1 Timoteo 1:5 - Dios Iwene

⁵ Jau Timoteo, jobadönö kwöba̧ja̧do, sulabenö tjomukwati̧ kabatibö, tjömöledö Jesúsnö ösödadönö tjösödo jö̧ba̧lö. Ja̧danö, tjomajadenö sulabenö omukwatökönö tjuju̧kwobetjö̧, ja̧danö: Aaa, biya̧ma otiwanö ja̧awa jö̧ba̧lö tjomajadenö tjöwaisi̧danö ja̧bö tjuju̧kwobetjö̧, ja̧danö isabenö Diosnö ösödö tjuju̧kwobetjö̧, tjömöledö Jesúsnö ösödadönö ösödö tjö̧jena.

1 Timoteo 1:5 ပူးပေါင်းရင်းမြစ်များ

Mateo 12:35

Jau, otiwo̧ma, omajadenö otiwa jawa omukwati̧tjö otiwa jawa yöba̧lo̧, ja̧danö sulabo̧ma omajadenö suli̧ jawa omukwati̧tjö suli̧ jawa yöba̧lo̧.

Mateo 5:8

Tjomajadenö sulabenö omukwatöködöma, isabenö tjo̧'wo̧ ösöwanö tjö̧jakwedö, jobadöma Diosnö tjedakobetjö̧.

Hechos 15:9

Chömöledö, Diosma judío jojodönöbi ja̧danö, judío jojodöböködönöbi bakwainö edo̧. Ja̧danö, bakwainö edobetjö̧ Diosma judío jojodöböködö tjo̧'wo̧ luwo̧nö dewinö baibanö tjusuli̧ma söbebö lobijetö, Jesúsnö tjösödobetjö̧, ökwödö dusuli̧ söbebö loinadanö.

Hechos 23:1

Ja̧danö, Pabloma, judío jojodötjö la'aka luwedö tjöba a'o ja̧nö, jobadönö jweinö edö yöbawijetö: —Chömöledö isabenö jö̧ta̧la. Ötjöma, la'akatjöda chö̧jinenanö baibanö omukwatiachijatö chomajade okwa, Ötjöma Dios öba a'otjö otiwanö ja̧bö jo̧sa, jö̧ba̧lö— yöbawijetö Pabloma.

Hechos 24:16

Jo̧kwaobetjö̧ böjȩnö ja̧nö chomajade okwa chomukwatobe, Dios öba a'otjöbi jojodö tjöba a'otjöbi otiwanö ja̧bö chö̧jobö jö̧ta̧la, jö̧ba̧lö— jö̧ba̧lö atadijetö Pabloma.

Romanos 10:4

Jau chömöledö, Cristoda okobe jwiinö Dios Moisésnö weina ja̧bina, ¿jö̧tö? Jo̧kwaijayonö, Cristoda okobe jwiinö ja̧inajayonö, Cristonö ösödadönöbi jö̧ba̧lo̧ Diosma, Bidöma sulabe jwibadö, jö̧ba̧lö. Ja̧danö, Cristoma Moisés iwȩyudinama söbebö loinobedanö ichejekwa chömöledö, Dios Moisésnö weina ja̧bökönö sulabe jwibadö badibobetjö̧.

Romanos 12:9

Ju'wedönö isabenö kwösödaduwo, wamedama kwösödaduwoko, okwanö kwösödaduwo. Jau chömöledö, sulabe jawa Dios öpöjödi̧ jawama kwöpöjödaduwo. Ja̧danö wanedö yötawa: Otiwa jawa 'diinö do̧ka̧laduwo, ja̧da kwösödaduwo.

Romanos 14:15

Jau chömöledö, kwöjawo̧duwi omukwatena, Ju'wi kwakwawa sula, Dios weökö jawa, jö̧ba̧lö. Ja̧danö, jejenö omukwatijayonö ökwödö kwukwaduwitjö̧ma, jo̧banö suli̧ kwöwaedaduwena, sulabenö omukwatobö ja̧köbaduwobetjö̧. Ja̧danö, jejenö ja̧bö kwöjawo̧duwinö ösödökönö kwukwaduwena chömöledö. Jejenö suli̧ waedökönaduwi kwö̧ja̧wo̧dönöma chömöledö. Cristoma jobadönö ösödö midawö woinobe, ¿jö̧tö? Jo̧kwajabetjö̧ kwö̧ja̧wo̧dönöma suli̧ waedökönaduwi chömöledö.

Romanos 9:1

Chömöledö, ötjöma isabenö ötjöda chömöledönö, Israel jojodönö jwiinö cho̧'wo̧ tjo̧acha, Diostjö 'da̧bachibö tjuju̧kwobetjö̧. Ja̧danö, kabatökönö chomajade niobedanö ichejekwa chömöledö, jwiinö cho̧'wo̧ tjo̧achobetjö̧. Ja̧ yötawaja̧ma Jesúskwö ja̧nö jweinö yötawobe, omöna yöta̧lökö. Ja̧danö, Dios O̧'wo̧ Luwo̧ma yötawi̧ a̧ja̧kwö, Jau jweinö yökawobe, jö̧ba̧lö chomajadenö yöawobe. Ja̧danö jejenö yöawobetjö̧, chöwaisa, Jweinö yötawobe chömöledönö cho̧'wo̧ tjo̧achi̧ma, jö̧ba̧lö. Jau chömöledö, isabenö chömöledö Israel jojodönö chösödobe. Ja̧danö jobadönö ösödö baikwö chomukwatobe: Chömöledö Israel jojodö tjö̧jibo jö̧ba̧lö, Diosma balekwo̧nö ötjönöda lȩbebö, ötjönö Cristo ö̧jelötjö 'da̧batö loitjö̧ma, otiwena, jobadö tjö̧jibobö, jö̧ba̧lö chomukwatobe.

1 Corintios 13:1

Ötjöma okobe deinö jojodö tjiwenebi, ángelesdö tjiwenebi okobe jwiinö tjiwenetenia otiwanö yöta̧lena. Jo̧kwaijayonö jejenö tjiwenetenia yöta̧lijayonö, ju'wedönö ösödakwabikwawökönö ja̧nö chö̧jitjö̧ma, chö̧ji̧ma mikwawökena chömöledö. Ja̧danö wanedö yötawa, yötawi̧ okwa jawa jwiobetjö̧, sule campanadanö, 'dii̧ jawatjö kwatji̧ ökwöi̧danö chichejekwena chömöledö.

2 Corintios 1:12

Chömöledö, otiwanö ökwödönö ja̧bö dö̧jina wene yötawaduwakwö, ökwödönö sulabenöma ja̧binöködösa jö̧ba̧lö. Jau chömöledö, okobe jwiinö böjȩnö ja̧nö ja̧di̧ma, ja̧danö ökwödönö ja̧bö dö̧ji̧ma sulabenö ja̧bökönö dö̧jijatö, Dios pjaatonö jweinö ja̧bö dö̧jijatö chömöledö. Ja̧danö, ja̧bö dö̧jinama ökwödöda waisanö omukwatöma ja̧dijökötö chömöledö, Diosda lȩlö̧jinö edö ökwödönö pjaatobetjö̧, otiwanö ja̧bö dö̧jijatö chömöledö. Jejenö yötawaja̧ma, jweinö yötawa chömöledö, ja̧danö chomajadenö chöwaisa, isabenö yötawa jö̧ba̧lö.

Gálatas 5:22

Jo̧kwaijayonö Dios O̧'wo̧ Luwo̧ do̧'wo̧ luwo̧nö otidi̧ma wainö ji̧ chömöledö. Baikwö yötawa: Dios O̧'wo̧ Luwo̧ otidi̧ma chömöledö, biya̧: ösödabikwawi̧bi, tjo̧'wo̧ ösöwi̧bi, tjo̧'wo̧ luwo̧nö wene jwiinö ja̧kwawabi, tjo̧'wo̧ 'dibachibö ja̧kwawabi, jojodönö dösölö̧jinö ja̧danö otiwanö ja̧awabi, jö̧tja̧li̧danö ja̧awabi,

Gálatas 5:6

Jau chömöledö, Cristo Jesúskwö dötewadö ja̧nö, Dios edemi dötade bajalesado̧ 'wibekwadö dö̧ji̧bi, 'wibekwöködö dö̧ji̧bi mikwawokobe chömöledö, ju'wida mikwawi̧ma. Jau chömöledö, Dios edemi jo̧ba yöawi̧ dösödi̧da mikwawi̧ma, ja̧danö dömöledö Jesúsnö ösödadönö ösödabikwawö ja̧nö di̧sebobe Dios yöawi̧ dösödi̧ma.

Deuteronomio 10:12

Tupakwö yöawinobe Moisesma, israel jojodönö: —Ja̧danö chömöledö israel jojodö, kwuluwo̧duwi Isabenö Jo̧ Dios ökwödönö wei̧ma, di̧ya? Sule bi̧yada weobe chömöledö: Kwuluwo̧duwi Isabenö Jo̧ Diosnö yebabinö omukwatö, jo̧ba ösödi̧danö ja̧bö ja̧nö, jo̧banö ile nibebö kwösödaduwobö. Ja̧danö okobe jwiinö kwomajadöduwinöbi, kwo̧'woduwinöbi jwaikwöda kwuluwo̧duwi Isabenö Jo̧ Dios ömöayedö kwö̧jaduwobö,

1 Timoteo 1:18

Jau chitji̧ Timoteo, Dios yöawi̧ yöbawadöma ökwönö yötjawinobe, ja̧bö kwö̧jakwa̧, ¿jö̧tö? Ja̧danö, jobadö yötjawinadanö ja̧bö kwö̧jobö weta. Ja̧danö, ökwönö yötjawina omukwatö, yötjawinadanö Dios wei̧ ja̧bö kwö̧jo. Ja̧danö, guardia jojo tjöbeba̧lö ö̧ji̧danö, tjöbeba̧lönö otiwa jawa wene a̧'dȩlanö te'ada̧lö kwö̧jo, sulabenö yöbawadö otiwa jawa wene balewö lobö, isa̧ökö weneda yötjawapji jö̧ba̧lö.

1 Timoteo 1:19

Ja̧danö kabatökönö Cristonö ösödö kwö̧jo, ja̧danö kwomajadenö kwöwaisi̧danö, jwaikwöda otiwanö ja̧bö kwö̧jo, sulabenö ja̧bökönö. Ju'wedöma tjomajadenö tjöwaisi̧danö ja̧bö tjö̧jinokobetjö̧, waekwinobe. Ja̧danö, Dios iwene tjösödo jö̧tja̧li̧ wenema kabatibö, isa̧ökö weneda tjösödinobe.

1 Timoteo 3:9

Ja̧danö, pjaatakwawa luwo̧ baibanö otidakwo̧ma otiwa jawa wene, Biya̧ma jwei̧ wene, jö̧ba̧lö Dios i̧sebina wene 'diinö do̧ba̧lö jo̧, ja̧danö, omajadenö öwaisi̧danö, Aaa, biya̧ma ja̧tobö otiwa, jö̧ba̧lö öwaisi̧danö ja̧bo̧, pjaatakwawa luwo̧ baibanö otidakwo̧ma.

2 Timoteo 1:3

Timoteo, kabatökönö ökwönö omukwatö Diosnö ösödö yöta̧lobe, otiwa jö̧ba̧lö. Jau Timoteo, cha'dödömine otiwanö Dios wei̧ ja̧bö tjö̧jinadanö, ötjöbi chomajadenö otiwanö chöwaisi̧danö, jwaikwöda Dios wei̧ ja̧bö jo̧sa. Ja̧danö jo̧ba wei̧ ja̧bö chö̧jonö, mölebi, yö̧tebi kabatökönö ökwönö omukwatö atebobe chuluwo̧ Diosnö.

2 Timoteo 1:5

Timoteo, ökwönö omukwatö isabenö Dios yöawi̧ kwösödi̧ wene chomukwatiba. Jau, ajayinöma ökwö kwa'do̧ Loida mikwujuma, isabenö Dios yöawi̧ ösöduju jö̧jinobe, ja̧danö kwojo'do Eunicebi isabenö Dios yöawi̧ ösöduju jö̧jinobe. Ja̧danö chedemi ökwöbi jobadö tjösödi̧danö isabenö ösödo̧ja Timoteo.

2 Timoteo 2:22

Jejenö jo̧be Timoteo, jo̧kwajabetjö̧ baikwö wetakwö: Möayedö sulabenö tjösödi̧tjö 'da̧bachibö döbibaji, ja̧danö ju'wida isakwi, otiwi̧ jawada. Jau ju'wida isakwö kwö̧jobö jo̧be, sulabe jwiinö kwö̧jobö, ja̧danö Dios yöawi̧ kwösödobö, ja̧danö jojodönö kwösödobö, ja̧danö wene jwiinö kwö̧jobö. Tjomajadenö bakwainö otiwadöma jejenö tjö̧jobö isakwadö Timoteo, ja̧danö ökwöbi jejenö kwö̧jobö kwisakwo.

Tito 1:15

Jobadö sulabenö yöbawadöma baikwö yötjawobe: Aaa, ju'wi jaye suli̧ waedakwawa ji̧, ju'wibi suli̧ waedakwawa ji̧, jö̧ba̧lö. Jo̧kwaijayonö, tjomajadenö sulabenö omukwatökönö bakwainö otiwanö omukwatadönöma, suli̧ waedakwawa ji̧ma jwia, okobe jwiinö otiwa. Jo̧kwaijayonö tjomajadenö sulabenö omukwatadöma, Cristonö öpöjödadöbi, tjomajadenö tjöwaisi̧ otiwa jawabi sulabe jawabi tjöwaisi̧ma wajwibadö, tjomajadenö bakwainö sulabenö omukwatadöda baibanö tjuju̧kwobetjö̧.

Hebreos 10:22

Jo̧kwaobetjö̧ Dios ö̧jobekwö tedachaduwo chömöledö, jo̧banö ösödö. Omukwataduwökönuwi, ¡Ayö! Ötjöma Dios öba a'otjö wene juna̧lo̧sa, jö̧ba̧lö. Dioskwö chichibobö jwibo̧sa, jö̧ba̧lö, omukwataduwökönuwi. Jejenö domukwatobö jwiobe chö̧ja̧wo̧dö. Tjo̧wi̧, ökwödöma ja̧ domukwati̧tjö dichö loinawö̧sa, Jesús ökwösobunö lilibö. Ja̧danö chö̧ja̧wo̧dö jwiinö salöobu ojwiyonö idichinawö̧sa, Dios öba a'otjö dewadöda badibinö. Jo̧kwaobetjö̧ Dios ö̧jobekwö tedachaduwo, okwa dichawedöda, Jesús imidawinanö jwiinö do̧'wo̧ wana̧lö.

Hebreos 13:18

Ja̧danö chömöledö, Diosnö akebaduwi̧ma kakatibaduwoko, ötjönöbi, ötjökwö ja̧dönöbi. Yötawaduwakwö chömöledö. Ötjö, ötjökwö otidadöbi domajadenö otiwanö omukwatö ju̧kwadösa, Okobe jwiinö dö̧ji̧ma jweinö omukwatöda dö̧jobö disakwa, otiwanö pjabatö, jö̧ba̧lö.

Santiago 4:8

Ja̧danö chö̧ja̧wo̧dö, kwomukwataduwi̧ balewachö, böjȩ jawatjö 'da̧bachibö Diosnö tjekachajaduwo, kwo̧'wo̧ luwo̧duwi okwanö jo̧bakwö 'dötewinö ja̧nö. Ja̧danö, jo̧banö tjekachajaduwiökwe Diosma ökwödökwö 'dötewinö ö̧jobe. Chö̧ja̧wo̧dö, ökwödöma sulabenö ja̧bö ju̧kwadöja. Ja̧ sulabenö ja̧köbaduwi̧ kabatibö otiwanö ja̧bö kwö̧jaduwo. Yelösöda ökwödöma dötölatajanö omukwatadöja, Diosnö ösödöbi, böjȩ jawa ösödöbi. Ja̧ kwomajadeduwinö sulabenö kwomukwataduwi̧ma kabatibö otiwanöda kwomukwataduwo.

1 Pedro 1:22

Ja̧danö chömöledö, ökwödöma ida̧ökö isabenö wene ösödö kwidichawinaduwobetjö̧, kwömöledöduwi Jesúsnö ösödadönö ösödadöja, yöne dömöledö jö̧ba̧lö. Jo̧kwajabetjö̧ jwaikwöda tupakwönönö ösödabikwawö kwö̧jaduwo chömöledö,

1 Pedro 3:16

Ja̧danö, okobe jwiinö ja̧bö kwö̧jaduwi̧ma, kwomajadeduwinö otiwanö kwöwaisaduwi̧danö ja̧bö kwö̧jaduwo chömöledö. Ju'wedöma isabenö ökwödönö öpöjödö sulabenö yötja̧lena chömöledö, Cristonö ösödadöma sulabedö, sulabenö ja̧badö, jö̧ba̧lö. Jo̧kwaijayonö kwomajadeduwinö kwöwaisaduwi̧danö ja̧bö kwö̧jaduwitjö̧ma, ökwödönö sulabenö yöba̧ladöma taba lö̧jawö̧ tjö̧jakwedö, otiwanö ja̧bö kwö̧jaduwi̧ öwaetjöda öwawobetjö̧.

1 Pedro 3:21

ja̧danö jobadö ojwetjö tjö̧jibinama, babe ökwödö dö̧jibi̧ jawa ojwenö bu̧datakwawa jawa badekwachobe. Ja̧ dö̧jibi̧ma, ojwema diteba'otjö dusula dichö loobetjö̧ ji̧badösa jö̧ba̧löma yöta̧lökö chömöledö, baikwö yötawa: Diosnö abebadösa, domukwati̧ jawa dusula dichö loobö, ja̧danö Jesucristo woawatjö tjeachajinobetjö̧, dö̧jibinö pjabato̧ Diosma.

1 Pedro 4:8

Ja̧danö inesö mikwawi̧ ja̧bö kwö̧jaduwobö yötawaduwakwö chömöledö, jwaikwöda kwömöledö Jesúsnö ösödadönö ösödabikwawö kwö̧jaduwo jö̧ba̧lö. Ja̧ma, ju'wi jayetjö bajalekwönönö inesö mikwawi̧ chömöledö, jejenö ösödabikwawö kwö̧jaduwitjö̧ma, kwömöledö sulabenö ja̧tjaja̧ omukwatökönö jobadönö ösödö kwö̧jaduwakobetjö̧.

2 Pedro 1:7

Ja̧danö jemi tupakwö kwömöledöduwinö ösödabikwawö kwö̧jaduwobö kwisakwaduwo, Ja̧danö jemi tupakwö okobe deinö jojodönö isabenö kwösödaduwobö kwisakwaduwo chömöledö.

1 Juan 3:10

Jejenö ja̧nö, öwawinö i̧sekwobe, Ötjöma Dios öibökwesa, Dioskwö dötewinö chi̧'yinö, jö̧ba̧lö. Jo̧kwaijayonö suli̧ jawa ja̧bö 'yo̧ma ju'wi i̧sekwobe, Ötjöma Awetja öibökwesa, jö̧ba̧lö. Ja̧danö chö̧ja̧wo̧dö, yötawaduwakwö. Cristotjö ö̧ja̧wo̧dönö ösödökönö jo̧ma i̧sekwobe, Ötjöma Awetjakwö dötewinö chi̧'yinö öibökwesa, jö̧ba̧lö. Jo̧ba ö̧ja̧wo̧dönö öpöjödo̧ma Diosma öibökökwe. Chö̧ja̧wo̧dö isabenö, bakwo̧ ö̧ji̧ma i̧sekwobe, Dios öibökwesakö̧, Awetja öibökwesakö̧, jö̧ba̧lö.

1 Juan 3:23

Ja̧danö, Dios wei̧ma dötölataja jawa. Abönö jawa biya̧: Jesucristonö dösödobö weobe, Jesucristoma Dios Itji̧, jwiinö inesö jo̧, jö̧ba̧lö. Ikenama jawa, Dios wei̧ma biya̧: Ökwödöda ösödabikwawö dö̧jobö weobe.

1 Juan 3:3

Ja̧danö, jejenö omukwatö te'ada̧lö jo̧ma, Isabenö ötjöma Jesucristodanö ichejekwo̧ chö̧jakwo̧sa, jö̧ba̧lö, babe böjȩnö ö̧jayi otiwanö ja̧bö 'yo̧, suli̧tjö dichö loinökwedanö. Isabenö chö̧ja̧wo̧dö, Jesúsnö omukwatö te'ada̧lö jo̧ma böjȩnö ö̧jayi sulabenö ja̧bökönö ja̧kwawa isakwo̧, Jesús böjȩnö ö̧jinadanö.