1 Pedro 5:8 - Dios Iwene8 Jweinö omukwatö eda̧lö kwö̧jaduwo chömöledö, kwöpöjojo Awetjama, ökwödönö suli̧ öwaedobö isakwobetjö̧. Kwöpöjojonö baikwö wanedö yötawa chömöledö: Didiba nöbo̧ma tulubö kwebacho̧, ukwakwo̧nö isakwö, ¿jö̧tö? Ja̧danö, Awetjama ökwödönö suli̧ öwaedobö isakwo̧ chömöledö, jo̧kwajabetjö̧ jweinö omukwatö eda̧lö kwö̧jaduwobö jo̧be. အခန်းကိုကြည့်ပါ။ |
1 Pedro 5:8
61 ပူးပေါင်းရင်းမြစ်များ
Ja̧danö, ju'wibi yötawa, wanedö, inesö la'aka luwo̧nö dötölataja jawa wanedö: Ju'wikwenama inesö la'aka luwo̧ma o̧'wo̧ sulekwö ö̧jena. Jobekwö o̧'wo̧ suliawö̧ itebonö ju̧kwadöma yebabidö, didiba labinö tuluiawö̧ yetjabi̧danö. Isabenö, didibama jwiinö labo̧, ¿jö̧tö̧? Jojodöma didiba labinö tuluobe tja̧ja̧kwena jwiinö yebabidö, ökwödönö ukwobö icha, jö̧ba̧lö. Ja̧ yetjabi̧danö yebabidö jojodöma, tjuluwo̧ inesö la'aka luwo̧ma o̧'wo̧ sulekwö jo̧nöma, jwiinö labo̧, jö̧ba̧lö. Jobekwö baledokobe inesö la'aka luwo̧ lȩlö̧jinö edo̧ yöbawö weitjö̧ma. Jao, ju'wikwenama inesö la'aka luwo̧ma itebonö ju̧kwadönö lȩlö̧jinö edö pjabato̧. Jobekwö pjaatiawö̧ itebonö ju̧kwadöma jwiinö tjösödena. Wanedö yötawa: Kwöwaisaduwobe, yȩayi̧ a̧delö tjo'yoli̧ lo̧be edö tjösödobe jojodöma, otiwa, jö̧ba̧lö. Ja̧ tjösödi̧danö ösödadö jojodöma tjuluwo̧ inesö la'aka luwo̧ma lȩlöjinö edö pjaatena, otiwa jö̧ba̧lö.
Ja̧danö, ju'wibi yötawa: Inesö la'aka luwo̧ma o̧'wo̧ sulachibinö ö̧jena itebonö ju̧kwadöma jo̧banö yebabidö. Wanedö yötawa: Didibama jwiinö labo̧ ¿jö̧tö̧? Jojodöma didiba labinö tuluobe tja̧ja̧kwena jwiinö yebabidö, ökwödönö ukwobö icha, jö̧ba̧lö. Ja̧ yetjabi̧danö yebabidö jojodöma, o̧'wo̧ sulachibinö inesö la'aka luwo̧nöma. Isabenö yötawa: Jo̧banö, inesö la'aka luwo̧nö o̧'wo̧ sulachibinö ja̧bajo̧nöma kwabö lotjobö weökwe inesö la'aka luwo̧ma.
Ja̧danö, ju'wibi yötawa: Inesö la̧'aka luwo̧ o̧'wo̧ sulinö edo̧ma usulasedönö jwiinö labo̧, jobadönö usula tjȩmawinö webo̧. Wanedö yötawa: Jo̧ba inesö la'aka luwo̧ o̧'wo̧ sulinö edo̧ma didiba tulubö labo̧danö labo̧. Ja̧danö, nöbo̧ waya jojodönö wo̧atotö jö̧ba̧lö juluwanö ö'öbakwawö icho̧danö labo̧, inesö la'aka luwo̧ usulasedönö o̧'wo̧ sulinö edo̧ma. Yelösöda, jobadönö usula tjȩmawobö labo̧.
Inesö lȩekwa luwo̧ Diosma ötjökwö yöne jo̧ chömöledö, tajawedö tabakwö chö̧jobö. Ötjönö öpöjödadöma, ötjönö wanedö, —Sulabenö ja̧bo̧, —jö̧ba̧lö yötja̧litjö̧bi, yebabö̧kö̧sa, ötjönö wanedö yötja̧lo jö̧ba̧ladönö yöta̧la, —A̧la̧ibö, lȩekwa luwo̧ öba a'o döjamato. Ötjönö öpöjödadöma, ichibö, lȩekwa luwo̧ öba a'o yötjawo, sulabenö ja̧taja̧ma, —jö̧ba̧lö yebabökönö yöta̧lawö̧.
Jemi ikenama la'aka luwo̧ Daríoma weinobe okobe deinö iteda öba a'o ichibö tjo̧'wo̧ sulinö Danielnö wene jwöbebajadönö tjichejebobö, ja̧danö jobadönöbi, tji̧lȩkwa̧munöbi, tji̧tji̧munöbi okobe deinö i̧lȩdo̧ okwa ikwö lotjinobe, didibadö tjukwobö. Ja̧danö, jejenö tjikwenama, didibadöma juluwanö mebibö tjukwinobe, ina nijinö metja̧pjinö, jwiinö tji'delachajinö mebibö tjukwibinobe jobadönö.
Ja̧danö, ödebiya meinama, jojodö tjomajadedanö wanekwachobe, Dios iwene a̧ja̧kwadöma. Ja̧danö, Dios iwene a̧ja̧kwadötjö ju'wedöma Dios iwene tja̧ja̧kwena, tjomajade 'dibadöma, ödebiya mana 'diamanö meinadanö ichejekwadö. Tja̧ja̧kwena, tjomajade 'diobetjö̧ Awetjama ichibö wechebö emibo̧, pji̧yu̧ mebibö tjukwinadanö, mana 'diamanö meaja̧. Ja̧danö, Awetja ichibö wechebö emibenama jobadö a̧ja̧kwadöma ¿dakwö do̧tjatibenada Dios iwenema? Do̧batiböködö— labebö lobö yöbawijetö Jesúsma—.
Tupakwö yöawinobe Jesúsma: —Wanedö yötawa: Te'ada̧lönö eda̧lö kwö̧jaduwo chömöledö, böjȩ jojodö tjösödi̧ jawama ökwödönö ömökapji jö̧ba̧lö. Jau chömöledö, nöinö pjiesta junö, ja̧danö nio ojwiyo owa̧lö, ja̧danö böjȩnö kwö̧ja̧duwi̧ omukwatö kwö̧jaduwitjö̧ma, yemidanö chichakwa̧ kwomukwataduwökena, ja̧danö chichakwa̧ te'ada̧lökönö kwö̧jaduwonö, juluwanö ja̧ möle baibena.
Ökwödö kwabe'doduwima Awetjada. Ökwödö ösödö kwö̧jaduwi̧ma Awetja ösödi̧danö ösödö kwö̧jaduwobe. Jo̧bama jojodönö kwabö lobo̧, ajayitjöda babe baibanö. Ja̧danö, isabenö jawa yöbawö̧kö̧, omönada yöbawo̧. Jo̧ba omajade okwa sule omönada a̧jobetjö̧ omönada yöbawo̧. Ja̧danö, isabenö yöawakwawama öpöjödo̧. Jo̧bama ajayinö omöna yöbawina. Ja̧danö, jojodönö tjo̧'wo̧ luwo̧nö öibobe omönada yötjawobö.
Jau chömöledö, kwöwaisaduwa, Awetjama kabatökönö isakwobe, ökwödö Jesúsnö ösödadönö suli̧ öwaedobö, ¿jö̧tö? Jau chömöledö, jejenö isakwo̧, ja̧danö belö sulabenö baledinatjö ökwödönö suli̧ öwaedotö jö̧ba̧lö isakwinobe Awetjama chömöledö. Ja̧danö, jejenö suli̧ öwaedotö jö̧ba̧lö isakwi̧ chöwaisobetjö̧, waisanö ökwödönö wetijatö chömöledö, sulabenö ja̧binanö lȩkebaduwoböbi, lȩbebajadö yemidanö jo̧banö kwösödaduwoböbi. Jau chömöledö, okobe jwiinö ja̧ wetinama, Awetja ökwödönö ujuluwapji jö̧ba̧lö wetijatö.
Chömöledö, Awetja, omöna yöba̧lo̧ma ökwödönö jelobe kwi̧'yaduwobö, öikwa jö̧ba̧lo̧. Jo̧bama jejenö öibenama ¿dakwö bakibaduwobeda, jelobe omukwatadö bakibaduwokoböma? Biya̧ chömöledö. Dios ujulunöda tjöbeba̧lakwawö ju̧kwaduwi. Wanedö yötawa: 'Bötjabikwawakwedö 'dii̧ jawa 'dutjawaja̧ tjöbeba̧lö ji̧danö ökwödöma tjöbeba̧lakwawö ju̧kwaduwi, okobe jwiinö Dios ujulunöda.
Ja̧danö, ya̧dö Jesúsnö ösödadönöbi weta: Ya̧dö kamijido̧ 'dutjawenama, ömadö jobadönö ösödö tjedo jö̧ba̧löma 'dutjawoko, otiwanö ja̧bö ju̧kwadö ya̧dö 'dutjawi̧danö 'dutjawo. Ja̧danö, ya̧dö tjotikwobö jo̧be. Ja̧ tjotikwobö yöta̧li̧ma, nöinö sasiyu tjönönawo jö̧ba̧lö yöta̧lökö, ja̧danö nöinö tjöwö'ye di̧batakwawö ja̧tjo jö̧ba̧lö yöta̧lökö, ja̧danö nöinö oro jawa tjönönawo jö̧ba̧lö yöta̧lökö, ja̧danö nöinö mikwawi̧ kamijido̧ 'dutjawo jö̧ba̧lö yöta̧lökö. Wanedö yöta̧la tjotikwi̧ma, jobadö otiwanö ja̧bö tjö̧ji̧ma, tjotikwobedanö ji̧, ja̧danö, ya̧dö Diosnö ösödadösa jö̧ba̧lö yöba̧ladöma, otiwanö ja̧bö tjö̧jobö jo̧be.
Ja̧danö, te'ada̧lakwawa luwedö jawa yötawa. Te'ada̧lakwawa luwo̧ baibanö otidakwo̧ma, otiwanö ja̧bö jo̧. Ja̧danö, otiwanö ja̧bö ö̧jobetjö̧, jojodö sulabenö yötja̧loböma jwibo̧. Ja̧danö, ilekwo bakwujunöda junalo̧, ja̧danö jobujukwöda jo̧. Ja̧danö, ja̧bö ö̧ji̧ma, bakweminö omukwatö jo̧. Ja̧danö, Aaa, biya̧ma otiwanö ja̧awa, jö̧ba̧lö öwaisi̧danö ja̧bö jo̧. Ja̧danö jojodö, Aaa, bitema otiwanö ja̧bö jo̧, jö̧ba̧lö tjöwaisökweda. Ja̧danö, jelobetjö ichajadö tjichenama, ejutjö dösölö̧jinö tebatö pjabato̧, ja̧danö, Dios iwene ba̧ja̧dakwawa waiso̧.
Ja̧danö, ju'wedö le'dedibö lotjijayonö, Duluwo̧ma le'dediböma loinokobe ötjönö, Duluwo̧ma ötjökwö ö̧jinobe, ja̧danö chujuluwachibanö pjaatinobe okobe jwiinö Dios yöawi̧ yötawobö. Jejenö pjaatobetjö̧, okobe deinö jobe ju̧kwadö judío jojodöböködöma Dios yöawi̧ tja̧ja̧kwinobe, ja̧danö ju'wibi, Duluwo̧ma chö̧jibinö pjaatinobe, lȩekwa luwedö ötjönö kwabö lotjapji jö̧ba̧lö.
Te'ada̧lakwawa luwo̧ otidakwo̧ma wainö ja̧bö jo̧, baikwö yötawa: Te'ada̧lakwawa luwo̧ otidakwo̧ma, jelobetjö ichajadönö dösölö̧jinö pjabatö jo̧, ja̧danö otiwa jawada ösödo̧, otiwanö ja̧bö ö̧jo jö̧ba̧lö. Ja̧danö, ja̧i̧ma jweinö omukwatö ja̧bo̧, ja̧danö, bakwainö edo̧ jojodönöma, bakwo̧nö jelo̧nötjö o̧penönö omukwatökönö, ja̧danö, jwaikwöda Dios ösödi̧ jawada ja̧bo̧. Ja̧danö, ja̧bö ö̧ji̧ma, Aaa biya̧ma otiwanö ja̧awa jö̧ba̧lö öwaisi̧danö ja̧bö jo̧, sulabenö ösödi̧ jawa ja̧bökönö.
Ja̧danö, ja̧ Dios mikwa jwiinö otiwa jawa iyi̧ma ökwödönö ba̧ja̧dobe Diosnö öpöjödö ja̧kwawama kadatibobö, ja̧danö böjȩ jojodö sulabe dösödi̧ jawa ja̧bökönö kabatibö ja̧dobö. Ja̧danö, tupakwö ba̧ja̧dobe ökwödönö, Dios mikwa jwiinö otiwa jawa iyi̧ma, obökönö dö̧jobö, ja̧danö sulabenö ja̧bökönö dö̧jobö, ja̧danö Diosnö ösödö dö̧jobö ina böjȩnö dö̧jayi.
Jesúsnö ösödadötjö ömadö damöbedönö baikwö ja̧bö tjö̧jobö kwöba̧ja̧dodönö: Okobe jwiinö ja̧tji̧ma, jweinö omukwatö ja̧bö tjö̧jobö, ja̧danö obökönö ja̧bö tjö̧jobö, ja̧danö tjösödi̧ jawa ja̧bökönö, biya̧ma otiwanö ja̧awa jö̧ba̧lö tjöwaisi̧da ja̧bö tjö̧jobö. Ja̧danö, jobadönö kwöba̧ja̧do, jwaikwöda Jesúsnö ösödö tjö̧jobö, ja̧danö tjömöledö Jesúsnö ösödadönö tjösödobö, ja̧danö tjo̧'wo̧ luwo̧nö me'dawachibökönö tjö̧jobö kwöba̧ja̧dodönö.
Ikenama iwene labinö ökwöi̧ cha̧ja̧kwijatö mölejȩbetjö, baikwö: —Tjo̧wi̧ta, Awetjanö mölejȩbetjö böjȩkwö jabö lotjajabe. Jo̧bama mölebi, yö̧tebi Do̧'wo̧ Döwana̧lökwe Dios öba a'o ja̧nö jwöbeba̧lo̧ Diosnö, iteda ömöledö babibinadö sulabenö ja̧tji̧ma. Ja̧danö, bajaliyanö, Do̧'wo̧ Döwana̧lökwe Diosma, iteda ömöledö babibinadönö tjö̧jibinö pjaati̧tjö okobe jwiinö badekwachajabe. Bajaliyanö, Dios ömöledö babibinadönö, Awetja sulabenö ja̧biainatjö tjö̧jibi̧ma badekwachajabe. Isabenö, Do̧'wo̧ Döwana̧lökwe Diosma iteda ujulu i̧sebajabe. Ja̧danö, Awetjanö jabö lotjajabetjö̧, tjo̧wi̧ta, Dios La'aka Luwo̧ ö̧ji̧ möle badekwachajabe. Ja̧danö, Do̧'wo̧ Döwana̧lökwe Dios, iteda jojodö tjö̧jibinö pjabatö weinökwenö, kabebö ujuni̧ möle badekwachajabe böjȩ la'aka luwo̧ baibanö.
Ja̧danö, Awetjanö tjujuluwinobetjö̧ ökwödö mölejȩnö ju̧kwadöma, otiwanö, kwo̧'wo̧duwi ösöwanö ju̧kwaduwi, jobema deobe Awetjama. Jo̧kwaijayonö jejenömaökö böjȩnö ju̧kwadöma. Yelösöda kwo̧'wo̧duwi ösöwanöma kwö̧jaduwokobe. Böjȩkwö jatjajökwema, yelösöda ölakwabikwawobe ökwödönöma. Jo̧bama öwaisa, Tjo̧wi̧, chö̧ji̧ma 'dö̧ibaja, lekwökö, jö̧ba̧lö. Jo̧kwaobetjö̧ ökwödönö labinö, inia tjököbaduwinö ja̧obö omukwato̧— jejenö mölejȩbetjö iwene yöawi̧ cha̧ja̧kwijatö.
Ikenama Diosma Awetjanö, jojodönö ba̧kwȩlö̧jatebö suli̧ waedö yöba̧lo̧nöma, do̧batö töbebö loobe chedijatö, ökwöla nöola okwa. Jobema, ju'wedö du̧ju̧tajanö ajayinö töbebö loinemi. Ojwe okwatjö labebinanöbi ajayinö töbebö loinemi jemima. Ja̧danö, omöna yöba̧linanöbi, Ötjöma Dios yöawi̧ yöbawo̧sa, jö̧ba̧lö, yöba̧linanöbi, ajayinö töbebö loinemi jemima, ökwöla ubola okwama. Jobema tiibökönö, tubinö yelösöda ubobe, azufre mikwi̧ ubi̧ tubi̧ma. Ja̧danö, jobadö wa̧medukwama, ba̧kwȩlö̧jatebö labebökönö, mölebi yö̧tebi inia tjötjinö baledawö̧.
ကြော်ငြာတွေ