̧mutjö iso̧ökö, isujuö̧kö̧ kwabö juwö Molecnö tjiyobö jwiakobetjö̧.

2 Reyes 23:14

Jobadönö ösödakwawa inawiyatjö otikwa o'iju 'dobö loinobe, ja̧danö Asera ötjabokonö ösödakwawa o'iju jubö loinobe, ja̧danö ja̧ ösödakwawa jawa ji̧nemi niji, jojodö tjiwe'iju ikwö loinobe, ja̧ ösödakwawemi suli̧ öwaedakobetjö̧.

2 Reyes 23:20

Ja̧ iyawemibiya suli̧ waedö, jobe möemiteniatjö iyawa iyö otidadönö kwabawö loinobe, ja̧danö iyawemikwena wame, jojodö tjiwe'iju juwö loinobe, iyawemi jwiinö suli̧ waekwemi baibanö. Jemi ikenama, ja̧ ja̧bö kabatajo̧, itebo comunidad Jerusalenbe ȩwa̧jinobe Josiasma.

Éxodo 32:20

Ikenama, tjotidajökwe pakaya itji̧danö ichekwo̧ o̧'wo̧ jawa tötöbö ökwölanö lobö juwijetö, oroma isobuda baibanö. Jemi ikenama jobu tiyuwachajena pjewö̧ko̧pja̧da baibanö 'do'dobijetö. Jo̧pja̧ lilibijetö ojwe ja'yuwödönö. Lilibö kabatö webijetö Israel jojodönö jödötjö tjowobö.

Isaías 2:18

Ja̧ möle, okobe jwiinö o̧'wo jawa söbebö loakobe Diosma,

Deuteronomio 12:2

Kwiteboduwinö ju̧kwadö, tjitebokwena jojodöma jelobetenia tjösödawö̧nö tjösödobe, mösa'iju möa'o wa̧pekwa'otjöbi, ja'yuwa'o wa̧pekwa'otjöbi, towibiya teebetjöbi. Ja̧danö tjitebo kwiteboduwi baibanö kwemaduwenama, okobe jwiinö tjösödawö̧nö ösödakwawemitenia jwiinö söbebö loköbaduwo.

Deuteronomio 12:3

Juwö iyawemitenia 'dobö pjolö loköbaduwo, ja̧danö ösödakwawa inawiya 'dobö loköbaduwo, ja̧danö tjösödoko Asera o̧'wo jawabi ökwölanö juwö loköbaduwo, ja̧danö ju'wi tjösödawö̧ o̧'wo jawabi bulatö loköbaduwo. Jwiinö jobadö tjösödawö̧nö ösödakwawa jawa söbebö loköbaduwo, bakobenö jobadö tjösödawö̧nö ösödakwawa jawa kwiteboduwitjö ja'yubebi jwiakobetjö̧.

Deuteronomio 13:10

Jobadöma kwuluwo̧duwi Isabenö Jo̧ Dios, Egipto nijitjö ju'wedö tjömöayedö kwö̧jinaduwelö ichejebina Diosnö kakatibaduwobö sulabenö ötjibobö tjisakwobetjö̧, jejenö inawiya ikwö kwabö loköbaduwobö ja̧kobe chömöledö.

Deuteronomio 13:5

—Ja̧danö sulabenö Diosnö kakatibaduwobö öbibadö, –Dios yöawi̧ yöbawadösa, –jö̧ba̧lö omöna yöba̧ladönöbi, –Tji̧'wi̧dinö tjedi̧ labebö lobadösa, –jö̧ba̧lö omöna yöba̧ladönöbi kwabö loköbaduwobö ja̧kobe chömöledö, kwuluwo̧duwi Isabenö Jo̧ Diosnö kakatibaduwobö sulabenö ötjibobetjö̧. Jau chömöledö, kwuluwo̧duwi Diosda Egipto nijitjö lakebaduwinö ichejebinama, jo̧bada ju'wedö tjömöayedö kwö̧jinaduwelö kwö̧jibaduwinö pjabatinama, jo̧kwaijayonö jobadö sulabenö öbibadöma jo̧ba wei̧ kakatibaduwobö ötjibobe, wanedö yötawa, Kwuluwo̧duwi Isabenö Jo̧ Diosma jweinö weinobe otiwanö kwekachaduwakwa̧ma manama, ja̧manöda otiwanö kwekachaduwobö, jo̧kwaijayonö jobadöma ja̧matjö 'da̧bachibö, jelobekwö kwi̧'yaduwobö ötjibobe, sulabenö. Jo̧kwajabetjö̧ jobadönö kwabö loköbaduwobö ja̧kobe, inesö suli̧ kwö̧'da̧deduwitjö̧ söbebö loköbaduwakobetjö̧.

Deuteronomio 13:6

—Jau chömöledö, isabenö Diostjö 'da̧bachibö, ju'wedö tjösödawö̧nö kwösödaduwobö öbibadönö kwabö loköbaduwobö jo̧be, baikwö yötawa: Ökwöda yöne kwöjawo̧bi, ökwöda kwitji̧bi, ökwöda kwitjijubi, kwilekwobi, jelo̧ yö̧ne kwömöledöso̧bi Diosnö kakatibaduwobö öbibö, –Ju'wedö tjösödawö̧nö dösödo, –jö̧ba̧lö sulabenö ötjibitjö̧ma, ile nikebaduwawö̧ tjö̧jijayonö, yayonö jobadönö kwabö loköbaduwobö ja̧kobe, ökwödöbi kwa'dödöbi wajwiköbaduwawö̧nö kwösödaduwobö sulabenö ötjibobetjö̧. Jau chömöledö, bö̧jȩ ba̧kwemeachibanö ju̧kwadötjö ju'wedö tjösödawö̧nö̧ kwösödaduwobö sulabenö öbibö, bemi nijinö ju̧kwadö tjösödawö̧nö kwösödaduwobö ötjibitjö̧bi, jelobe ödö ju̧kwadö tjösödawö̧nö kwösödaduwobö ötjibitjö̧bi,

Deuteronomio 13:9

jobadönö kwabö loköbaduwobö ja̧kobe. Yöne kwömöledö tjö̧jitjö̧böbi, yayonö jobadönö kwabö loköbaduwobö ja̧kobe, ja̧danö ökwöda jobadö sulabenö ötjibaja̧ kwa̧ja̧kwaduwobetjö̧, ökwöda ajayinö inawiya kwikwobö ja̧kobe, ja̧danö kwi̧sȩbaja̧danö okobe deinö ju'wedö israel jojodöbi inawiya tjikwobö ja̧kobe, debö tji̧'yenanö baibanö.