Nyɛ̀nɛ̀ŋ 17:23 - WƆŊ FƐ̀Ì EBÒ SÌÀŊ DAYÀA

²³ Yèè nààŋ mìŋ yaà weè kààìŋ ko jawa gbeeiŋ niìŋ yèè mìŋ yaà yɛ̀ɛ̀mɛ̀ manɛ̀ŋ maŋ nìŋ zoolà maŋ, mìŋ naŋ mɛ̀ɛ̀ŋ wɔŋ gbɛ̀gbɛ̀ zòòlo maŋ mìè mɛɛ̀ŋ sìngìà wuùŋ wààŋ, ‘Koɓɛ̀ wo Dayàa e nyimàiŋ wɔ.’ Nìŋ zoolà wo Dayà wɛɛ̀, kɛɛ niŋ nyimààŋ wuùŋ ngèè gbiŋ. Weètii mìŋ manaŋ kaiŋ wòò e kiiuŋ nɛ̀.

Nyɛ̀nɛ̀ŋ 17:23 ပူးပေါင်းရင်းမြစ်များ

Maafiù 15:9

E zòòlo nyiŋ nɛ̀ ko nɛ̀ɛ̀ŋ miìŋ è yaà wèè foo, esaɓù kɛ̀ àŋ kaà maŋ sàwà bànè nyuùŋkpùuŋ, e teenè mààŋ miiŋ nàŋ yaà maŋ sàwàim màŋ!’ ”

Jɔ̀ɔŋ 17:25

Dèdà tɔ̀ɔ̀nyaàaŋ, anyùùŋ nyaŋ e ɗuunyaŋ lɛɛ̀ aŋ nyiŋ mààùm. Kɛɛ miàŋ kàum nyìmàŋ, yèè anyùùŋ màŋjɛ̀wɛ̀im nyàŋ àŋ nyìmàŋ kɛ̀ muàŋ naim tùɔ̀ŋ.

Jɔ̀ɔŋ 17:3

Yèè wɔŋ nyiiŋ gèe gò jùàa nàŋ yaà, wèè aum nyìmàŋ kɛ̀ muàŋ nàŋ yaà wo Dàyà tɔ̀ɔ̀nyaàaŋ, yèè aŋ nyìmàŋ miàim wo Jisɛ̀ Kulaì, wo yèɔ mùŋ naŋ tùɔ̀ŋ wɔ.

Jɔ̀ɔŋ 4:22

Anyùùŋ nyaŋ e yìwìà ko Sàmilià aŋ nyimààŋ kɛ̀ ɓòò àŋ zoolà. Kɛɛ yàwi nààŋ Juùù nyaŋ èiŋ nyìmàŋ wo Dayàa è zoolàìŋ wɔ, yèè esaɓù wilɛ̀ sùà anyùùŋ nyaŋ gbiŋ e ɗuunyaàŋ àŋ do nàŋ jòèyè.

Jɔ̀ɔŋ 8:54

Wo Jisɛ̀ naŋ nyiŋ fasàì wààŋ, “Sèè ka tɛ̀nɛ̀ŋ miàŋ bi, è yaà wèè foo. Wo Dèda miɔ̀ŋ wuŋ bi nàŋ dɛɛkɛ̀ìm. Nìŋ naŋ woò kɛ̀ wuŋ nàŋ yaà wo Dayàiŋ nɔɔ̀ŋ,

Nyɛ̀nɛ̀ŋ 17:30

E teenga gɔuɛ̀ sùà, wo Dayà naŋ wa jùùyè anyùùŋ nyaŋ gbiŋ hakɛ̀ wèè tɛɛ̀, esaɓù kɛ̀ aŋ nyimààŋ wa kɛ̀ kiìŋ àŋ yaà wa nyinie. Kɛɛ wò naŋ naàŋ woò sààmɛ kɛ̀ wo nyùùŋ gbiŋ yèè koɓɛ̀ gbiŋ aŋ dangè maŋ tùwo naanààŋ nyiŋ màŋ yèè aŋ kìlà ko nɛ̀ɛ̀uŋ niìŋ.

Luùm 1:28

Nààŋ anyùùŋ nyɛɛ̀ŋ naŋ gè maŋhɛɛ wèè aŋ ngèè pɛɛ gòngò e kèè Dayàa, wò dangà wèè maŋ jìì kòmàŋ kàaɓì nyiŋ màŋ maŋ nyiŋ toomò. Weètii àŋ nyɛnɛŋ maŋ keì sàngè maŋ yè maŋ gò tɛɛwɛ̀ wèè aŋ nyɛ̀nɛ̀ŋ maŋ.

1 Kɔliìŋ 1:21

Wo Dayà e jiikɛ̀ɛ̀uŋ nɛ̀ sùà wò naŋ nyɛ̀nɛ̀ŋ e nyìngà wèè anyùùŋ auŋ nyìmàŋ, e yìwìà e jììkɛ̀ɛ̀ nyiŋ bi lɛ̀ sùà. Kɛɛ, wo Dayà naŋ ɗewè wèè wo nɔŋ jòèyè anyùùŋ nyaŋ naŋ hààwè ke mìè gbìàŋ ɓàaɓàaà è woàìŋ lɛ.

1 Kɔliìŋ 8:5

Manɛ̀ŋ zimgbe yaà ko àìjɛnɛ̀ŋ yèè e ɗuunyaŋ àŋ nyààŋ miìŋ aŋ dayà yèè aŋ kana, kɛɛ tɔɔɓaa, aŋ bà gbiŋ fè àŋ dayà yèè àŋ kana.

Ɛfesɔ̀ 2:12

E teenga lii sùà niŋ nyimààŋ wa è kèè Jisɛ̀ Kulaìɛ. Nìŋ yaà wa anyùùŋ fuɔŋ joo koɓɛ̀ anyùùŋ Ezɔ̀ɛ̀ nyaŋ wo Dayà naŋ tàeɗùù nyaŋ, yèè niŋ fè wa àŋ bàiŋbà kòɓɛ̀ è mìèsùàguùŋ nɛ è yèɛ wò Dayà naŋ wa ɓèmè è ɗààhiì kòɓɛ̀ ànyunùuŋ nyàŋ lɛ. Nìŋ yaà wa e ɗuunyaŋ lɛɛ̀, kɛɛ niŋ kuwà wa kò tùlìè jii bà gbiŋ, yèè niŋ gò wa gbɛ̀ɛ̀ Dayà kɔɔ tòloò pɛɛ.

2Tɛsè 2:4

Wò do nàŋ gììyè manɛ̀ŋ maŋ gbiŋ àŋ naŋ nyààŋ dayà ɔ̀ɔ̀ manɛ̀ŋ maŋ gbiŋ àŋ naŋ zoolà maŋ maŋhɛɛ, wò do nàŋ nyɛ̀nɛ̀ŋ mààŋ wò kuwa e gààŋ maŋ gbiŋ diɛŋ. Wò do ngèè pɛɛ nàŋ kɔ̀ ko Saaŋ Zòòlò Dayài wo woò wààŋ wuŋ nàŋ yaà wo Dayà.

1Time 1:17

Koɓɛ̀ wo Kànà wɔŋ nyiiŋ gèe gò jùàa, wo Dayà gunɔ̀ɔŋ, e jòòwo yèè e dɛ̀ɛ̀kɛ nɔ̀ŋ ko nɛ̀ɛ̀uŋ niìŋ wèè julɔfɔ yèè julɔfɔ! Àmiinàŋ.

1Jɔ̀ɔŋ 5:20

Yèè èiŋ nyìmàŋ kɛ̀ wo Jɔ̀àfèlàà Dayàa naŋ hnè yèè wò naŋ wi fè jiikɛ̀ɛ, wèè eiŋ nyìmàŋ wo Dàyà tɔ̀ɔ̀nyaàaŋ. È yààìŋ anyùùŋ guùŋ wo Dayàa tɔ̀ɔ̀nyaàaŋ sùà, yèè anyùùŋ guùŋ wo Jɔ̀àfelaauŋ nɔɔ̀ŋ Jisɛ̀ Kulaì sùà. Wuŋ nàŋ yaà wo Dàyà tɔ̀ɔ̀nyaàaŋ, yèè wuŋ nàŋ yaà wɔŋ nyiiŋ gèe gò jùàa.