1 Tesalonicenses 4:11 - Dios Iwene

¹¹ Ja̧danö, wene jwiinö kwö̧jaduwobö kwisakwaduwo chömöledö, ja̧danö kwomukwataduwo jö̧ka̧laduwi̧da omukwatö kwö̧jaduwo, ja̧danö kwakwawa jawa kwo̧'wo̧li̧ jawa otidö kwö̧jaduwo, belö ökwödönö wedinadanö.

1 Tesalonicenses 4:11 ပူးပေါင်းရင်းမြစ်များ

Proverbios 17:1

Salomón jwebebö yöawakwawa jawanö wanekwachi̧ jawama baikwö laebobe: Chömöledö ¿di̧yatjö̧ mikwawobeda, tjö̧möledökwö ösödabikwawö ja̧kwawakö̧, kwakwawa nöinö juna̧lakwawakö̧ di̧yatjö̧? Isabenö yötawa: Tjömöledökwö ösödabikwawö ja̧nö ja̧kwawama jwiinö mikwawobe. Wanedö yötawa: Tjömöledöma ösödabikwawö, wene jwiinö kwanö tjöba̧jadobe. Ja̧danö jobadöma kwakwawa nöinöma jwibadö. Panpja 'diapjada ja'yubeda juna̧ladö. Isabenö yötawa: Tjömöledökwö wene jwiinö tjö̧jobetjö̧ tjo̧'wo̧ ösöwanö ja̧dö nöinö kwakwawa jwiijayonö. Ja̧danö, ju'wedöma tjö̧möledökwö ölakwabikwawö, wene juna̧lö ja̧döma tjo̧'wo̧ ösöwanö jö̧ködö. Jobadöma yelösöda kwakwawa okobe jwiinö juna̧ladö. Jobekwö tju̧juna̧li̧jayonö jobadöma tjö̧möledökwö wene tju̧juna̧lakwawobetjö̧ tjo̧'wo̧ ösöwanö kwanö jö̧kö̧dö. Nöinö kwakwawa tju̧juna̧lijayonö tjo̧'wo̧ ösöwanö jö̧ködö. Isabenö yötawa: Tjömöledökwö ösödabikwawö ja̧nö ja̧kwawama jwiinö mikwawobe.

Proverbios 17:14

Ja̧danö, ju'wibi yötawa, wanedö: Ojwe tjöekwemi ojwiyo ja'yubeda ebawobe. Ja̧danö, jemi dadö tju̧tumökötjö̧ma ojwiyoma nöinö ebawibö pjolachaibakobe ¿jö̧tö̧? Te'ada̧lökönö jemima dadö tju̧tumobö jo̧be. Isabenö yötawa: Ja̧ tju̧tumi̧danö jojodöma jamatö jwöjwötjakwawena te'ada̧lökönö katjatakwawobö jo̧be jwiinö tjölakwabikwawapji jö̧ba̧lö. Isabenö, ojwe pjolachibapji jö̧ba̧lö juluwanö tju̧tumi̧danö jojodöma jamatö jwöjwötjakwawena juluwanö katjatakwawobö jo̧be, jwiinö tjölakwabikwawapji jö̧ba̧lö.

Marcos 13:34

Wanedö yötawa: Bakwo̧ la'aka luwo̧, jelobe i̧'yajabe okobema ejunö ömöayedöma tjuluwo̧ weaja̧ otidö tjuju̧kwobe. Jobadöma bakwo̧nökwena tjotidawa otidö tjuju̧kwobe tjuluwo̧ weaja̧ma. Apjude a'o te'ada̧lo̧nöbi, Eda̧lö kwite'ada̧lo, jö̧ba̧lö, webijetö tjuluwo̧ma i̧'yakwa̧ abönö, yemidanö ichakwa̧ma ite'ada̧lobö. Ja̧danö, ömöayedöma wajwibadö tjuluwo̧ yemidanö ichakwa̧ma.

Hechos 18:3

Jobadöma, Pablo otidi̧, i̧sa̧do̧tjö o̧di̧ju otidi̧danö otidijadötö, i̧sa̧do̧tjö otikwejuma. Bakwainö otidadötjobetjö̧ Pabloma jobadökwö ji̧jetö bakobe otidö, balada iyö emobö.

Hechos 20:35

Jejenö ökwödönö i̧sebö chotidijatö chömöledö, ökwödöbi ötjö chotidobe edö kwomukwataduwobö, Aaa, ja̧danö ökwödöbi dotido, demaja̧ baladanö diyo usula jojodönö pjabatö, jö̧ba̧lö. Kwomukwataduwo chömöledö Duluwo̧ Jesús yöa̧linama. Jo̧bama baikwö yöba̧lijetö: Isabenö ju'wedönö pjabatö ja̧bo̧ma o̧'wo̧ ösöwanö jo̧. Jo̧bama jelo̧ tjiyökwe o̧'wo̧ ösöwanö ö̧jemitjö̧ o̧penönö o̧'wo̧ ösöwanö jo̧. Jejenö Duluwo̧ Jesús yöba̧lijetö—yöbawijetö Pabloma.

Romanos 12:11

Kwotidaduwi̧ma otiwanö kwotidaduwo, nuwelö̧jachibökönö, ja̧danö jwaikwöda Duluwo̧ Dios wei̧ ja̧bö kwö̧jaduwo, kwomajadeduwinö Diosnö ösödö.

Romanos 15:20

Ba̧kwȩlö̧jatebö ju'wedö yötjawokobe yötawobö chisakwijatö. Baikwö wanedö yötawa: Dios iwene yöbawadöma, o̧do tjotidobedanö otidadö, ja̧danö jelo̧ otidaja̧ wame chotidapji jö̧ba̧lö, ba̧kwȩlö̧jatebö ju'wedö yötjawokobeda yötawobö chisakwijatö.

1 Corintios 4:12

ja̧danö dömamijunö labinö otidö dö̧jobe. Ju'wedö ökwödönö öpöjödö suli̧ tjöwaedotö jö̧ba̧lö yötja̧lenama, otiwanö Diosnö adebobe, jobadönö pjaatobö. Ja̧danö, usula demawinö ja̧tjenama, do̧'wo̧ 'dibachibö dö̧jobe.

2 Corintios 5:9

Jo̧kwajabetjö̧ ina bi'o diteba'onö dö̧jitjö̧böbi, jo̧bakwö dö̧jitjö̧böbi disakwi̧ma bakwainö 'ya̧ chömöledö, Duluwo̧ ösödi̧danö ja̧bö dö̧jobö.

Efesios 4:28

Ja̧danö, ökwödötjö bakwo̧ naukwabo̧ma naukwabikwawatjö kabatibö, Otiwanö chotido, jö̧ba̧lö, itedada naukwabökönö u̧kwa emawabi, jwibadönö iyöbi iyö ö̧jobö jö̧ba̧lo̧.

1 Timoteo 2:2

Ja̧danö, la'aka luwedönöbi, ju'wedö luwedönöbi Jesúsnö ösödadö atjebobö jo̧be Diosnöma, jobadö luwedökwö ölakwabikwawa jwiinö, wene jwiinö Diosnö ösödö dö̧jobö, ja̧danö Dios ösödi̧danö ja̧bö dö̧jobö, ökwödö Jesúsnö ösödadöma.

1 Timoteo 5:13

Ja̧danö, ju'wibi yötawa. Otidökönö sule jelejube jelejube kwebachadö batjibena, ja̧danö jemi tupakwö jojodö tjoma'apekwönö yöba̧ladö, ja̧danö ju'wedö jawa yöba̧ladö batjibena, jojodö yötja̧loko jö̧tja̧li̧ma yöba̧lö.

Tito 3:14

Jau Tito, ökwödö dömöledö jobe Cretanö ju̧kwadö Jesúsnö ösödadöma tjöwaisachibobö jo̧be, otiwanö ja̧bö tjö̧jobö. Ja̧danö, inesö pjatjato jö̧tja̧li̧ma otiwanö pjatjatena, mikwa jwii̧ jawada ja̧bö tjö̧japji jö̧ba̧lö.

1 Pedro 3:4

Ju'wida chömöledö ya̧dö inesö kwotikwaduwi̧ma, kwo̧'wo̧ luwo̧duwi jawada, dösölö̧jinö ja̧danö jwöjwöakwawa jwiinö ja̧kwawada. Jejenö tjotikwi̧ma, damö jawa jwöachökö ji̧ chömöledö, ja̧danö Dios edemi, inesö mikwawi̧ chömöledö.

1 Pedro 4:15

Chömöledö, jelo̧nö kwabö lobajadö usula kwemawaduwitjö̧ma, ja̧danö ju'wi jaye naukwajadö usula kwemawaduwitjö̧ma, ja̧danö sulabenö ja̧bajadö usula kwemawaduwitjö̧ma, ja̧danö wene baibobö sulabenö yöba̧lajadö usula kwemawaduwitjö̧ma, ja̧ma taba lö̧ji̧ chömöledö, sulabenö ja̧köbaduwobetjö̧.