1 Corintios 4:19 - Dios Iwene

^19-20 Jo̧kwaijayonö, Duluwo̧ weitjö̧ma, juluwanö jobe chichibakobe chömöledö. Ja̧danö, jobe chichibenama, chöwaisachibakobe jobadö juluwadösa jö̧ba̧ladönöma. Baikwö yötawa: Dios ömöayedö dö̧ji̧ mikwawi̧ma sule daanö yödawi̧maökö, okwa jawada, Dios ujuludaobe. Ja̧danö, jobadöma isabenö yötja̧li̧danö Dios ömöayedö juluwadö tjö̧jitjö̧ma, Dios ujulu tjujuna̧lena. Ja̧danö, jobe ichibö jobadönö chöwaisachibena, isabenö tjujuluwojobö, omöna yötja̧lojobö jö̧ba̧lö chömöledö.

1 Corintios 4:19 ပူးပေါင်းရင်းမြစ်များ

Hechos 18:21

Ikenama jö̧balijetö: —Tjo̧wi̧ chȩwa̧ja. Dios weitjö̧ma yemidanö chichocha— jö̧ba̧lijetö. Ikenama Éfesotjö ȩwa̧jijetö isowinö.

Hechos 19:21

Ikenama ja̧ baledinemi tupakwöma Pabloma, o̧'wo̧ ösöwanö jö̧ba̧lijetö: —Aaa, ötjöma babema Jerusalénbe chi̧'yocha. 'Ya̧jo̧ma kwetachocha Macedoniabebi, Acayabebi. Ikenama, Jerusalénnö kwebachö kabatiböma Romabe yöbawö chi̧'yocha— jö̧ba̧lijetö.

Hechos 20:2

Jobe ichibö okobe jwiinö comunidadkwena kwebachö 'yi̧jetö. Ja̧danö, jobe comunidadkwena kwebachö ja̧nö yöba̧lijetö jojodönö, tjo̧'wo̧ ösöwachibanö tjomukwatobö Diosnö. Jejenö yöbawö kwebachöma Grecia nijibe ichibijetö.

Romanos 15:32

Ja̧danö, biya̧ judío jojodöböködö tjiyina Jerusalénnö ju̧kwadönö chiyaja̧ ikenama, Dios ösöditjö̧ma ökwödö Roma jojodönö edö chi̧'yena. Dios jejenö weitjö̧ma, cho̧'wo̧ ösöwanö ökwödökwö Roma jojodökwö chichibocha, ja̧danö ökwödökwö ja̧nö chösödocha chömöledö. Jejenö nöinö chotidajabetjö babema chö'wachibakobe chömöledö.

1 Corintios 11:34

Ja̧danö, a̧wi̧chi̧lö̧jitjö̧ma, kwejuduwitjöda abönö kwukwaduwo, ko̧ko̧kwö kwukwaduwenama sulabenö ja̧köbiökwe Dios lȩebapji jö̧ba̧lö. Ja̧danö ju'wijaye abebö kwa̧ja̧kwinaduwa jawama, jobe Corintiobe chichibenada ökwödönö atadö yötawocha, ja̧bö kwö̧jaduwo jö̧ba̧lö.

1 Corintios 14:5

Jau chömöledö, okobe deinö ju'wedö tjiwenenö yöka̧laduwobö chösöda, jo̧kwaijayonö ja̧tjö o̧penönö chösödi̧ma biya̧, jojodö tjiwenenö Dios yöawi̧ yökawaduwobö chömöledö. Jau chömöledö, ju'wedö tjiwenenö yöbawo̧ma, laebi̧ jawa labebö loawa jwiinö yöawitjö̧ma, yöawi̧ma jojodönö mikwawokobe, tja̧ja̧kwokobetjö̧. Jo̧kwajabetjö̧ ju'wedö tjiwenenö yöbawo̧nötjö bajalekwönönö mikwawobe jojodö tjiwenenö Dios yöawi̧ yöbawo̧ma, okobe deinö Jesúsnö ösödadönö pjaatobetjö̧.

1 Corintios 16:5

Chömöledö, baikwö yötawa kwiteboduwibe chi̧'yakwa̧ma: Ajayinö Macedoniabe chi̧'yobö jo̧be chömöledö, ja̧danö jemi ikenama, ökwödö kwö̧jaduwobe chichibena.

1 Corintios 16:7

Jau chömöledö, sule baledöma ökwödönö chedobö chöpöjöda, ja'yubenö lekwe ökwödökwö chö̧jobö chösöda, ja̧danö Duluwo̧ jejenö weitjö̧ma, jejenö ja̧tocha.

1 Corintios 2:6

Jau chömöledö, tjo̧'wo̧ luwo̧nö da̧peachadönö yötawenama, waisakwawa ji̧ wene yötawobe jobadönö, waisanö tjomukwatakobetjö̧. Jo̧kwaijayonö, yötawi̧ wene waisakwawa ji̧ma böjȩ waisakwawa jawamaökö, ja̧danö böjȩ luwedö waisanö tjomukwati̧ jawamaökö. Böjȩ luwedönö baikwö yötawa chömöledö, tupakwö tjujulu jwitjakwedö jobadöma. Ja̧danö jobadö waisanö tjomukwati̧ jawama yödawökö.

1 Corintios 4:18

Ökwödötjö ju'wedöma, Aaa, ökwödöma juluwadödobetjö̧, Pabloma baikwö ichökö jö̧ba̧lö kwomukwataduwobe.

1 Corintios 4:6

Chömöledö, biya̧ yötawaja̧ jawama, ökwödönö pjabatö yötawajabe. Ja̧danö, ötjönö Apolosnö wanedö yötawajabe, ökwödönö a̧ja̧kwö, ökwödöbi kwöwaisachibaduwobö Dios iwene laebi̧danö kwomukwataduwobö, ja̧danö bakwo̧nö jelo̧nötjö o̧penönö kwomukwataduwapji jö̧ba̧lö, ja̧danö ju'wedönö kwöpöjödaduwapji jö̧ba̧lö, sulabedö jö̧ba̧lö.

2 Corintios 1:23

Jau chömöledö, chi̧'yakwa̧ jö̧ta̧lina waekwinama baikwö jweinö yötawaduwakwö, ja̧danö chuluwo̧ Diosma öwaisa, biya̧ yöta̧li̧ma jwei̧ wene jö̧ba̧lö. Sule chomukwati̧ chöbalewabobetjö̧ chi̧'yobö chomukwati̧ma waekwijökötö chömöledö, ju'wida, sulabenö ja̧köbinaduwa wene cha̧ja̧kwijatö. Ja̧danö jejenö cha̧ja̧kwitjö̧ kwiteboduwi Corintiobema chi̧'yijökötö chömöledö, labinö ökwödönö lȩtebapji jö̧ba̧lö, ja̧danö labinö lȩtebawö̧, nöinö kwo̧'wo̧ tjo̧achaduwapji jö̧ba̧lö.

2 Corintios 10:9

Chömöledö, ökwödönö kwialusöja chiwȩyudi̧ma labinö lȩbebö chiwȩyudobe, jo̧kwaijayonö sule yebeabinöma chiwȩyudökö chömöledö, isabenö chiwȩyudi̧danö ja̧takwo̧sa.

Hebreos 6:3

Ja̧danö, ja̧ ajayinö tjöba̧ja̧di̧ döwaisachinatjö tupakwö di̧'yobö jo̧be. Ja̧danö chö̧möledö, sule Dios pjaati̧nöda jejenö da̧peachö di̧'yakwedösa.

Santiago 4:15

Jo̧kwaobetjö̧ yötawaduwakwö. Bejenöda yöka̧laduwo: Duluwo̧ Dios weitjö̧ma ina 'yabayedö dö̧jakwedösa, itekwayi jelobe di̧'yobö, ja̧danö jobetjö dotidobö.