1 Corintios 12:8 - Dios Iwene

⁸ Ja̧danö, Dios O̧'wo̧ Luwo̧ma bakwo̧nö iyena, jojodönö waisanö lȩekwa yöawo jö̧ba̧lö. Ja̧danö, jelo̧nö waisakwawa ji̧ wene yöawo jö̧ba̧lö iyo̧ma jo̧bada, Dios O̧'wo̧ Luwo̧da.

1 Corintios 12:8 ပူးပေါင်းရင်းမြစ်များ

Diosnö ösödo̧ Job mikwo̧ usula emawina jawa 32:8

Jejenö omukwatö 'wii̧nö chö̧bijatö chömöledö. Jo̧kwaijayonö isabenö jojodö waisanö omukwatadö batjibobö pjaati̧ma, lekwe o̧bia tjö̧ji̧maökö, Okobe Jwiinö Juluwo̧ Dios o̧'wo luwo̧ jojodökwö ö̧ji̧da, jojodö okwa jawa waisachibanö tjomukwatobö pjaati̧ma.

Éxodo 31:3

Ja̧danö, ötjö Cho̧'wo Luwo̧ma Bezaleel o̧'wo̧ luwo̧nö pjabatö öibobe, o̧do otikwa jawa jwiinö otiwanö otido̧ baibanö, ja̧danö o̧do okwa jawa otikwabi. Ju'wi jawa, ju'wi jawabi o̧do otikwa jawa okobe jwiinö waisö otiwanö otido̧.

Proverbios 2:6

Jao chitji̧, Isabenö Jo̧da ökwönö jweinö kwomukwatobö pjabato̧ma. Jo̧bada ökwönö ju'wi jawabi ju'wi jawa kwöwaisobö pjabato̧ma. Ja̧danö, Isabenö Jo̧da ju'wi jawabi ju'wi jawa ¿di̧ya sulojobö jö̧ba̧lö, di̧ya otiwojobö jö̧ba̧lö kwöwaisachibobö pjabato̧ma.

Isaías 50:4

Chuluwo̧ Isabenö Jo̧ Diosma ötjönö öba̧ja̧dajabe, iteda waisanö yöa̧li̧ yöta̧lobö, me'dawachibadönö tjujuluwachibanö yöta̧lakwa̧ chöwaisakobetjö̧. Ötjönö ba̧ja̧dö, yȩayikwena ötjönö wiludö, ö̧ba̧ja̧di̧ cha̧ja̧kwobö webo̧, waisachadö tjöwaisachi̧danö, Dios öba̧ja̧di̧ jawa a̧ja̧kwö chöwaisachakobetjö̧.

Isaías 59:21

Ju'wibi yöawobe Isabenö Jo̧ma: Ja̧danö, ötjöma jobadö tjö̧jibinö pjatatajawö̧nö isabenö pjatatakwa̧ wene yöbawö chujunakwo̧sa, baikwö: Ökwödökwö jo̧ cho̧'wo luwo̧ma, la'akatjöda kwö̧jaduwelö laebökakwo̧. Ja̧danö ötjö yötawi̧, yöka̧laduwobö chiyaja̧ chiwenema, ba̧kwelöjatebö yöba̧lö kwö̧jaduwakwedöja, ja̧danö kwitji̧muduwibi ba̧kwelöjatebö yöba̧lö tjö̧jakwedö, ja̧danö tji̧tji̧mu tupadanö jojodöbi ba̧kwelöjatebö chiwene yöba̧lö tjö̧jakwedö. Bemi tupakwö, ba̧kwelöjatebö 'dö̧ibajökönö, jobekwö yöba̧lö kwö̧jaduwakwedöja, jö̧ba̧lö yöawobe Isabenö Jo̧ma.

Daniel 2:21

Isabenö Diosda tupakwö baledakwa̧ omukwatö juno̧ma, babe baledakwa̧bi tupakwö baledakwa̧bi. La'aka luwedötjö ju'wedönö la'aka luwedö tjö̧ji̧tjö latjebobö webo̧ Diosma, ja̧danö la'aka luwedö tjö̧jinemi balekwedönö webo̧. Diosda jojodö waisanö omukwatadö batjibobö pjabato̧ma, ja̧danö jo̧bada waisachadö nöinö tjöwaisachibobö pjabato̧ma.

Mateo 13:11

Jejenö atjebökwe, Jesúsma atadinobe: —Diosma ökwödö chöba̧ja̧di̧ waisachadönö iyinobe, jojodö wajwitji̧ jawa, mölejȩbe jo̧ Dios la'aka luwo̧ ö̧jakwa̧ jawa kwöwaisaduwobö, jo̧kwaijayonö ju'wedö jojodönö jejenö iyinokobetjö̧, wanedö yöbawöda yötawobe jobadönö.

Hechos 6:3

Jo̧kwaobetjö̧, chömöledö, ökwödötjö emö junaduwi jelemutjö du̧ju̧tajanö ömadönö, pjaatakwawa jojodönö, ja̧ iyawa webadö batjibinö. Jobadö emö kwujunaduwakwawö̧ma, Otiwanö omukwatö ju̧kwadö, jö̧ba̧lö, jojodö yötja̧lawö̧nöda emö kwujunaduwo. Ja̧danö, jobadö emö kwujunaduwakwawö̧ma waisanö omukwatadönöda kwujunaduwo. Ja̧danö, Dios O̧'wo̧ Luwo̧ öba̧ja̧dawö̧nöda emö kwujunaduwo. Emö kwujunaduwawö̧nö wedakobe jobadöda iyawa wetjobö.

Romanos 15:14

Chömöledö, chedemi kwömöledöduwinö ida̧ökö otiwanö ösödadöja, ja̧danö chedemi ida̧ökö waisadöja ökwödönö yötawaja̧ma. Ja̧danö, chedemi ida̧ökö waisadöja biya̧ jawa ju'wedönöbi yökawaduwo jö̧ba̧lö.

1 Corintios 1:30

Ja̧danö, Diosma ökwödönö Cristo Jesúskwö bakobe bakibaduwanö ja̧inobe. Ja̧danö Diosma Cristonötjö iteda öwaisi̧ waisakwawa ji̧ma ökwödönö iyobe. Jau chömöledö, Cristoda sulabe jwibadö badibanö ja̧binama, ja̧danö Cristoda Dios ömöledö badibanö ja̧binama, ja̧danö Cristoda dö̧jibobö midawö wobinama.

1 Corintios 1:5

Diosma isabenö öwaetjöda ökwödö kwö'da̧deduwitjö i̧sebinobe, Cristo jawa wenema, isabenö wene jö̧ba̧lö chömöledö. Cristokwö dötewinö kwuju̧kwaduwobetjö̧, Diosma isabenö okobe jwiinö otiwa jawa iyinobe ökwödönöma, okobe jwiinö yöawakwawabi yökawaduwobö, ja̧danö okobe jwiinö waisakwawabi kwöwaisaduwobö.

1 Corintios 13:2

Ja̧danö, otiwanö Dios yöawi̧ yötawobö chöwaisena, ja̧danö okobe jwiinö chöwaisena, jojodö wajwitji̧ jawabi chöwaisena. Ja̧danö, jwaikwöda Diosnö chösödena, okobe jwiinö juluwo̧ jö̧ba̧lö. Jau chömöledö, mö'ösa'iju pjolachibinö weto jö̧ba̧lö Diosnö chösödena, Diosma mö'ösa'iju pjolachibinö ja̧obö juluwo̧ jö̧ba̧lö. Jo̧kwaijayonö, ju'wedönö ösödakwabikwawökönö chö̧jitjö̧ma, mikwawö̧kö̧sa chömöledö.

1 Corintios 13:8

Jau chömöledö, jojodönö ösödabikwawö ja̧kwawama 'dö̧ibökakobe, böjȩnö ja̧nöbi, mölejȩnö ja̧nöbi dömöledönö ösödabikwawö dö̧jakobetjö̧. Jo̧kwaijayonö jejenömaökö ju'wi jaye ja̧bö dö̧jo jö̧ba̧lö Dios ökwödönö iyi̧ jawama chömöledö. Dios yöawi̧ yöawakwawama 'dö̧ibakobe, ja̧danö ju'wedö tjiwenenö yöawakwawabi 'dö̧ibakobe, ja̧danö waisakwawabi 'dö̧ibakobe chömöledö, böjȩnö dö̧jayida ja̧bö dö̧jobö Dios ja̧ iyobetjö̧.

1 Corintios 14:26

Jau chömöledö, yötawaja̧danö jo̧be, jo̧kwajabetjö̧ baikwö wetaduwakwö ja̧bö kwö̧jaduwo jö̧ba̧lö: Ko̧ko̧kwö Diosnö kwösödaduwenama, bakwo̧ lo̧awa lo̧o jö̧ba̧lö ujuna̧lena. Ja̧danö, jelo̧ ba̧ja̧dakwawa öba̧ja̧do jö̧ba̧lö ujuna̧lena. Ja̧danö, jelo̧ Dios jo̧banö i̧sebina jawa yöawo jö̧ba̧lö ujuna̧lena. Ja̧danö, jelo̧ ju'wedö tjiwenenö yöawakwawa jawa yöawo jö̧ba̧lö ujuna̧lena. Ja̧danö, jelo̧ ju'wedö tjiwenenö yötja̧li̧ labebö lobö yöawo jö̧ba̧lö ujuna̧lena. Jau chömöledö, okobe jwiinö ko̧ko̧kwö ja̧köbaduwi̧ma, Jesúsnö ösödadö tjöda̧peacho jö̧a̧li̧ jawada ja̧köbaduwo.

1 Corintios 14:6

Yötawaja̧ labebö lobö yötawa chömöledö. Ökwödökwö ichibö, ju'wedö tjiwenenö yötawitjö̧ma, ökwödönö pjatatökena ichejekwa, kwa̧ja̧kwaduwokobetjö̧, ¿jö̧tö? Jo̧kwaijayonö, Dios ötjönö i̧sebina wene ökwödönö kwiweneduwinö yötawitjö̧bi, ja̧danö waisakwawa ji̧ wene yötawitjö̧bi, ja̧danö Dios yöawi̧ yötawitjö̧bi, ja̧danö ökwödönö chöba̧ja̧ditjö̧bi, jejenö ja̧bö ökwödönö pjatatena chömöledö.

1 Corintios 2:11

Jau chömöledö, wanedö yötawa: Ökwö kwomukwati̧ma ju'wedö jojodö edöködö, ¿jö̧tö? Jo̧kwaijayonö, ju'wedö tjedököjayonö, ökwöda kwo̧'wo̧ luwo̧ma öwaisobe, ökwö kwo̧'wo̧ luwo̧obetjö, ¿jö̧tö? Dios O̧'wo̧ Luwo̧bi ja̧danö, sule Dios O̧'wo̧ Luwo̧da okobe jwiinö Dios jawa waiso̧ma, iteda O̧'wo̧ Luwo̧obetjö̧.

1 Corintios 2:16

Jau chömöledö, Dios iwene baikwö laebobe: Böjȩ jojodötjö bakwo̧bi deobe, Duluwo̧ omukwati̧ waiso̧ma, ja̧danö bakwo̧bi Duluwo̧nö ba̧ja̧do̧ma deobe jö̧ba̧lö laebobe. Ja̧danö böjȩ jojodö Dios omukwati̧ tjöwaisoböma jwibadö. Jo̧kwaijayonö ökwödö Cristonö ösödadöma Dios omukwati̧ döwaisobö jo̧be chömöledö, ökwödöma Cristo omukwati̧ dujuna̧lobetjö̧.

2 Corintios 1:12

Chömöledö, otiwanö ökwödönö ja̧bö dö̧jina wene yötawaduwakwö, ökwödönö sulabenöma ja̧binöködösa jö̧ba̧lö. Jau chömöledö, okobe jwiinö böjȩnö ja̧nö ja̧di̧ma, ja̧danö ökwödönö ja̧bö dö̧ji̧ma sulabenö ja̧bökönö dö̧jijatö, Dios pjaatonö jweinö ja̧bö dö̧jijatö chömöledö. Ja̧danö, ja̧bö dö̧jinama ökwödöda waisanö omukwatöma ja̧dijökötö chömöledö, Diosda lȩlö̧jinö edö ökwödönö pjaatobetjö̧, otiwanö ja̧bö dö̧jijatö chömöledö. Jejenö yötawaja̧ma, jweinö yötawa chömöledö, ja̧danö chomajadenö chöwaisa, isabenö yötawa jö̧ba̧lö.

2 Corintios 11:6

Ju'wedö ötjönö yötja̧lena, Aaa, Pabloma jojodö tjösödachibanö yöawakwawama otiwanö yöbawö̧kö̧ jö̧ba̧lö, jo̧kwaijayonö baikwö yötawaduwakwö, ju'wedö jojodö tjösödachibanö yöbawadö yötjawi̧danö yötawököjayonö, waisakwawa jawama isabenö waisanö yöbawo̧sa chömöledö, ja̧danö isabenö öwaetjöda i̧sebiachinobe ökwödönö chömöledö, waisakwawa waiso̧ chö̧ji̧ma.

2 Corintios 2:14

Jau chömöledö, ökwödönö cha̧ja̧kwokobetjö̧ cho̧'wo̧ tjo̧achijatö. Jo̧kwaijayonö, cho̧'wo̧ tjo̧achijayonö, Diosma otiwanö pjaatinobe chömöledö, ja̧danö jo̧banö chösödobe, ba̧kwȩlö̧jatebö ujuluwobetjö̧. Ja̧danö wanedö yötawa: Guardia la'aka luwo̧danö, Diosma ökwödönö öbibö Cristo jawa wene öpöjödadönö dujuluwobö pjabato̧, ja̧danö ökwödönötjö böjȩ bakwameachibanö jojodö Cristo jawa wene tjöwaisobö pjabato̧.

2 Corintios 6:6

Jejenö usula demawijayonö, sulabenö ja̧bökönö dö̧jobe, ja̧danö ju'wibi Dios iyi̧ waisakwawa di̧sebobe, ja̧danö ju'wibi do̧'wo̧ 'dibachibö dösölö̧jinö ja̧bö dö̧jobe chömöledö, isabenö Dios ömöayedösa jö̧ba̧lö. Ja̧danö ju'wibi, Dios O̧'wo̧ Luwo̧ do̧'wo̧ luwo̧nö ö̧ji̧ma i̧sebobe Dios ömöayedö dö̧ji̧ma, ja̧danö ju'wibi isabenö jojodönö ösödabikwawö ja̧nö di̧sebobe, isabenö Dios ömöayedösa jö̧ba̧lö.

2 Corintios 8:7

Jau chömöledö, ida̧ökö otiwanö Dios yöawi̧ ösödadöja, ja̧danö ju'wibi ida̧ökö otiwanö yöbawadöja, ja̧danö ju'wibi ida̧ökö otiwanö waisakwawa waisadöja, ja̧danö ju'wibi ida̧ökö jwaikwöda Jesús jawa otidadöja, ja̧danö ju'wibi ida̧ökö ökwödönö otiwanö ösödadöja chömöledö. Jejenö ida̧ökö otiwanö ja̧bö ju̧kwadöja chömöledö, jo̧kwaijayonö jenadama kakataduwobömaökö. Jau chömöledö, jemi bajalekwönönö ju'wibi otiwanö lȩlö̧jinö iyö pjabatadö bakibaduwobö chösöda chömöledö.