1 Samuel 17:28 - Dios Iwene

²⁸ David jojodönö yöa̧lemi, David öpöe Eliabma a̧ja̧kwinobe, ja̧danö a̧ja̧kwö, Davidnö ölabinobe, ja̧danö Davidnö yöa̧linobe: —Tajawedö baikwö kwichaja̧da? Obejadö ja'yubeda kwajwimunö kwiteada̧lo̧ jö̧ka̧lijayonö, jobadönö le'dedibö kwichaji̧? Ökwönö chöwaisökweja, chöjawo̧, otiwo̧sa jö̧ba̧lö kwomukwati̧ma, ja̧danö kwomajadenö sulabenö kwomukwati̧ma. Ökwöma sule ölakwabikwawö kwakwatjakwawi̧ kwedotö jö̧ba̧lö baikwö sulabenö ichajo̧ja, —jö̧ba̧lö yöa̧linobe Eliabma, öjawo̧ Davidnö.

1 Samuel 17:28 ပူးပေါင်းရင်းမြစ်များ

Génesis 37:11

Ja̧danö, José öpöedöma jwiinö labijadötö Josénöma. Jo̧kwayijayonö abe'doma José i̧'wi̧dikwaja̧ yöawaja̧ma ba̧kwȩlö̧jatebö o̧'wo̧ junabijetö, ¿Tajijö? jö̧ba̧lö.

Génesis 37:4

Ja̧danö, José öpöedöma tjedemi tjabe'do jobadötjö o̧penönö Josénö ile niebiawö̧ jwiinö tjo̧'wo̧ sulinö edö öpöjödijadötö Josénöma. Yöa̧lakwawa öpöjödö labinöda yöba̧liabijadötö tjö̧jawo̧ Josénöma.

Génesis 37:8

Jejenö chi'wi̧dikwa yöawiawö̧: —¿Isa? Ja̧danö, ju'winö ökwödö duluwo̧ baibanö kwö̧jakobe ¿jö̧ka̧li̧ji̧?—jö̧ba̧lijadötö José öpöedöma. Ja̧danö, i̧'wi̧dikwaja̧ yöawawö̧ tjo̧'wo sulinö edö jwiinö öpöjödijadötö Josénö, ajayi tjöpöjödajemitjö̧ o̧penönö öpöjödö tjo̧'wo sulinö edö.

Proverbios 18:19

Ja̧danö, ju'wibi yötawa: Bakwo̧ ömöledöso̧nö sulabenö ja̧itjö̧ma ja̧inökwema jo̧banö öpöjödö 'da̧bachibo̧, yemidanö ösödökönö. Yelösöda waiyobe jo̧bakwö yemidanö pjabachibö ö̧jo jö̧ba̧lö. Ja̧danö, wanedö yötawa: Bakwena ju̧kwadöma tjöekwemi 'diemi otidadö tjöpöjojodö ölakwabikwawö ichö tjöekwemi 'dobö lotjapji jö̧ba̧lö ¿jö̧tö̧? Waiyobe ja̧ tjöekwemi 'dobö lotjoböma. Isabenö yötawa: Tjöekwemi 'diemi 'dobö loTJobö waiyi̧danö ömöledöso̧ sulabenö ja̧inökwema yemidanö jo̧banö ja̧binakwö pjabachibö ö̧joböma waiyobe. Ja̧danö, ju'wibi yötawa: Du̧ju̧taja tjö̧möledö idödada wene ju̧na̧lakwawadöma, ölakwabikwawö tjö̧jobetjö̧ 'da̧bachakwadöda tjö̧jobe. Wanedö yötawa: Jobadötjö bakwo̧ma ömöledöso̧ jo̧bakwö wene juna̧lo̧ eju a̧petube ichibobe. Ja̧danö, a̧petube ichibö tjöekwemi apetubekwöchobe ji̧bo̧danö jo̧, ömöledöso̧ jo̧banö öpöjödö teachobö weokobetjö̧. Jobekwö 'da̧bachiböda ju̧kwadö, wene juna̧lö ölakwabikwawö ja̧döma.

Proverbios 27:4

Ja̧danö, ju'wibi yötawa: Jwiinö dameakwo̧ma jojodönö lȩ lö̧jökönö edö labo̧. Yelösöda, jo̧ba dameakwo̧ma ödameakwi̧ tjöbeba̧lökönö jo̧, ödameakwi̧ma labinö ojwe usuwi̧danö usuwö dameakwö jwöeba̧lawö̧nö. Jao jo̧ba dameakwo̧ma jwiinö labo̧ijayonö, jo̧ba ölabi̧tjö bajalekwönönö labo̧ ö'wöyabikwawö jo̧ma. Yelösöda ö'wöyabikwawö jo̧ma jwiinö labo̧.

Mateo 10:36

Jau chömöledö, ökwödö ötjönö ösödadö inesö kwöpöjojodö tjö̧jakwedöma, ökwödö yöne kwömöledöduwitjö ötjönö öpöjödadöda.

Marcos 3:21

Ikenama Jesús ömöledöma jo̧ba kwökönö otidobe yötjawi̧ a̧ja̧kwö, Jesúswe, o̧'wo̧ söba̧lö ö̧jena, jö̧ba̧lö, 'yi̧jadötö jo̧banö öbibö tjȩwa̧jobö.

Judas 1:10

Jejenö waisanö yöa̧linobe Miguelma chömöledö, jo̧kwaijayonö jejenö waisanöma yöba̧löködö ökwödönö sulabenö yöbawadöma. Jobadöma okobe jwiinö wajwitji̧ jawa sulabenö yöba̧ladö. Wanedö yötawa: Tebonö ju̧kwadö omukwatökönö a̧dekwanö tjöwaisi̧ jawada ja̧tji̧danö, jobadö sulabenö yöbawadöma idöda tjösödi̧ jawada omukwatökönö ja̧badö, ja̧danö jejenö ja̧bö, jobadönö söbebö loawa baibobö ja̧badö.

1 Samuel 16:13

—Weökwe, Samuelma David öpöedö tjöba a'otjö o̧tesa̧yunö o̧tesobu toebinobe David uu wamenö. Ja̧danö, jejenö o̧te toebenama, Isabenö Jo̧ O̧'wo Luwo̧ma juluwanö Davidkwö ichibinobe, ja̧danö ja̧ möletjö baikwö bajalenö Davidkwö ö̧jinobe Dios O̧'wo Luwo̧ma. Ikenama, Davidnö o̧te tobebajo̧, Samuelma a̧laibö, itebo comunidad Ramabe ȩwa̧jinobe.

1 Samuel 16:7

Jo̧kwaijayonö, jejenö omukwatiökwe, Isabenö Jo̧ma Samuelnö yöa̧linobe, —Jo̧banö edö wame jawa omukwatökönui, Aaa, bitema otiwo̧, otiwanö möbo̧ jö̧ba̧lö. Ötjöma jo̧banö omudawö junö̧kö̧sa. Ötjö Isabenö Jo̧ma jojodö wamenö tjedi̧danöma edö̧kö̧sa, ötjöma jojodö tjomajadenö tjomukwati̧ edo̧sa, —jö̧ba̧lö yöa̧linobe Diosma Samuelnö, bitemaökö jö̧ba̧lö.

1 Samuel 17:29

Yöa̧lökwe, Davidma atadinobe, —Sulabenö ja̧taja̧ma di̧ya? Sulabenö ja̧tökötö, sule abebö a̧ja̧kwöda abebö cha̧ja̧kwajabe, —jö̧ba̧lö.