2 Pedro 1:12 - Dios Iwene

¹² Yötawaja̧danö ja̧bö ja̧kwawama isabenö otiwobe, ökwödö Dios ömöledö ja̧bö dö̧jo jö̧ba̧lö chömöledö, jo̧kwajabetjö̧, ba̧kwȩlö̧jatebö ja̧ jawa kwomukwatibaduwobö yötawakobe. Ja̧ jawa ida̧ökö waisadöja, ja̧danö ida̧ökö ja̧ jawa omukwatö 'diinö ja̧döja chömöledö.

2 Pedro 1:12 ပူးပေါင်းရင်းမြစ်များ

Hechos 16:5

Ja̧ yötjawi̧ a̧ja̧kwö ösödijadötö jobe ju̧kwadö Jesúsnö ösödadöma, juluwachibanö tupakwö tji̧'yobö ösödö, tjo̧'wo̧ luwo̧ jawama. Ja̧danö, ju'wi möle jwiinö ju'wedöbi, ju'wedöbi, Jesúsma dö̧jibinö pjabato̧, jö̧ba̧lö, ösödö do̧batö emijadötö Jesúsnöma.

Filipenses 3:1

Chömöledö, böja kwialusöja wȩyudö katatakwa̧ abönö, baikwö yötawaduwakwö: Duluwo̧kwö dötewanö ja̧nö, kwo̧'wo̧duwi ösöwachibanö kwö̧jaduwo. Jejenö ba̧kwȩlö̧jatebö wȩyudajichobe chömöledö, ja̧danö jejenö wȩyukwama chöpöjödachibokobe chömöledö, isabenö ökwödönö pjaati̧ jö̧ba̧lö.

Colosenses 1:5

Jau chömöledö, isabenö wene otiwa jawa wenema kwa̧ja̧kwinaduwobe, ja̧ wene ösödadöma mölejȩbe otiwanö tjö̧jakwedö jö̧ba̧lö. Jo̧kwajabetjö̧, mölejȩbe dö̧jakwedösa jö̧ba̧lö Cristo Jesúsnö kwösödinaduwobe, ja̧danö kwömöledö Jesúsnö ösödadönö ösödabikwawö kwö̧jaduwobe.

Colosenses 2:7

Wanedö yötawa chömöledö: Jo̧batjö pokwö kwö̧jaduwobe ichejekwa, jo̧kwajabetjö̧ kwö̧jaduwi̧ bö'diama 'diinö jo̧banö do̧ba̧lö kwöda̧peachaduwo, jo̧banö jwaikwöda ösödö kwö̧jaduwakobetjö̧. Jau chömöledö, jejenö ökwödönö tjöba̧ja̧dinadanö kwö̧jaduwo, ja̧danö jwaikwöda Diosnö ösödö kwö̧jaduwo, otiwanö pjabato̧ja jö̧ba̧lö.

1 Timoteo 4:6

Jau Timoteo, biya̧ ökwönö yöbawö chiwȩyudaja̧ma dömöledönö Jesúsnö ösödadönö yökawitjö̧ma otiwena, kwuluwo̧ Cristo Jesús ömöayo̧ otiwo̧ kwö̧jena. Ja̧danö, kwo̧'wo̧ luwo̧nö kwöda̧peacho jö̧ba̧lö, kabatökönö waisachö kwö̧jo, isabenö wene, otiwa jawa Jesús jawa wene, a̧ja̧kwö kwösödina wenema.

2 Timoteo 1:6

Ja̧danö, jejenö chöwaisobetjö̧, kwujuluwachibanö yötawakwö, Dios ja̧bö kwö̧jobö iyinama, ajayitjö bajalekwönönö jwaikwöda ja̧bö kwö̧jo jö̧ba̧lö. Jau Timoteo, damötjö chömamiju kwuunö 'bibeba̧lö ja̧tinenama, Diosma ja̧bö kwö̧jobö iyinobe, ja̧danö ajayitjö bajalekwönönö ja̧ ja̧bö kwö̧jobö yötawakwö.

Hebreos 10:32

Jo̧kwaobetjö̧ chömöledö ökwödönö pjabatö yötawaduwakwö. Omukwataduwi ajayinö Jesús kwö̧jibaduwinö pjaatina kwöwaisachibinaduwa, Jesúsma dö̧jibinö pjabato̧, jö̧ba̧lö. Jemi tupakwö yelösöda usula kwemawinaduwobe Jesúsnö kwösödaduwobetjö̧. Ja̧danö, jejenö ökwödönö baledijayonö me'dawachibökönö kwö̧jinaduwobe, Jesúsnö kabatibökönö, ajayinö kwö̧jinaduwanö tjebachajökönö.

Hebreos 13:9

Isabenö, chömöledö ajayinö Jesúsnö, bakwo̧danö yöbawinadö yötjawina kwomukwataduwo. Babe mölema ju'wedö ba̧jekwadö jelobekwö omukwatö yötjawi̧ma jo̧be, ju'wi jawabi, ju'wi jawabi. Ja̧danö, jelobekwö omukwatö yötjawobe, Moisésnö weina a̧ja̧kwö dö̧jobö jo̧be, dukwobö wei̧ma, jö̧ba̧lö. Ja̧danö, Moisésnö weina kwukwaduwobö a̧ja̧kwö kwö̧jaduwitjö̧ma juluwachibanö kwi̧'yaduwena kwo̧'wo̧ luwo̧duwinö, jö̧ba̧lö, jelobekwö omukwatö yötjawobe. Chömöledö, kwakwawamaökö ökwödönö do̧'wo̧ luwo̧nö juluwachibanö kwi̧'yaduwoböma, Dios jawada. Diosma ökwödönö pjabatö lȩlö̧jino edobetjö̧ do̧'wo̧ luwo̧nö juluwachibanö di̧'yobe. Chömöledö ju'wedö jelobe omukwatö yötjawi̧ma öpöjödaduwi. Ajayinö yöbawinadö Jesúsnö isabenö ji̧ yötjawinada omukwatö kwuju̧kwaduwo.

1 Pedro 5:10

Isabenö babe usula kwemawaduwobö jo̧be chömöledö, ikenama ja'yubenö lekwajabetjö jejenö usula emawajadönö, Diosma ökwödö usula kwemawaduwaja̧tjö kwö̧bibajaduwinö otidö loakobe chömöledö. Jau chömöledö, Diosda, mikwa jwiinö otiwanö iyo̧da ökwödönö jwöinöbe, Cristokwö dötewanö ja̧nö, jo̧ba ba̧kwȩlö̧jatebö salöinö idejatobe ökwödö kwö̧jaduwobö, ja̧danö isabenö jo̧bakwö kwö̧jaduwakwedöja chömöledö. Ja̧danö chömöledö, ina böjȩnö kwö̧jaduwayi, Diosda 'diinö kwö̧jaduwobö pjaatakwo̧, ja̧danö pjolachibökönö kwö̧jaduwobö ujunakwo̧, ja̧danö kwujuluwaduwachibanö pjaatakwo̧ chömöledö.

1 Pedro 5:12

Chömöledö, Silvano mikwo̧ pjaatonö, ja'yubeda ökwödönö chiwȩyudajabe chömöledö. Silvanonö chöwaisökwe chömöledö, dömöledöso̧ otiwanö Dios wei̧ otidö jo̧ jö̧ba̧lö, ja̧danö ökwödönö chiwȩyudobö pjaatajabe. Omukwatö chiwȩyudi̧ma, baikwö yötawa chömöledö: Ökwödönö kwujuluwachibaduwanö pjatatobö chösöda. Ja̧danö ökwödönö baikwö yötawobö chösöda: Chömöledö, chöwaisa, Dios lȩlö̧jinö edö otiwa jawa iyi̧ wenema, kwösödaduwi̧ weneda, ja̧ wene ösödö 'diinö kwö̧jaduwobö jo̧be. Ja̧ wenema isabenö wene chömöledö, jo̧kwajabetjö̧ ökwödönö chiwȩyudajabe, jweinö kwomukwataduwakobetjö̧.

2 Pedro 1:13

Jo̧kwaijayonö yayonö ina yaba̧lö chö̧jayi, ba̧kwȩlö̧jatebö ja̧ jawa yemidanö kwomukwataduwo jö̧ba̧lö yöbawo̧sa chömöledö.

2 Pedro 1:15

Jo̧kwajabetjö̧ ja̧ jawa chiwȩyudobe chömöledö, ö'wö batibaja̧ ikenabi chiwȩyudina eda̧lö, ja̧ jawa ba̧kwȩlö̧jatebö kwomukwataduwakobetjö̧.

2 Pedro 3:1

Chösödawö̧ chömöledö, belö ökwödönö kwialusöja chiwȩyudijatö, ja̧danö babe yemidanö ökwödönö chiwȩyudobe. Ja̧danö ajayisöjabi, böja ikenasöjabi, damötjö baledina jawa kwomukwataduwobö yötawa, bakwainö otiwanö kwomukwataduwobö chömöledö.

2 Pedro 3:17

Jau chömöledö, sulabenö yöbawadöma isabenö yötjawakobe, ja̧danö sulabenö yötjawakwa̧ abönö ökwödönö chiwȩyudajabe, kwöwaisaduwobö. Ja̧danö, ida̧ökö kwöwaisaduwobetjö̧, te'ada̧lönö kwö̧jaduwo chömöledö, jobadö yötjawi̧ kwa̧ja̧kwaduwenama, yötjawi̧ ösödö jobadö sulabenö ja̧tji̧danö ja̧köbaduwapji jö̧ba̧lö, ja̧danö 'diinö kwö̧jaduwi̧ma waekwapji jö̧ba̧lö.

1 Juan 2:21

Ja̧danö chö̧ja̧wo̧dö, ökwödönö chöwaisa, Isabenö ji̧ yöawi̧ waisadöja, jö̧ba̧lö. Chomukwatokobe ökwödönö, Jelobekwö omukwatadö, jö̧ba̧lö. Ja̧danö, Dios isabenö ji̧ iwenema wajwibadö, jö̧ba̧lö, chomukwatokobe. Chö̧ja̧wo̧dö ökwödönö chöwaisa, Isabenö ji̧ yöawi̧ waisadöja, jö̧ba̧lö. Ja̧danö kwöwaisaduwobe, Omöna yöbawadö yötjawi̧ma isabenö ji̧ yöawakwawamaökö, jö̧ba̧lö. Ja̧danö chö̧ja̧wo̧dö kwöwaisaduwobe, Omöna yöawakwawama Dios isabenö ji̧ iwenetjö ichokobe, jö̧ba̧lö.

2 Juan 1:2

Jau chö̧ja̧wo̧dö, Dios isabenö ji̧ iwenema do̧'wo̧ luwo̧nö jo̧betjö̧ ökwödönö öbibö pjaatobe dö̧ja̧wo̧dönö ile nidebobö. Babebi ba̧kwȩlö̧jateböbi ja̧ Dios isabenö ji̧ iwenema do̧'wo̧ luwo̧nö jo̧be, ökwödönö pjabatö.

Judas 1:17

Chösödawö̧ chömöledö, isabenö Duluwo̧ Jesucristo webawedö yötjawina kwomukwatibaduwobö jo̧be.

Judas 1:3

Chömöledö, ökwödö Jesúsnö ösödadöma, okobe deinö bakwainö ji̧badösa, ¿jö̧tö? Jau chömöledö, ökwödö okobe deinö Dios lȩlö̧jinö iyi̧tjö emadösa, ja̧danö ja̧ jawa labebö lobö ökwödönö chiwȩyudobö jö̧ta̧latö. Jo̧kwaijayonö sulabenö yöbawadö yötjawobetjö̧, ja̧ chiwȩyudobö jö̧ta̧li̧ma waekwajabe, ju'wida chiwȩyudobö jo̧be babema. Jau chömöledö, ju'wedöma ju̧kwawö dö'da̧de tetjachajabe, ja̧danö dö'da̧de ja̧nö sulabenö yötjawobe. Jo̧kwajabetjö̧ ju'wida chiwȩyudobö jö̧ta̧lijayonö, ökwödönö kwujuluwaduwachibanö chiwȩyudobö jo̧be, dösödi̧ wene tjöbeba̧lö ölakwabikwawö kwö̧jaduwobö. Jau chömöledö, ja̧ dösödi̧ wenema, bakwöta wene balewachökö wene, ja̧danö bakwötanöda Dios iyina wene, ba̧kwȩlö̧jatebö ja̧ wenenöda dö̧jibobö. Ja̧ wene balewö lobö sulabenö yötjawapji jö̧ba̧lö, tjöbeba̧lö ölakwabikwawö kwö̧jaduwobö kwujuluwaduwachibanö chiwȩyudaduwakwö. Ökwödönö sulabenö yöbawadönö baikwö yötawa: Diosma damötjö jobadönö lȩebakwa̧ omukwatö ujuninobe. Jobadöma isabenö Diosnö ösödöködö chömöledö, ja̧danö sulabenö yöbawö Dios mikwa jwiinö otiwa jawa iyi̧ wene balewö lotjobe, jojodö jwaikwöda sulabenö ja̧bö tjö̧jobö wei̧ wene baibanö. Ja̧danö ju'wibi, Duluwo̧ma bakwo̧dajayonö, Duluwo̧ Jesucristonö öpöjödadö, duluwo̧bö̧kö̧ jö̧ba̧lö.

Judas 1:5

Isabenö Duluwo̧ lȩebakwawö̧ jobadönö chömöledö, damötjö sulabedönö lȩebinadanö. Jau chömöledö, ida̧ökö kwöwaisaduwijayonö, yayonö yemidanö kwomukwatibaduwobö yötawaduwakwö damötjö baledina jawa, baikwö: Damötjö Duluwo̧ma okobe deinö Israel jojodönö tjö̧jibinö pjaatinobe, Egipto nijitjö latjebobö, ¿jö̧tö? Ja̧danö, ajayinö Egipto nijitjö latjebobö pjaatinajayonö, jemi ikenama jobadö pjaatinajawö̧tjö yöawi̧ öpöjödadönö söbebö loinobe, ¿jö̧tö?