1 Tesalonicenses 2:16 - Dios Iwene

¹⁶ Jau chömöledö, judío jojodöböködönö tjö̧jibobö yödawenama, judío jojodöma tjöpöjödobe, judío jojodöböködönöma yökawaduwa jö̧ba̧lö, ja̧danö yödawökönö sulabenö ja̧tjobö tjisakwobe chömöledö. Jau chömöledö, la'akatjöda sulabenö ja̧biatjinadanö, ja̧bi sulabenö ja̧tjajabe judío jojodöma. Ja̧danö wanedö yötawa: Sulabenö ja̧tji̧ma su̧'bȩ baibajabe ida̧ökö. Jo̧kwajabetjö̧, babema bajaliyanö Dios lȩebi̧ma jobadönö badekwachajabe chömöledö.

1 Tesalonicenses 2:16 ပူးပေါင်းရင်းမြစ်များ

Génesis 15:16

Ja̧danö, kwömöledöma ju'winö, lekwe o̧biya, cuatrocientos o̧biya jenanö baibajena yemidanö tjetjachajakobe baikwö, Canaán nijibe. Ja̧ mölema bemi Canaánnö ju̧kwadö amorita mikwadönö lȩtebakobe. Jobadö lekwe sulabenö ja̧bö tjuju̧kwakwedö. Ja̧danö, sulabenö ja̧tjemitjö o̧penönö sulabenö ja̧bö tjuju̧kwena ötjöma bajaliyanöma lȩtebakwawö̧. Ikenama, lȩtebaja̧ okobe kwömöledöma yemidanö tjetjachakobe baikwö— yöbawijetö Isabenö Jo̧ Diosma Abramnö.

Isaías 45:22

Jau, ötjöda Diosbo̧ma, jo̧kwajabetjö̧ sulabenö kwomukwataduwi̧ kabatibö, balewachö ötjönö kwösödaduwo, ökwödönöbi kwö̧jibaduwinö pjatatakobetjö̧. Jau, okobe deinö bö̧jȩnö ju̧kwadö, bö̧jȩ bakwachö̧je ju̧kwadöbi ötjönö kwödösaduwo, ötjöda Diosbo̧chobetjö̧, ja̧danö jelo̧ diosbo̧ma deobetjö̧.

Daniel 8:23

Ja̧danö, jobadö yöbawö webö tjö̧benama jojodöma jwiinö sulabenö ja̧bö tjö̧jakobe, ja̧danö Dios jobadönö lȩebobö ja̧kobe. Jo̧kwaijayonö, yöbawö wetji̧ 'dö̧ibakwa̧ abönö, la'aka luwo̧ bakwo̧ itebotjö jelo̧ öbamatakobe, la'aka luwo̧ baibanö. Jo̧bama juluwo̧sa jö̧ba̧lö omukwatakobe, ja̧danö jwiinö labo̧ ö̧jakobe, ja̧danö omöna yöba̧lo̧ ö̧jakobe.

Mateo 12:45

Jejenö badekwajo̧, ömöledö ju'wedö tjo̧'wo̧ luwo̧nö sulabedönö jelemutjö du̧ju̧tajabedönö isakwena, itedatjö bajalekwönönö sulabedönö, ja̧danö jobadönö öbibö, yemidanö ajayinö ö̧jinökwe o̧'wo̧ luwo̧nö teachibena. Jejenö baibitjö̧ma, jejenö tjö̧jökwema ajayinö usula emawö ö̧jinatjö bajalekwönönö yelösöda nöinö usula emawakwo̧, ¿jö̧tö? Ökwödö babe möle sulabedöbi ja̧danö. Yötawi̧ kwöpöjödaduwobetjö̧, ajayinö usula kwemawaduwinatjö bajalekwönönö nöinö usula kwemawaduwakwedöja— jö̧a̧linobe Jesúsma.

Mateo 23:32

Isabenö jobadödanö bakwaibedöja, ja̧danö babema jobadö Dios weawö̧nö kwabö lobö jamatö ja̧tjinama, jemi tupakwöbi badekwachinö ja̧köbaduwakwedöja.

Mateo 24:14

Ja̧danö, Dios yöbawö ö̧jena jawa otiwa jawa wenema böjȩ bakwameachibanö yötjawakobe tja̧ja̧kwobö, okobe deinö tjitebotenia jojodö tja̧ja̧kwobö, ja̧danö jemi ikenada 'dö̧ibaji̧ möle baibakobe.

Mateo 24:6

Ja̧danö, guerra kwakwatjakwawi̧ wene kwa̧ja̧kwaduwakobe, yöne kwakwatjakwawi̧ wenebi, jelobe ödötjö kwakwatjakwawi̧ wenebi, jo̧kwaijayonö ja̧ baledi̧ a̧ja̧kwö, kwo̧'wo̧ tjo̧achaduwa chömöledö. Jau chömöledö, ja̧ jawa isabenö baledobö jo̧be, jo̧kwaijayonö ina 'dö̧ibaji̧ möle baibokobe.

Mateo 3:12

Jo̧bama sulabedönö otiwadötjö böjö 'da̧batö ujunakobe, batjo otidadö kwakwawa sula'wotjö böjö 'da̧batö kwakwawa lödawejunö tjödi̧danö. Ja̧danö, böjö 'da̧batö junajo̧, okobe deinö sula'wodanö ichejekwadö sulabedönö, sula'wo ko̧ko̧dö juwö lotji̧danö ökwöla tiibokolanö juwö loakobe— jö̧ba̧lö yöawinobe Juanma.

Marcos 16:16

Bakwo̧, ja̧ otiwa jawa wene ösödö, Jau Jesúsma dö̧jibinö otido̧, jö̧ba̧lö, ösödo̧nö, ojwenö ubu̧datajökwenöma jo̧ba ö̧jibinö otidökwe Diosma. Jo̧kwaijayonö, Jesúsnö öpöjödo̧ma Dios lȩebi̧ baibenama baledakwo̧.

Hechos 13:45

Ba̧jekwadö a̧ja̧kwö tji̧'yiawö̧ judío jojodötjö la'aka luwedöma tjo̧'wo̧ sulinö edijadötö Pablonöma, Jweinö yöbawö̧kö̧, sulabenö omukwato̧, jö̧ba̧lö.

Hechos 13:50

Jo̧kwaijayonö Antioquíanö ju̧kwadö judío jojodötjö la'aka luwedöma ina öpöjödijadötö Pablonö, Bernabénö. Tjo̧'wo̧ sulinö edö yöba̧lijadötö jobenö ju̧kwadö ya̧dö la'aka luwedötjö ju'wedönöma Pablonö, Bernabénö tjölabobö. Jobadö ya̧döma judío jojodöböködö Diosnö ösödadöma. Ja̧danö, ömadö la'aka luwedötjö ju'wedönöbi yöba̧lijadötö, Pablonö, Bernabénö tjölabobö. Jejenö yötja̧liawö̧ jobadöma jwiinö labijadötö. Ikenama ju'wedönöbi yöba̧lijadötö, Pablonö, Bernabénö tjölabobö. A'dewö lododönö, jö̧ba̧lö, labinö yöba̧lijadötö. Jejenö yötja̧liawö̧ jobadöma Pablonö Bernabénö jobetjö a'dewö lobijadötö.

Hechos 14:19

Ju'wi möle ju'wedö judío jojodöma, Antioquíanö ju̧kwadöbi, Iconionö ju̧kwadöbi Pablo Bernabé tjuju̧kwobekwö 'yi̧jadötö, Listrabe. Jobe ichibö jobadöma tjo̧'wo̧ sulinö eda̧lö yöba̧lijadötö jobe ju̧kwadönöma, Pablonö tjölabobö. Jejenö yötja̧liawö̧ jojodöma jwiinö labijadötö Pablonö. Ja̧danö, labijidöma Pablonö inawiya ikwawijadötö, ö'wöchinö. Ikenama, tjo̧wi̧ ö'wö baibajabe, jö̧ba̧lö, tötöbö lobijadötö Pablonöma comunidad ö'öböbe.

Hechos 14:2

Jo̧kwaijayonö judío jojodötjö ju'wedöma öpöjödijadötö. Jobadöma tjo̧'wo̧ sulinö edö yöba̧lijadötö judío jojodöböködönö, tjölabinö ja̧bö Jesúsnö ösödadönöma.

Hechos 14:5

Ikenama öpöjödadöma judío jojodöbi, judío jojodöböködöbi, jobe la'aka luwedökwö Pablonö, Bernabénö, Inia tjötjinö ja̧do, jö̧ba̧lö, inawiya dikwawo, jö̧ba̧lö, tjo̧'wo̧ sulinö eda̧lö omukwatibijadötö.

Hechos 17:13

Ikenama Pablo, Silas ajayinö latjebinemi Tesalónicanö ju̧kwadö judío jojodöma ju'wedö yötjawi̧ a̧ja̧kwijadötö, Babema Pabloma Dios iwene yöawobe Berea comunidadnö, jö̧ba̧lö. Jejenö a̧ja̧kwö tjo̧'wo̧ sulinö edö Bereabe 'yi̧jadötö, Pablo, Silas tjö̧jobekwö. Jobe 'ya̧nö, Bereanö ju̧kwadö Pablonö, Silasnö jwiinö tjölabobö jwöbeba̧lö yöbawijadötö.

Hechos 19:9

Jejenö tja̧ja̧kwonö ju'wedöma tjuu 'ditjobetjö̧ öpöjödijadötö. Jobadöma Pablo yöawi̧ma, ji̧kwa mananö tjichibobö yöawi̧ma, öpöjödö tjo̧'wo̧ sulinö edö sulabenö yöba̧lijadötö jojodönö, Pablonöma. Jejenö yötja̧liökwe Pabloma jejutjö labebajijetö ju'wedö Jesúsnö ösödadönö öbibö. Jemi tupakwöma jejutjö yöbawijökötö. Jelejutjöda yöbawijetö, Tirano mikwo̧, ba̧ja̧dakwawa jojo, jo̧ba öba̧ja̧dejutjöda. Ju'wi möle jwiinö jeju okwa tebachö jojodö yötja̧li̧ atada̧lö yöbawiabijetö Pabloma.

Hechos 21:21

Kwi̧'yajabe okobetjö jobadöma ju'wedö ökwönö omöna yötjawi̧ tja̧ja̧kwinobe, Pabloma judío jojodönö weinobe katjatibobö Moisés wȩyudö weinama, Dios yöawi̧ iwȩyudinama, jö̧ba̧lö. Jejenö omöna yötjawinobe ju'wedöma. Ja̧danö, ju'wibi omöna yötjawinobe, biya̧: Pabloma weinobe judío jojodönö tji̧tji̧munö, ömadönö, tjötade bajalesado̧ 'wibebö lotjoko, jö̧ba̧lö, omöna yötjawinobe. Ja̧danö, Pabloma weinobe judío jojodö ba̧kwȩlö̧jatebö ja̧biatjina jawama kabatibö tjuju̧kwo, jö̧ba̧lö, omöna yötjawinobe ökwönöma. Jejenö bemi ju̧kwadö Jesúsnö ösödadö judío jojodöma tja̧ja̧kwinobe ju'wedö omöna yötjawi̧ma— yötjawijatö te'ada̧lakwawa jojodöma Pablonöma—.

Hechos 23:12

Ju'wi dewachö judío jojodötjö ju'wedöma bakobe ko̧ko̧kwö omukwatijadötö, Pablonö kwabö lotjakwa̧ma. Jobadöma baikwö yöba̧lakwawijadötö: —Babema Diosnö yöbawö dujuno isabenö ja̧dakwa̧ wenema. Ja̧ yöbawö junawa wene ja̧dökötjö̧ma Diosma ökwödönö lȩebena. Dios öba a'otjö yöbawö dujuno biya̧ wenema: Ökwödöma kwakwawabi dukwokobe, owawabi dowokobe jo̧ba Pablonö kwabö lodenanö kabatö—yöba̧lakwawijadötö. Jejenö yöbawö junijadötö isabenö ja̧tjakwa̧ wene, Dios öba a'otjö.

Hechos 24:9

Judío jojodöma okobe jwiinö Tértulo jö̧a̧li̧ma: —Jau jweinö yöawa— bakwainö omukwatö jö̧ba̧lijadötö.

Hechos 25:2

Jerusalénnö ichajo̧nö jojodötjö Diostjö ö'weje pjabatadö tjuluwedöbi, ju'wedö judío jojodötjö la'aka luwedöbi Pablonö tjöpöjödi̧ yöbawijadötö. Ösödinö abebijadötö Festonö:

Hechos 25:7

Ichejebö tjujunökwenö judío jojodö la'aka luwedöma, Jerusaléntjö ichajadöma, söpödibö ja̧nö, labinö jwöbeba̧lijadötö, Bitema jwiinö sulabenö ja̧biainobe, jö̧ba̧lö. Jejenö jö̧tja̧lijayonö, Pabloma sulabenö ja̧okobetjö̧ bakwo̧bi deijetö, Pablo sulabenö ja̧i̧ edo̧ma.

Hechos 4:12

Ja̧danö, jojodö tjö̧jibinö pjabato̧ma jo̧bada. Jelo̧ma deobe. Dios böjȩnö ju̧kwadönö tjö̧jibinö pjaatobö weinökwema bakwo̧da, Jesúsda— jejenö yöbawö atadijetö Pedroma.

Hechos 9:23

Ja̧danö, lekwe möle baledajena, judío jojodö, Ite Saulonöma kwabö lodonö, jö̧ba̧lö, omukwata̧lijadötö.

1 Corintios 10:33

Jau chömöledö, ötjö ja̧bö chö̧ji̧danö ja̧bö kwö̧jaduwo. Ötjöma okobe jwiinö ja̧bö chö̧ji̧ma, okobe deinö jojodö tjösödo jö̧ba̧lö, ja̧bö chö̧jobe chömöledö. Ja̧danö, ötjöda otiwanö chö̧jakwa̧ chomukwatökö chömöledö, ju'wedö otiwanö tjö̧jakwa̧ chomukwatobe, jobadöbi tjö̧jibo jö̧ba̧lö.

Gálatas 5:11

Chömöledö, ju'wedöma ötjönö yötjawena, Pablobi yöbawo̧, tjötade bajalesado̧ 'wibekwadöda tjö̧jibakwedö jö̧ba̧lö. Jo̧kwaijayonö jejenö yöbawö̧kö̧sa chömöledö. Isabenö jejenö yötawitjö̧ma, judío jojodötjö usula chemawoko jö̧ta̧lena chömöledö. Ja̧danö, isabenö jejenö yötawitjö̧ma, Jesús towisa'onö midawö woina wene yötawi̧ma judío jojodö tjöpöjödoko jö̧tja̧lena.

Efesios 3:13

Jo̧kwaobetjö̧ chömöledö, kwo̧'wo̧duwi tjo̧kekwaduwa ötjönöma, ka̧lena ba̧kwaweju okwa ba̧nö inia tjötinö baledi̧ma. Ökwödönö kwö̧jibaduwinö pjabato̧nö yötawinobetjö̧, inia tjötinö baledobe, chömöledö. Jau, inia tjötinö ötjönö baledijayonö, ji̧bakwawa wene yötawina kwa̧ja̧kwinaduwobetjö̧ jejenö baledobe. Chömöledö, kwo̧'wo̧duwi ösöwanö ju̧kwaduwi otiwanö kwa̧ja̧kwinaduwobetjö̧.

Efesios 3:8

Chömöledö, ötjöma ju'wedö Dios ömöledö babibinadötjö baikwönönöda jo̧sa. Jejenöijayonö Diosma ötjönö lȩlö̧jino edö 'da̧batö ujuninobe, judío jojodöböködönö yötawobö, Cristoma jwiinö pjabato̧, jwiinö otiwo̧, jwiinö juluwo̧, jö̧ba̧lö. Ja̧ jawa, Cristo pjaati̧, otiwi̧, ujuluwi̧ jawa kaatiboböma jwibo̧, jö̧ba̧lö, yötawobö 'da̧batö ujuninökwesa.

1 Tesalonicenses 1:10

Ja̧danö, Dios Itji̧ mölejȩtjö ichakwa̧ te'ada̧lö ju̧kwadötö jö̧ba̧lö yötjawobe. Jau chömöledö, Diosma iteda Itji̧ Jesúsnö woawatjö tjeachajinö ja̧inobe, ja̧danö jo̧ba Jesúsda Dios lȩebakwa̧tjö dö̧jibinö ja̧bo̧ma.

2 Tesalonicenses 2:10

Ja̧danö, okobe jwiinö sulabenö omöna yöa̧lakwawama omöna yöa̧lakwo̧, Dios lȩebakwawö̧ jo̧banö tjösödakobetjö̧. Jau chömöledö, jobadö Dios lȩebakwawö̧ma isabenö wene tjösödinatjö̧ma tjö̧jibo jö̧tja̧linena, jo̧kwaijayonö tjöpöjödinobetjö̧ Dios lȩebakwawö̧ tjö̧jobe.

1 Timoteo 2:4

Jau Timoteo, Diosma jejenö ja̧bö dö̧jobö ösödo̧ okobe deinö böjȩnö ju̧kwadö tjö̧jibobö ösödobetjö̧, ja̧danö okobe deinö isabenö wene tjöwaisachibobö ösödobetjö̧.

Hebreos 6:8

Jo̧kwaijayonö chömöledö, jayu batjoma abönö juwökönö, ja̧danö 'dawödö, sobö tjotidökötjö̧ma tjujunaja̧ma otiwanö pokwökena. Sȩi̧da ötjebiyada pokwena. Ja̧danö, Diosma jemi edö lȩebobe, Sula, sȩa'woda. Juwö lotocha, jö̧ba̧lö. Chömöledö jejenö yötawajökwe, jelobekwö omukwatö, Jesústjö 'da̧bachibö 'yo̧ ö̧ji̧ma. Jo̧ba ö̧ji̧tjö suli̧da laebobe, batjo sula'wo pokwayudanö. Ja̧danö Diosma, jo̧banö lȩbebö ö̧ji̧tjö suli̧ma juwö loakwo̧.

Apocalipsis 22:11

Ja̧danö, sulabenö ju̧kwadöma, sulabenö tjuju̧kwobö jo̧be. Ja̧danö, otiwanö ju̧kwadöma otiwanö tjuju̧kwobö jo̧be. Ja̧danö, taba̧lö̧ji̧ jawada omukwatö ju̧kwadöma taba̧lö̧ji jawada omukwatö tjuju̧kwobö jo̧be. Ja̧danö, otiwanö omukwatö ju̧kwadöma otiwanö omukwatö tjuju̧kwobö jo̧be. Ja̧danö, wainö ja̧nö sulabedökwö pjabacha̧lökönö ju̧kwadöma jejenö, wainö pjabacha̧lökönö tjuju̧kwobö jo̧be— jejenö ángelma jö̧a̧lijatö ötjönöma.