1 Reyes 12:20 - Dios Iwene

²⁰ Ja̧danö, Salomon itji̧ Roboannö kabatibajadö, okobe deinö israel jojodötjö u'dakwö ju̧kwadöma Nebat itji̧ Jeroboannö tja̧ja̧kwinobe, —Egipto nijibetjö ȩwa̧jabe Jeroboanma, —jö̧ba̧lö, ja̧danö a̧ja̧kwajadö, jo̧banö jwötjinobe, ko̧ko̧kwö tjö̧jobe ichobö. Ikenama, Nebat itji̧ Jeroboannö 'da̧batö tjujuninobe, okobe deinö israel jojodötjö inesö la'aka luwo̧ ö̧jobö. Israel jojodötjö, sule Judasaso jojodöda David itji̧mu tupadanö jojodönö tjösödinobe, —David itji̧mu tupadanö jojodö tjömöayedösa, —jö̧ba̧lö.

1 Reyes 12:20 ပူးပေါင်းရင်းမြစ်များ

2 Samuel 20:2

Yöa̧lawö̧, israel jojodöma jo̧banö tja̧ja̧kwinobe, ja̧danö Davidnö le'dedibö, Bicri itji̧ Sabakwö latjebinobe. Jo̧kwaijayonö, jobadö latjebonö, judasaso jojodöma jwaikwöda la'aka tjuluwo̧ Davidkwö tji̧'yinobe, bite la'aka duluwo̧nö ösödadösa jö̧ba̧lö. Ja̧danö, Davidkwö teadö tji̧'yinobe, Jordan mikwödötjö, Jerusalenbe ichibenanö kabatö.

1 Reyes 11:13

Jo̧kwaijayonö, jwiinöma ökwödötjö 'dötebökakwo̧sa, ina israel jojodötjö bakwaso luwedö kwö̧jaduwobö wetakwo̧sa, ötjö chömöayo̧mine Davidnö ösödö chomukwatobetjö, ja̧danö ötjö omudawö chujuninemi Jerusalen comunidad ösödö chomukwatobetjö, ökwödö David itji̧mu tupadanö jojodö ina bakwaso luwedö kwö̧jaduwobö wetakwo̧sa, —jö̧ba̧lö yöawinobe Isabenö Jo̧ma, Salomonnöma.

1 Reyes 11:26

Ja̧danö Salomon öpöjojodötjö jelo̧ma Jeroboan mikwo̧. Jo̧ba Jeroboanma, Nebat itji̧, ja̧danö Efrainsaso comunidad Sereda jojo. Jeroboan ojo'doma, Zerua mikwuju, jilekwenö wobekwinujuma. Ajayinö Salomon ömöayo̧ ö̧jinajayonö, jo̧ba Jeroboanbi Salomon öpöjojo baibinobe.

1 Reyes 11:32

Jo̧kwaijayonö, ju'wedö domulataja jawasaso Salomontjö 'dötebijayonö, ina bakwaso la'aka luwo̧ ö̧jobö wetocha. Jau, Salomon abe'do chömöayo̧mine Davidnö otiwanö omukwatö ösödo̧sa, ja̧danö okobe jwiinö israel niji sasokwena nijitjö ötjöda chitebo baibanö 'da̧batö chujuninemi Jerusalen comunidad otiwanö omukwato ösödo̧sa, jadanö ja omukwatö, ina bakwaso luwo̧ ö̧jobö wetakwo̧sa Salomonnö.

1 Reyes 11:35

Jo̧kwaijayonö Salomon itji̧ la'aka luwo̧ baibenama, jo̧batjö domulataja jawasaso 'dötebakwo̧sa, ja̧danö 'döbebajo̧, ökwönö chiyakwo̧sa, domulataja jawasaso jojodötjö inesö la'aka luwo̧ kwö̧jobö̧.

1 Reyes 11:36

Jo̧kwaijayonö jwiinö 'dötebökakwo̧sa, Salomon itji̧ la'aka luwo̧ ö̧ji̧ma, ina bakwaso la'aka luwo̧ ö̧jobö chujunibakwo̧sa. Jau, Jerusalen comunidad 'da̧batö chujunajabe, ötjö Isabenö Jo̧ chitebo comunidad baibanö, ja̧danö chömöayo̧mine David itji̧mu tupadanö jojodö ba̧kwelöjatebö jobe Jerusalentjö chöba a'otjö luwedö tjö̧jobö chösödobetjö̧, ina jobe bakwaso la'aka luwo̧ ö̧jobö wetakwo̧sa.

1 Reyes 11:37

— –Jau Jeroboan, Ökwönö 'da̧batö chujunocha, ju'wedö israel jojodötjö la'aka tjuluwo bakibanö, ökwö webö kwö̧jobö kwösödi̧danö, okobe jwiinö ja̧ niji webö kwö̧jakwo̧ja.

1 Reyes 12:17

Israel jojodö kabatibö tjȩwa̧jiökwe, Salomon itji̧ la'aka luwo̧ Roboanma iteda ömöayo̧ Adoniran mikwo̧nö weinobe, tjö̧jobekwö i̧'yobö. Jo̧ba Adoniranma, 'diinö otikwa weawa la'aka luwo̧ ö̧jinobe, ja̧danö ichibiawö̧, tjöpöjödinobe israel jojodöma, ja̧danö jo̧banö a̧ja̧kwökönö, inawiya ikwawö jo̧banö kwabö lotjinobe. Ja̧danö, jejenö Adonirannö kwabö lotjiökwe, juluwanö iteaka kolukanö a̧ji̧bö döibajinobe Roboanma, Jerusalenbe, jo̧banöbi kwabö lotjapji jö̧balö. Jobekwö laebobe israel jojodö Salomon itji̧ Roboannö katjatjibina wenema. Jo̧kwaijayonö, okobe deinö israel jojodöma katjatibinokobe Roboannö, Judasaso jojodöma ina jo̧banö tjösödinobe, ja̧danö jemi tupakwö Roboanma ina webö ö̧jinobe, israel jojodötjö judasaso comunidadtenia ju̧kwadönö.

2 Reyes 17:21

Ajayinö israel sasoteniatjö domulataja jawa oso David ömöledö tjujulutjö Dios 'yebö loenama, jobadö domulataja jawa oso jojodöma Nebat itji̧ Jeroboannö tjujuninobe, idöda tjuluwo̧ inesö la'aka luwo̧ baibanö. Ja̧danö Israel la'aka luwo̧ babibajo̧, ömöayedö israel jojodönö Isabenö Jo̧ ö̧jelö 'da̧bachibö tji̧'yobö weinobe, ja̧danö inesö sulabenö ja̧awa ja̧tjobö weinobe.

1 Samuel 10:24

Ja̧danö Samuelma jojodönö yöawinobe, —Isabenö biteda Dios omudawö ujunajökwema, okobe deinö israel jojodötjö bakwo̧bi bitedanö jo̧ma deobe, —jö̧ba̧lö Samuel yöawawö̧, okobe deinö jojodöma Saulnö ösödö jwötjeba̧linobe, —Lekwe bite la'aka duluwo̧ ö̧jobö dösöda, —jö̧ba̧lö.