Nyɛ̀nɛ̀ŋ 3:20 - WƆŊ FƐ̀Ì EBÒ SÌÀŊ DAYÀA

²⁰ Sèè nìŋ nyɛnɛŋ yɛi, e teenga do nàŋ hnè nìŋ do nàŋ nyìmè kɛ̀ wo Kanaà Dayà kòò wò yààìŋ kìɛ̀ŋ sùà kpùùmaŋ, e kìlà ke ɗɔ̀ɔ̀ guùŋ wò do nàŋ tùɔ̀ŋ wo Kanaà Jisɛ̀, wo yèɔ wò naŋ naàŋ tàeɗùù tɛ wɔ̀, wo Kulaìɔ, wèè wo hiàŋ e jòèye e ɗuunyaàŋ e weèiŋ.

Nyɛ̀nɛ̀ŋ 3:20 ပူးပေါင်းရင်းမြစ်များ

Maafiù 16:27

Miàim wo Jɔ̀àfèlàà Nyuùŋ kpùnɔɔ̀ŋ do nàŋ hnè e teenga kpuu sùà e jòòwò Dèda miɔ̀ŋ yaà aŋ màikàuŋ nyàŋ sùà wèè ka kìɛ̀ŋ e jìwààjɛ̀wɛ̀ koɓɛ̀ anyùùŋ nyaŋ gbiŋ wèè maŋ keì maŋ àŋ naŋ nyɛ̀nɛ̀ŋ maŋ.

Maafiù 24:3

Nààŋ wo Jisɛ̀ jaa wa wɔŋ tòò maŋ Ɔlè Kùùɔ dìmɛ̀, anyùùŋ màŋjɛ̀wɛ̀uŋ nyàŋ naŋ hnè ko nɛ̀ɛ̀uŋ ke gbùnuo sùà, yèè àŋ nauŋ dawè nyààŋ, “Wòò wi e teengaà tɛɛ̀ do nàŋ kaaìŋ lɛ, yèè kiìŋ nàŋ do nàŋ nɔ̀ŋ e tɔ̀ɔ̀màŋseìɛ kɛ̀ e teengaà è haì wèè maŋ hnàŋ e kìlà e tɔɔ̀ kɛ̀ kuii nàŋ yaà ko dìà e ɗuunyaàŋ?”

Luù 19:11

Nààŋ àŋ yaà wa gbɛ̀ɛ̀ sùà ko Jùlusɛ̀làm, anyùùŋ nyaŋ kuwa wa wo Jisɛ̀ maŋjɛ̀wɛ naŋ kòmò maŋ kàɓanè maŋ wò yaà wa giiye màŋ, naŋ gongò kɛ̀ sèè wò haì wa nɔŋ ko Jùlusɛ̀làm fà wò nɔ̀ŋ wo kana nyiŋ nɔɔ̀ŋ.

Luù 21:27

Kpeiŋ anyùùŋ do nàŋ yɛ̀mɛ̀ miàim, wo Jɔ̀àfèlàà Nyuùŋ kpùnɔɔ̀ŋ mìŋ yaà hìnìè ke nyili fua sùà ko fùùiŋ e yìwìà e gaàŋ gbee yèè e gbolòùŋ.

Nyɛ̀nɛ̀ŋ 17:31

Wò jàà ke ɗɔɔ e ɓula wèè wo gbàì anyùùŋ nyaŋ gbiŋ e ɗuunyaàŋ e tɔ̀ɔ̀nyaàŋ sùà. Yèè wò naŋ tà wo Jisɛ̀ ke ɗùù wèè wo gbaì anyùùŋ nyaŋ weèuŋ. Wo Dayà wò wi kìɛ̀ŋ e tɔ̀ɔ̀nyààŋ e keì lɛɛ̀ yàwi nààŋ gbiŋ nààŋ wò naŋ gè wo Jisɛ̀ e fàa dìì.”

Nyɛ̀nɛ̀ŋ 3:19

Fèìŋ maŋ tùwo naanààiŋ màŋ jɛwɛ, Kpeiŋ, niŋ kìlà koɓɛ̀ Dayài, wèè wo juuyà maŋ jùumùiŋ màŋ hakɛ̀.

Nyɛ̀nɛ̀ŋ 3:21

Wo Jisɛ̀ do nàŋ jèè ko àìjɛnɛ̀ŋ e jèèsùà e teengaà e hnàŋ wèè manɛ̀ŋ maŋ gbiŋ nɔ̀ŋ bàne miŋ jɛ̀ì, màànààŋ nɔŋ wo Dayà naŋ wa gbùùyè aŋ kèèlà nɛɛmaŋ gɔuŋ nyàŋ sùà lɛ.

2Tɛsè 2:2

ke jii ɓɔ̀ kè diiyèiŋ nɔŋ fɔ̀ɔ̀yɔ̀ è gòngoiŋ nɛ̀ sùà ɔ̀ɔ̀ naŋ kùwìè màŋ jii sùlia, wèè è wòoɛ̀ kɛ̀ ke ɗɔ̀ɔ̀ Kanaà kè haì. Ɗɔɔ bà è yaà wɔ̀i e gòngo sùà è naŋ tɛɛ̀ woò e teengaà è yààìŋ fèe sùà maŋ mìè nyààŋ wɛ̀ijì, ɔ̀ɔ̀ è yààìŋ wòò ke mìè Dayà, ɔ̀ɔ̀ kɛ̀ è naiŋ sìngè wɔŋ fɛi sùà.

2Tɛsè 2:8

Kpeiŋ kɛ̀ wo Dayà do nàŋ fùlìè Wo Nyuùŋ pɔ̀ɔ̀ maŋ sàwàa, kɛɛ sèè wo Kanaà Jisɛ̀ hnàŋ, wò douŋ nàŋ jìwìè wɔŋ fòìɔ fòloùŋ nyààŋ wɔŋ, yèè e mɛ̀ɛ̀ŋ Kanaà, e dɛngò dɛngòiŋ nii euŋ pɔɔpɔ̀ɔ̀.

Hiɓu 9:28

E ɗèwè guùŋ nɛ sùà wo Dayà naŋ wa kìɛ̀ŋ wo Jisɛ̀ Kulaì e sùà guùŋ kpò wèè wo nɔ̀ŋ e nɛ̀ŋ saaà, yèè wò naŋ fɔ̀ e sùà guùŋ kpò wèè wo gùà maŋ jùùmù anyuùŋ zimgbe. Kɛɛ sèè wò hnàŋ ɓɛìŋ, e naàŋ ɓɛìŋ nɔ̀ŋ wèè wo gùà màŋ jùumù. Wò do nàŋ hnè wèè wo jòèyè anyùùŋ nyaŋ gbiŋ yàaùŋ fulie nyàŋ.

Maŋ kèì nyɛɛnɛŋ 1:7

Yɛ̀mɛìŋ, wo Jisɛ̀ yaà hinie ke nyili fuaà diɛŋ! Anyùùŋ nyaŋ gbiŋ douŋ nàŋ yɛmɛ̀, e kpùlìà anyùùŋ nyaŋ nauŋ jùwò e ɓula nyàŋ. Maŋ ziì maŋ gbiŋ e ɗuunyaàŋ do nàŋ nɔ̀ŋ ke nyowo sùà weèuŋ. Tɔɔɓaa yɛi è do nàŋ nɔ̀ŋ!