1 Tesalonicenses 3:3 - Dios Iwene

^3-4 usula emawö Jesúsnö ösödö dö̧ji̧ kakatibaduwapji jö̧ba̧lö. Jau chömöledö, ina ökwödökwö dö̧jayi, ökwödönö yödawijatö ökwödö Jesúsnö ösödadö usula demawakwa̧ma. Jo̧kwajabetjö̧ ökwödöma kwöwaisaduwa chömöledö, ökwödö Jesúsnö ösödadöma, isabenö usula demawakwedösa jö̧ba̧lö. Ja̧danö, kwöwaisaduwa chömöledö, ökwödönö yödawinadanö ida̧ökö baledajabe jö̧ba̧lö.

1 Tesalonicenses 3:3 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 23:14

Ja̧danö, –Job usula emawinö wetakwo̧sa, –jö̧ba̧lajo̧, jwaikwöda jö̧a̧li̧danö usula chemawinö webo̧. Ju'wibi, chedemi ju'wi jawabi tupakwönönö usula chemawinö weakwa̧ omukwatö ujunajena,

Lucas 21:12

Ja̧ jawama 'dö̧ibaji̧ möle baledakwa̧ abönö jawa chömöledö, ja̧danö isabenö 'dö̧ibaji̧ möle baledakwa̧ abönö baledakobe. Jo̧kwaijayonö ju'wibi yötawaduwakwö chömöledö, ja̧ yötawa̧ja̧ jawa böjȩtjö kwedaduwakwa̧ abönö, nöinö baledakobe ökwödö ötjönö ösödadönöma. Baikwö yötawa: Ökwödönö öpöjödö do̧tjatakobe, ja̧danö usula kwemawaduwinö sulabenö ja̧tjakobe. Usula kwemawaduwinö ja̧bö, judío ba̧nö tja̧ja̧kwa̧lejubiyatjö jojodö tjöba a'otjö kwö̧jaduwobö tjujunakobe, ja̧danö ka̧lena kwö̧baduwobö tjödakobe. Ja̧danö Jesúsnö ösödadösa jö̧ba̧lö yöka̧laduwobetjö̧, usula kwemawaduwinö luwedö tjöba a'o, ja̧danö inesö la'aka luwedö tjöba a'o öbibö tjujunakobe.

Juan 16:2

Jau, inia tjököbaduwinö baledakobe ökwödönöma. Kwömöledöduwi judío jojodöma jobadökwö ba̧nö kwa̧ja̧kwa̧laduweju tekachaduwoböma wetjökakobe, ötjönö ösödö kwö̧jaduwobetjö̧. Yelösöda ja̧ mölema jojodöma ökwödönö kwabö lotjakobe, Diosma jejenö kwabö lodobö ösöda, jö̧ba̧lö, tjomukwatobetjö̧.

Juan 16:33

Ja̧danö, babe yötawaja̧ma kwo̧'wo̧ luwo̧duwi tjo̧bekwökönö kwö̧jaduwobö yötawajabe. Chömöledö, böjȩnö ja̧nö usula kwemawaduwakobe. Jo̧kwaijayonö, kwo̧'wo̧duwi̧ ösöwanö kwö̧jaduwo, ötjöma böjȩnö jawa okobe jwiinö chujuluwobetjö̧— yöawinobe Jesúsma öba̧ja̧di̧ waisachadönöma.

Hechos 14:22

Jobe comunidadkwena 'ya̧nö Jesúsnö ösödadönö pjabatö yöbawijadötö, Kwo̧'wo̧ luwo̧duwi juluwachibanö tupakwö kwi̧'yaduwo, jö̧ba̧lö. Jesúsnö kabatibökönö kwö̧jaduwo. Ja̧danö, jo̧banö omukwatö kwö̧jaduwo, jö̧ba̧lö, pjabatö yöbawijadötö. Jobadönö jö̧ba̧lijadötö: —Chömöledö ¿wajwiköbaduwiji̧? Ökwödö Jesúsnö ösödadöma, usula demawobö jo̧be. Isabenö ökwödöma usula emawadösa. Ökwödöma Dios webö ö̧jena ja̧nö, do̧'wo̧ ösöwachibanö duju̧kwenanö baibanö, usula emawadösa— jö̧ba̧lijadötö.

Hechos 2:25

Ja̧danö chömöledö, Davidmine iwȩyudina a̧ja̧kwaduwi, kwöwaisaduwobö ötjö yötawi̧ma jweinö yötawobe, jö̧ba̧lö. Damötjö ökwödötjö ajayinö ji̧nadö tjuluwo̧ Davidminema wȩyudijetö Jesús jawa wenema, iteda Uluwo̧ jawama. Dios O̧'wo̧ Luwo̧ma David o̧'wo̧ luwo̧nö öibobetjö̧ wȩyudijetö baikwö: Ötjö Chuluwo̧ma ba̧kwȩlö̧jatebö ötjökwö ö̧jobe. Jo̧bama ötjö chipjeanö ö̧jobe. Ötjökwö ja̧nö pjaatobetjö̧ cho̧'wo̧ tjo̧bekwökönö chö̧jobe.

Hechos 21:11

Jo̧bama ökwödö dö̧jobekwö 'ya̧wibö Pablo u̧kwa koleasö̧jȩ jȩbatibö iteda ömajamijunöbi, ömasapiyanöbi jwaawijatö, Dios O̧'wo̧ Luwo̧ jo̧ba o̧'wo̧ luwo̧nö yöawi̧ i̧sebö. Jwabawö Pablonö jö̧a̧lijatö: —Pablo, Dios O̧'wo̧ Luwo̧ma ötjö cho̧'wo̧ luwo̧nö yöawatö, baikwö: Böjȩ koleasö̧jȩ ötjö Agabo jwabawö chö̧ji̧danö, böjȩ u̧kwa koleasö̧jȩ nönawo̧nöma Jerusalénnö ju̧kwadö judío jojodöma jwatjakwo̧, judío jojodöbököbönö tjiyobö, jö̧ba̧lö— i̧sebö yöawijatö Agaboma.

Hechos 21:13

Jejenö lȩdeabijayonö Pabloma jö̧a̧lijatö: —Kwubudekwabiduwatjö chömöledö. Jejenö kwubudekwabiduwobema jwiinö cho̧'wo̧ tjo̧tekwobe. Ötjöma Duluwo̧ Jesús ja̧ina yötawobetjö̧ jobetjö Jerusalénbetjö ötjönö do̧tjatitjö̧ma wainö do̧tjatakwo̧sa. Jesús ja̧ina yötawobetjö̧ kwabö lotjitjö̧bi wainö kwabö lotjakwo̧sa. Jejenö ötjönö baleditjö̧ma ötjöma, Jau kwatjö̧ma, do̧tjatena, kwabö lotjena, jö̧ba̧lo̧sa— jö̧a̧lijatö Pabloma.

Hechos 9:16

Jo̧bama ötjö jawa wene yöawobetjö̧ yelösöda usula emawakwo̧. Ja̧ usula emawakwa̧ öwaisachibobö chi̧sebocha jo̧banöma— jö̧ba̧lijetö Duluwo̧ma Ananíasnöma.

Romanos 5:3

Ju'wibi chömöledö, ökwödönö wene baibenama, jwiinöma do̧'wo̧ tjo̧achökena. Jwaikwöda do̧'wo̧ ösöwanö ja̧nö domukwatena, Biya̧ wene baibi̧ma otiwanö baibobe, ökwödönö pjaati̧, jö̧ba̧lö. Baikwö pjaati̧ chömöledö: Wene baleditjö̧ma, baledajadöma, tupakwö dujuluwachibanö, juluwanö me'dawachiböködödanö baibanö dö̧jena.

1 Corintios 15:58

Jejenö jo̧be chösödawö̧ chömöledö, ja̧danö jejenöobetjö̧, 'diinö kwö̧jaduwo, pjolachibökönö. Ja̧danö jwaikwöda Duluwo̧ wei̧ ja̧bö kwö̧jaduwo kwöwaisaduwobetjö̧, Duluwo̧ wei̧ ja̧bö dö̧ji̧ma isabenö mikwa ji̧ jö̧ba̧lö.

1 Corintios 4:9

Jau chömöledö, ökwödö Jesús webawedöma la'aka luwedödanö dichejekwökö. Baikwö wanedö yötawa chömöledö: Böjȩ luwedö sulabenö ja̧badönö lȩbebö, jobadönö kwabö lotjobe. Ja̧danö, kwabö lotjakwa̧ abönö, okobe deinö tjöba a'otjö junadö, ju'wedö jobadönö otjo jö̧ba̧lö. Jobadöjayedödanö dichejekwobe ökwödöma chömöledö, Diosma ökwödönö ujuninobe ichejekwa, okobe deinö jojodöbi ángelesdöbi ökwödönö edö otjo jö̧ba̧lö.

Efesios 3:13

Jo̧kwaobetjö̧ chömöledö, kwo̧'wo̧duwi tjo̧kekwaduwa ötjönöma, ka̧lena ba̧kwaweju okwa ba̧nö inia tjötinö baledi̧ma. Ökwödönö kwö̧jibaduwinö pjabato̧nö yötawinobetjö̧, inia tjötinö baledobe, chömöledö. Jau, inia tjötinö ötjönö baledijayonö, ji̧bakwawa wene yötawina kwa̧ja̧kwinaduwobetjö̧ jejenö baledobe. Chömöledö, kwo̧'wo̧duwi ösöwanö ju̧kwaduwi otiwanö kwa̧ja̧kwinaduwobetjö̧.

Filipenses 1:28

Ja̧danö kwöpöjojodöduwinö yebabökönö ju̧kwaduwi chömöledö, ja̧danö jejenö yebabökönö kwö̧jaduwi̧ma kwöpöjojodönö i̧sebakobe, Dios jobadönö söbebö loakwa̧ma, ja̧danö Dios ökwödö kwö̧jibaduwinö ja̧akwa̧ wenebi jobadönö i̧sebakobe.

Colosenses 1:23

Ja̧danö isabenö ökwödöma jwaikwöda Cristonö kwösödaduwobö jo̧be, 'diinö pjolachibökönö kwö̧jaduwobö jo̧be chömöledö, otiwa jawa wene a̧ja̧kwö kwo̧'wo̧ kwöwana̧laduwi̧ wenema kabatibökönö chömöledö. Jau chömöledö, ja̧ otiwa jawa wene, böjȩ bakwameachibanö jojodö tja̧ja̧kwi̧ wenetjö ömöayo̧danö babibinasa chömöledö, ja̧ wene yöbawö chö̧jo jö̧ba̧lö.

1 Tesalonicenses 5:9

Jau chömöledö, Diosma ökwödönö omudawö ujuninokobe, iteda lȩebakwawö̧ badibanöma, Duluwo̧ Jesucristonötjö ji̧badö badibanö omudawö ujuninobe chömöledö.

2 Tesalonicenses 1:4

Jau chömöledö, ju'wedöma ökwödönö sulabenö ja̧tjijayonö, ja̧danö nöinö usula kwemawaduwijayonö, jwaikwöda kwo̧'wo̧duwi 'dibachibö Jesúsnö ösödadöja. Jo̧kwajabetjö̧ ökwödönö ösödö, jelobetenia Dios ömöledönö yödawobe, Dömöledö Tesalónicanö ju̧kwadöma otiwanö ju̧kwadötö, jobadöma usula tjemawijayonö, otiwanö Jesúsnö ösödadötö, jö̧ba̧lö.

2 Timoteo 1:8

Jo̧kwajabetjö̧, Duluwo̧ jawa wene tabakwökönö yöbawö kwö̧jo Timoteo, ja̧danö ka̧lena chö̧bijayonö, ötjönöma kwötabakwokotjö, Pabloma chömöledöso̧bö̧kö̧ jö̧ba̧lö. Jau Timoteo, Jesús jawa wene yötawobetjö̧ ka̧lena chö̧bobe ötjöma, ja̧danö, ökwöbi otiwa jawa wene yökawobetjö̧, bakobe Dios ujulunö ötjökwö usula emawö kwö̧jo ökwöbi, öpöjödachibökönö.

1 Pedro 2:21

Jau chömöledö, kwöwaisaduwa, Diosma jejenö kwo̧'wo̧ 'dibachibö usula kwemawaduwobö ösödo̧, jejenö otiwanö ja̧bajadö usula kwemawaduwo jö̧ba̧lö Diosma ökwödönö jwöinobetjö̧. Jau chömöledö, Cristobi ökwödönö pjabatö usula emawinobe, ja̧danö Duluwo̧ jejenö usula emawinobetjö̧, ökwödö jo̧ba ömöayedöbi usula emawö kwö̧jaduwobö jo̧be. Jau chömöledö, Cristoma sulabenö ja̧bökönö usula emawinobe, ja̧danö otiwanö ja̧köbaduwakwa̧ i̧sebinobe, jo̧ba ja̧inadanö ökwödöbi ja̧bö kwö̧jaduwakobetjö̧.

Apocalipsis 2:10

Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.

Apocalipsis 2:13

Jo̧bama baikwö yöawobe ökwödö Pérgamo jojodönö, jo̧banö ösödadönöma: Ötjöma chöwaisa, jobe kwiteboduwima Awetja ba̧nö wei̧danö jo̧be. Jo̧kwaijayonö chedemi ökwödöma jweinö omukwatö, otiwanö kwö̧jaduwobe, Jesúsnöda ösödadösa, jö̧ba̧lö. Ja̧danö, bakwo̧, ötjönö ba̧kwȩlö̧jatebö yöbawo̧, Antipas mikwo̧nö, kwabö lotjenabi ökwödöma kwo̧'wo̧duwi 'dibachibö kakatibinaduwokobe ötjönöma.