Wamu Jonda Mia Kake Matakut San 5:9 - Wantoat

⁹ Siwan wa aminda kau kayuu takngatu sipsip mateu wagwende anzing taingamuking, “Ninda ga gandupna take singgakge gata pepa wagomu take tapsa. Takenga gata gatak gatau take dauya. Dasingge? Aminda ga gwa guwa kumbuyak. Kungwake dakga tukngwakuyak kakngata aminbamu waiakngane sandewan wa aminda Anututane amina dakngake yuaing. Ngan. Gata aminu kwaapzang pasiwi aminu dongu kuupbapat nana kunduta Anututane amina dakngake yuaing. Siakan. Aminu wamna inata inata yakaing gatu gupna inata inata gatu kepna inata inata ngangu kuut kundukan gata pasiwi itane amina dakngake yuaing.

Wamu Jonda Mia Kake Matakut San 5:9 ပူးပေါင်းရင်းမြစ်များ

Lotutane Kap Taknga 144:9

Anutu, apman nata kau kayuu takngatu tangenake tainanggenggat. Kau wa taiwiu gita tanguke gae taiwit.

Lotutane Kap Taknga 149:1

Buyambam tapatane umana yatangenatnong. Ginda ie kau kayuk taknga aknga tainong. Taike amin asingganu unin tawakaing aminun, ginda itane umana gaak inikaing tapduk komune initangenatnong.

Lotutane Kap Taknga 33:3

Taike kau kayuk takngatu ie tainong. Taike gita tanguke kau noman nomana siknga taiyuuk ie apbakngake kumzang siknga tainong.

Lotutane Kap Taknga 40:3

Siwan gatu ita kau kayuu takngatu taiwitde nanikut. Kau waaknga Anutu ninda banip sikamang kapae umana yatangenatnanga. Siwan nata kau waaknga taiwa aminbamda na nanduke akgwauke Anutue banip sining.

Lotutane Kap Taknga 96:1

Ginda kau kayuk kaknga aknga Buyambam tapae tainong. Ginu kepna kepna nana aminu kuupbam sikngata Buyambam tapae kau tainong.

Lotutane Kap Taknga 98:1

Ninda kau kayuu takngatu Buyambam tapae tainim. Dasingge, ita duya inata inata take siknga pasinggak. Pasike inane kekekngana buyambamu yuyuknga takwan takngane tasike ita amau ayapbikgak.

Matyu 20:28

Na aminbamdane notnaapaaya unzakan. Nata apa aminda nae puya pasingamuningge dua apbum. Wena. Apuke puya tasike amin gatayamunangge apbum. Apuke kungwayamit takngata iwana zipmake yawamba kuwa aminbam sandeke papitde apbum,” ngang ninikut.

Matyu 26:28

Sanga wa natane daknga. Nata kungwake daknga tungwaba Anututa wamu kwikwiknga kayuk kaknga yawan kekekawik. Nata kungwake daknga tukngwaba Anututa banip zikaa akngana tapan tekwamban aminbamdane waiakngana sandeyamikge tukngwambit.

Aposel 20:28

Ge ginda gisae katak tagwautnong. Tagwauke aminu kundu Anutue Waung Kapata papan aminabam dakngaking aminu sipsip binga toitnong. Aminu waakwau Jesuta kungwake daknga tukngawanggut takngata gatayaman itane aminabam dakngake yuaingu katak toitnong.

1 Korin 6:20

Aho. Aminda sanga manita usikuu ita inae tapik. Ina unzakan Anututa ginu inae papan ginda itane amina nomana siknga dakngake yuaing. Unzingge ginda sanga itane umana yatangenatnanga aknga tawake tasinong.

1 Korin 7:23

Siwan aminda sanga manita usikuu ita inae tapik. Ina unzakan Anututa ginu inane panangge natake yawan Jesuta ninde tangge kungwanimukutde ginda itane amina dakngake yuaing. Unzingge ginda dua katewa sanga kepdakane nana akngata Anututane katakngine ginu kaiwan kuning.

Efesas 1:7

Siwan Jesu waapata ninde butaya siknga natanimuke ita ninde tangge kungwanimukut. Unzingge Anututa ninde musip kwikwik nataniman buyambam siknga sikut. Siwan ita nindane waiaknganin sandetnimukut.

Efesas 5:19

Kaipakuwawan ginda notzae yaninangge natakengu miti kapde wamu takngatu takngatue natake yaninong. Yanike Buyambam tapaninde inimbakngake ginda miti kap tainong.

Kolosi 1:14

Ngan. Itane waaknga waapata ina gatanimuke nindane waiaknganin sandetniman yuamang.

Kolosi 1:23

Tanguwan kumbutde ginda Jesue banip sike itane wamu takeaknga gitna siknga take yutnong. Yuke ginda wamu take waaknga natake Anututa ninu apme gatanimik ngang natake natayuaing kaknga ma tewam. Ginda aminu tapatu dua katewa ita gindane natdetdetza dua kaipakuwan tening. Wena. Ginda atewanu asikaya Jesuta gin danipakuke Anututane nomune pewan gitna yutning ba dasing? Wena. Siwan wamu take waakngata kepna kepna kuupbam tawamban sandekut. Ngan. Na Pol. Anututa na tapan nata wamu waakngakan yanikapitde takut.

Taitus 2:14

Siwan Jesu waapata ninde natake nin papan itane aminabam dakngake kepi nomana akngane iaknga siknga natake sukunimde natake ita ninde tangge kungwanimukut. Ita ninu waiaknganinde gepbiatang yukumang kaknga sandetnimikge kepi tasinimunangge kungwanimukut.

Hibru 11:14

Sike wamu aminu waakwakga yakingu wa ninda natake wa aminda inane kepna siknga tanangge yakaing ngang natapnim.

2 Pita 2:1

Siakan ngana tupa siknga aminu kunduta Isrel nana aminde banakan enaking. Enake Anututane siakan wam taknga teke kem wam taknga yanindamuking. Ina unzakan aminu kunduta ginde banakan enake gikaya kuut kem wam taknga danindamutnangge tasining. Buyambam tapaninda wa amindane waiakngana gwa sandewan yangga aminu gwa dakngaking ngana tapa tekwamban wa aminda akusopuke kem wamu inata inata gindane natdetdetza pasiwan mainanga aknga tangenatning. Tangenake Buyambam tapaninde masa asimuke kem wam taknga danindamutning. Wa aminu masande Anututa pasiwan zetgaman wai sining.

1 Jon 1:7

Siwan Anutu kakaa akngatane yapii. Siwan ninda kakaa akngane sukukengu ninda musipminu takngatukan natake ninu kuupbamda notna notna dakngake yutnim. Dakngake yuwatna Anututane waaknga Jesuta ninde tangge kungwanimuke daknga tukngwakut takngata nindane waiaknganinu kuupbam sandetnimunggak. Sandetniman kepi nomana akngane sukunim.

1 Jon 2:2

Ita ninu itane aminabamdane waiaknganikat gatu aminu kuupbamdane waiaknganaatde wam yatapan takanggak kapa dakngake yuak.

Wamu Jonda Mia Kake Matakut San 10:11

Sike nata nataawa wamu takngatu anzing nanikut, “Gata Anutue wam natake gatuka yanikapso. Ngan. Sangabamu aminu dongu takngatu takngatu kepna kepna nana wamna inata inata yakaing amin gatu wa amindane take aminu kwaapzang ngangge apik kakngae natake yakapso,” ngang naniwan natapbum.

Wamu Jonda Mia Kake Matakut San 11:9

Sike aminu kwaapzangu kepna kepna nana gupna inata inata wamna inata inata yakaingu dongu inata nana aminda apuke aminu waapaatdane gupna saat katasike notnata dua kwainingge yandakngake yuwawa kuku tapduu gweaat gwenduat gatu kautdukan ngang siwik.

Wamu Jonda Mia Kake Matakut San 13:7

Siwan Anututa kaapzongu wagwenu katewan wagwenda amau Anututane aminabapat tasike wa amin yapbikut. Yapbike wagwenda tupan tapa dakngake aminu kuupbam kepna kepna nana dongu inata inata gatu wamna inata inata yakaingu gupna inata inata ngang papan aminu kuupbamda itane gepbiatang koyuking.

Wamu Jonda Mia Kake Matakut San 13:8

Siwan aminu kepdakane yuaingu kuupbamda kaapzongu wagwende tumuk wam iniking. Sike wa amindane umana tupa siknga tapduu Anututa sangabamu dua tasike tekut komune sipsip mateu masande aminda tanguwa kumbuu wagwendane buk gomune Anututa dua matakut. Aho. Buu wagomune aminu kayuu asinggan asinggan yutning amindane umanakan matakut.

Wamu Jonda Mia Kake Matakut San 14:6

Siwan nata mia kawawa angela tapatuta bepmake ena kakaa banakan komune kuwan kakum. Sike angela waapata wamu takeaknga Anututa yawan asinggan asinggan yuak kaknga take kukut. Sike aminu kepdakane yuaingu kuupbamu wamu waaknga yanikapikge kukut. Ngan. Aminu kepna kepna nana dongu inata inata gatu aminu wamna inata inata yakaingu gupna inata inata yuaingu kuupbamde yanikapikge kukut.

Wamu Jonda Mia Kake Matakut San 15:3

Pake wa aminda kau takngatu tupa siknga Mosesda Anututane puya amina dakngake itane aminabamu iwanae kataune sandekutde taikut binga taiking. Ngan. Kau wa sipsip mateu wagwenda wa aminu iwanae kataune sandekutde natake anzing taiking, “Buyambam tapaninu Anutu! Ga kekeknga sikngaapa! Puya kuupbam gata tasinggau wa take siknga. Ninda gatane puyakae nangaakan nataamang. Ga ninu aminu kuupbamdane tupan tapa. Kepi kuupbamu gata tasinggau wa noman siknga.

Wamu Jonda Mia Kake Matakut San 17:15

Sike nata mia kawawa angela waapata anzing nanikut “Maya waapata yangga buyambam tapaapane yuwan kayak. Sike yangga wa kayakgane yapii wa aminu kuupbam. Ngan. Aminu kepna kepna nana kuupbam donga inata inata nana gatu wamna inata inata yakaing gatu gupna inata inata ngangu aminu kepdakane nana kuupbamu unin.

Wamu Jonda Mia Kake Matakut San 4:11

“Ga nindane Buyambam tapanin. Ga nindane Anutunin. Ga nomana sikngaapa. Aminbamda gatane umanda take yatangenatning. Aminbamda gatane gepbiatang take koyutning. Dasingge? Gata sangabam tasike tekuyak. Gikae banipda siwan gata sangabam pasiwi aake ayuaing.” Sike wa aminda wamu wa unzing yawa natapbum.

Wamu Jonda Mia Kake Matakut San 5:12

Kau taike apaa siknga anzing taiking, “Sipsip mateu anggwenu tupa aminda atanguwa kumbutde ninu asiknga bakngakamang. Sipsip mateu anggwenda kekekngana kayaapa dakngawan kaamang. Anggwenda sangaapana kwaapzang papan kaamang. Gatu anggwenda natdetdeu buyambam siknga papan kaamang. Pake anggwenda kekeknga siknga yuwan kaamang. Yuwawan aminu kuupbamda anggwendane umana asiknga yatangenake ie inimbaknganing.”

Wamu Jonda Mia Kake Matakut San 5:6

Sike ita wamu waaknga naniwan natake nata laionu wagwen kanangge natapa ngana sipsip mateu gwenduta yuwan kakum. Kawa sipsip mateu wagwenu tupa aminda tanguwa kumbutna kakum. Sike sipsiu wagwenda gatuna gweake tupan sikngaapa gatu sanga kayuk yuaingu wa gweaat gweaat gatu take aminu waakwak ngangge banakan yuwan kakum. Sike sipsiu wagwendane komna katau kuut musa kautdu dakaaya. Siwan kaina kuut katau kuut musa kautdu gweaya ngang kakum. Sike kom dakandaka gatu kai gwegwendane yapii Anututane Waung Kapa unin. Waungu awia tapatukan ngana ita puya inata inata pasinggakge nata ie natapa waungu katau kuut musa kautdu tapaaya binga sikut. Siwan Anututa waungu waakwau yanipewan kepna kepna kuupbam kuwa sandekgaunin.