Nyɛ̀nɛ̀ŋ 14:22 - WƆŊ FƐ̀Ì EBÒ SÌÀŊ DAYÀA

²² Àŋ naŋ wa kìɛ̀ŋ anyuùŋ hààwe nyàŋ maŋ jii nyingè yèè àŋ naŋ nyiŋ pɔwɔ̀ wèè aŋ jeèè tɔ̀ɔ̀nyaàŋ e hààwe nyiŋ nɛ̀ sùà. Àŋ naŋ nyiŋ woò nyààŋ, “È kuwa eiŋ kà e keì nyìnga zimgbe dìì pangàà è kɔ̀àìŋ e Kànà Dayàa sùà.”

Nyɛ̀nɛ̀ŋ 14:22 ပူးပေါင်းရင်းမြစ်များ

Maafiù 10:38

Sèè nìŋ go ɓèmè wɔŋ vànèkpaaiŋ nɔɔ̀ŋ yèè naŋ dè kè kpèè miɛ̀ŋ màŋjɛ̀wɛ, kɛ̀ niŋ fè tɛ̀ɛ̀ wèè naŋ nɔ̀ŋ anyùùŋ màŋjɛ̀wɛ̀im.

Maafiù 16:24

Kpeiŋ wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Sèè wo nyùùŋ gbiŋ manaŋ wèè woim dè maŋjɛ̀wɛ, sɔɔ̀ wo gììyà wuŋ bi maŋhɛɛ, wo ɓèmè wɔŋ vànèkpaauŋ nɔɔ̀ŋ, yèè woim dè maŋjɛ̀wɛ.

Maafiù 19:24

Tɔ̀ miŋ woòiŋ ɓɛìŋ, e gò nyìngà wèè wò ɗòsòo wo kɔ̀ɛ̀ɛ̀ e mìilì jewi sùà màànààŋ è naŋ nyìngè wèè wo nyuùŋ bàne wo kà è Kànà Dayàa sùà.”

Luù 24:26

Niŋ nyimààŋ kɛ̀ wò Kulaìɔ, wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, kuwa wa wo kùwà è keì nyìnga paŋgàà wo wa nɔ̀ŋ jòòwouŋ?”

Jɔ̀ɔŋ 15:18

“Sèè anyùùŋ nyaŋ e ɗuunyaŋ lɛɛ̀ sùà aiŋ wùàŋ màànààŋ nɔŋ è yaà lɛ, jàaìŋ jii kɛ̀ miàŋ jiɛ̀ àŋ naŋ wa wùɔ̀ŋ.

Jɔ̀ɔŋ 15:20

Jàaìŋ maŋ mìè gbòa mɛɛ̀ŋ jii nààŋ mìŋ naiŋ woò lɛ, ‘Aŋ ɓɔìjɔ̀à kuwà è gààŋ àŋ do nìàŋ wò kààmɔɔŋ nyiŋ nɔɔ̀ŋ.’ Weètii sèè anyùùŋ aim jàà e nànàŋ, nyìmaìŋ kɛ̀ àŋ doiŋ nàŋ jàà e nànàŋ nyɛ̀iŋ pɛɛ. Sèè àŋ nyɛnɛŋ e yèɛ mìŋ naŋ nyiŋ woò wèè aŋ nyɛ̀nɛ̀ŋ lɛ, kɛ̀ nyɛ̀iŋ pɛɛ àŋ do nàŋ nyɛ̀nɛ̀ŋ e yèɛ niŋ naŋ nyiŋ woò wèè aŋ nyɛ̀nɛ̀ŋ lɛ.

Jɔ̀ɔŋ 16:33

Kàiŋ tɛɛ̀ woò tɛ, wèè kɛ̀ niŋ kɛɛnɛ̀ŋ maŋ jii fàa esaɓù mɛ̀ sùà. E teengaà nìŋ yaà anyùùŋ nyaŋ tɛɛ e ɗuunyaŋ lɛɛ̀ sùà lɛ, nìŋ kuwa naŋ kà e keì nyìnga dìì. Kɛɛ geìŋ zɔlɔ̀! Kà ɓùlà aŋ yè nyaŋ kuwa maŋ kpèè naanààŋ yèè àŋ giiyà wo Dayà maŋhɛɛ nyàŋ.”

Jɔ̀ɔŋ 3:5

Wo Jisɛ̀ naŋ fasaì wààŋ, “Miŋ woòum e tɔɔɓaaà kɛ̀, wo nyùùŋ gbiŋ fè ɓɛ̀nɛ̀ŋ nɔ̀ŋ wò bàuŋbà è Kànà Dayàa sùà sèè wo gò nɔ̀ŋ kòmauŋ e yìwìà è wùìyè yaà wo Jìnàŋ wo Kanaà Dayà.

Nyɛ̀nɛ̀ŋ 11:23

Ke jii naŋ wa fɔ̀ wo Bànaŋɓà nààŋ wò nao wa haì yèè wò naŋ yɛ̀mɛ̀ e ɗeweɛ̀ wo Dayà naŋ wa kpùùmò anyùùŋ nyaŋ lɛ̀. Kpeiŋ wò naŋ nyiŋ dawè wèè aŋ kɛɛnɛ̀ŋ maŋ jii nyingè e kìlà aŋ jeè e hààwe yaà e tɔ̀ɔ̀nyaàŋ maŋ jii nyiŋ màŋ sùà koɓɛ̀ wo Kanaà.

Nyɛ̀nɛ̀ŋ 11:26

Nààŋ wò naŋ wa mɛ̀ɛ̀ŋ wo Sɔɔ̀, wò nauŋ hìɛ̀ŋ ko Aŋtiɔ̀. Kuŋ nyiiŋ tìyèe yaà ke gbòò anyuùŋ hààwe nyàŋ hewa dèènè koɓɛ̀ guùŋ wèè wɔŋ dòà guùŋ kpalauŋ, yèè àŋ naŋ kàà ke gbòò anyuùŋ zimgbe. Kuii ko Aŋtiɔ̀, nàŋ yaà koɓɛ̀ jiɛ̀jiɛ̀i anyùùŋ naŋ wa nyààŋ anyuùŋ hààwe nyàŋ aŋ Kulusɛ̀ɛ̀ìŋ wèè e teenga jiɛ̀jiɛ̀ɛ.

Nyɛ̀nɛ̀ŋ 11:29

Anyùùŋ màŋjɛ̀wɛ̀ nyaŋ gbiŋ ko Aŋtiɔ̀ naŋ wa ɗewè wèè aŋ toomò koɓɛ̀ guùŋ aŋ nyɛ̀nɛ̀ŋ maŋ kuàŋ gbònògbono e yìwìà e yèɛ naŋ wa ɓɛ̀ɛ̀nɛ̀ŋ wo nyùùŋ gbiŋ kùàŋ sùà lɛ wèè aŋ tùàŋ anyuùŋ hààwe dàwi nyiŋ nyàŋ ko Jùdià.

Nyɛ̀nɛ̀ŋ 13:43

Yèè nààŋ e dèèneɛ ko sààŋ zòòlò aŋ Juùù nyaŋ naŋ wa naàŋ ɓaa, aŋ Juùù nyuuŋ yèè anyùùŋ nyaŋ fè àŋ Juùù nyaŋ zimgbe nyiŋ naŋ wa kìlè koɓɛ̀ e zòòlò aŋ Juùù nyaŋ lɛ̀, naŋ wa dè wo Pɔɔ̀ yaà wo Bànaŋɓà maŋjɛ̀wɛ. Wo Pɔɔ̀ yaà wo Bànaŋɓà naŋ nyiŋ kìɛ̀ŋ jii nyingè wèè aŋ jeèè e hààwe sùà koɓɛ̀ Dayài esàɓù ke kpèè siaàŋ wo Dayà naŋ nyiŋ tɔɔ̀ lɛ.

Nyɛ̀nɛ̀ŋ 14:20

Kɛɛ nààŋ anyùùŋ màŋjɛ̀wɛ̀ Kanaà Jisɛ̀ naŋ wa dèènè wo Pɔɔ̀ kɔɔ, wò naŋ wa yèwè dìì yèè yaà nyiŋ naŋ kɛ̀ɛ̀ ko jawa gbeeì. Wɔŋ niìsìaà bàa wo Pɔɔ̀ yaà wo Bànaŋɓà naŋ kɔ̀ ko Dɛɓì.

Nyɛ̀nɛ̀ŋ 14:28

Kpeiŋ wo Pɔɔ̀ yaà wo Bànaŋɓà naŋ nɔ̀ŋ anyùùŋ màŋjɛ̀wɛ̀ nyaŋ e tɛɛ wèè e teenga mùnlaŋ.

Nyɛ̀nɛ̀ŋ 15:32

Aŋ wɛ̀ìjì tìyèe nyàŋ, wo Juɗà yèè wo Silà, naŋ wa gbòò anyuùŋ hààwe nyàŋ kɔɔ wèè e teenga mùnlaŋ wèè kɛ̀ aŋ kɛɛnɛ̀ŋ maŋ jii nyingè yèè e gààŋ.

Nyɛ̀nɛ̀ŋ 15:41

Yèè àŋ naŋ kɔ̀ɛ̀ wɔŋ fùɔ̀ŋ Siilìàa yaà ko Sèlesìà, àŋ yaà nyììne sùà ke gbòò anyuùŋ hààwe nyàŋ maŋ jii e nyaàiŋ dè wo Jisɛ̀.

Nyɛ̀nɛ̀ŋ 18:23

Wò naŋ kuii nɔ̀ŋ wèè e teenga kpàa bà, yèè wò nao yèwè wo jààmè maŋ kpàlàùŋ kpàlàùŋ zimgbe wɔŋ fùɔ̀ŋ anyùùŋ Gàlatìà nyaŋ yaà wɔŋ fùɔ̀ŋ Fɛgìàa sùà. Wò naŋ wa kpùùmò anyuùŋ hààwe nyàŋ koɓɛ̀ bi wèè aŋ kɛɛnɛ̀ŋ gààŋ e hààwe nyiŋ nɛ̀ sùà.

Nyɛ̀nɛ̀ŋ 6:7

Kpeiŋ ke mìè Kanaà Dayà naŋ wa ɓaayè. Ke gbòò anyuùŋ hààwe nyàŋ ko Jùlusɛ̀làm naŋ wa dɛ̀kɛ̀ sùà gbee, e kìlà ke gbòò aŋ sìèfèìŋ zòòlo zimgbe naŋ wa jàà e hààweɛ̀ kùàŋ dìì.

Nyɛ̀nɛ̀ŋ 9:16

Kɛɛ miàŋ bi douŋ nàŋ tɔ̀ɔ kɛ̀ kiìŋ è keì nyìnga wò do nàŋ kɔ̀ɛ̀ sùà wèè esàɓù e deè mɛ̀.”

Luùm 8:17

Nààŋ è yààìŋ aŋ jɔ̀à Dayà, è doiŋ nàŋ yɛ̀mɛ̀ e kpùùmaàŋ wò naŋ bànè hàa wèè anyunùuŋ nyàŋ lɛ. Yèè yàwi pɛɛ doiŋ nàŋ yɛ̀mɛ̀ e nɛ̀ɛŋ wo Dayà naŋ bànè hàa wèè Jisɛ̀ Kulaì, màànààŋ nɔŋ wò naŋ niŋ yɛmɛ̀ lɛ. Kɛɛ sɔɔ̀ eiŋ kà e mɔ̀ɔ̀nɛŋ dìì wèè e keì sìàŋ nyɛ̀nɛŋ màànààŋ wo Jisɛ̀ Kulaì naŋ niŋ kɔ̀ dìì lɛ, wèè kɛ̀ yàwi pɛɛ e yɛmɛ̀iŋ e jòòwo màànààŋ wò naŋ niŋ yɛmɛ̀ lɛ.

1 Kɔliìŋ 1:8

E kìlà wò doiŋ nàŋ yɛ̀mɛ̀ diɛŋ wo nyɛ̀nɛ̀ŋ naŋ nyìngà sùà e jèèsùà naŋ hàì ko dìaì, e wèè e tɔ̀mɛ goiŋ nàŋ nɔ̀ŋ kè ɗɔ̀ɔ̀ è hnàŋ Kanaà Jisɛ̀ Kulaìɛ diɛŋ.

Fèle 1:29

Wo Dayà naiŋ kìɛ̀ŋ e ɗeweɛ̀ wèè naŋ tomo wèè wo Jisɛ̀ Kulaì, e fè nɔŋ wèè nauŋ kùwìè è hààwe tiŋ guùŋ sùà, kɛɛ sɔɔ̀ naŋ kà e keì nyìnga dìì e weèuŋ.

Kòlo 1:23

Nìŋ kuwa naŋ jèè hààwe sɛmɛ sùà, e kìlà naŋ bànè ko tɔɔtu siaŋ. Ɓɔ̀ nìŋ dangè nyɛ̀iŋ bi nìŋ do mɛɛmɛ̀ɛ̀ŋ e yìwìà kè jii tùliaà nìŋ naŋ wa yɛmɛ̀ yɛ, e teengaà nìŋ naŋ wa kòmò Ebò Siaàŋ e yìwìà ko àìjɛnɛ̀ŋ lɛ. Wèè esàɓù Ebò Siaŋ lɛɛ̀, miàim Pɔɔ̀, naŋ nɔ̀ŋ wo ɓɔìjɔ̀à tòmo, yèè mìŋ naŋ wa gbòò ke mìè Dayàa koɓɛ̀ anyùùŋ nyaŋ gbiŋ e ɗuunyaàŋ.

1Tɛsè 3:13

E ɗewe mààŋ tɛɛ̀ sùà, tɔɔɓaa wò do nàŋ sìè maŋ jiiiŋ màŋ gààŋ, e tɔ̀mɛ naìŋ nɔ̀ŋ yèè nìŋ do nàŋ nɔ̀ŋ anyuùŋ nɛɛmaŋ ko fɛ̀ɛ̀fèìŋ Dayà wiɔ̀ wo Dèdaà e teengaà wo Kana wiɔ̀ Jisɛ̀ yaà anyùùŋ nɛɛmaŋ nyàn gbiŋ wò kanaŋ nyàŋ àŋ hnàŋ.

2Time 1:8

Ɓɔ̀ mùŋ nyɛ̀nɛ̀ŋ è sàngè, wèè maŋ gbòà kè mìè seì è nyaàiŋ dè wo Kana wiɔ̀ Jisɛ̀ Kulaì. E kìlà ɓɔ̀ mùŋ nyiniàm è sàngè, esaɓù kɛ̀ mìŋ yaà wo nyùùŋ màŋ keì esàɓù Jisɛ̀ Kulaìɛ sùà. Kɛɛ, ɓèmè e jeum keì nyìngàà wèè Ebò Siaàŋ, màànààŋ wo Dayà naum kìɛ̀ŋ e gààŋ wèè maŋ niŋ nyɛ̀nɛ̀ŋ lɛ.

2Time 3:12

Wo nyùnɔ̀ɔŋ gbiŋ manaŋ wèè wo nɔ̀ŋ wo nyùùŋ tɔ̀ɔ̀nyaàŋ yèè wo bàuŋbà wo Jisɛ̀ Kulaì sùà wɔ, wò do nàŋ kùwò e nìmìlà e yìwìà anyuùŋ joo sìwè.

1Pììlɛ 2:21

Wèè tɛɛ̀ wo Dayà naiŋ nyààŋ, wo Jisɛ̀ Kulaì wuŋ bi naŋ mɔɔnɛ̀ŋ weèiŋ yèè wò naŋ jòò e tɔ̀ɔ̀màŋseì, e wèè naŋ dè e gòlò feeuŋ nɛ̀ maŋjɛ̀wɛ.

1Pììlɛ 5:10

Sèè nìŋ kɔɛ̀ maŋ keì nyìnga mɛɛ̀ŋ sùà wèè e teenga kpuu sùà, wo Dayàa kuwa maŋ tɛ̀ɛ̀tɛ̀ɛ̀ maŋ gbiŋ wɔ̀, wo yèɔ naiŋ nyààŋ wèè wo goonòiŋ e jòòwò nyiiŋ gèe gò jùà ke gbòò Jisɛ̀ Kulaì sùà wɔ, wuŋ bi doiŋ nàŋ nyɛ̀nɛ̀ŋ sengei yèè woiŋ fè e kɔɔ nyingè, woiŋ sìà e gààŋ woiŋ jàà ko tɔɔtu tùlìà jii.

1Pììlɛ 5:9

Nyìngaìŋ e hààweiŋ nɛ̀ sùà niŋ giiyàuŋ maŋhɛɛ, esaɓù nàŋ nyìmàŋ kɛ̀ ke gbòò aŋ wùìya nyàŋ e ɗuunyaàŋ gbiŋ sùà, àŋ yaà kɔ̀ɔ̀yɛ̀ maŋ kèì nyìngà guùŋ mɛɛ̀ŋ dìì.

2Pììlɛ 1:11

E ɗèwè guùŋ nɛɛ̀ sùà wo Dayà doiŋ nàŋ gè nyààŋ diɛŋ wèè naŋ nɔ̀ŋ e Kànàŋ nyiiŋ gèe gò jùà Kana wiɔ̀, wo Nyuùŋ Jòèyeɔ̀ Jisɛ̀ Kulaìɛ sùà.

Juù 1:3

Nyɛiŋ nààŋ dàwi mànaim nyàŋ, tɔɔɓaa mìŋ yaà wa zoolo sɛmɛ e wànàŋ gbee sùà wèè ka sìngà ko nɛ̀ɛ̀iŋ niìŋ e nyaàiŋ dè e jòèyè nɛɛmaàŋ è naiŋ gòònò e fèemàŋ lɛ. Kɛɛ sɔɔ̀ ka sìngà kaiŋ dawè wèè naŋ dè e hààwe bi gòlò jɛwɛ e yèɛ wo Dayà naŋ kìɛ̀ŋ anyunùuŋ nyàŋ yèè e bà gbiŋ gò jòò jɛ̀wɛ̀ lɛ.

Maŋ kèì nyɛɛnɛŋ 1:9

Miàŋ nàŋ yaà wo Jɔ̀ɔŋ, wo wùìyaiŋ nɔɔ̀ŋ, yèè wo nyùùŋ màŋjɛ̀wɛ̀ wo Kanaà Jisɛ̀. Miàŋ nàŋ yaà wo dàwiiŋ nɔɔ̀ŋ ke jii tɔumtɔ̀ùm sùà, wo yèɔ yaà kɔ̀ɔ̀yɛ̀ e keì nyìngaà dìì e yèɛ hnàŋ koɓɛ̀ aŋ yè nyaŋ yaà aŋ bà nyiŋ bà e Kanauŋ nɛ̀ sùà nyaŋ. Àŋ naim wa gbìɛ̀ŋ ke tììŋ Pamòɛ sùà mààŋ wo nyùùŋ keì, esaɓù kɛ̀ mìŋ naŋ gbòò ke mìè Dayàa, yèè mìŋ naŋ wòò e tɔ̀ɔ̀nyaàaŋ e nyaàiŋ dè ke mìè seìɛ wo Jisɛ̀ naŋ wa gɔ̀ì sùà yɛ.

Maŋ kèì nyɛɛnɛŋ 2:10

E jùù ɓɔ̀ è nyɛ̀nɛ̀iŋ wèè è nimilàa nìŋ yaà hinie naŋ kà dìì lɛ. Wo Dɛwìɔ doiŋ nàŋ kɔ̀ɔ̀ e wàa dìì e kìlà wo nyɛ̀nɛ̀ŋ aŋ gbìàŋ nyɛ̀iŋ nààŋ bà nyiŋ ko sààŋ nyìwì. E keì nyìngaiŋ nɛ̀ doo nàŋ nɔ̀ŋ wèè maŋ ɗɔ̀ɔ̀ zììyà. Jèeìŋ e hààwe sùà ko nɛ̀ɛ̀ŋ miìŋ, sèè pɛɛ è gelà wèè naŋ fà, mìŋ doiŋ nàŋ kìɛ̀ŋ wɔŋ nyiiŋ gèe màànààŋ nɔŋ àŋ kiɛ̀ŋ wo nyùùŋ ke ɓɔ̀ɗì kana wèè ke nɔ̀ŋ e jìwààjɛ̀wɛ̀ wèè e nɛ̀ɛŋ wò naŋ ɓùlò lɛ.”

Maŋ kèì nyɛɛnɛŋ 7:14

Mìŋ naŋ fasàì mìàŋ, “Dàa, miŋ nyimààŋ, kɛɛ muàŋ màŋ nyìmàŋ.” Wò naim woò wààŋ, “Anyùùŋ nyɛɛ̀ŋ naŋ kɔ̀ɛ̀ɛ̀ e nimilà nyìngaà sùà yèè àŋ naŋ hnè bòìbòì. Àŋ naŋ sɔ̀ɔ̀ maŋ ɓuuɓane nyiŋ màŋ yèè àŋ naŋ miŋ nyɛ̀nɛ̀ŋ màŋ naŋ fòò e yìwìà maŋ sɛ̀ìŋ Ɓaawaaà sùà.