2 Corintios 10:1 - Dios Iwene1 Chömöledö, Cristoma lȩlö̧jinö ja̧danö dösölö̧jinö ja̧bö jo̧, ¿jö̧tö? Ja̧danö, ötjö Pabloma jo̧ba Cristo iminö dösölö̧jinö abebö wetaduwakwö, ökwödönö wȩyudö yötawi̧ kwa̧ja̧kwaduwobö, kwiteboduwibe chichibena ökwödönö lȩtebapji jö̧ba̧lö. Jau chömöledö, ju'wedö ötjönö yötja̧lena, Aaa, Pablo ökwödökwö ö̧jenama, labinöma yöba̧lö̧kö̧, sule jelobetjö iwȩyudenada labinö yöbawö wȩyudo̧ Pabloma, jo̧kwajabetjö̧ ichakwa̧ yedabökö jö̧ba̧lö yötja̧lena. အခန်းကိုကြည့်ပါ။ |
2 Corintios 10:1
38 ပူးပေါင်းရင်းမြစ်များ
Ja̧danö, Dios iwene wȩyudina Isaíasbi biya̧ wene yebabökönö iwȩyudinobe, Dios Israel jojodöböködönö yöawi̧ma. Baikwö laebobe Isaías iwȩyudinama: Ötjönö Diosnö isakwöködöma, tjisakwököjayonö, ötjönö tjöbadekwajinobe. Ja̧danö, ötjönö isakwö abebinöködöma, jobadönö chi̧sekwijatö, ötjönö tjedobö, jö̧ba̧lö laebobe Dios Israel jojodöböködönö yöawinama.
Chömöledö, Diosma ökwödönö lȩlö̧jinö edinobetjö̧, yötawaduwakwö, Diosnö kwiyawaduwo, Diosnö iyawadö, ina 'yaba̧ladö iyawadö bakibaduwanö. Jejenö kwiyawaduwobö chösöda chömöledö. Ja̧danö, Diosnö iyawadö kwö̧jaduwobema, jo̧ba wei̧da jwaikwöda ja̧bö kwö̧jaduwo chömöledö, Dios ösödi̧danö. Jejenö Diosnö kwösödaduwobö otiwa chömöledö.
Jo̧kwaijayonö, ida̧ökö waisadöja jö̧ba̧lö chomukwatijayonö, ina wȩyudö weta ökwödönöma biya̧ jawa kwomukwataduwobö, biya̧ jawa kwo̧'wo̧ jwikibaduwapji jö̧ba̧lö. Diosma otiwa jawa iyö judío jojodöböködönö yötawobö weinobetjö̧, yebabökönö wȩyudö wetajabe, Diosma ötjönö 'da̧batö ujuninobetjö̧ judío jojodöböködönö yöbawo̧ batibanö. Jau chömöledö, Cristo Jesús ömöayo̧sa, ja̧danö jo̧ba wei̧ ja̧bö judío jojodöböködönö pjatatobe. Wanedö yötawa, Jjudío jojodöböködönö pjatati̧ma: Diostjö judío jojodöböködötjö ö'weje pjabato̧danö chichejekwa chömöledö, jobadönö otiwa jawa wene yötawobetjö̧. Ja̧danö, ö'weje jojo chotidobema, judío jojodöböködönö Dios ö̧jobekwö ötibobedanö ichejekwa. Ja̧danö, jobadönö chiyobedanö ichejekwa Diosnöma, jobadönö edö iteda ömöledö batjibanö ösödö emo jö̧ba̧lö. Ja̧danö, Dios O̧'wo̧ Luwo̧ jobadönö 'da̧batö ujunobetjö̧, Diosma jobadönö emö ösödobe chömöledö.
Jau chömöledö, Cristo ömöledödobetjö̧, wajwibadödanö dichejekwa. Jejenö dichejekwonö, ökwödö Cristo ömöledö ja̧nö, Aaa, waisadösa jö̧ba̧lö kwomukwataduwobe. Ja̧danö, dujulu jwibadödanö dichejekwijayonö, ökwödöma Aaa juluwadösa jö̧ba̧lö kwomukwataduwobe. Ja̧danö, ju'wedö ökwödönö Aaa, jobadö Corintio jojodöma otiwadö jö̧ba̧lö tjomukwatonö, ökwödönö sulabedö jö̧ba̧lö tjomukwatobe.
Ja̧danö, baikwö wetaduwakwö chömöledö, otiwanö yötawi̧ kwa̧ja̧kwaduwobö, jobe ichibö labinöma yötawökakobetjö̧. Jau chömöledö, ju'wedöma ötjönö baikwö yötja̧lobe: Böjȩ jojodö tjomukwati̧danö omukwatö, iteda emotö jö̧ba̧lö yöbawo̧ Pabloma jö̧ba̧lö. Jejenö yöba̧ladöma sulabenö tjomukwatobe chömöledö, ja̧danö baikwö yötawaduwakwö, wȩyudö yötawi̧ tja̧ja̧kwökötjö̧ma, isabenö labinö lȩbebö yötawakwo̧sa jobadönöma.
Chömöledö, Cristo ömöayo̧ chö̧ji̧ma isabenö öwawobe, kwöwaisaduwobö, ¿jö̧tö? Jejenö öwaetjöda öwawijayonö, ökwödötjö jelo̧ omukwatena, Aaa, Pabloma Cristo ömöayo̧bö̧kö̧, ötjödasa Cristo ömöayo̧ma jö̧ba̧lö. Jejenö omukwatoböma jwia chömöledö, ötjö Pablobi isabenö Cristo ömöayo̧sa, ja̧danö Cristo ömöayo̧sa jö̧ba̧lö omukwato̧ma, ötjönöbi jweinö omukwatobö jo̧be, isabenö Pablobi Cristo ömöayo̧ jö̧ba̧lö.
Jejenö ökwödönö sulabenö ja̧badönö ösödadöja chömöledö, ja̧danö jobadö ja̧tji̧danö ja̧awa isabenö otiwitjö̧ma, tabakwö yöta̧lo jö̧ta̧lena, jobadötjö baikwönönöbo̧sa jö̧ba̧lö. Jau chömöledö, jobadö ja̧tji̧danö isabenö otiwitjö̧ma, otiwanö yöbawo̧ chö̧joböma jwitena, ötjöma jejenö ökwödönö sulabenö ja̧tobö jwitobetjö̧, ja̧danö sulabenö yöbawo̧sa jö̧ba̧lö tabakwö chö̧jo jö̧ta̧lena, ¿jö̧tö? Jo̧kwaijayonö, jobadö ja̧tji̧danö ja̧awama otiwökö chömöledö, jo̧kwajabetjö̧ taba jwiinö yötawaduwakwö, isabenö otiwanö yöbawo̧sa̧ jö̧ba̧lö chömöledö. Chömöledö, isabenö yötawi̧ kwa̧ja̧kwaduwobö jo̧be, yötawi̧ma isabenö nöinö mikwawobetjö̧. Ötjöma isabenö ökwödönö yöbawadötjö ja'yubebi baikwönönöbö̧kö̧sa chömöledö, baikwö yötawa: Jobadötjö bakwo̧ ju'wijayetjö, Aaa, otiwo̧sa jö̧a̧lobö jö̧a̧litjö̧ma, wame jawa omukwatadö yötja̧li̧danö ötjöbi jejenö yöta̧locha, ötjöbi bakwainö otiwo̧sa jö̧ba̧lö. Jau chömöledö, kwomukwataduwobö ötjöbi jobadö yötja̧li̧danö wame jawa yöba̧lö yöta̧locha, otiwo̧sa jö̧ba̧lö.
Okobe jwiinö ja̧ chöbaledina jawa yötawaja̧ma isabenö chöbaledijatö chömöledö, ja̧danö ja̧ jawama öwaetjöda i̧sebobe isabenö Cristo ömöayo̧ otiwo̧sa jö̧ba̧lö. Jau chömöledö, ju'wedö Cristo ömöayedö otiwadösa jö̧ba̧lö yötjawobö ji̧tjö̧ma, ötjöbi Cristo ömöayo̧ otiwo̧sa yöta̧lobö jȩna chömöledö, jo̧kwajabetjö̧ isabenö yötawi̧ kwa̧ja̧kwaduwobö jo̧be. Jau chömöledö, isabenö ja̧ jawa chöbaledijatö, ja̧danö Diosma chöbaledina waiso̧ chömöledö. Jau chömöledö, Duluwo̧ Jesús uluwo̧ Dios, iteda abe'doma kabatökönö ba̧kwȩlö̧jatebö dösödakwo̧, ja̧danö jo̧bama waiso̧, isabenö jweinö yöta̧lobe jö̧ba̧lö. Chömöledö, ötjöma otiwo̧sa, juluwo̧sa jö̧ba̧lö yöta̧loböma isabenö chöpöjöda, jo̧kwajabetjö̧ chö̧ji̧ jawatjö ju'wi jaye otiwa jö̧ba̧lö yöta̧lobö ji̧tjö̧ma, ötjöda chujulu i̧sebi̧ jawa yöta̧lökö, sule chujulu jwiti̧ wene i̧sebi̧ jawada yöta̧lobö chösöda chömöledö, otiwa jö̧ba̧lö.
Jo̧kwajabetjö̧, babema Cristo yöa̧lo jö̧a̧laja̧ma, ökwödönöda weajabe, jo̧ba yöa̧li̧ma ökwödöda jojodönö yödawobö. Jo̧kwajabetjö̧ Cristo yöa̧lo jö̧a̧li̧ma, jojodönö yöbawö dö̧jobe chömöledö. Jau chömöledö, ökwödönötjö Diosma jojodönö budekwödanö a̧deba̧lobe, chömöledö bakibaduwo jö̧ba̧lö. Jau chömöledö, sule yöbawödama yödawokobe, budekwödanö jojodönö yödawobe, Jesúsnö kwösödaduwo jö̧ba̧lö.
Jejenö laebobe otiwa jawa wenema chömöledö, ja̧danö Dioskwö bakobe otidö, budekwödanö abebadösa jojodönö, Dios mikwa jwiinö otiwanö iyö pjaati̧ma kwöpöjödaduwa jö̧ba̧lö. Jau chömöledö, Dios iwene damötjö tjiwȩyudinadanö jo̧be, baikwö laebobe Dios iwene: Ökwödönö pjatatakwa̧ möle baibenama, ökwödönö cha̧ja̧kwijatö, ja̧danö kwö̧jibaduwinö pjatatakwa̧ möle baibenama, ökwödönö pjatatijatö, jö̧ba̧lö laebobe Dios iwene. Jejenö laebobe Dios iwene chömöledö, ja̧danö Dioskwö bakobe otidö yödawobe: Dios ökwödönö pjaatakwa̧ möle jö̧ba̧lö badekwachi̧ma, babe möleda badekwachobe, ja̧danö kwö̧jibaduwinö pjaatakwa̧ möle badekwachi̧ma babe möleda badekwachobe, jo̧kwajabetjö̧ Dios iyi̧ öpöjödökönö, Cristonö kwösödaduwo jö̧ba̧lö yödawobe jojodönö.
Jau chömöledö, sulabenö öpöjödadö jö̧ba̧lö chomukwatökö ökwödönö, isabenö ötjönö ösödadöja jö̧ba̧lö chöwaisobe, ja̧danö jejenö ökwödönö chöwaisobetjö̧ yebabökönö jweinö yötawobe ökwödönö, Corintio jojodöma otiwanö tja̧ja̧kwakwedö jö̧ba̧lö. Jau chömöledö, ökwödönö chösöda, yötawi̧ otiwanö a̧ja̧kwadöja jö̧ba̧lö, ja̧danö jejenö chöwaisi̧ma chujuluwachibanö pjaatobe, cho̧'wo̧ ösöwachibanö chö̧jobö. Jau chömöledö, nöinö wene döbaledijayonö, ökwödönö omukwatö, chömöledö Corintio jojodöma isabenö otiwanö a̧ja̧kwadö jö̧ba̧lö cho̧'wo̧ ösöwachibanö jo̧sa.
Jo̧kwaobetjö̧ chömöledö, Diosma ökwödönö otiwanö pjaatobetjö̧ budekwö lȩtebaduwakwö, Otiwanö Dios ösödi̧ jawada ja̧bö ju̧kwaduwi, jö̧ba̧lö. Ötjöma Duluwo̧ weina yötawobetjö̧ ka̧lena ba̧kwaweju okwama bo̧sa. Bena ba̧nö budekwö lȩtebaduwakwö, baikwö: Diosma ökwödönö jwöinobe iteda ömöledö bakibaduwobö. Jo̧kwaobetjö̧, iteda ömöledö bakibinaduwobetjö̧ otiwanö ja̧bö ju̧kwaduwi, iteda ösödi̧ jawada ja̧bö, chömöledö.
Ja̧danö isabenö ökwödöma jwaikwöda Cristonö kwösödaduwobö jo̧be, 'diinö pjolachibökönö kwö̧jaduwobö jo̧be chömöledö, otiwa jawa wene a̧ja̧kwö kwo̧'wo̧ kwöwana̧laduwi̧ wenema kabatibökönö chömöledö. Jau chömöledö, ja̧ otiwa jawa wene, böjȩ bakwameachibanö jojodö tja̧ja̧kwi̧ wenetjö ömöayo̧danö babibinasa chömöledö, ja̧ wene yöbawö chö̧jo jö̧ba̧lö.
Jau Filemón, ötjö Pabloma ötjö chömamunöda baikwö chiwȩyuda: Onésimo ökwönö umusiditjö̧ma ötjödada jo̧ba umusidi chimidocha jö̧ba̧lö. Kwöwaisa Filemón, ökwöda ötjö Pablonö kwumusido jö̧ka̧lena, ötjödasa ji̧kwa wene yöbawö ökwönö kwö̧jibobö pjabatinachobetjö̧, ¿jö̧tö? Jo̧kwaijayonö ökwöda ötjönö kwumusido jö̧ka̧lijayonö, yayonö yöta̧la, Onésimo ökwönö umusiditjö̧ma ötjöda chimidocha jö̧ba̧lö.
Chösödawö̧ chömöledö, ökwödöma isabenö kwiteboduwi mölejȩbetjö ödö ja̧nö, lekwema böjȩnö jö̧ködöja. Jo̧kwajabetjö̧ ökwödönö budekwödanö atebaduwakwö, böjȩ jojodö sulabenö tjösödi̧ jawa ja̧bökönö kwö̧jaduwobö. Ja̧ sulabenö kwösödaduwi̧ jawama baikwö wanedö yötawa, kwo̧'wo̧ luwo̧duwinö ölakwabikwawobedanö ichejekwa, jo̧kwaijayonö ja̧ jawa ja̧bökönö kwö̧jaduwo.
Chömöledö, ötjöma ökwödö kwömöledöduwiso̧sa. Ökwödöma bakweminö Jesúskwö dötewinö babibinadösa. Ja̧danö, Jesúsnö dösödobetjö̧ ökwödönöbi, ja̧danö, ötjönöbi inia tjödinö baledobe. Ja̧danö, ju'winö, bakweminö Jesúskwö dö̧jakwedösa, iteda La'aka Luwo̧ ö̧jakwa̧ möle baledena. Ja̧danö, ökwödöma ja̧ möle baledakwa̧ bakweminö te'ada̧ladösa, Jesús La'aka Luwo̧ ö̧jakwa̧ möle baledakwa̧ma. Ja̧danö, labi̧ jawa baledenabi, do̧'wo̧ 'dibachibö ja̧nö ju̧kwadösa, bakweminö. Ja̧danö, chömöledö, ökwödönö yötawobö jö̧ta̧la ötjönö baledina, kwöwaisaduwobö. Ötjöma, Dios iwenebi, Jesús ö̧jina wenebi yötawobetjö̧ ötjönö do̧batö, e'ewö lotjijatö bi'o o'wejesa'onö, Patmos mikwa'onö le'dedö. Jau, le'dedö lotjinökwesa ötjöma, bi'onöda chö̧jobö.
ကြော်ငြာတွေ