1 Crónicas 5:22 - Dios Iwene

²² Tjölakwabikwawonö, Diosda israel jojodönö pjabatö ölakwabikwawinobe, jo̧kwajabetjö̧ agareno jojodötjö ba̧jȩkwadö ölakwabikwawö ö'wö batjibinobe. Ja̧danö, jobadönö juluwajadö, tjiteboinemi nijinö tjö̧jinobe Rubensaso jojodöbi, Gadsaso jojodöbi, Manasessaso jojodöbi. Lekwe möle jobe tjö̧jinobe, Asiria jojodö israel jojodönö tjujuluwenanö baibanö, ja̧danö ja̧ möle tjitebotjö latjebinobe Asiria jojodöma.

1 Crónicas 5:22 ပူးပေါင်းရင်းမြစ်များ

Génesis 49:19

Ikenama Jacobma yöbawijetö itji̧ Gadnö: —Gad, ökwötjö tupadanö jojodönö baledakwa̧ yötawa. Ju'winö naukwabidöma ökwötjö tupadanö jojodö tjitea tjö̧naukwotö jö̧ba̧lö tjichakobe. Jo̧kwaijayonö ökwötjö tupadanö jojodöma naukwabidönö juluwajadöma jobadönö a'dewö tjö̧kömanö lutjakwedö— yöbawijetö Jacobma itji̧ Gadnö.

2 Reyes 15:29

Ja̧danö, Peka israel la'aka luwo̧ öjonö, Asiria la'aka luwo̧ Tiglat-pileser mikwo̧ma israel nijibe ölakwabikwawö ichinobe, ja̧danö ichibajo̧ Ijon comunidadbi, Abel-bet-maaca comunidadbi, Janoa comunidadbi, Cedes comunidadbi, Hazor comunidadbi, Galaad nijibi, Galilea nijibi, okobe jwiinö Neftalisaso nijibi mebibö ujuluwinobe. Ja̧danö, juluwajo̧, jobe ju̧kwinadönö do̧batö, tjitebotjö labebö öibinobe jobadönö, iteda itebo Asiriabe.

2 Reyes 17:6

Ja̧danö, wapötakwa o̧biya tjösawajo̧, Oseas ida̧ökö jelemutjö ö'wejemu jawa o̧biya baledibanö webö ö̧jenama, bajaliyanö Samaria comunidad ujuluwinobe Asiria la'aka luwo̧ma. Ja̧danö, juluwajo̧, ujuluwajawö̧ israel jojodönö öbibö laebinobe tjitebotjö, ja̧danö iteda itebobe öbibajo̧, Halah comunidadnöbi, Habor ojwe ö'öbö comunidad Gozannöbi, medo jojodö tjitebo comunidadbiyanöbi tjö̧jobö weinobe.

1 Crónicas 4:41

jo̧kwaijayonö Juda la'aka luwo̧ Ezequias mikwo̧ webö ö̧jonö, jobadö Simeonsaso jojodötjö luwedöma jobe tjujuluwobö tji̧'yinobe, ja̧danö okobe deinö jobe ju̧kwadö Cam itji̧mu tupadanö jojodönöbi, meunitas jojodönöbi kwabawö lotjinobe, jobadötjö bakwo̧bi deenanö baibanö. Ja̧danö jobekwö jwiinö söbebö lotjinobetjö̧, babe mölema jobadötjö bakwo̧bi deobe. Okobe deinö jobadönö kwabawö lobajadö, idöda tjitebo baibanö tjeminobe, tja̧jwi̧mu otiwanö tjukwakwa̧ tjösödobetjö̧.

1 Crónicas 5:21

Ja̧danö, agarenos jojodönö juluwajadö, tjiteaja̧ 'dötjebinobe Rubensaso jojodöbi, Gadsaso jojodöbi, Manasessaso jojodöbi. 'Dötjebina jawa baikwö laebobe: Cincuenta milbedö camellodönö 'dötjebinobe, ja̧danö doscientos cincuenta milbedö obejadönö 'dötjebinobe, ja̧danö dos milbedö buludönö 'dötjebinobe. Ju'wibi, agarenos jojodötjö cien milbedö jojodönö do̧tja̧tinobe, tjömöayedö batjibanö.

1 Crónicas 5:26

Jo̧kwaiökwe, jobadönö lȩebinobe Israel jojodö tjösödökwe Diosma, ja̧danö Asiria la'aka luwo̧ Pul mikwo̧nö, ju'wi imi Tiglat-pileser mikwo̧nö weinobe, tjitebobe ichö, ölakwabikwawö ujuluwobö, ja̧danö juluwajo̧, jobadö Rubensaso jojodönöbi, Gadsaso jojodönöbi, Manasessaso ja'ö jojodönöbi öbibö emobö. Ja̧danö, jobekwö weiawö̧, asiria jojodöma jobadönö latjebinobe tjitebotjö̧, ja̧danö jobadönö öbibö tjujuninobe Halah comunidadnöbi, Habor comunidadnöbi, Hara comunidadnöbi, Gozan ojwe ö'öbö nijinöbi tjö̧jobö. Ja̧danö, jobekwö tjujuniawö̧, babe mölebi baibanö, ina tjitebotjö labebinadö jobe ju̧kwadö, Rubensaso jojodöbi, Gadsaso jojodöbi, Manasessaso ja'ö jojodöbi.

1 Crónicas 6:26

Ahimot itji̧ma Elcana mikwo̧. Ja̧danö Elcana itji̧ma Zofai mikwo̧. Ja̧danö Zofai itji̧ma Nahat mikwo̧.

Romanos 8:31

Chömöledö, biya̧ babeda yötawaja̧ omukwatö, ökwödönö suli̧ waedo̧ma bakwo̧bi deobe ichejekwa. Diosda ökwödönö pjabato̧obetjö̧, bakwo̧bi deobe ökwödönö suli̧ waedo̧ma chömöledö.

Josué 23:10

Jau chömöledö, iteda yöbawö ujuninadanö, kwuluwo̧duwi Isabenö Jo̧ Diosda döpöjojodönö ölakwabikwawobetjö̧, ökwödö israel jojodötjö bakwo̧da döpöjojodö milbedönö a'dewö loena. Jau, isabenö juluwadöja chömöledö, Diosda ökwödönö pjaatobetjö̧.