2 Corintios 3:18 - Dios Iwene

¹⁸ Jo̧kwaijayonö okobe deinö ökwödö Jesúsnö ösödadöma tjöekwado̧ jwibadösa chömöledö, öwaetjöda Dios dejatinö ujulu edadösa. Jau chömöledö, Duluwo̧ salöinö ujulu edadösa, ja̧danö tjöbadekwawöte öwawinö i̧sebi̧danö ja̧ ujulu i̧sebadösa ju'wedönö, jobadöbi tjedakobetjö̧. Ja̧danö ju'wibi chömöledö, Duluwo̧ salöinö ujulu dedenama, Duluwo̧ Dios O̧'wo̧ Luwo̧ma, Duluwo̧danö ichejekwadö badibanö otido̧, jo̧ba salöinö dejatinö juluwo̧danö bakwainö dichejekwakobetjö̧. Jejenö jo̧be chömöledö, jo̧kwajabetjö̧ yödawi̧ wene 'yayi̧ wenema inesö mikwawi̧ jö̧ba̧lö, ja'yubebi salöi̧ dotojoböma omukwatöködösa. Jau chömöledö, jojodö ja̧ salöi̧ öwawinö tjedakobetjö̧, inesö mikwawi̧ wene 'yayi̧ wenema yöbawadösa.

2 Corintios 3:18 ပူးပေါင်းရင်းမြစ်များ

Juan 1:14

Ja̧danö, Dios Iwene Jo̧, jö̧ba̧lö, ötjabökwema jojo baibanö jeminökwe. Ja̧danö, jojo baibanö jeminökwema böjȩnö ökwödökwö ö̧jinobe. Ökwödöma jo̧banö edö, Jwiinö otiwo̧, jö̧ba̧lö, dösödijatö. Yelösöda, jo̧bama Dios Itji̧, iteakwo̧daobetjö̧ jwiinö otiwo̧. Ja̧danö, jo̧bama jwiinö lȩlö̧jino edöda pjabato̧. Ja̧danö, jweinöda yöba̧lo̧.

Juan 12:41

Ja̧danö, Isaíasma Jesúsnö iwȩyudinobe, ajayinöma öwaisinobetjö̧, Jwiinö otiwakwo̧, jö̧ba̧lö.

Juan 17:22

Ötjö jwiinö chotiwi̧, kwiyina chotiwi̧ma bidönö chiyobe. Jobadönö jejenö chiyobe bakwaibedödanö tjuju̧kwobö, ökwödö bakwainö omukwatö dö̧ji̧danö.

Juan 17:24

Ina aebinobe: —Chabe'do, bidö ökwö kwiyinawö̧ma, ökwö kwö̧jobe, ötjökwö tjö̧joböma jwiinö chösöda. Ja̧danö, jobetjöma ötjö chotiwi̧ tjedobö chösöda, ajayinö kwiyina chotiwi̧ma— aebinobe—. Ajayinö, böjȩ ina jwiayi ötjö chotiwi̧ kwiyijatö ötjönöma, ötjönö jwiinö ile nikebobetjö̧— aebinobe—.

Romanos 12:2

Ja̧danö, ju'wedö böjȩ jojodö ja̧bö tjö̧ji̧danöma ja̧bö kwö̧jaduwoko chömöledö. Diosma kwomukwataduwi̧ balewachinö ja̧obö ösödo̧, ja̧danö balewachinö ja̧obö weköbaduwo, 'yayi̧ jawada omukwatadö bakibaduwanö. Ja̧danö, Dios ökwödö kwomukwataduwi̧ balewachinö ja̧itjö̧ma, Dios ösödi̧ jawa kwöwaisaduwena, inesö otiwa jawa, sulabe jwii̧ jawama.

Romanos 13:14

Wainö ja̧bö kwö̧jaduwo chömöledö. Baikwö wanedö yötawa: Duluwo̧ Jesucristo jawa 'dukawaduwo chömöledö, ja̧danö Dios ösödi̧ jawada ja̧köbaduwobö kwisakwaduwo. Ja̧danö, sulabenö dösödi̧ jawama, böjȩ jojodö sulabenö dösödi̧ jawa ja̧köbaduwoböma kwisakwaduwoko chömöledö.

Romanos 8:29

Jau chömöledö, Diosma la'akatjöda öwaisinobe jo̧banö tjösödakwedönöma, iteda ömöledö batjibakwedönöma. Ja̧danö, jejenö waisö, jobadönö 'da̧batö ujuninobe, iteda itji̧ Jesúsdanö ichejekwadö batjibo jö̧ba̧lö. Ja̧danö, weinobe, Jesúsda iteda i̧tji̧mutjö abönö pöe baibobö, ökwödö döpöe baibobö chömöledö.

Romanos 8:4

Jau chömöledö, Moisés iwȩyudinama baikwö laebobe: Biya̧ Dios wei̧ jawa ja̧bö̧kö̧ma Dios lȩebakwo̧ jö̧ba̧lö. Ja̧danö, Dios ökwödönö lȩebobö ji̧nobe, Dios wei̧ jawa ja̧dinokobetjö̧. Jo̧kwaijayonö, Jesúsda midawö woinobe, balekwo̧da woinobe, ökwödö dö̧jibobö. Balekwo̧da midawö woinobe, ökwödö Jesúsnö ösödadöma Dios O̧'wo̧ Luwo̧ ömöayedödanö baibanö dö̧jibobö. Jau chömöledö, ökwödö Jesúsnö ösödadöma, Dios O̧'wo̧ Luwo̧ wei̧ ja̧bö ju̧kwadösa babema, suli̧ wei̧tjömaökö.

Romanos 8:7

Jau chömöledö, suli̧ ömöayedödanö ju̧kwadöma, Dios öpöjojodö. Ja̧danö, Dios wei̧ma ja̧böködö. Ju'wibi, Dios wei̧ ja̧tjoböma jwibadö, tjujulu jwitjobetjö̧.

1 Corintios 13:12

Ja̧danö, babema wajuwanöma dedokobe Diosnöma chömöledö, tjöbadekwawöte sulabötetjö dediakwawobedanö ichejekwa, jo̧kwaijayonö mölejȩbetjö, döbabiyakwena öwawinö dedakobe. Ja̧danö, babe Diosnö chöwaisi̧ma, ja'öda chöwaisobe, jo̧kwaijayonö mölejȩbetjö, jo̧ba ötjönö öwaisi̧danö balekwa mikwa jo̧banö chöwaisakobe chömöledö.

1 Corintios 15:49

Jau chömöledö, babema letiatjö otidinökwedanö dichejekwobe, ¿jö̧tö? Ja̧danö, babe jo̧banö dichejekwi̧danö, tupakwöma mölejȩbetjö ichinadanö dichejekwakwedösa chömöledö.

2 Corintios 3:17

Jau chömöledö, Duluwo̧nö dösödenama, tjöekwado̧ kalebö loobe Duluwo̧ma, iteda salöinö ujulu dedakobetjö̧. Ja̧ Duluwo̧ jö̧ba̧lö yöta̧laja̧ma, Dios O̧'wo̧ Luwo̧nö yöta̧lobe chömöledö, bakwo̧dabedötjobetjö̧. Ja̧danö, baikwö yötawaduwakwö chömöledö: Dios O̧'wo̧ Luwo̧ do̧'wo̧ luwo̧nö ö̧jobetjö̧, tjöekwado̧ jwibadö dö̧jobe. Jau chömöledö, isabenö ja̧ tjöekwado̧ kalekwö loawa jo̧be, ja̧danö Israel jojodöbi tjöekwado̧ kalekwö lotjobö jo̧be, jo̧kwaijayonö Duluwo̧nö tjöpöjödobetjö̧, jwaikwöda tjöekwado̧ muchekwadöda tjö̧jobe.

2 Corintios 4:4

Jau chömöledö, yödawi̧ma isabenö öwawinö yödawobe, jo̧kwaijayonö öpöjödadöma böjȩ jojodö tjösödökwe Awetja omöna yöa̧li̧ tjösödobetjö̧ yödawi̧ tjöpöjödobe chömöledö. Jau chömöledö, wanedö yötawa: Awetjama jobadönö ja̧obe, tjomukwati̧nö yȩa'wo okwa tjö̧ji̧danö tjomukwatobö, otiwa jawa wene dejati̧ tjedapji jö̧ba̧lö. Jau chömöledö, Duluwo̧ Cristoma iteda Abe'do Diosdanö bakwainö jo̧, ja̧danö jojodönö salöinö idejatobö ösödo̧, jo̧banö ösödö tjö̧jibakobetjö̧. Jo̧ba salöinö idejati̧ wene otiwa jawa weneda yödawobe jojodönö chömöledö, jo̧kwaijayonö ja̧ salöinö dejati̧ tjedapji jö̧ba̧lö, Awetjama öpöjödadönö omöna yöa̧lobe.

2 Corintios 5:17

Jau chömöledö, Cristonö ösödadöma ida̧ökö jo̧bakwö wotjinobe, ja̧danö ida̧ökö jo̧bakwö tjetjachajinobe. Jo̧kwajabetjö̧, baikwö jo̧be chömöledö, bakwo̧ Cristokwö dötewanö ö̧jitjö̧ma, Dios 'yayinö otidajökwe baibanö jo̧ jo̧bama. Jau chömöledö, Cristokwö dötewadönöma, damö jawama ida̧ökö 'dö̧ibajinobe, ja̧danö babe dö̧ji̧ma, 'yayinö ja̧kwawa baibinobe. Jo̧kwajabetjö̧ chömöledö, damö jawa ida̧ökö 'dö̧ibajinobetjö̧, tupakwö ja̧ jawa domukwatoböma jwiobe, jwaikwöda 'yayinö ja̧kwawa jawada domukwatobö jo̧be.

Gálatas 6:15

Chömöledö, dötade bajalesado̧ 'wibekwadö dö̧ji̧bi, 'wibekwöködö dö̧ji̧bi ja'yubebi mikwawokobe chömöledö, ju'wida mikwawi̧ma, 'yabayedö dö̧ji̧da.

Colosenses 3:10

ja̧danö balekwado̧ 'yabayo̧ o̧'wo̧ luwo̧ ökamijido̧ 'dukawinaduwobe ichejekwa. Jau chömöledö, jo̧ba 'yabayo̧ kwo̧'wo̧ luwo̧duwima, Dios otidinökwe, ja̧danö jo̧banö otidobe Diosma, Diosdanö ichejekwo̧ baibanö, otiwanö Diosnö kwöwaisaduwakobetjö̧.

1 Timoteo 1:11

Jobekwö laebobe isabenö wene ötjö yötawi̧ wenema Timoteo. Ja̧danö, ja̧ jwiinö otiwa jawa wene yötawi̧ma, inesö otiwo̧ Diosma ötjönö yöbawö iyinobe, tupakwö ju'wedönö yötawo jö̧ba̧lö.

Tito 3:5

ja̧danö dö̧jibinö pjaatinobe. Ökwödöda otiwanö ja̧diökwema ja̧inokobe dö̧jibinö ja̧böma, iteda lȩlö̧jinö edo̧obetjö̧, dö̧jibinö ja̧inobe. Jau Tito, Dios O̧'wo̧ Luwo̧ma ökwödö sulabe dujuna̧li̧ dichö loinobe, 'yabayedö badibanö, 'yayinö bötjachibadö badibanö.

Santiago 1:23

Chö̧ja̧wo̧dö wanedö yötawaduwakwö: Bakwo̧ tjöba dekwawötenö ediakwawö, Jooo chöba yȩamajabe, jö̧ba̧lö, edo̧.

1 Juan 3:2

Chö̧ja̧wo̧dö chösödawö̧, yötawaduwakwö. Isabenö, ökwödöma Dios i̧tji̧musa. Jo̧kwaijayonö Diosma ökwödönö ina öwawinö i̧sebokobe mölejȩbe ichibö balewachibö dö̧jakwa̧ma. Ina waiya. Wajwidobe ¿dakwö dichejekwakwa̧jö, jö̧ba̧lö? Ja̧danö, domajadenö ¿dakwö omukwatö dö̧jakwa̧jö? jö̧ba̧lö, ina waiya. Jo̧kwaijayonö ja'yubeda döwaisa, biya̧: Cristo yemidanö ichena ökwödöma jo̧badanö babibö dö̧jakwedösa. Ja̧ mölema Cristoma ökwödönö wajuwanö öwawachobetjö̧ jo̧badanö ichejekwadö dö̧jakwedösa.