1 Tesalonicenses 5:21 - Dios Iwene

²¹ Jo̧kwaijayonö, okobe jwiinö kwa̧ja̧kwaduwi̧ma, otiwojobö jweojobö jö̧ba̧lö kwisakwaduwo, ja̧danö kwa̧ja̧kwaduwaja̧ otiwitjö̧ma 'diinö do̧ka̧laduwo.

1 Tesalonicenses 5:21 ပူးပေါင်းရင်းမြစ်များ

Proverbios 23:23

Chitji̧, kwö̧jima baikwö kwö̧jo: Omöna yötjawi̧ jawa a̧ja̧kwökönö isabenö ji̧ jawa yötjawi̧ma ösödö kwomajadenö kwanawo. Ja̧danö, jweinö omukwatö ja̧kwawa yötjawi̧ ösödö kwomajadenö kwanawo. Ja̧danö, jwebebö yötjawi̧ ösödö kwomajadönö kwanawo, jobekwöda chö̧jobö jo̧be jö̧ba̧lö. Ja̧danö, di̧ya sulojobö jö̧ba̧lö, di̧ya otiwojobö jö̧ba̧lö waisakwawama ösödö kwomajadenö kwanawo. Jobekwö omukwatö kwö̧jo chitji̧, ja̧ waisakwawa la'akatjöda kakatiboko.

Proverbios 3:1

Baikwö laebobe Salomón iteda itji̧nö möayo̧nö jwebebö yöawinama: Chitji̧ yötawakwö: Ötjö jwebebö yötawi̧ma kwo̧’wo̧ jwikiboko. Ja̧danö, weti̧ma kwomajadenö kwanawo, jwiinö mikwawobe jö̧ba̧lö.

Proverbios 4:13

Ja̧danö, yemidanö yötawakwö chitji̧: Ötjö jwebebö yötawi̧ma a̧ja̧kwö kwö̧jo. Ja̧ yötawi̧ma, 'diinö do̧tja̧li̧danö do̧ka̧lo, kabatibökönö. Kwo̧'wo̧ jwibibökönö ba̧kwȩlö̧jatebö kwomukato ja̧ yötawi̧ma, otiwanö kwö̧jobö öbibö yötawobetjö̧.

Isaías 8:20

Dios wei̧ jawabi, ju'wi Dios yöawi̧ jawabi kwaja̧kwaduwo chömöledö, i̧ya̧da mikwawi̧ma. Ja̧danö baikwö yötawaduwakwö, ju'wedöma Dios yöawinatjö wainö yötjawitjö̧ma, ja̧danö Dios weinatjö wainö wetjitjö̧ma, isabenö wajwibadö jobadöma. Wanedö yöta̧la, tjo̧'wo luwo̧ jawama: Jobadöma bakwainö yȩa'wo jȩmida, la'akatjöda dewi̧ dewachokobeda ju̧kwadö.

Lucas 12:57

Tupakwö yöawinobe Jesúsma: Ja̧danö, kwömöledökwö wene kwujuna̧laduwenama, ¿tajawedö ökwödöda yöba̧lakwawö otikwö loköbaduwokobeda? ¿Tajawedö ökwödöda yöba̧lakwawökönö lȩekwa luwo̧ öba a'o kwi̧'yaduwobeda?

Juan 15:4

Chömöledö, ubasa'ba opjiya dötewi̧danö ötjöma ökwödökwö dötewinö jo̧sa. Ja̧danö, wetaduwakwö. Ötjökwö dötewinö ja̧duwi. Ötjökwö dötewinö ja̧döma ubasa'ba otiwanö wa̧ja'ba wa̧ji̧danö otiwanö da̧peachö tji̧'yakwedö. Ja̧danö, ubasa'ba sopja wa̧jokopja, 'döbebö loawopjama ¿dakwö wa̧jobö? Wa̧jökö. Kököbachöda kököachopja. Jejenö kwi̧'yaduwobe ökwödöma, ötjökwö dötewinö. Ötjökwö dötewinö kwi̧'yaduwökötjö̧ma ¿dakwö da̧peachö kwi̧'yaduwobö? Ötjökwö dötewinö kwö̧jaduwobö jo̧be chömöledö.

Juan 8:31

Jemi ikena, Jesúsma yöawinobe jobadönö, judío jojodönö, iteda yöawi̧ ösödadönöma: —Ötjö yötawi̧ a̧ja̧kwö kwö̧jaduwitjö̧ma isabenö ökwödöma ötjö chöba̧ja̧di̧ waisachadö bakibaduwakwedöja.

Hechos 11:23

Ja̧danö, jo̧ba Bernabéma otiwanö omukwatö, Diosnö jwiinö ösödö ji̧abijetö. Dios O̧'wo̧ Luwo̧ iteda o̧'wo̧ luwo̧ okwanö öba̧ja̧di̧ ösödö ji̧abijetö jo̧ba, Bernabéma. Ja̧danö, jo̧bama Antioquíabe wetjajökwe 'ya̧jo̧ edö ösödijetö. Bidö judío jojodöböködönöma Diosma lȩlö̧jino edö pjaatinobe, jö̧ba̧lö, ösödijetö. Ikenama Bernabéma Jesúsnö ösödadönö tjo̧'wo̧ ösöwachibanö tjomukwatobö yöba̧lijetö, Jesúsnö kabatibökönö kwo̧'wo̧ kwöwana̧laduwo, jö̧ba̧lö. Ja̧danö, Bernabéma Antioquíanö ja̧nö Jesús ö̧jina yöawiawö̧ ba̧jekwadö ju'wedö Antioquíanö ju̧kwadöbi, Jesúsma dö̧jibinö pjabato̧, jö̧ba̧lö, ösödijadötö Jesúsnöma.

Hechos 14:22

Jobe comunidadkwena 'ya̧nö Jesúsnö ösödadönö pjabatö yöbawijadötö, Kwo̧'wo̧ luwo̧duwi juluwachibanö tupakwö kwi̧'yaduwo, jö̧ba̧lö. Jesúsnö kabatibökönö kwö̧jaduwo. Ja̧danö, jo̧banö omukwatö kwö̧jaduwo, jö̧ba̧lö, pjabatö yöbawijadötö. Jobadönö jö̧ba̧lijadötö: —Chömöledö ¿wajwiköbaduwiji̧? Ökwödö Jesúsnö ösödadöma, usula demawobö jo̧be. Isabenö ökwödöma usula emawadösa. Ökwödöma Dios webö ö̧jena ja̧nö, do̧'wo̧ ösöwachibanö duju̧kwenanö baibanö, usula emawadösa— jö̧ba̧lijadötö.

Hechos 17:11

Ja̧danö, Bereanö ju̧kwadö judío jojodöma, Pablo yöawi̧ a̧ja̧kwö ösödö a̧ja̧kwijadötö. Jobadöma Tesalónicanö ju̧kwadö judío jojodötjö o̧penönö ösödö a̧ja̧kwijadötö. Jobadöma tjo̧'wo̧ ösöwanö, Da̧ja̧kwobö jö̧da̧la, jö̧ba̧lö, a̧ja̧kwijadötö Dios iwenema. Ju'wi möle jwiinö tja̧ja̧kwaja̧ ikenama, Dios iwene, damötjö tjiwȩyudina waisachö eda̧lijadötö, Pabloma Dios iwene yöawi̧da jweinö yöbawo̧, jö̧ba̧lö.

Romanos 12:2

Ja̧danö, ju'wedö böjȩ jojodö ja̧bö tjö̧ji̧danöma ja̧bö kwö̧jaduwoko chömöledö. Diosma kwomukwataduwi̧ balewachinö ja̧obö ösödo̧, ja̧danö balewachinö ja̧obö weköbaduwo, 'yayi̧ jawada omukwatadö bakibaduwanö. Ja̧danö, Dios ökwödö kwomukwataduwi̧ balewachinö ja̧itjö̧ma, Dios ösödi̧ jawa kwöwaisaduwena, inesö otiwa jawa, sulabe jwii̧ jawama.

Romanos 12:9

Ju'wedönö isabenö kwösödaduwo, wamedama kwösödaduwoko, okwanö kwösödaduwo. Jau chömöledö, sulabe jawa Dios öpöjödi̧ jawama kwöpöjödaduwo. Ja̧danö wanedö yötawa: Otiwa jawa 'diinö do̧ka̧laduwo, ja̧da kwösödaduwo.

1 Corintios 15:58

Jejenö jo̧be chösödawö̧ chömöledö, ja̧danö jejenöobetjö̧, 'diinö kwö̧jaduwo, pjolachibökönö. Ja̧danö jwaikwöda Duluwo̧ wei̧ ja̧bö kwö̧jaduwo kwöwaisaduwobetjö̧, Duluwo̧ wei̧ ja̧bö dö̧ji̧ma isabenö mikwa ji̧ jö̧ba̧lö.

1 Corintios 2:11

Jau chömöledö, wanedö yötawa: Ökwö kwomukwati̧ma ju'wedö jojodö edöködö, ¿jö̧tö? Jo̧kwaijayonö, ju'wedö tjedököjayonö, ökwöda kwo̧'wo̧ luwo̧ma öwaisobe, ökwö kwo̧'wo̧ luwo̧obetjö, ¿jö̧tö? Dios O̧'wo̧ Luwo̧bi ja̧danö, sule Dios O̧'wo̧ Luwo̧da okobe jwiinö Dios jawa waiso̧ma, iteda O̧'wo̧ Luwo̧obetjö̧.

Gálatas 6:10

Jo̧kwajabetjö̧, otiwanö ja̧dobö ji̧tjö̧ma, otiwanö ja̧bö dö̧jo okobe deinö jojodönö chömöledö, ja̧danö ju'wedönö otiwanö ja̧di̧tjö bajalekwönönö otiwanö ja̧bö dö̧jo dömöledö Jesúsnö ösödadönöma chömöledö.

Efesios 5:10

Chömöledö, Duluwo̧ ösödi̧ kwöwaisachibaduwobö chösöda.

Filipenses 1:10

Jejenö atebobe chömöledö, isabenö otiwi̧ jawa kwösödaduwakobetjö̧. Jo̧kwajabetjö̧, iya̧da möle Cristo yemidanö ichakwa̧ möle badekwachenama, bakwainö sulabe jwiinö, ja̧danö wene jwiinö kwö̧jaduwakobe, ja̧danö Jesucristoma ökwödönö sulabe jwibadö bakibaduwanö ja̧inobetjö̧, otiwanö ja̧bö kwö̧jaduwakobe. Ja̧danö chömöledö, jejenö kwö̧jaduwobetjö̧, Diosnö otiwanö tjomukwatakobe, ja̧danö jo̧banö ösödö yötja̧lakobe chömöledö.

Filipenses 3:16

Ja̧danö chömöledö, baikwö yötawaduwakwö, ja̧bö dö̧jo jö̧ba̧lö döwaisachibinama, okobe deinö bakwo̧nökwena, ja̧ ida̧ökö döwaisachibina jawa ja̧bö dö̧jobö jo̧be.

Filipenses 4:8

Bajaleapo yötawi̧ma baikwö yötawaduwakwö, otiwi̧ jawada, jojodö biya̧ma otiwa jö̧ba̧lö tjomukwato jö̧tja̧li̧ jawada kwomukwataduwo jö̧ba̧lö. Jau chömöledö, isabenö ji̧ jawada, ja̧danö otiwanö tjomukwati̧ jawada, ja̧danö jwei̧ jawada, ja̧danö bakwainö wene jwii̧ jawada, ja̧danö tjo̧'wo̧ ösöwi̧ jawada, ja̧danö jojodö tja̧ja̧kwobö otiwi̧ jawada omukwatö kwö̧jaduwo.

1 Tesalonicenses 5:15

Ja̧danö, ökwödönö sulabe baibenama, kwite'ada̧laduwo, ökwödötjö bakwo̧bi balekwa mikwa sulabenö ja̧apji jö̧ba̧lö. Kabatökönö otiwanö ja̧bö kwö̧jaduwobö kwisakwaduwo, kwömöledöduwi Jesúsnö ösödadönöbi, ju'wedö jojodönöbi.

1 Tesalonicenses 5:22

Ja̧danö okobe jwiinö suli̧tjöma kwöpöjödaduwo sulabenö ja̧bökönö.

2 Tesalonicenses 2:15

Jo̧kwajabetjö̧, pjolachibökönö kwö̧jaduwo chömöledö, yödawina wene isabenö wene do̧ba̧lö, yöbawö yödawina wenebi, wȩyudö yödawina wenebi.

2 Timoteo 1:15

Timoteo, kwöwaisa, ba̧jekwadö Asia nijitjö Jesúsnö ösödadöma ötjönö katjatibinobe, ja̧danö jobadötjö Figelobi, Hermógenesbi ötjönö katjatibinobe.

2 Timoteo 3:6

jobadöma isabenö jojodönö suli̧ tjöwaedobetjö̧. Jau Timoteo, isabenö jojodönö suli̧ tjöwaedobe, jobadötjö ju'wedöma tebachö, sulabenö yöbawö 'daliwa tjönobedanö ichejekwa, ya̧dö tjo̧'wo̧ luwo̧nö me'dawadönö do̧tjatotö jö̧ba̧lö. Jobadö tjo̧'wo̧ luwo̧nö me'dawadö ya̧dönö baikwö yötawa: Jobadöma jwaikwö idöda tjösödi̧ jawada isakwadö, ju'wi tjösödi̧ jawabi, ju'wi tjösödi̧ jawabi, ja̧danö tjösödi̧ jawa jwaikwöda isakwö, nöinö sulabenö ja̧bö tjö̧jobe.

2 Timoteo 4:14

'Dii̧ jawa cobretjö otido̧ Alejandro mikwo̧ma nöinö suli̧ öwaedinobe ötjönö, ja̧danö jejenö sulabenö ja̧iökwe Duluwo̧ma isabenö balekwa mikwa jo̧banö lȩebakobe.

Hebreos 10:23

Chö̧ja̧wo̧dö ökwödöma, Diosnö do̧'wo̧ wana̧lö ja̧dösa, jö̧ba̧lö yöda̧lobe. Ja̧danö, Dios jö̧a̧li̧danö isabenö badekwachakobe, jö̧ba̧lö, omukwatö ju̧kwadösa. Jejenö omukwatö jo̧banö do̧'wo̧ wana̧lö jwaikwöda di̧'yaduwo, jo̧ba jö̧a̧li̧danö badekwachakwa̧ te'ada̧lö. Isabenö, jwaikwöda do̧'wo̧ wana̧lö di̧'yobö jo̧be, Diosma isabenö jö̧a̧li̧danö ja̧bo̧obetjö̧.

1 Juan 4:1

Chö̧ja̧wo̧dö chösödawö̧, a̧ja̧kwaduwitjö. Okobe jwiinö yöawakwawa kwa̧ja̧kwaduwi̧ma juluwanö kwösödaduwoko, Jweinö yöbawo̧, jö̧ba̧lö. Isabenö, bakwo̧ yöawi̧ a̧ja̧kwö ö'wiawakwa̧lö̧jönö kwa̧ja̧kwa̧laduwobö jo̧be, ba̧jekwadö omöna yöbawadö tjö̧jobetjö̧. Jau chö̧ja̧wo̧dö, ö'wiawakwa̧lö̧jönö kwa̧ja̧kwa̧laduwo kwöwaisaduwobö, Ite yöbawo̧ma ¿Dios O̧'wo̧ Luwo̧ öibökweji̧? Ja̧danö, yöawi̧ma ¿Dios O̧'wo̧ Luwo̧tjö̧ ichobeji̧? jö̧ba̧lö.

Apocalipsis 2:2

Jo̧bama baikwö yöawobe ökwödö Éfesonö ju̧kwadönö, jo̧banö ösödadönöma: Ökwödö kwö̧jaduwi̧ma okobe jwiinö chöwaisa. Ja̧danö, otiwanö kwö̧jaduwi̧ma chöwaisa. Chedemi otiwanö, ötjö weti̧ a̧ja̧kwö kwö̧jaduwobe. Ja̧danö, sulabenö baledonöbi ökwödöma kwo̧'wo̧duwi 'dibachibö kwö̧jaduwobe. Ja̧danö, chedemi sulabenö omukwatadö yötjawi̧ma yelösöda kwa̧ja̧kwaduwokobe. Ja̧danö, jelobe omukwatö yöba̧linadönöma kwöwaisachibinaduwobe, Omöna yöba̧ladö, jö̧ba̧lö. Jobadöma, Ökwödöma Jesús webawedösa, jö̧ba̧lö, yötja̧lijayonö ökwödöma, otiwanö omukwatö kwisakwinaduwobe, jweinö yötja̧lojobö, omöna yötja̧lojobö, edö. Jejenöma otiwanö kwöwaisachibinaduwobe, Jobadöma omöna yöba̧ladö, Jesús webawöködö, jö̧ba̧lö.

Apocalipsis 2:25

Biya̧da chösöda, kwö̧jaduwoböma: Ötjönö ösödöda, kwo̧'wo̧ wana̧löda kwö̧jaduwo, ötjö chichenanö baibanö.

Apocalipsis 3:11

Chömöledö chichakwa̧ma lekwokobe. Ja̧danö, lekwokobetjö̧ kwo̧'wo̧ luwo̧duwi okwanö ö'wiawakwawalö̧jönö ja̧nö kwite'ada̧laduwo. Jejenö ja̧nö, ötjönö kwo̧'wo̧ wana̧lö ja̧duwi, ju'winö, mölejȩbenö kwichibaduwena, ökwönö otiwa jawa chiyo jö̧ta̧laja̧ jelo̧nöda chiyapji, jö̧ba̧lö.

Apocalipsis 3:3

Yötawaduwakwö. Omukwataduwi. Ajayima Dios iwene yötjawi̧ a̧ja̧kwö jwiinö kwösödinaduwobe. Ja̧danö, ja̧ ajayi a̧ja̧kwö kwösödinaduwadanö yemidanö kwösödaduwobö, babe jelobekwö kwomukwataduwi̧ma kabatibö balewachaduwi. Chömöledö, kwo̧'wo̧ luwo̧duwi okwanö woawatjö yemidanö 'yabibajadö bakibaduwanö wilubakwawaduwi. Jejenö, wiluköbakwawaduwökötjö̧ma ötjöma, ökwödö wajwiköbaduwonö naukwabo̧ ichi̧danö chichakwo̧sa, ökwödönö lȩbebö.