Zaarettido Wogaa 20:1 - Wolaytta Bible

¹ “Intte morkkiyaara olettanau biyo wode, eta parati, paraa gaaretinne eta olanchchati intteppe darin be7idi, etau yayyoppite; aissi giikko, inttena Gibxxeppe kessida GODAI intte Xoossai inttenaara de7ees.

Zaarettido Wogaa 20:1 ပူးပေါင်းရင်းမြစ်များ

Doomettaabaa 26:3

Ha biittan amaridaagaa takkashsha; taani nenaara gidana; nena anjjana; aissi giikko, ha biittaa ubbaa taani neeyyoonne ne zerettaayyo immana; taani ne aawaa Abrahaamayyo caaqqido caaquwaa minttana.

Hanidabaa Odiya Naa77antto Maxaafaa 14:10

Gakkin Asikka aara olettanau kiyiis; kiyidi ba olanchchata Mareesha matan de7iya Xafaata Wombban salppissiis.

Hanidabaa Odiya Naa77antto Maxaafaa 14:11

Hegaappe guyyiyan, Asi GODAA ba Xoossaa woossidi, “Abeet GODAU, wolqqi bainna olanchchati wolqqaama olanchchata xoonanaadan maaddiyai neeppe attin, harai baawa! Abeet GODAU, nu Xoossau, nuuni nenan ammanettidi, ha cora olanchchatuura ne sunttan olettanau yiido gishshau, neeni nuna maadda. Abeet GODAU, neeni nu Xoossaa; nena asi xoonenna” yaagiis.

Hanidabaa Odiya Naa77antto Maxaafaa 20:12

Abeet nu Xoossau, neeni eta bolli pirddikkii? Aissi giikko, nuna olanau yiida ha daro olanchchatuura olettanau nuuyyo wolqqi baawa. Nuuni oottanabaakka erokko; shin nu aifeti nena xeelloosona” yaagiis.

Hanidabaa Odiya Naa77antto Maxaafaa 20:15

GODAA Ayyaanai Yahaazi7eela bolli wodhdhin, hagaadan yaagiis; “Kawuwau Yoosaafixaa, Yihudaaninne Yerusalaamen de7iya asau, ubbaikka siyite! GODAI inttena hagaadan yaagees; 'Ha daro olanchchatu gaasuwan yayyoppitenne dagammoppite. Aissi giikko, olai Xoossaagaappe attin, intteegaa gidenna.

Mazamure Maxaafaa 118:6

GODAI tanaara de7iyo gishshau, taani yayyikke. Asi tana ai oottii?

Mazamure Maxaafaa 20:7

Issooti issooti bantta ola parai goochchiyo gaariyan, harati bantta paran ceeqettoosona; shin nuuni GODAA nu Xoossaa wolqqan ceeqettoos.

Mazamure Maxaafaa 23:4

Neeni ta GODAI tanaara de7iyo gishshau, taani haiquwaa milatiya xumaa giddoora biikkokka, iitabau yayyikke. Ne gatimainne ne guufee tana minttettoosona.

Mazamure Maxaafaa 46:11

Ubbaappe Wolqqaama GODAI nunaara de7ees; Yaaqooba Xoossai nuuni qosetti attiyo soho.

Mazamure Maxaafaa 46:7

Ubbaappe Wolqqaama GODAI nunaara de7ees; Yaaqooba Xoossai nuuni qosetti attiyo soho.

Mazamure Maxaafaa 46:8

Haa yiite; GODAA oosuwaa xeellite; i sa7an oottido garamissiya malaataa be7ite.

Kessaabaa 20:2

“Nena Gibxxeppe ailletettaa biittaappe kessida GODAI ne Xoossai tanattennee.

Isiyaasa 31:1

Maaduwaa koyanau duge Gibxxe wodhdhiyaageetussinne paran ammanettiyaageetussi aayye7ana! Cora gidiyo gishshau paraa gaaretun, daroppe mino gidiyo gishshau paraasatun ammanettiyaageetussi aayye7ana! Eti Israa7eela Geeshshaakko xeellokkona; woikko GODAAPPE maaduwaa koyokkona.

Isiyaasa 41:10

Taani nenaara de7iyo gishshau yayyoppa; taani ne Xoossaa gidiyo gishshau dagammoppa. Taani nena minttana; qassi taani nena maaddana. Taani nena ta xooniya ushachcha kushiyan kaafada oiqqana.

Isiyaasa 43:2

Neeni haattaa gidduwaara pinniyo wode, taani nenaara gidana. Neeni shaafatu gidduwaara pinniyo wodekka eti nena muukkokkona. Neeni tamaa giddoora aadhdhiyo wode, xuugettakka; lacoikka nena meenna.

Isiyaasa 7:14

Yaatikko, Godai ba huuphen intteyyo malaataa immana; geela7iyaa shahaarada attuma na7aa yelana; a sunttaakka “Amaanu7eela” yaagada sunttana.

Ermmaasa 16:14

GODAI hagaadan yaagees; “'Israa7eela asaa Gibxxe biittaappe kessida GODAI ero' yaagidi caaqqiyoogaa asai aggidi, 'Israa7eela asaa huuphessa bagga biittaappenne eta i laalido biittatu ubbaappe zaaridi ehiida GODAI ero' yaagidi caaqqana gallassai yaana. Aissi giikko, taani eta kase eta aawatussi immido buzo biittaa zaarada ehaana” yaagees.

Zakkaariyaasa 10:5

Bantta morkketa ogiyaa urqqaara gattidi yedhdhiya mino olanchchatu mala gidana; GODAI etaara de7iyo gishshau, eti olettana; olettidi paraasatakka xoonana.

Qoodaabaa 10:9

“Intte biittan woraajjiya intte morkkiyaara intte olettanau kiyiyo wode, he xurumbbata xoqqu oottidi punnite. Hegan GODAI intte Xoossai inttena he wode hassayidi, intte morkkiyaappe inttena ashshana.

Qoodaabaa 23:21

Yaaqooba zariyau iitabi yaanabi, Israa7eela asau metoi gakkanabi taayyo beettibeenna. GODAI eta Xoossai etaara de7ees; i etau kawo gidiyoogaa awaajjoosona.

Roome 8:31

Yaatin, nuuni hagaa ubbaa woiganee? Xoossai nu bagga gidikko, nuna oonee qohanai?

Zaarettido Wogaa 1:29

“Hegaappe guyyiyan, taani hagaadan yaagaas; 'Etau yayyoppite woikko shabbirettoppite.

Zaarettido Wogaa 2:7

“GODAI intte Xoossai intte oottidobaa ubbaa anjjiis; intte ha gooba bazzuwan hemettiyo wode, inttena naagiis. Ha oitamu laitta ubban GODAI intte Xoossai inttenaara de7iis. Aibanne intteyyo pacissibeenna.

Zaarettido Wogaa 20:2

Intte olaa doommanaappe kasetidi, qeesee sinttau aadhdhidi hagaadan yaago;

Zaarettido Wogaa 20:3

'Inttenoo Israa7eela asatoo, siyite; intte hachchi intte morkkiyaara olettanau haneeta. Simmi intte wozanai dagammoppo; yayyoppite; eta sinttan kokkoroppitenne shabbirettoppite.

Zaarettido Wogaa 31:6

Minnite; aikko baawa; yayyoppite. Eta be7idi dagammoppite. Aissi giikko, GODAI intte Xoossai inttenaara gidana. I inttena yeggenna woikko aggenna” yaagiis.

Zaarettido Wogaa 31:8

I GODAI ba huuphen nenaara gididi nena kaalettana. I nena olenna; ainnekka nena aggenna. Hegaa gishshau, yayyoppa; ne wozanan dagammoppa” yaagiis.

Zaarettido Wogaa 7:1

“GODAI intte Xoossai intte laattanau biyo biittaa inttena gelissiyo wodenne, qassi intteppe wolqqaamiyaanne minniya laappun kawotettata, hegeetikka Hiiteta, Gerggeeseta, Amooreta, Kanaaneta, Parzzeta, Hiiwetanne Yaabuusata intte sinttappe xoqolliyo wode,

Zaarettido Wogaa 7:18

SHin etayyo yayyoppite. GODAI, intte Xoossai, Gibxxe kawuwaa bollinne Gibxxe biittaa ubbaa bolli oottidoogaa hassayite.

Zaarettido Wogaa 7:21

“Hegaa gishshau, intte etayyo yayyoppite; aissi giikko, inttenaara de7iya GODAI, intte Xoossai, gitanne yashshiya Xoossaa.

Zaarettido Wogaa 9:3

SHin miya tamadan intteppe sinttaara biyaagee GODAA intte Xoossaa gidiyoogaa hachchi erite. I eta xaissananne intte sinttan eta kaushshana. GODAI intteyyo giidoogaadan intte eta yedettidi kessananne sohuwaarakka xaissana.

Yaasu Maxaafaa 1:5

Neeni de7ido laitta ubban ai asinne nena olidi teqqenna. Taani Muuseera gididoogaadan, nenaarakka gidana; taani nena mulekka yeggikkenne aggikke.

Yaasu Maxaafaa 1:9

Minna; xala! Ne biyo soho ubban taani GODAI ne Xoossai nenaara de7iyo gishshau, yayyoppa! Hirggoppa! Hagaa ubbaa taani nena azazaas” yaagiis.

Yaasu Maxaafaa 11:9

Yaasu GODAI a azazidobaa ubbaa eta bollan poliis; eta paratakka gilddayiis; eta paraa gaaretakka taman xuuggiis.

Daannatu Maxaafaa 6:12

Hegan GODAA kiitanchchai ayyo beettidi, “Laa nenoo, mino olanchchau, GODAI nenaara de7ees” yaagiis.

Daannatu Maxaafaa 6:16

Zaarin GODAI, “Tumuppe taani nenaara gidana; issi asa shociyoogaadan, neeni Midiyaama asaa shocada xoonana” yaagiis.

Sameela Maxaafaa Koiruwaa 17:32

Daawiti Saa7oola, “Ha bitaniyaa gaasuwan o wozanaikka maashoppo; taani ne ashkkarai baada, ha Pilisxxeemiyaara olettana” yaagiis.