2 Reyes 10:7 - Dios Iwene

⁷ Ja̧danö, Jehu iwȩyudaja̧ tjedenama, juluwanö okobe deinö tjuluwo̧mine itji̧mu ömadönö do̧batö, tjuubiya tjubulatinobe, ja̧danö tjuubiya wi̧lȩyubiyanö anö, Jezreel comunidadbe wetjinobe, Jehunö.

2 Reyes 10:7 ပူးပေါင်းရင်းမြစ်များ

1 Reyes 21:19

Ichibajo̧, baikwö yökawonö: –Isabenö Jo̧ ökwönö yöa̧li̧ma, baikwö laebobe: Biyu batjo luwo̧nö kwabö lobajo̧, kwöbatjo baibanö 'dökebaji̧? –jö̧ba̧lö yöka̧lonö. Ja̧danö tupakwö yökawonö: –Isabenö Jo̧ma baikwö yöawobe: -Acab, Nabotnö kwabö loköbaduwenama, a̧wi̧lidöma Nabot ökwösobu 'dȩtjinobe, jö̧tö? Ja̧danö, jobe Nabot ökwösobu 'dȩtjinemima, ökwöda kwökwösobubi 'dȩtjakwedö awi̧li̧döma, –jö̧ba̧lö yökawo Acabnö, —Eliasnö weinobe Diosma.

1 Reyes 21:21

Baikwö yöawobe Isabenö Jo̧ma ökwönö: –Acab, tjowita. Ida̧ökö ökwönö lȩbebö, söbebö lotobö baibajabe, ja̧danö ökwönöbi söbebö lotocha, ja̧danö ju'wibi okobe deinö Israel nijinö ju̧kwadö ökwö yö̧ne kwömöledötjö ömadönö söbebö lotocha, tjömöayedöbedönöbi, tjömöayedöböködönöbi bakwainö okobe deinö söbebö lotocha.

2 Reyes 10:6

Yötja̧lökwe, yemidanö kwiyalusöja wȩyudö weinobe jobadönö, baikwö: —Isabenö bakobe ötjökwö ja̧dö, chömöayedö kwö̧jaduwitjö̧ma, ja̧danö weti̧ kwa̧ja̧kwaduwobö kwomukwataduwitjö̧ma, baikwö wetaduwakwö: —Kwuluwo̧duwi Acabmine itji̧mu tupadanö jojodö tjuubiya ko̧ko̧dö kwichejebaduwo, ja̧danö itekwai, babedajayena Jezreel comunidadbe chö̧jobekwö kwichaduwo, —jö̧ba̧lö wȩyudö weinobe. Ja̧ möle la'aka luwo̧ Acabmine itji̧mu tupadanö jojodö setentabedöma, Samaria comunidad la'aka luwedökwö tjö̧jinobe, ja̧danö jobadö Samaria luwedöma jobadönö da̧pedö tjö̧jinobe.

2 Reyes 10:8

Wetjiökwe, bakwo̧ ichibö yöawinobe Jehunö, La'aka luwo̧ Acab itji̧mu ömadö tjuubiya tjichejebajabe, —jö̧ba̧lö. Yöawökwe, —Comunidad apjude a'o mö japopo dopolatajanö kwödaduwo tjuubiyama, yȩayi dewachenanö baibanö jobe kwödaduwo, —jö̧ba̧lö weinobe.

2 Reyes 10:9

Ja̧danö, ikena möle dewachenama, labebö jojodö tjöba a'o jamatö yöa̧linobe jojodönö: —Chömöledö, ökwödöma kwuluwo̧mine Joram wei̧ kabatibinöködöja, ötjödasa chuluwo̧nö katatibobö omukwatinasa, ja̧danö omukwatajo̧ jo̧banö kwabö lobinasa̧. Jo̧kwajabetjö̧ Joramnö kwabö loawama, ökwödö jawamaökö, ja̧tjö wene jwibadöja. Jo̧kwaijayonö, ötjöma bidö ju'wedö Acab itji̧munö kwabö lobinö̧kö̧sa, tida bidönö kwabö lobinama?

2 Reyes 11:1

Jehu ajayinö Israel la'aka luwo̧ Joramnö kwabö loenama, Juda la'aka luwo̧ Ocoziasnöbi kwabö loinobe. Ja̧danö, Ocozias ojo'do Atalia jitji̧ ö'wö baibaja̧ jöwaisachibenama, isuda la'aka luwuju jö̧jobö jomukwatinobe. Jo̧kwajabetjö̧, okobe deinö jitji̧mine itji̧munö kwabö lojobö jisakwinobe, isudada la'aka luwuju jö̧jakobetjö̧.