2 Pedro 1:1 - Dios Iwene

¹ Dokwa chömöledö, Ötjöma Simón Pedrosa, ja̧danö Jesucristo webawo̧sa, ja̧danö ju'wibi jo̧ba ömöayo̧sa. Ötjöma böja kwialusöja wȩyudö wetaduwakwö, ökwödö Cristonö chösödi̧danö bakwainö ösödadönö. Jau chömöledö, dö̧jibinö pjabato̧ Dios Jesucristoma bakweminö jojodönö edo̧obetjö̧, ötjönö pjaatinadanö ökwödönöbi pjaatinobe, Cristonö chösödi̧danö ökwödöbi bakwainö kwösödaduwobö. Ja̧danö, ökwödö bakwainö ösödadönö böja kwialusöja wȩyudö wetaduwakwö.

2 Pedro 1:1 ပူးပေါင်းရင်းမြစ်များ

Isaías 12:2

—Jau, edaduwi, Diosda ökwödönö dö̧jibinö pjabato̧ma, jo̧kwajabetjö̧ jo̧banö do̧'wo wa̧nalö ja̧nö, yebabökönö dö̧jakwedösa. Jau, Isabenö Jo̧ Diosda dujuluwachibanö pjabato̧ma, jo̧bada dö̧jibinö pjabato̧ma, ja̧danö döpöjojodötjö dö̧jibobö pjaatinobetjö̧, jo̧banö ösödö lo̧badösa, —jö̧balö yöka̧laduakwedöja.

Mateo 10:2

Jobadö a̧li̧nösamutjö du̧ju̧tajabedö Jesús öba̧ja̧di̧ waisachadöma, tjimibiya baikwö laebobe: Abönö Simón, ju'wi imi Pedrobi, Pedro öjawo̧ Andrésbi. Ja̧danö Zebedeo i̧tji̧mu Jacobobi, ja̧danö Jacobo öjawo̧ Juanbi.

Mateo 4:18

Jesús o̧pesobu Galilea mikwobu ö'öbönö kweachemi, ömadö du̧ju̧taja ba̧i̧ jwobadönö edinobe, Simón ju'wi imi Pedro mikwo̧nöbi, öjawo̧ Andrés mikwo̧nöbi. Jobadöma maya jwobö tjotidinobe, ja̧danö maya jwotjobe edinobe.

Lucas 1:47

ja̧danö cho̧'wo̧ luwo̧ma chö̧jibinö pjabato̧ Diosnö omukwatö o̧'wo̧ ösöwachibanö ö̧jobe,

Lucas 11:49

Jo̧kwajabetjö̧ Diosma itedada waisanö omukwatö yöa̧linobe: Yötawi̧ yöbawadönöbi, chömöayedö ötjö webawedönöbi wetocha, ja̧danö jobadötjö ju'wedönö kwabö lotjakobe, ja̧danö ju'wedönö usula tjemawinö ja̧tjakobe, jö̧ba̧lö. Jejenö omukwatö ujuninobe Diosma, iteda ömöayedö ökwödö babe möle ju̧kwadönö yötjawobö, ja̧danö jobadönö kwabö loköbaduwakobe. Jejenö kwabö loköbaduwiökwe, isabenö Dios lȩebakwawö̧ja. Jau isabenö Dios lȩebakwawö̧ja, kwa'dödö ja̧tjinadanö ja̧köbaduwiökwe okobe deinö Dios yöawi̧ yöbawadönö kwabö lotjiökwe Dios lȩebakwa̧ma ökwödö babe möle ju̧kwadönö badekwachakobe,

Juan 1:42

Yöawaja̧ ikena öpöenö öbibö i̧'yinobe Jesús ö̧jobekwö. Ja̧danö, Jesúsma, jo̧banö edö jö̧a̧linobe: —Ökwöma Simón mikwo̧ja, Juan itji̧— jö̧a̧linobe—. Babema chimidakwö Cefas, jö̧ba̧lö— midö yöawinobe Jesúsma Simónnöma. Cefas, jö̧ba̧löma, inawa, jö̧ba̧lö, griego jojodö tjiwenenö.

Juan 12:26

Ja̧danö, ötjö chöba̧ja̧di̧ waisachadö tjö̧jo jö̧ba̧ladöma ötjökwö tjichobö jo̧be. Jejenö, ötjö chö̧jobema chöba̧ja̧di̧ waisachadöbi tjö̧jakwedö. Ja̧danö, Chabe'do Diosma ötjö chöba̧ja̧di̧ waisachadönö edö, Bidöma jwiinö mikwawadö, jö̧ba̧lö, omukwatakwawö̧— yöawinobe Jesúsma.

Juan 20:21

Ikenama Jesúsma yemidanö jö̧a̧linobe: —Kwo̧'wo̧duwi ösöwanö ja̧duwi— jö̧ba̧lö—. Chabe'do ötjönö weinadanö ökwödönö wetobe, chiwene yökawaduwobö— jö̧ba̧lö weinobe jobadönö.

Hechos 15:14

Simón Pedro yöawatö ökwödönöma, Dios judío jojodöböködönö ajayinö ösödi̧ i̧sebinama, jobadötjöbi iteda i̧tji̧mu batjibanö ja̧bö.

Romanos 1:1

Ötjö Pablo mikwo̧sa, Cristo Jesús ömöayo̧sa, Cristo Jesús webawo̧sa. Ötjöma Dios 'da̧batö ujuninökwesa, otiwa jawa Dios jawa wene yötawobö weinökwesa.

Romanos 1:12

Chömöledö, ökwödönö cheditjö̧ma isabenö otiwena. Baikwö yötawa: Ökwödö Jesúsnö kwösödaduwobe cheditjö̧ma bakwainöda ötjö cho̧'wo̧ luwo̧ ujuluwachibena tupakwö. Ja̧danö, ökwödö Jesúsnö chösödobe kwedaduwitjö̧ma, bakwainö tupakwö ujuluwachibena kwo̧'wo̧ luwo̧duwima. Ja̧danö, pjadatakwawena do̧'wo̧ luwo̧ bakwainö ujuluwachibanö tupakwö.

Romanos 1:17

Jau chömöledö, ja̧ wenema isabenö Dios ujulu ji̧ wene. Baikwö yötawa: Ja̧ wenema wajuwanö labebö lobö yöawobe, Dios jojodö suli̧ jwibadö batjibanö ja̧i̧ma, Dios iwene laebi̧danö. Baikwö laebobe Dios iwenema: Dios bidöma suli̧ jwibadö jö̧a̧lawö̧ma, Dios yöawi̧ tjösödobetjö̧da ja̧kwawa juna̧ladö, jö̧ba̧lö laebobe. Ja̧danö, la'akatjöda Dios yöawi̧ ösödadönöda suli̧ jwibadö batjibanö pjaatinobe Diosma, damötjö ju̧kwinadönöbi, babe ju̧kwadönöbi.

1 Corintios 1:30

Ja̧danö, Diosma ökwödönö Cristo Jesúskwö bakobe bakibaduwanö ja̧inobe. Ja̧danö Diosma Cristonötjö iteda öwaisi̧ waisakwawa ji̧ma ökwödönö iyobe. Jau chömöledö, Cristoda sulabe jwibadö badibanö ja̧binama, ja̧danö Cristoda Dios ömöledö badibanö ja̧binama, ja̧danö Cristoda dö̧jibobö midawö wobinama.

1 Corintios 15:9

Jau chömöledö, Jesús webawedötjö, baikwönönöbo̧sa ötjöma, ja̧danö Jesús webawo̧ jö̧ba̧lö ötjabobö mikwawö̧kö̧sa ötjöma, Dios ömöledönö usula tjemawinö ja̧tinobetjö̧.

1 Corintios 9:1

Chömöledö, ötjö Pabloma ju'wedö tjömöayo̧bö̧kö̧sa, ¿jö̧tö? Ja̧danö, ötjöma Jesús webawo̧ chö̧jobe, ¿jö̧tö? Ja̧danö, Duluwo̧ Jesúsnö chedinobe, ¿jö̧tö? Ja̧danö, ökwödö Corintio jojodöma ötjönötjö Duluwo̧nöma kwösödinaduwobe, ¿jö̧tö?

2 Corintios 4:13

Jau chömöledö, damötjö Dios iwene wȩyudinama baikwö iwȩyudinobe: Dios yöawi̧ chösödobetjö̧, yöbawo̧sa, jö̧ba̧lö. Ökwödöbi ja̧danö chömöledö, jo̧ba omukwatinadanö omukwatö, ökwödöbi Dios yöawi̧ ösödö yöbawadösa.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

Gálatas 2:8

Jau chömöledö, Diosma Pedronötjö judío jojodönö pjaatinobe, ji̧kwawa wene tja̧ja̧kwobö, ¿jö̧tö? Ja̧danö, ötjönötjö Diosma judío jojodöböködönö pjaatinobe, jobadöbi ji̧kwa wene tja̧ja̧kwobö.

Efesios 3:5

Damötjöma Diosma iteda tojö junö omukwatinama labebö lobijökötö da'dödöminenöma. Jo̧kwaijayonö, ökwödö dö̧ji̧ma, Dios O̧'wo̧ Luwo̧ma Dios ajayinö tojö junö omukwatinama labebö loinobe Dios 'da̧batö ujuninawö̧nö, Jesús webawedönöbi, Dios iwene yöbawadönöbi.

Efesios 4:11

Chömöledö, jo̧bama, mölejȩbe kabekwajinama, damötjö Dios iwenenö iwȩyudinökwe. Jo̧ba iwȩyudinökwe iyabinadanö, otiwa jawa iyabijetö. ¿Dakwö yöawobeda, otiwa jawa iyabijetö, jö̧ba̧löma? Biya̧ chömöledö: Cristoma jo̧banö ösödadönöma bakwo̧nökwena wainökwena jelo̧nö ju'wi, jelo̧nö ju'wi, tjo̧'wo̧ luwo̧ jawa tjotidawakwena iyabinobe, jojodönö pjabatö, Dios wei̧ tjotidobö. Jo̧banö ösödadötjö ju'wedönöma 'da̧batö ujuninobe iteda weawö̧ batjibinö ja̧bö. Ja̧danö, ju'wedönö 'da̧batö ujuninobe Dios iwene yötjawobö Jesúsnö ösödadönö. Ja̧danö, ju'wedönö ji̧bakwawa wene yötjawobö 'da̧batö ujuninobe. Ja̧danö, ju'wedönö Jesúsnö ösödadönö tjite'ada̧loböbi, tjöba̧ja̧doböbi 'da̧batö ujuninobe Cristoma.

Efesios 4:5

Ja̧danö, Duluwo̧ Jesúsma bakwo̧da, jelo̧ma deobe. Ökwödöma jo̧ba iwene, ji̧bakwawa wene, bakwainö ösödinadösa, Jesúsma dö̧jibinö pjabato̧, jö̧ba̧lö. Ökwödöma bakwo̧nökwena Jesúsnö dösödi̧ i̧sebö ojwenö bu̧dachibinadösa, bakwainö.

Filipenses 1:1

Ötjö Pablobi, Timoteobi Cristo Jesús ömöayedösa, ja̧danö Timoteokwö ja̧nö böja kwialusöja wetaduwakwö, okobe deinö ökwödö Filipos comunidadtjö Dios ömöledö Cristo Jesúskwö dötewadönö, ja̧danö ökwödötjö Jesúsnö ösödadönö te'ada̧lakwawa luwedönöbi, pjaatakwawa luwedönöbi.

Filipenses 1:29

Jau chömöledö, Diosma otiwa jawa ökwödönö iyinobe, Cristonö kwösödaduwo jö̧ba̧lö iyinobe, ¿jö̧tö? Jo̧kwaijayonö sule ja̧damaökö chömöledö, ju'wibi otiwa jawa ökwödönö iyinobe, Cristo jawa otidö kwö̧jaduwobetjö̧, usula kwemawaduwoböbi iyinobe.

Filipenses 3:9

Cristokwöda bakobe dötewinö chö̧jo jö̧ba̧lö. Ja̧danö, babema Moisés iwȩyudina ja̧bö, ötjöda chujulunö sulabe jwibo̧ batiboböma chisakwokobe chömöledö, babe sulabe jwibo̧ chö̧ji̧ma, Cristonö chösodiökwe Dios sulabe jwibo̧ batibanö ja̧i̧da chömöledö. Jau chömöledö, ja̧ sulabe jwibo̧ chö̧ji̧ma, ötjö ja̧ti̧maökö, yöawi̧ chösödiökwe Dios ja̧i̧da chömöledö.

2 Timoteo 1:5

Timoteo, ökwönö omukwatö isabenö Dios yöawi̧ kwösödi̧ wene chomukwatiba. Jau, ajayinöma ökwö kwa'do̧ Loida mikwujuma, isabenö Dios yöawi̧ ösöduju jö̧jinobe, ja̧danö kwojo'do Eunicebi isabenö Dios yöawi̧ ösöduju jö̧jinobe. Ja̧danö chedemi ökwöbi jobadö tjösödi̧danö isabenö ösödo̧ja Timoteo.

Tito 1:1

Tito, böja kwialusöjanö ötjö Pablo mikwo̧ma wȩyudö wetakwö. Ötjöma Dios ömöayo̧sa, ja̧danö Jesucristo webawo̧sa. Ötjöma Dios 'da̧batö ujuninökwesa, Dios omudawö ujuninawö̧nö pjabatö chöba̧ja̧do jö̧ba̧lö. Ja̧danö, jobadönö chöba̧ja̧dobe, jwaikwöda Dios yöawi̧ tjösödakobetjö̧. Ja̧danö, isabenö wene tjöwaisakobetjö̧ chöba̧ja̧dadönö. Ja̧danö, Dios ösödi̧danö ja̧bö tjö̧jakobetjö̧ chöba̧ja̧dadönö.

Tito 1:4

Tito, ökwöma ötjöda chitji̧danöbo̧ja bakobe Jesúsnö ösödö dö̧jobetjö̧. Ja̧danö, böja kwialusöja wȩyudö wetakwö. Dabe'do Diosnöbi, dö̧jibinö pjabato̧ Cristo Jesúsnöbi ateba, ökwönö lȩlö̧jinö edö, kwo̧'wo̧ luwo̧ ösöwachibanö tupakwö pjatjato jö̧ba̧lö.

Tito 2:13

Jau Tito, ina böjȩnö dö̧jayi, do̧'wo̧ wana̧lö dite'ada̧lobe, isabenö Dios jö̧a̧lina möle badekwachakobe jö̧ba̧lö, inesö otiwa möle, ökwödö dö̧jibinö pjabato̧ la'aka Dios Jesucristoma iteda ujulu i̧sebenama.

Santiago 1:1

Chömöledö, Cristotjö chö̧ja̧wo̧dö dokwa. Ötjö Santiago böja kwialusöjanö wȩyudö yötawa ökwödö judío jojodönö, Israelbetjö labebinadö jelobebi, jelobebi ju̧kwadönöma. Ötjöma Dios ömöayo̧sa. Ja̧danö, Duluwo̧ Jesucristo ömöayo̧sa ötjöma. Böja kwialusöja weta ökwödönö Jesúsnö ösödadönöma.

1 Pedro 1:1

Dokwa chömöledö, ötjöma Jesucristo webawo̧ Pedro mikwo̧sa. Ötjöma böja kwialusöja wȩyudö wetaduwakwö, ökwödö Dios omudawö ujuninawö̧ mölejȩ jojodönö. Jau chömöledö, ina böjȩnö kwö̧jaduwijayonö, mölejȩ jojodöja. Ja̧danö ökwödö jelobetenia ju̧kwadönö chiwȩyudobe, Ponto nijinö ju̧kwadönöbi, Galacia nijinö ju̧kwadönöbi, Capadocia nijinö ju̧kwadönöbi, Asia nijinö ju̧kwadönöbi, Bitinia nijinö ju̧kwadönöbi.

1 Pedro 1:7

ja̧ usula kwemawaduwi̧ baledibö isabenö Dios yöawi̧ kwösödaduwi̧ wenema otiwanö öwawakobetjö̧. Jau chömöledö, isabenö usula kwemawaduwobö jo̧be. Baikwö wanedö yötawa: Oro ökwölanö lödebö tjotidökötjö̧ma, bakwainö otiwi̧ma öwawökena, ¿jö̧tö? Sule ökwölanö lödebö tjotidaja̧ ikenada otiwanö öwawobe oro otiwi̧ma, ¿jö̧tö? Ökwödö Dios yöawi̧ kwösödaduwi̧bi ja̧danö chömöledö. Usula emawökönö kwö̧jaduwitjö̧ma, otiwanö Dios yöawi̧ kwösödaduwijayonö, kwösödaduwi̧ma otiwanö öwawökena, sule usula emawö kwöbaledaduwajenada otiwanö öwawena otiwanö kwösödaduwi̧ wenema. Jo̧kwajabetjö̧ isabenö usula kwemawaduwobö otiwobe chömöledö. Jau chömöledö, oroma mikwawijayonö, ja'yubeda mikwawobe, oroma tupakwö jwiakobetjö̧. Jo̧kwaijayonö ökwödö Dios yöawi̧ kwösödaduwi̧ma orotjö bajalekwönönö mikwawi̧ chömöledö, jo̧kwajabetjö̧ orotjö bajalekwönönö isabenö kwösödaduwi̧ wene otiwanö öwawobö jo̧be. Jau chömöledö, babe usula kwemawaduwi̧ma, ökwöladanö ichejekwa, bakwainö otiwanö kwösödaduwi̧ wenema öwawobö, ja̧danö ja̧ jawa usula emawö kwöbaledaduwenama, isabenö Dios yöawi̧ kwösödaduwi̧ wenema öwawakobe chömöledö. Ja̧danö chömöledö, jejenö öwawobetjö̧, 'dö̧ibaji̧ möle Jesucristo ichenama, Diosma otiwanö ösödadöja jö̧ba̧lö yöawakobe, ja̧danö dejatinö ujulu ökwödönö iyakobe, ja̧danö ökwödönö otiwanö omukwatakobe chömöledö. Jejenö jo̧be chömöledö, jo̧kwajabetjö̧ babe usula kwemawaduwijayonö, yayonö kwo̧'wo̧ ösöwachibanö ja̧döja, otiwa jö̧ba̧lö.

1 Pedro 2:7

Jau chömöledö, ökwödö Jesúsnö ösödadöma jweinö domukwatobe Duluwo̧nö, isabenö mikwawo̧ jö̧ba̧lö. Ja̧danö, jo̧banö dösödobetjö̧, isabenö ökwödönö pjabato̧ chömöledö. Jo̧kwaijayonö, öpöjödadöbi tjuju̧kwobe chömöledö, ja̧danö tjöpöjödiökwe, pjabatö̧kö̧ jobadönöma. Jau chömöledö, jobadönö baikwö laebobe Dios iwene: O̧do otidadö biwama sulabawa, mikwawököwa jö̧tja̧linawa inawama, la'aka lödawawa, ju'wi inawatjö bajalekwönönö mikwawawada baibinobe, jö̧ba̧lö laebobe.

1 Pedro 5:1

Ja̧danö, ökwödönö baledi̧ jawa omukwatö, ökwödötjö Jesúsnö ösödadönö te'ada̧lakwawa luwedönö baikwö yötawa: Jesúsnö ösödadönö otiwanö kwite'ada̧laduwo chömöledö. Jau chömöledö, ötjö Pedroma bakobe ökwödökwö Jesúsnö ösödadönö te'ada̧lakwawa luwo̧sa chömöledö, ja̧danö ökwödönö yötawi̧ma isabenö waisanö yötawobe. Ötjöma Cristokwö ja̧nö jo̧ba usula emawina chedijatö chömöledö. Ja̧danö ju'wibi chöwaisa, Cristoma iteda dejatinö ujulu i̧sebenama, ötjöbi ja̧ ujulu chujuna̧lakobe jö̧ba̧lö.

2 Pedro 1:4

Jau chömöledö, Duluwo̧ma dejatinö juluwo̧obetjö̧, ja̧danö jwiinö otiwo̧obetjö̧, inesö mikwawi̧ wene ökwödönö yöbawö ujunajabe, yöawi̧ ösödö, suli̧tjö dö̧jibobö, ja̧danö iteda otiwi̧ ökwödöbi dujuna̧lobö. Jau chömöledö, kwöwaisaduwa, böjȩ jojodö sulabenö tjösödi̧tjö böjȩma suli̧ jwöachobe, ¿jö̧tö? Jo̧kwaijayonö ja̧ suli̧ jwöachi̧tjö dö̧jibanö pjabato̧ Duluwo̧ma, ja̧danö böjȩ suli̧ jwöachijayonö, ökwödöma Duluwo̧ inesö otiwi̧ dujuna̧lakwedö dö̧jobe.

Judas 1:1

Ötjö böja wȩyudö webo̧ma, Judassa, Jesucristo ömöayo̧sa, ja̧danö ju'wibi Jacobo öjawo̧sa. Ja̧danö, böjanö wȩyudö wetawö̧ma bidö, Dios jwöinawö̧nö, ju'wibi Dabe'do Dios ösödawö̧nö, ju'wibi Jesucristo tjöbeba̧lö ite'ada̧lawö̧nö.