1 Timoteo 2:1 - Dios Iwene

¹ Ja̧danö, Jesúsnö ösödadönö weawa yötawa Timoteo, Jesúsnö ösödadönö weköbobö. Jesúsnö ösödadönö ajayi weti̧ma biya̧, Jesúsnö ösödadöma Diosnö atjebobö jo̧be. Ja̧danö, Jesúsnö ösödadö jwibö tjö̧jenama, Diosnö atjebobö jo̧be iyobö. Ja̧danö, ju'wedö jojodönö atjebobö jo̧be, Dios jobadönö pjaatobö. Ja̧danö, Diosma otiwanö iyinobetjö̧, jo̧banö atjebobö jo̧be, otiwanö pjabatö kwiyajabe jö̧ba̧lö. Ja̧danö, Jesúsnö ösödadöma Diosnö atjebobö jo̧be okobe deinö jojodönö pjaatobö.

1 Timoteo 2:1 ပူးပေါင်းရင်းမြစ်များ

Hechos 17:30

¿Kwöwaisaduwiji̧? Diosma lekwe omukwatijökötö jo̧banö wajwibadö sulabenö ja̧tjinama, Ina lȩtebökö, jö̧ba̧lö. Jo̧kwaijayonö babema jejenömaökö. Babema Diosma weobe jojodönö, Sulabenö tjomukwati̧ kabatibö tjöbalewacho, jö̧ba̧lö.

Romanos 1:8

Chömöledö, ökwödönö nöinö yötawakwa̧ abönö, yötawaduwakwö chömöledö: Böjȩnö ju̧kwadö okobe deinö yötja̧lobe ökwödönöma, Roma jojodöbi Jesucristonö ösödadö, jö̧ba̧lö. Jejenö yötja̧li̧ a̧ja̧kwö, ötjöma jwiinö cho̧'wo̧ ösöwanö cha̧ja̧kwobe. Ja̧danö ösödö, Diosnö yöta̧lobe, Jesucristo midawö woinobetjö̧, ökwödönö Romanö ju̧kwadönö jwiinö otiwanö pjaatinobe, jö̧ba̧lö, yöta̧lobe Diosnöma chömöledö.

Romanos 6:17

Ja̧danö, ökwödöma ajayinöma suli̧ ömöayedödanö kwuju̧kwinaduwobe. Jo̧kwaijayonö, suli̧ ömöayedödanö kwuju̧kwaduwemi ja'ötjö, Dios iwene kwa̧ja̧kwinaduwobe. Ja̧danö, isabenö wene a̧ja̧kwibö, jwaikwöda Dios iwene kwösödinaduwobe chömöledö.

1 Corintios 15:3

Jau chömöledö, inesö mikwawi̧ wene ötjö cha̧ja̧kwina wenema ökwödönö yötawijatö. Ja̧ yötawina wenema biya̧ chömöledö: Damötjö Dios iwene wȩyudinadö imidawakwo̧nö tjiwȩyudinadanö, Cristoma midawö woinobe, ökwödö dusuli̧ imidawo jö̧ba̧lö.

2 Corintios 8:6

Ja̧danö, ja̧ wene omukwatö, Titonö yödawijatö, yemidanö ökwödö Corintio jojodö kwiteboduwibe i̧'yobö, ökwödö kwiyaduwakwa̧ jawa pjaatobö. Jau chömöledö, belö Titoda ökwödönö pjaatinobe, ja̧ iyawa baladama 'da̧batö kwujunaduwobö, ¿jö̧tö? Jo̧kwajabetjö̧ jo̧banö yödawijatö, ja̧ Jerusalénnö ju̧kwadönö kwiyaduwobö kwomukwatinaduwa balada jawa pjaatobö, ajayinö kwomukwatinaduwadanö otiwanö kwiyaduwakobetjö̧.

Efesios 3:13

Jo̧kwaobetjö̧ chömöledö, kwo̧'wo̧duwi tjo̧kekwaduwa ötjönöma, ka̧lena ba̧kwaweju okwa ba̧nö inia tjötinö baledi̧ma. Ökwödönö kwö̧jibaduwinö pjabato̧nö yötawinobetjö̧, inia tjötinö baledobe, chömöledö. Jau, inia tjötinö ötjönö baledijayonö, ji̧bakwawa wene yötawina kwa̧ja̧kwinaduwobetjö̧ jejenö baledobe. Chömöledö, kwo̧'wo̧duwi ösöwanö ju̧kwaduwi otiwanö kwa̧ja̧kwinaduwobetjö̧.

Efesios 5:20

Jejenö lo̧bö Diosnö kwösödaduwo ba̧kwȩlö̧jatebö, jwiinö sulabenö baledenabi, otiwanö jenabi. Jesucristoma ökwödö kwuluwo̧duwiobetjö̧, Diosnö kwösödaduwo, Dabe'do ökwönö dösöda, otiwanö pjabato̧ja, jö̧ba̧lö.

Efesios 6:18

Ja̧danö chömöledö, ba̧kwȩlö̧jatebö Dios O̧'wo̧ Luwo̧ ökwödö kwo̧'wo̧ luwo̧duwinö öba̧ja̧da̧lonö a̧ja̧kwö akebaduwo Diosnöma, okobe jwiinö pjaataduwokwö. Kwö'wachibaduwoko chömöledö, Diosnö aekwama. Ba̧kwȩlö̧jatebö, ö'wachibökönö akebaduwo Diosnöma, iteda ömöledö babibadönöma pjaatobö.

Filipenses 1:3

Chömöledö, ba̧kwȩlö̧jatebö ökwödönö chomukwatenama, Chuluwo̧ Diosnö ösödö atebobe, jwiinö otiwa jö̧ba̧lö.

Filipenses 4:6

Ja̧danö, okobe jwiinö baledi̧ma, kwo̧'wo̧ tjo̧kekwaduwa chömöledö, dakwö ja̧dakwajö jö̧ba̧löma. Kwo̧'wo̧ tjo̧bekwökönö, Diosnöda akebaduwo chömöledö, jo̧ba pjaatobö akebaduwonö, otiwanö pjabato̧ja jö̧ba̧lö.

1 Tesalonicenses 3:12

Ja̧danö, Duluwo̧nö ateba, kwömöledö Jesúsnö ösödadönöbi, ja̧danö okobe deinö jojodönöbi kwösödabikwawaduwi̧ nöachinö pjaato jö̧ba̧lö, ökwödönö dösödi̧danö kwösödabikwawaduwo jö̧ba̧lö.

2 Tesalonicenses 1:3

Chö̧ja̧wo̧dö, Diosma ökwödönö pjaatobetjö̧, jo̧banö dösödobö jo̧be, ja̧danö dösödo jö̧da̧li̧danö kabatökönö otiwanö Diosnö ösödö yöda̧lobe, otiwanö Tesalónicanö ju̧kwadönö pjabato̧ja jö̧ba̧lö. Jau chömöledö, ökwödönö pjaatobetjö̧, Jesúsnö kwösödaduwi̧ma nöachobedanö ichejekwa, ja̧danö kwömöledö Jesúsnö ösödadönö kwösödabikwawaduwi̧bi nöachobedanö ichejekwa. Ja̧danö jejenö pjaatinobetjö̧, otiwanö pjabato̧ja jö̧ba̧lö yöta̧lanö chömöledö.

1 Timoteo 2:4

Jau Timoteo, Diosma jejenö ja̧bö dö̧jobö ösödo̧ okobe deinö böjȩnö ju̧kwadö tjö̧jibobö ösödobetjö̧, ja̧danö okobe deinö isabenö wene tjöwaisachibobö ösödobetjö̧.

1 Timoteo 5:5

Jesúsnö ösöduju jilekwenö wobekwinuju jömöledö debujuma, jömöledönö jo̧'wo̧ jöwana̧loböma jwibuju. Ja̧danö, Diosnöda jo̧'wo̧ wana̧luju, jo̧bada ite'ada̧lobö, ja̧danö kabatökönö Diosnö abebuju, kabatökönö Dios pjaatobö abebuju jobujuma, yö̧tebi, mölebi. Jobujujayedönö Dios ömöledö tjite'ada̧lobö jo̧be.

2 Timoteo 2:24

Jau Timoteo, kwöwaisa, Duluwo̧ ömöayedöma jwöjwötjakwawobö jwibadö, ¿jö̧tö? Jwöjwöbakwawökönö, okobe deinö jojodönö dösölö̧jinö yötja̧lakwawobö jo̧be Duluwo̧ ömöayedöma. Jau Timoteo, Duluwo̧ ömöayedöma okobe deinö jojodönö dösölö̧jinö yötja̧lobö jo̧be. Ja̧danö ju'wibi, jojodönö tjöba̧ja̧dobö jo̧betjö̧, otiwanö jojodönö Dios iwene ba̧ja̧dakwawa tjöwaisachobö jo̧be, jweinö tjöba̧ja̧dakobetjö̧. Ja̧danö ju'wibi, jojodö jobadönö sulabenö ja̧tjenama o̧'wo̧ 'dibachibö tjöbaledobö jo̧be.

Tito 2:11

Jau Tito, Dios okobe deinö böjȩ jojodö tjö̧jibobö pjaatenama, öwaetjöda i̧sebinobe, Mikwa jwiinö otiwa jawa iyo̧sa, jö̧ba̧lö.

Tito 3:2

ja̧danö, ju'wedönö sulabenö yöba̧lökönö tjö̧jobö, ja̧danö jwöjwöbökönö tjö̧jobö, ja̧danö, dösölö̧jinö yöba̧lö tjö̧jobö, ja̧danö okobe deinö ju'wedönö otiwanö dösölö̧jinö ja̧bö tjö̧jobö yökawodönö.

Hebreos 6:11

Chömöledö, kwö̧ja̧wo̧dönö dösölö̧jinö pjakataduwi̧danö Jesúsnö do̧batö kweminaduwa baikwö, babebi kwo̧'wo̧ luwo̧duwi okwanö dösölö̧jinö kwi̧'yaduwo, jwaikwöda Diosnö kwo̧'wo̧duwi wana̧lö. Chömöledö, jwaikwöda kwi̧'yaduwobö chösöda, Diosnö kwo̧'wo̧duwi̧ wana̧lö, Okobe jwiinö Dios yöbawö ujuninama isabenö baledakobe, jö̧ba̧lö. Jejenö te'ada̧lö jwaikwöda kwi̧'yaduwo chömöledö, okobe jwiinö Dios yöbawö ujuninama badekwachenanö kabatö.

Santiago 5:16

Isabenö yötawaduwakwö. Jojodö atjebiökwe pjabato̧ Duluwo̧ma, ö'wöchadönö tjö̧bibajinö pjabatöbi, sulabenö ja̧tji̧ yöbawö lobadö tjusuli̧ söbebö loböbi. Jo̧kwaobetjö̧ chö̧ja̧wo̧dö suli̧ ja̧köbaduwi̧ma yökawakwawaduwo ökwödödada. Ja̧danö, ökwödödada Diosnö akebakwawaduwo kwö̧bibaduwinö pjaatobö. Isabenö, bakwo̧ Dios ösödi̧danö ja̧bö jo̧ma Diosnö aebena, Pjabati, jö̧ba̧lö, Diosma iteda ujulunö pjaatobe.