Zaarettido Wogaa 31:6 - Wolaytta Bible

⁶ Minnite; aikko baawa; yayyoppite. Eta be7idi dagammoppite. Aissi giikko, GODAI intte Xoossai inttenaara gidana. I inttena yeggenna woikko aggenna” yaagiis.

Zaarettido Wogaa 31:6 ပူးပေါင်းရင်းမြစ်များ

Doomettaabaa 26:24

He biido gallassi qammikka GODAI ayyo qonccidi a, “Taani ne aawaa Abrahaama Xoossaa; taani nenaara de7iyo gishshau, neeni yayyoppa; taani nena anjjana; ta ashkkaraa Abrahaama gishshau ne zerettaa taani corayana” yaagiis.

Doomettaabaa 28:15

Taani nenaara de7ais; neeni biyoosa ubban taani nena naagana; qassi taani nena ha biitti guyye zaarada ehaana; taani neeyyo oottana giidoogaa oottana gakkanaassi nena yeggikke” yaagiis.

Sameela Maxaafaa Naa77anttuwaa 10:12

Simmi minna! Nu asaa gishshaunne nu Xoossaa katamatu gishshau, ane minni olettoos. GODAI bana lo77iyaabaa ootto” yaagiis.

Kawotu Maxaafaa Koiruwaa 2:2

“Taani haiqqiyo wodee matiis. Hegaa gishshau, minna; yeeqenna asa gida.

Kawotu Maxaafaa Koiruwaa 6:13

Yaatada taani Israa7eela asaa giddon de7ana; taani ta asaa Israa7eela aggikke” yaagiis.

Kawotu Maxaafaa Koiruwaa 8:57

GODAI nu Xoossai kase nu aawatuura de7idoogaadan, nunaarakka de7o; i nuna mulekka aggoppo woikko yeggoppo.

Hanidabaa Odiya Koiro Maxaafaa 22:13

GODAI Muuse baggaara Israa7eela azazido azazuwaanne wogaa naagiyaabaa gidikko, ubbai neeyyo hanana. Aikko baa minna! Yayyoppa woikko dagammoppa!

Hanidabaa Odiya Koiro Maxaafaa 28:10

Ha77ikka Beeta Maqidasiyaa keexxanau GODAI nena dooridoogaa dogoppa. Minnada oosuwaa ootta” yaagiis.

Hanidabaa Odiya Koiro Maxaafaa 28:20

Hegaappe guyyiyan, Daawiti ba na7aa Solomona, “Aikko baa; minna! Oosuwaa ootta! GODAI Xoossai, ta Xoossai nenaara de7iyo gishshau, yayyoppa; dagammoppa! GODAA Beeta Maqidasiyaa oosoi polettana gakkanaashin, Xoossai nena yeggennanne aggenna.

Hanidabaa Odiya Naa77antto Maxaafaa 32:7

“Hayyanintta minnite! Asoore kawuwaara de7iyaagaappe nunaara de7iyaagee aadhdhees. Hegaa gishshau, Asoore kawuwaayyoonne aara de7iya daro olanchchatuyyo yayyoppite! Dagammoppite!

Mazamure Maxaafaa 27:1

GODAI taayyo poo7onne tana ashshiyaagaa; yaatin, taani ooyyo yayyanee? GODAI ta de7oi naagettiyo miixaa; yaatin, taani ooyyo dagammanee?

Mazamure Maxaafaa 27:14

GODAN ufaissaa wotta; minnadanne wozannaamada, GODAN ufaissaa wotta.

Mazamure Maxaafaa 94:14

Xoossai ba asaa yeggenna; i baageeta aggenna.

Isiyaasa 41:10

Taani nenaara de7iyo gishshau yayyoppa; taani ne Xoossaa gidiyo gishshau dagammoppa. Taani nena minttana; qassi taani nena maaddana. Taani nena ta xooniya ushachcha kushiyan kaafada oiqqana.

Isiyaasa 51:12

GODAI hagaadan yaagees; “Inttena minttettiyaagee tana. Yaatin, haiqqiya asau yayyanau, maatadan eesuwan meliya asaa na7au yayyanau intte oonee?

Ermmaasa 1:8

Etau yayyoppa. Aissi giikko, taani nena ashshanau nenaara issippe de7ana. Taani GODAI hagaa odaas” yaagiis.

Ermmaasa 32:40

Taani etaara merinau maachchaa maacettana. He maachchan taani etayyo lo77obaa oottiyoogaa aggikke; eti taappe wora simmenna mala, taani eti taayyo yayyanaadan oottana.

Hagge 2:4

“'Gidikkonne, Zarubaabeelaa, ha77i minna! Taani GODAI hagaa odais. Yoxedeeqa na7au, qeese ubbatu halaqau Yaasuu, neenikka minna! Biittan de7iya asa ubbau, inttekka minnite! Minnidi oottite; aissi giikko, taani inttenaara de7ais. Taani Ubbaappe Wolqqaama GODAI hagaa odais.

Zakkaariyaasa 8:13

Inttenoo Yihudaa asatoo, inttenoo Israa7eela asatoo, kawotettatu giddon intte qanggettidaageeta gididi de7ideta; shin ha77i taani inttena ashshana; inttekka anjjettidaageeta gidana. Yayyoppite! Intte kushiyaakka minttite!” yaagees.

Qoodaabaa 13:20

biittai ai mala araddakko ladakko, he biittan mitti de7iyaakko bainnaakko be7ite. Minnite! He biittan mokkidabaa aifiyaappe ekkennan yooppite” yaagiis. He wodee woine turai koiro aifiyaa aifiyo wode.

Qoodaabaa 13:9

Biniyaama Raafu na7aa Palxxa

Qoodaabaa 14:9

Hegaa gishshau, GODAA bolli makkala makkaloppite. He biittaa asau yayyoppite; eti nuuyyo haatta ushshakka gakkokkona. Etau ambboomiyaabi baawa; shin GODAI nunaara de7ees. Intte etayyo yayyoppite!” yaagidosona.

Luqaasa 12:32

“Amarida dorssa wudiyau, intte Aawai ba kawotettaa inttessi immanau ufaittiyo gishshau yayyoppite.

Koiro Qoronttoosa 16:13

Tishshi giite. Ammanuwan minnite. Xalite. Minnite.

Efisoona 6:10

Wurssettan, Godaaninne a gita wolqqan minnite.

Zaarettido Wogaa 1:21

Be7ite, GODAI intte Xoossai ha biittaa intteyyo immiis. GODAI intte aawatu Xoossai intteyyo odidoogaadan kiyidi, ha biittaa laattite; yayyoppite; ufaissaa qanxxoppite' yaagaas.

Zaarettido Wogaa 1:29

“Hegaappe guyyiyan, taani hagaadan yaagaas; 'Etau yayyoppite woikko shabbirettoppite.

Zaarettido Wogaa 11:8

“Hegaa gishshau, intte mino gidanaadaaninne Yorddaanoosa pinnidi intte ekkanau biyo biittaa intte laattanaadan, taani hachchi inttena azaziyo azazuwaa ubbaa naagite.

Zaarettido Wogaa 20:1

“Intte morkkiyaara olettanau biyo wode, eta parati, paraa gaaretinne eta olanchchati intteppe darin be7idi, etau yayyoppite; aissi giikko, inttena Gibxxeppe kessida GODAI intte Xoossai inttenaara de7ees.

Zaarettido Wogaa 31:23

Hegaappe guyyiyan, GODAI Nawe na7aa Yaasa hagaadan yaagidi azaziis; “Minna, aikko baawa; taani etau immanau qaalaa gelido biittaa Israa7eela asaa efaada gelissaasa. Taanikka nenaara issippe gidana” yaagiis.

Zaarettido Wogaa 31:7

Hegaappe guyyiyan, Muusee Yaasa xeesidi, Israa7eela asaa ubbaa sinttan hegaadan yaagiis, “Minna; minna; aikko baawa. Aissi giikko, neeni ha asaara issippe GODAI eta maizza aawatuyyo immana giidi caaqqido biittaa gelaasa; he biittaakka eta laatissaasa.

Zaarettido Wogaa 31:8

I GODAI ba huuphen nenaara gididi nena kaalettana. I nena olenna; ainnekka nena aggenna. Hegaa gishshau, yayyoppa; ne wozanan dagammoppa” yaagiis.

Zaarettido Wogaa 4:31

GODAI intte Xoossai maarotettan kumida Xoossaa gidiyo gishshau, i inttena aggenna; woikko xaissenna; intte aawatussi i caaqqido maachchaakka dogenna.

Zaarettido Wogaa 7:18

SHin etayyo yayyoppite. GODAI, intte Xoossai, Gibxxe kawuwaa bollinne Gibxxe biittaa ubbaa bolli oottidoogaa hassayite.

Naa77antto Ximootiyoosa 2:1

Simmi ta na7au, Kiristtoos Yesuusan de7iya aaro kehatettan minna.

Ibraawe 13:5

Miishsha siiqoppe inttena naagite; intteyyo de7iyaagee intteyyo gido. Aissi giikko, Xoossai ba huuphen, “Taani nena mulekka yeggikke woikko aggikke” yaagiis.

Yaasu Maxaafaa 1:9

Minna; xala! Ne biyo soho ubban taani GODAI ne Xoossai nenaara de7iyo gishshau, yayyoppa! Hirggoppa! Hagaa ubbaa taani nena azazaas” yaagiis.

Yaasu Maxaafaa 10:25

Yaatin, Yaasu eta, “Yayyoppite; hirggoppite; minnitenne xalite. Intte olettiyo intte morkketa ubbaa GODAI hagaadan oottana” yaagiis.

Ajjuutaa 21:8

SHin yayyiyaageeti, ammanennaageeti, tunati, shemppo woriyaageeti, shaaramuxiyaageeti, bitiyaageeti, eeqassi goinniyaageetinne worddotiyaageeti ubbai de7iyo sohoi tamainne dinnee eexxiyo abbaa gidana. Hegee naa77antto haiqo” yaagiis.

Sameela Maxaafaa Koiruwaa 12:22

GODAI ba gita sunttaa gishshau ba asaa aggenna; aissi giikko, i inttena ba asa oottanau ufaittees.