2 Corintios 10:13 - Dios Iwene

^13-14 Chömöledö, ¿tida ökwödö Corintio jojodönö ajayinö Cristo jawa otiwa jawa wene yöbawinama? Ötjöda, ¿jö̧tö? Jau chömöledö, Diosma isabenö jojodönö yödawobö ujuninobe, ja̧danö jejenö ujunenama, ökwödö Corintio jojodönöbi yödawobö ujuninobe, jo̧kwajabetjö̧ ökwödökwö otiwanö otidinadösa jö̧ba̧lö yöda̧lenama, sulabenöma yöda̧lokobe chömöledö, Dios dotidobö ujunina jawada yöda̧lobetjö̧. Ökwödökwö dotidököjayonö, otiwanö dotidinobe jö̧ba̧lö yöda̧litjö̧ma, sulabenö yöda̧lena chömöledö, ja̧danö jelo̧ otidina dönaukwobedanö ichejekwena, jelo̧ otidijayonö ökwödöda otiwanö otidinadösa jö̧ba̧lö yöda̧lobetjö̧.

2 Corintios 10:13 ပူးပေါင်းရင်းမြစ်များ

Proverbios 25:14

Ja̧danö, ju'wibi yötawa: Bakwo̧, ökwönö chiyocha, jö̧ba̧lö yöbawö ujunijayonö la'akatjöda iyökötjöma kwo̧'wo̧ tjo̧bekwö kwö̧jena. Wanedö yötawa: Ojwiyo'wiju nöinö lö̧jobetjö̧ ja̧danö jwa̧lȩ'epjo jwa̧lȩ'ȩwobetjö̧, Otiwa, o̧bakobe, jö̧ba̧lö ösödö kwite'ada̧lobe. Ja̧danö, o̧bobö kwite'ada̧lijayonö o̧bökötjö̧ma kwo̧'wo̧ tjo̧bekwö kwö̧jena. Ja̧ kwo̧'wo̧ tjo̧bekwö kwö̧ji̧danö kwo̧'wo̧ tjo̧bekwö kwö̧jobe, bakwo̧ ökwönö chiyocha jö̧ba̧lö yöbawö ujunijayonö la'akatjöda iyokobetjö̧.

Isaías 28:17

Ja̧danö wanedö yötawa: O̧do otido̧ma, ba̧ja̧dakwawopja junalo̧, otidaja̧ otiwanö ö̧ba̧jadakobetjö̧, ja̧danö jweinö otidinojobö edakobetjö̧, jö̧tö? Jobekwö ökwödönö ba̧ja̧dö chedocha chömöledö, jweinö lȩekwada yökawaduwojobö jö̧ba̧lö, ja̧danö jweinö ötjö weti̧ a̧ja̧kwö kwö̧jaduwojobö jö̧ba̧lö. Ja̧danö, jweinö lȩekwa yö̧kawaduwokobetjö̧, ja̧danö weti̧ a̧ja̧kwö kwö̧jaduwokobetjö̧, isabenö kwöwaekwaduwakwedöja. Baikwö wanedö yötawa: Tiyuwaso pjei̧ öwiyama ökwödönö tjoduwakobe, ja̧danö ojwe okwatibö söbebö loakobe 'diinö tjöbebö kwotidinaduwemima.

Mateo 25:15

Jobadönö bakwo̧nökwena weinobe, tjotidobö tjöwaisi̧danö. Bakwo̧nö iteda emi̧ baladatjö oro ö̧pi̧biya cinco mil ö̧pi̧biya iyinobe, ite'ada̧lobö, ja̧danö jelo̧nö dos mil oro ö̧pi̧biya iyinobe, ja̧danö jelo̧nö mil oro ö̧pi̧biya iyinobe. Jejenö iyajo̧, jelobe kwebachö i̧'yinobe la'aka luwo̧ma.

Romanos 10:18

Chömöledö, Israel jojodöma otiwa jawa wene tjöpöjödinobe, ¿jö̧tö? ¿Tajawedö tjöpöjödinada chömöledö? ¿Tja̧ja̧kwokobetjö̧ tjöpöjödinaji̧? Ja̧maökö chömöledö, isabenö tja̧ja̧kwinobe otiwa jawa wenema. Dios iwene baikwö laebobe: Otiwa jawa wene yötjawobe ökwöi̧ma böjȩ bakwameachibanö jojodönö ökwöinobe, ja̧danö böjȩ ö'öbönö ju̧kwadöbi tja̧ja̧kwinobe, jö̧ba̧lö laebobe.

Romanos 12:3

Jau chömöledö, Diosma otiwa jawa iyö, ötjönö weinobe ökwödönö yötawobö. Jejenö weinobetjö̧, ökwödönö bakwo̧nökwena weta, Omukwatökönaduwi, ökwödöma otiwadösa, jö̧ba̧lö. Jau chömöledö, Diosda ökwödönö bakwo̧nökwena pjabatinama, Jesúsnö kwösödaduwobö, ¿jö̧tö? Jo̧kwajabetjö̧ otiwo̧sa jö̧ba̧löma kwomukwataduwa chömöledö, bakwo̧nökwena, Dios pjaatinökwesa, jö̧ba̧lö kwomukwataduwo.

Romanos 12:6

Ja̧danö, bakwo̧ iteba'obedö dö̧jobema, bakwo̧nökwena Dios ökwödönö wainökwena iyinadanö ja̧bö dö̧jo chömöledö. Baikwö yötawa chömöledö: Dios bakwo̧nö Dios iwene yöawo jö̧ba̧lö iyinatjö̧ma, Aaa, biya̧ma Dios yöawi̧, yötawobö webo̧ Diosma, jö̧ba̧lö öwaisi̧danö yöawobö jo̧be.

Romanos 15:20

Ba̧kwȩlö̧jatebö ju'wedö yötjawokobe yötawobö chisakwijatö. Baikwö wanedö yötawa: Dios iwene yöbawadöma, o̧do tjotidobedanö otidadö, ja̧danö jelo̧ otidaja̧ wame chotidapji jö̧ba̧lö, ba̧kwȩlö̧jatebö ju'wedö yötjawokobeda yötawobö chisakwijatö.

1 Corintios 12:11

Jejenö wainökwena iyijayonö, iyo̧ma bakwo̧da, Dios O̧'wo̧ Luwo̧da. Ja̧danö, jo̧bada ösödi̧danö okobe deinö bakwo̧nökwena wainökwena iyo̧, jo̧ba ujulunö ja̧bö tjö̧jo jö̧ba̧lö.

Efesios 4:7

Chömöledö ökwödöma tjiteba'o bakwa'odanö babibinadö dö̧jijayonö Cristoma ökwödönö bakwo̧nökwena dotidawakwena wainö iyobö omukwato̧. Ja̧danö, ökwödönö bakwo̧nökwena otiwanö pjabatö iyo̧, dotidawakwena, Dios weina otiwanö dotidobö.

1 Pedro 4:10

Diosma ökwödönö bakwo̧nökwena ja̧bö kwö̧jaduwobö iyinobe chömöledö, ¿jö̧tö? Jau chömöledö, ökwödönö bakwo̧nökwena iyinobe, jo̧kwajabetjö̧ ja̧ iyina jweinö omukwatö, ja̧bö kwö̧jaduwobö iyinadanö kwömöledöduwinö pjabatakwawö kwö̧jaduwo.