Nyɛ̀nɛ̀ŋ 16:14 - WƆŊ FƐ̀Ì EBÒ SÌÀŊ DAYÀA

¹⁴ Wo nìeɔ̀ àŋ nyaaŋ wo Leɗià wɔ nàŋ yaà wa wo nyùnɔ̀ɔŋ bà guùŋ naŋ wi wa kumìè wɔ. Wò yewe wa ko jawa gbeeì aŋ nyaaŋ Tàyatilà, wò yaà wa wo nyuùŋ mààŋ maŋ dèè sɛ̀ìŋ tɔɔ nyìngà ɓaà titi, yèè wò hewa zòòlò Dayà. Wo Kanaà naŋ wa yìlè ke jiiuŋ nɛɛ̀ŋ wèè wo kumiàŋ e yèɛ wo Pɔɔ̀ yaà wa woo lɛ̀.

Nyɛ̀nɛ̀ŋ 16:14 ပူးပေါင်းရင်းမြစ်များ

Luù 24:45

Kpeiŋ wò naŋ nyiŋ kpuumò maŋ jii nyiŋ màŋ naŋ yilè wèè aŋ nyìmàŋ maŋ mìè gbòà wɔŋ fɛ̀ì Dayàa,

Jɔ̀ɔŋ 12:20

Aŋ Guliì nyuuŋ nyàŋ bà naŋ wa kɔ̀ ko zoolo e tèèngà wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ ko Jùlusɛ̀làm.

Nyɛ̀nɛ̀ŋ 10:2

Wo Kɔ̀nilìɔ̀ yaà anyunùuŋ nyàŋ ko gboounoo kuwa wa e hààwe yèè àŋ duɔŋ wa wo Dayà. Wò hewa kpùùmàŋ anyuùŋ pɔ̀ɔ nyàŋ zimgbe, yèè wò hewa zòòlò Dayà e teengaà diɛŋ.

Nyɛ̀nɛ̀ŋ 11:21

E gààŋ Kanaà yaà nyiìŋ wa maŋjɛ̀wɛ, yèè anyuùŋ zimgbe naŋ wa kìlè koɓɛ̀ wo Kanaà yèè àŋ nauŋ sìè e hààwe sùà.

Nyɛ̀nɛ̀ŋ 13:43

Yèè nààŋ e dèèneɛ ko sààŋ zòòlò aŋ Juùù nyaŋ naŋ wa naàŋ ɓaa, aŋ Juùù nyuuŋ yèè anyùùŋ nyaŋ fè àŋ Juùù nyaŋ zimgbe nyiŋ naŋ wa kìlè koɓɛ̀ e zòòlò aŋ Juùù nyaŋ lɛ̀, naŋ wa dè wo Pɔɔ̀ yaà wo Bànaŋɓà maŋjɛ̀wɛ. Wo Pɔɔ̀ yaà wo Bànaŋɓà naŋ nyiŋ kìɛ̀ŋ jii nyingè wèè aŋ jeèè e hààwe sùà koɓɛ̀ Dayài esàɓù ke kpèè siaàŋ wo Dayà naŋ nyiŋ tɔɔ̀ lɛ.

Nyɛ̀nɛ̀ŋ 13:50

Kɛɛ anyùùŋ gbèègbèè aŋ Juùù nyaŋ naŋ kɔ̀ koɓɛ̀ aŋ kpàkòò ɓììɓìì nyaŋ bà ko jawaì yèè aŋ jɔùŋ kɛ̀ɛ̀nɛ̀ŋ ɓɛ̀ɛ̀jàa nyàŋ bà aŋ yè nyaŋ fè àŋ Juùù nyaŋ kɛɛ àŋ zoolà Dayà nyaŋ, yèè àŋ naŋ nyiŋ nyɛ̀nɛ̀ŋ aŋ kɛ̀ɛ̀nɛ̀ŋ maŋ jii fiìì wèè wo Pɔɔ̀ yèè wo Bànaŋɓà, yèè aŋ naŋ nyiŋ nimilà, e nɔ̀ŋ esaɓù aŋ nyiŋ nyìmàŋ aŋ nyiŋ gè maŋ tàta miiŋ wɔŋ fuɔɔ̀ŋ sùà.

Nyɛ̀nɛ̀ŋ 16:40

Wo Pɔɔ̀ yèè wo Silà naŋ fòlò ko sààŋ nyìwìi yèè àŋ naŋ kɔ̀ ko gbòò Leɗià. Kuŋ àŋ naŋ mɛ̀ɛ̀ŋ anyùùŋ hààwè Kanaà, yèè àŋ naŋ nyiŋ kìɛ̀ŋ maŋ mìè gbòà jii nyingè wèè e hààwe nyiŋ nɛ̀, yèè àŋ naŋ kɔ̀.

Nyɛ̀nɛ̀ŋ 18:7

Wo Pɔɔ̀ naŋ nyiŋ jòò yèè wò naŋ kɔ̀ wèè wo jòò ko gbòò wo felaa bà àŋ nyaaŋ wo Taitɔ̀ Jɔtù. Wo felaa wɛɛ̀ fè wa wò Juùù, kɛɛ wò hewa zòòlò Dayà yèè ko gboouŋ niìŋ naŋ wa gbɛ̀ɛ̀ ke sààŋ zòòlò aŋ Juùù nyaŋ.

Nyɛ̀nɛ̀ŋ 8:27

Wo Felè naŋ yèwè dìì wo ka. Wò naŋ wa mɛ̀ɛ̀ŋ wo nyùùŋ gbèè wɔŋ fùɔ̀ŋ Itìopìàa bà guùŋ ke dòmàŋ guùŋ bi diɛŋ wò jaa wɔŋ gɔ̀ sòouŋ nɔɔ̀ŋ sùà. Wo felaa bi nàŋ sia wa e kèè e sùlò nɛɛnɛɛ̀ŋ feìŋ wèè wo jɔùŋ kana gbeeɔ̀ àŋ nyaaŋ Kandeì wèè wɔŋ fùɔ̀ŋ Itìopìàa. Wo kenàŋ gbeeɔ̀ naŋ wa kɔ̀ ko Jùlusɛ̀làm ko zoolo, yèè wò yaà wa naàŋ kɛ̀ɛ̀ sùà maŋjɛ̀wɛ ko jawauŋ noo. Wò yaà wa kpìnìè wɔŋ fɛi e yìwìà wɔŋ fɛ̀ì wɛ̀ijìɔ Àzaayà nààŋ wò yaà wa kɔɔyɛ wɔŋ gɔ̀sòouŋ nɔɔ̀ŋ sùà wɔŋ yèɔ aŋ sòo nyàŋ gɔɛɛ dìì wɔŋ.

Luùm 9:16

Sèè è nɔ̀ŋ yɛi, manɛ̀ŋ maŋ gbiŋ naŋ tùlìè ke nyowoɛ̀ wo Dayà tɔɔ̀ lɛ jii, yèè e fè è yèɛ ànyuùŋ kpùuŋ manaŋ ɔ̀ɔ̀ àŋ nyɛnɛŋ lɛ̀.

Fèle 2:13

esaɓù kɛ̀ wo Dayà kòò wò yààìŋ tòòmò sùà, wèè woiŋ nyɛ̀nɛ̀ŋ naŋ nyimèè yèè naŋ ɓɛnɛ̀ŋ wèè nauŋ jɔ̀ɔ̀lɔ̀ dìì.

Maŋ kèì nyɛɛnɛŋ 1:11

Ke mìèɛ naŋ woò wààŋ, “Singà e nɛ̀ɛŋ mùŋ naŋ yɛmɛ̀ lɛ wɔŋ fɛi sùà, yèè muŋ tùàŋ niŋ koɓɛ̀ maŋ gbòò anyuùŋ hààwe nyàŋ maŋ jàwà gbèègbèè nɔɔnɔŋ le tìyèe mɛɛ̀ŋ sùà, ko Ɛfesɔ̀, ko Sìmanà, ko Pɛgamùŋ, ko Tàyatilà, ko Saɗì, ko Fèlèdɛfià, yaà ko Làòdisià.”

Maŋ kèì nyɛɛnɛŋ 3:20

Kòmaìŋ tɛɛ̀! Mìŋ sià wɔŋ gbemgbeeɔ̀ feìŋ yèè ka wuŋ kpùlà. Sèè wo nyùùŋ gbiŋ komo ke miè miɛ̀ŋ e kìlà wo yìlè wɔŋ gbemgbeeɔ̀, mìŋ do nàŋ jɔ̀ ko saaŋ nyiŋ niìŋ yèè yàwi nyiŋ doiŋ nàŋ jììyè e nɛ̀ŋje koɓɛ̀ guùŋ.

Maŋ kèì nyɛɛnɛŋ 3:7

Wò naŋ ɓɛìŋ woò wààŋ, “Tɛɛ̀ mùŋ kuwa maŋ sìngà koɓɛ̀ wo màikàa wèè ke gbòò anyuùŋ hààwe nyàŋ ko Fèlèdɛfià. “Ke miè gbìaàŋ kɛɛ̀ e yìwìà wo yèɔ yaà nɛɛmaŋ yèè e tɔ̀ɔ̀nyaàŋ sùà wɔ. Wuŋ nàŋ kuwa e jììŋ Kanaà Dèèweɛ̀, yèè sèè wò yilà wɔŋ gbemgbee, wo nyùùŋ gbiŋ fè wuŋ yìlà, yèè sèè wò yìlè wuùŋ, wo nyùùŋ gbiŋ fè wuŋ ɓɛ̀nɛ̀ŋ yìle.