Aebökwe, israel la'aka luwo̧ Acabma Dios yöawi̧ yöbawadönö o̧ko̧kodinobe, cuatro cientos jenanö ba̧jȩkwadö yöbawadönö. Ko̧ko̧dajo̧, jobadönö abebö a̧ja̧kwinobe: —Dakwö weobeda Diosma, Ramot Galaadbe ölakwabikwawö chi̧'yobö jo̧beji̧? Ölakwabikwawö chi̧'yobö jwiobeji̧? —jö̧ba̧lö. Abebö a̧ja̧kwawö̧, —Jau, ölakwabikwawö kwi̧'yo, ja̧danö duluwo̧ Diosma ökwö la'aka duluwo̧ kwujuluwobö pjaatakwo̧, —jö̧ba̧lö tjatadinobe.
2 Pedro 2:1 - Dios Iwene1 Jau chömöledö, Dios yöawi̧ yöbawadöma Dios O̧'wo̧ Luwo̧ yöawi̧da yötjawinobe, jo̧kwaijayonö, jobadö otiwanö yötjawonö, Dios yöawi̧ yöbawöködöbi yötjawinobe. Jobadöma Dios yöawi̧ yötjawököjayonö, Dios yöawi̧ yöbawadösa, jö̧ba̧lö omöna yötja̧linobe. Ja̧danö chömöledö, ökwödö kwö'da̧deduwitjö jobadöjayedö omöna yöbawadö tjö̧jakobe chömöledö, Dios iwene yöbawadösa, jö̧ba̧lö omöna yöba̧ladöma. Jobadöma isa̧ökö wene yötjawakobe, suli̧ tjöwaedotö jö̧ba̧lö. Ja̧danö ju'wibi, Duluwo̧nö, jobadö tjö̧jibobö midawinanö tjöpöjödakobe, la'aka luwo̧bö̧kö̧ jö̧ba̧lö. Jejenö suli̧ waedadöma, Dios juluwanö jobadönö lȩebobö ja̧badö chömöledö. အခန်းကိုကြည့်ပါ။ |
2 Pedro 2:1
73 ပူးပေါင်းရင်းမြစ်များ
¡Ayö! jö̧ba̧lö, okobe deinö Canaán nijinö ju̧kwadöma yebabidöda tjuju̧kwobe, kwujulu kwisȩbaja̧ yötjawi̧ tja̧ja̧kwajabetjö̧, jwiinö juluwo̧, jö̧ba̧lö. Jejenö, yebabinö tjuju̧kwobetjö̧ jobadö tjuju̧kwemi döbaledena wi̧inö tjö̧jobe, inawa wi̧achawa ji̧danö. Isabenö Jo̧, ökwödö, ökwö kwömöledö, Egiptotjö dö̧jibinö pjabatö lakebinawö̧ma jobadö tjuju̧kwemi döbaledenanö kabatö jejenö, wi̧inö tjö̧jobe.
Jau chömöledö, isabenö Dios weakwo̧ jö̧a̧linökwesa jö̧ba̧lö omöna yöba̧ladöma yötjawakobe, ja̧danö Dios yöawi̧ yöbawadösa jö̧ba̧lö omöna yöba̧ladöbi yötjawakobe. Jobadöma jojodö edajitjökö jawa tji̧sebakobe, Dios omudawö ujuninawö̧bi jobadö yötjawi̧ tjösödobö, jo̧kwaijayonö Dios omudawö ujuninawö̧tjobetjö̧ tjösödökakobe.
Ba̧jekwadö, Ötjödasa jojodö tjö̧jibinö pjabatö Dios weajökwesa, jö̧ba̧lö, yöba̧ladöbi, ja̧danö, Ötjödasa Dios yöawi̧ yöbawo̧sa, jö̧ba̧lö, yöba̧ladöbi tjichakobe. Jobadö omöna yöbawö tjichonöbi kwa̧ja̧kwaduwoko. Jobadöma tjo̧'wo̧ sulinö omukwatö jojodö edajitjökö jawa i̧seböbi, juluwi̧ jawa i̧seböbi tji̧sebakobe jojodö tjösödo jö̧ba̧lö. Ja̧danö, jejenö tji̧sebakobe Dios i̧tji̧mu baibanö 'da̧batö ujuninawö̧bi tjösödo jö̧ba̧lö. Jejenö tji̧sebijayonö waekwakobe, Dios i̧tji̧muma tjösödökakobe omöna yöba̧ladönöma.
Abebö tja̧ja̧kwökwe, Jesúsma atadö yöawinobe baikwö: —Chömöledö, ö'wiakwawönö kwö̧jaduwo, jelo̧ ökwödönö omöna yöa̧li̧ kwösödaduwapji jö̧ba̧lö. Ba̧jekwadö chiminö ichö yötjawakwedö, ötjödasa Dios weakwo̧ jö̧a̧linökwema jö̧ba̧lö, ja̧danö ju'wedöbi yötjawakwedö, 'dö̧ibaji̧ möle tjo̧wi̧ juluwanö baiba jö̧ba̧lö, jo̧kwaijayonö yötja̧li̧ ösödökönaduwi, ja̧danö tjö̧kömanöma 'yö̧könaduwi.
Ja̧danö, ökwödötjö okobe deinö jojodö bidöma otiwanö yöbawadö jö̧ba̧lö tjösödawö̧ma, Ayö, isabenö o̧'wo̧ tjo̧achö tjö̧jakwedö. Kwöwaisaduwa chömöledö, Bidöma otiwanö yöbawadö, jö̧ba̧lö jojodö tjösödawö̧ma, Dios yöawi̧ jweinö yöbawöködöda, ¿jö̧tö? Jau chömöledö, kwa'dödöma ¿didö yötjawi̧ a̧ja̧kwö, otiwanö yöbawadö jö̧ba̧lö tjösödinada, Dios yöawi̧ jweinö yöbawadöena, Dios yöawi̧ omöna yöba̧ladöena? Dios yöawi̧ omöna yöba̧ladönöda tjösödinobe, ¿jö̧tö? Jau chömöledö, Dios yöawi̧ jweinö yöbawadönö la'akatjöda ösödöködö böjȩ jojodöma. Jo̧kwajabetjö̧ ökwödö yökawaduwi̧ ösödö, Bidöma otiwanö yöbawadö, jö̧ba̧lö ökwödönö tjösöditjö̧ma, öwaetjöda öwawena, Dios yöawi̧ omöna yöka̧laduwobetjö̧ yökawaduwi̧ ösödadö jö̧ba̧lö. Ja̧danö, ju'wibi yötawaduwakwö: Jejenö Dios yöawi̧ omöna yöka̧laduwiökwe, Diosma isabenö ökwödönö lȩebakobe, damötjö ji̧nadö sulabenö yöbawadönö lȩebi̧danö— jö̧ba̧lö yöawinobe Jesúsma.
Jau chömöledö, ajayinöma ju'wedö Jesúsnö ösödöködöma Jesúsnö ösödöködötjijayonö, Jesúsnö ösödadödanö ichejekwö ökwödö Jesúsnö ösödadö dö'da̧de tjichibinobe, Cristo Jesúsnö ösödadö dö̧ji̧, Cristo Jesús midawö woinobetjö̧ Moisés iwȩyudina jawatjö dö̧jibina tjedo jö̧ba̧lö. Jobadöma ökwödönö suli̧ tjöwaedotö jö̧ba̧lö, yemidanö Moisés iwȩyudina jawatjö ömöayedödanö badibanö ja̧tjotö jö̧ba̧lö tjichinobe chömöledö,
Ja̧danö, Dios weina Moisés iwȩyudinatjö Dios lȩebi̧ma demo jö̧da̧linobe chömöledö, okobe jwiinö laebi̧danö ja̧dokobetjö̧. Jo̧kwaijayonö ökwödö Dios lȩebi̧tjö demo jö̧da̧linama, Cristonöda baibinobe. Dios lȩebi̧ma Cristonö baibinobe Dios iwene laebi̧danö. Baikwö laebobe Dios iwenema: Okobe deinö towinö la̧dönöma, Dios lȩebawö̧, jö̧ba̧lö laebobe.
Jejenö da̧peachadö badibenama, ökwödöma tjemu wajwibadödanö dö̧jökena, Dios iwenema. Ja̧danö, waisanö ja̧nö, ju'wedö wainö omukwatö yötjawi̧ma da̧ja̧kwökena. Wanedö yötawa chömöledö: Isowi, tjolanö nubökönö nönawowi, jwa̧lȩ'epjo ichobe balawa loobö jwa̧lȩ'epjo e'ewibobekwö 'yo̧wi. Ökwödöma jejenö dö̧jaduwoko. Jowi isowi balawa loobö jwa̧lȩ'epjo e'ewibidanöma e'ewibököwö̧sa, do̧'wo̧ luwo̧nö da̧peachö dö̧jenama. Ja̧danö ju'wedökwöma, ökwödönö tjo̧'wo̧ sulinö edö, sulabenö doma'a o̧pekwönö ja̧badöma tje'ewibököwö̧sa, isowi tjolanö nubökönö nönawowidanöma.
Ökwödöma wajwibadö omukwatöködödanöbedöja chömöledö, baikwö yötawa: Isabenö Jo̧ma kwabe'doduwibo̧, jo̧bada ökwödönö otidinobetjö̧, ja̧danö ju'wibi ökwödönö otidajo̧, kwiteboduwisaso juluwaso bakibaduwanö ujuninobe, jö̧tö? Isabenö otiwanö pjaatinobe chömöledö, ja̧danö jejenö pjaatiawö̧ balekwa mikwa jo̧banö kwöpöjödaduwobö otiwenaji̧? Sula chömöledö, jo̧banö kwösödaduwo jö̧ba̧ladöja.
Ja̧danö ju'wedöma yötja̧lena, Aaa, chi̧'wi̧di̧danö chedajabe, usulasedö mikwawöködö tjö̧ji̧danö dö̧jitjö̧ma otiwena, ja̧danö ángelesdönö dösöditjö̧ma otiwena, jö̧ba̧lö yötja̧lena. Jejenö ja̧böködöma sulabedö jö̧ba̧lö yötja̧lena, jo̧kwaijayonö jejenö yöba̧ladö wetji̧ma a̧ja̧kwökönaduwi. Jobadöma böjȩ jojodö tjomukwati̧da omukwatö, Otiwadösa, jö̧ba̧lö tjomukwatobe chömöledö,
Tjöbeba̧lakwawönö kwö̧jaduwo chömöledö, mikwa jwii̧ böjȩ waisakwawa jawa omöna yöba̧ladö yötjawi̧ a̧ja̧kwökönö, ökwödönö tjujuluwapji jö̧ba̧lö. Jobadö yötjawi̧ma, jojodö tja'dödö yötjawi̧ jawada, ja̧danö böjȩ a̧wȩtjö̧ yötjawi̧ jawada yötjawobe. Jobadö yötjawi̧ma Cristotjö ichökö ji̧ chömöledö, jo̧kwajabetjö̧ jobadö yötjawi̧ma a̧ja̧kwökönaduwi.
Jobadö 'wi̧inö batjibobö jo̧be, yötjawoko jö̧tja̧li̧ jawa yötjawobetjö̧. Ja̧danö, jejenö yötjawoko jö̧tja̧li̧ jawa yötjawobetjö̧, ju'wedö jojodö okobe deinö tjömöledökwö isabenö wene katjatibobe. Jejenö sulabenö yöbawadöma otiwanö omukwatöma yöbawöködö, sule nöinö balada tjemotö jö̧ba̧löda, jojodönö omöna yöbawadö.
Tito, Jesúsnö ösödadötjö bakwo̧ma Jesúsnö ösödadö ju'wedö Jesúsnö ösödadökwö tjölakwabikwawobö ja̧bo̧ ö̧jitjö̧ma, jo̧banö weköbo, jejenö ja̧bö ö̧ji̧ kaatibobö. Bakwötanö weköbajökwe ina a̧ja̧kwökötjö̧ma, yemidanö weköbonö, kaatibobö. Ja̧danö, dötölatajanö kaatibobö weköbajökwe ina a̧ja̧kwökönö jwaikwöda sulabenö tjölakwabikwawobö ja̧bo̧ ö̧jitjö̧ma, jo̧batjö 'da̧bachibö kwö̧jaduwo ökwödö Jesúsnö ösödadöma.
¿dakwö baledoböda Dios Itji̧nö kabatibö, jo̧ba yöawi̧ a̧ja̧kwöködönö? Chömöledö, Dios jobadönö lȩebi̧ma Moisés wei̧ a̧ja̧kwöködönö lȩebinatjö o̧penönö labobe. Isabenö, jobadöma tjo̧'wo̧nö sulinö edadö Dios Itji̧nö. Ja̧danö, jobadöma Jesús ökwösobu ebawinö woina omukwatö, tjo̧'wo̧ sulinö edö, Jesús ökwösobuma mikwawokobu, jö̧ba̧lö, omukwatadö. Chömöledö, Cristoma itedada ökwösobunö imidawinobe Dios 'yayi̧ balekwa yöbawö ujunina jamatö 'yo̧bö, ökwödö Dioskwö dichibobö pjabatö. Ja̧danö, jobunöda dichawedödanö batjibinobe, Dios öba a'o suli̧ jwibadöda. Jejenöijayonö Dios Itji̧nö kabatibö ösödöködöma, Mikwawokobu, jö̧ba̧lö, omukwatadö. Ja̧danö, jejenö omukwatadöma, Dios O̧'wo̧ Luwo̧nöbi, Mikwawö̧kö̧, jö̧ba̧lö, sulabenö omukwatadö. Yelösöda Dios O̧'wo̧ Luwo̧nöbi, ökwödönö pjabato̧nö, jojodönö lȩlö̧jino edo̧nöma jwiinö tjöpöjödobe. ¡Ayö! Jobadöma yelösöda Dios jwiinö lȩebakwawö̧.
Jau chömöledö, ökwödöma la'akatjöda Jesúsnö edinöködöja, ¿jö̧tö? Jo̧kwaijayonö, la'akatjöda Jesúsnö kwedinaduwököjayonö, jo̧banö ile nibebö ösödadöja, ja̧danö jo̧bama kwedaduwökökwejayonö, jo̧ba yöawi̧ ösödadöja, isabenö jö̧a̧li̧danö ja̧akwo̧ jö̧ba̧lö. Jejenö ösödö, kwo̧'wo̧ luwo̧duwi ösöwachibanö ja̧döja. Chömöledö, isabenö jwiinö kwo̧'wo̧ luwo̧ ösöwachibanö ja̧döja, ja̧danö jejenö kwo̧'wo̧ ösöwachibanö kwö̧jaduwi̧ma böjȩ jojodö tjomukwati̧tjö bajalekwönönö kwo̧'wo̧ ösöwachibanö kwö̧jaduwobe, kwo̧'wo̧ luwo̧ ösöwachibanö kwö̧jaduwi̧ma Diostjöda ichobetjö̧.
Chö̧ja̧wo̧dö chösödawö̧, a̧ja̧kwaduwitjö. Okobe jwiinö yöawakwawa kwa̧ja̧kwaduwi̧ma juluwanö kwösödaduwoko, Jweinö yöbawo̧, jö̧ba̧lö. Isabenö, bakwo̧ yöawi̧ a̧ja̧kwö ö'wiawakwa̧lö̧jönö kwa̧ja̧kwa̧laduwobö jo̧be, ba̧jekwadö omöna yöbawadö tjö̧jobetjö̧. Jau chö̧ja̧wo̧dö, ö'wiawakwa̧lö̧jönö kwa̧ja̧kwa̧laduwo kwöwaisaduwobö, Ite yöbawo̧ma ¿Dios O̧'wo̧ Luwo̧ öibökweji̧? Ja̧danö, yöawi̧ma ¿Dios O̧'wo̧ Luwo̧tjö̧ ichobeji̧? jö̧ba̧lö.
Ja̧danö, Diosma jejenö i̧sebobö kaatibokobetjö̧, jo̧ba, böjȩ teebetjö labebajo̧ma, ojwe okwatjö labebajo̧ öba a'o ja̧nö, ujulu i̧sebobe chedijatö. Jejenö ujulu i̧sebiawö̧ jo̧ba omöna yöa̧li̧ ösödö, jojodöma jo̧ba wei̧ a̧ja̧kwö ju̧kwadö. Ja̧danö, ojwe okwatjö labebajo̧ o̧'wo̧ jawa tjotidobö webo̧ kwölöte'onö dȩawatjö̧ woachibajökwe o̧'wo̧ jawama.
Jo̧bama baikwö yöawobe ökwödö Pérgamo jojodönö, jo̧banö ösödadönöma: Ötjöma chöwaisa, jobe kwiteboduwima Awetja ba̧nö wei̧danö jo̧be. Jo̧kwaijayonö chedemi ökwödöma jweinö omukwatö, otiwanö kwö̧jaduwobe, Jesúsnöda ösödadösa, jö̧ba̧lö. Ja̧danö, bakwo̧, ötjönö ba̧kwȩlö̧jatebö yöbawo̧, Antipas mikwo̧nö, kwabö lotjenabi ökwödöma kwo̧'wo̧duwi 'dibachibö kakatibinaduwokobe ötjönöma.
Jo̧bama baikwö yöawobe ökwödö Esmirna jojodönö, jo̧banö ösödadönöma: Ökwödö, Esmirna jojodönö inia tjököbaduwinö baledi̧ma chöwaisa. Yelösöda, jwibadöja, usulasedö babibinadöja, chöwaisa. Jo̧kwaijayonö, ökwödöma kwo̧'wo̧ luwo̧duwinö okobe jwiinö juna̧ladödanö kwö̧jaduwobe, böjȩ jawa jwiköbaduwijayonö. Chöwaisa, judío jojodötjö ju'wedöma omöna yötja̧lobe ökwödönöma, Sulabenö ja̧badö, jö̧ba̧lö. Jobadöma, Ökwödödasa Dios ömöledö, jö̧ba̧lö, yötja̧lijayonö, tjo̧'wo̧ luwo̧nö Dios ömöledö babibinöködö. Jobadöma Awetjanöda ösödadö.
Chömöledö ökwödö kwö̧jaduwi̧ma chöwaisa. Yelösöda kwime'dawaduwobe ji̧jayonö ina, ötjö wetina a̧ja̧kwö kwö̧jaduwobedanö ja̧. Ja̧danö, kwime'dawaduwijayonö ina ötjönö kabatibökökönö, Jesúsnö do̧'wo̧ wana̧ladösa, jö̧ba̧lö, otiwanö kwö̧jaduwobe. Jo̧kwaobetjö̧ ökwödönö apjude po̧bebo̧danö po̧bebo̧sa, chiwene yöbawö labebö kwi̧'yaduwobö. Ötjödasa po̧bebo̧ma. Bakwo̧, Po̧bebökönuwi, jö̧ba̧lo̧ma deobe.
Ja̧danö, tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö lo̧tjijatö. Lo̧tji̧ma 'yayi̧ lo̧awa, biya̧: Ökwöda jwiinö mikwawo̧ja, böja ösöja tö'awa'be kabebö kwedoböma. Ökwö, kwabö lotjinökweda, jwiinö mikwawo̧ja, kwökwösobu ebawinö kwimidawinobetjö̧. Ökwöda jwiinö mikwawo̧ja, jojodö Dios ömöledö batjibanö kwimidawinobetjö̧. Böjȩ bakwameachibanö ju̧kwadönö midawinaja, Dios ömöledö batjibanö. Bakwasokwena ju̧kwadönöbi, wainökwena tjiwene yöba̧ladönöbi, jelobebi, jelobe ju̧kwadönöbi, okobe deinö böjȩnö ju̧kwadönö midawinaja.
Ja̧danö, jobadö öwawöködöma labinö Diosnö atjeba̧li̧ cha̧ja̧kwijatö, baikwö: —Duluwo̧ Dios, ökwöma okobe jwiinö webo̧ja, suli̧ jwibo̧ja, jweinö yöba̧lo̧ja. ¿Dokwa lekwe kwite'ada̧lakwa̧da ökwödönö kwabö lobinadönö lȩkeboböma? ¿Dokwa lekwe kwite'ada̧lakwa̧da balekwa mikwa lȩbebö weköbakwa̧ma?—budekwabinö atjeba̧li̧ cha̧ja̧kwijatö.
ကြော်ငြာတွေ