Hanidabaa Odiya Naa77antto Maxaafaa 28:9 - Wolaytta Bible

⁹ GODAA sunttan hananabaa yootiya Odeeda giyo issi bitanee Samaariyan de7ees. Odeedi Samaariyaa yiya olanchchatuura gaittanau kiyidi, hagaadan yaagiis; “Be7ite, GODAI, intte aawatu Xoossai Yihudaa hanqqettido gishshau, intte kushiyan aatti immiis. SHin inttekka saluwaa gakkida hanqquwan eta siifideta.

Hanidabaa Odiya Naa77antto Maxaafaa 28:9 ပူးပေါင်းရင်းမြစ်များ

Doomettaabaa 11:4

ekkidi, “Haayite; nu sunttaa xeesissanaunne qassi nuuni ha sa7aa ubbaa bollan laalettennan attanau issi gita katamaanne xeerai saluwaa gakkiyo issi pooqiyaa nuuyyo keexxoos” yaagidosona.

Doomettaabaa 4:10

Yaagin GODAI Qaayeela, “Hagaa aissi oottadii? Be7a; ne ishaa suuttai biittaappe taakko waassees.

Kawotu Maxaafaa Koiruwaa 20:13

He wode hananabaa yootiya issi bitanee Israa7eela Kawuwaa Akaabakko yiidi, “GODAI nena hagaadan yaagees; 'Ha kenchcho olanchchata ubbaa be7ai? Taani hachchi eta ne kushiyan aattada immana; immobare taani GODAA gidiyoogaa neeni hegan erana' yaagees” yaagiis.

Kawotu Maxaafaa Koiruwaa 20:22

Hegaappe guyyiyan hananabaa yootiyaagee Israa7eela kawuwaakko yiidi, “Ba; baada ne baggaa mintta. Minttada, oosettanau bessiyaabi aibakko akeeka. Aissi giikko, yiya laitti bone Sooriyaa kawoi nena naa77anttuwaakka olana” yaagiis.

Kawotu Maxaafaa Koiruwaa 20:42

Hananabaa yootiyaagee kawuwaayyo, “GODAI, 'Taani, “I haiqqana bessees” giido bitaniyaa neeni yedda aggadasa. Hegaa gishshau, ne shemppoi a shemppuwaara gada; ne asai a asaara gada' yaagees” yaagiis.

Hanidabaa Odiya Koiro Maxaafaa 21:13

Daawiti Gaada, “Taani keehippe un77ettaas. GODAA maarotai keehi gita gidiyo gishshau, ane taani a kushiyan kunddana; taani asa kushiyan kunddikke” yaagiis.

Hanidabaa Odiya Naa77antto Maxaafaa 28:5

Hegaa gishshau, GODAI a Xoossai a Sooriyaa kawuwaa kushiyan aatti immiis. Immin eti a xoonidi, a asaappe daro asaa omooddidi, Damasqqo efiidosona. Qassikka GODAI a Israa7eela kawuwaa kushiyau aatti immin, kawoi iita shochchaa shociis.

Izira Maxaafaa 9:6

“Abeet ta Xoossau, taani ta sinttaa neekko pude denttanaukka yayyaisinne yeellatais; aissi giikko, nu nagarai doorettidi, nu huuphiyaappe pude aadhdhiis; nu naaqoikka saluwaa gakkiis.

Mazamure Maxaafaa 69:26

Aissi giikko, eti neeni qaxxayidoogeeta yedettoosona; qassi neeni dechchidoogeetu tuggaabaa denttidi haasayoosona.

Isiyaasa 47:6

Taani ta asaa hanqqettaas; ta laataakka tunissaas; taani eta ne kushiyan aattada immaas. Neeni etau qarettabaakka; cimidaageetu bollankka ne qambbaraa keehi deexettadasa.

Yoonaasa 1:2

“Dendda! Denddada he gita katamaa Nanawe ba; baada he katamaa asaa iitatettai ta sintti gakkido gishshau, etayyo markkatta” yaagiis.

Zakkaariyaasa 1:15

Taani Aihuda gidenna kawotettatu bolli guuttaa hanqqettaas; shin ha77i eta bolli daro hanqqettaas. Aissi giikko, eti ishaluwan uttidi, Aihudatu tuggaa darissidosona.

Ajjuutaa 18:5

Aissi giikko, i nagarai saluwaa gakkanau dooretti uttiis. Xoossai i iita mooruwaa hassayiis.

Daannatu Maxaafaa 3:8

Hegaa gishshau, GODAA hanqqoi Israa7eela asaa bolli eexxi kiyiis; yaatin, GODAI Masphphexoomiyaa biittaa Kawuwaa Kushaani-Rish77ataima kushiyan eta aattidi immiis; immin eti ayyo hosppun laittaa haarettidosona.