Nyɛ̀nɛ̀ŋ 13:43 - WƆŊ FƐ̀Ì EBÒ SÌÀŊ DAYÀA

⁴³ Yèè nààŋ e dèèneɛ ko sààŋ zòòlò aŋ Juùù nyaŋ naŋ wa naàŋ ɓaa, aŋ Juùù nyuuŋ yèè anyùùŋ nyaŋ fè àŋ Juùù nyaŋ zimgbe nyiŋ naŋ wa kìlè koɓɛ̀ e zòòlò aŋ Juùù nyaŋ lɛ̀, naŋ wa dè wo Pɔɔ̀ yaà wo Bànaŋɓà maŋjɛ̀wɛ. Wo Pɔɔ̀ yaà wo Bànaŋɓà naŋ nyiŋ kìɛ̀ŋ jii nyingè wèè aŋ jeèè e hààwe sùà koɓɛ̀ Dayài esàɓù ke kpèè siaàŋ wo Dayà naŋ nyiŋ tɔɔ̀ lɛ.

Nyɛ̀nɛ̀ŋ 13:43 ပူးပေါင်းရင်းမြစ်များ

Maafiù 23:15

“E keì nyìnga do nàŋ nɔ̀ŋ ko nɛ̀ɛ̀iŋ niìŋ nyɛ̀iŋ nààŋ kààmɔ̀ɔ̀ŋ maŋ Sàwà Dayà nyaŋ yèè nyɛ̀iŋ nààŋ Fɛlosiì nyaŋ. Nìŋ yaà nyùùŋ fɛ̀ɛ̀ ɗòònààkeì. Nìŋ kaaìŋ dìì naŋ nìàŋ wɔŋ juwoɔ̀ wèè naŋ kàmè anyùùŋ nyaŋ fè àŋ Juùù nyaŋ wò guùŋ wèè wo hààwè e yèɛ nìŋ kaà lɛ. Sèè nìŋ mɛɛ̀ŋ yèè nìŋ kile wo nyùùŋ bi koɓɛ̀ e hààweiŋ nɛ̀, nìŋ nyɛnɛŋ wo nyùùŋ wii wo nɔ̀ŋ e bànèbaneuŋ e sùà tìyèe wèè ko jàhamaŋ, màànààŋ nɔŋ nyɛ̀iŋ bi nìŋ doo nàŋ kɔ̀ lɛ.

Nyɛ̀nɛ̀ŋ 11:23

Ke jii naŋ wa fɔ̀ wo Bànaŋɓà nààŋ wò nao wa haì yèè wò naŋ yɛ̀mɛ̀ e ɗeweɛ̀ wo Dayà naŋ wa kpùùmò anyùùŋ nyaŋ lɛ̀. Kpeiŋ wò naŋ nyiŋ dawè wèè aŋ kɛɛnɛ̀ŋ maŋ jii nyingè e kìlà aŋ jeè e hààwe yaà e tɔ̀ɔ̀nyaàŋ maŋ jii nyiŋ màŋ sùà koɓɛ̀ wo Kanaà.

Nyɛ̀nɛ̀ŋ 13:50

Kɛɛ anyùùŋ gbèègbèè aŋ Juùù nyaŋ naŋ kɔ̀ koɓɛ̀ aŋ kpàkòò ɓììɓìì nyaŋ bà ko jawaì yèè aŋ jɔùŋ kɛ̀ɛ̀nɛ̀ŋ ɓɛ̀ɛ̀jàa nyàŋ bà aŋ yè nyaŋ fè àŋ Juùù nyaŋ kɛɛ àŋ zoolà Dayà nyaŋ, yèè àŋ naŋ nyiŋ nyɛ̀nɛ̀ŋ aŋ kɛ̀ɛ̀nɛ̀ŋ maŋ jii fiìì wèè wo Pɔɔ̀ yèè wo Bànaŋɓà, yèè aŋ naŋ nyiŋ nimilà, e nɔ̀ŋ esaɓù aŋ nyiŋ nyìmàŋ aŋ nyiŋ gè maŋ tàta miiŋ wɔŋ fuɔɔ̀ŋ sùà.

Nyɛ̀nɛ̀ŋ 14:22

Àŋ naŋ wa kìɛ̀ŋ anyuùŋ hààwe nyàŋ maŋ jii nyingè yèè àŋ naŋ nyiŋ pɔwɔ̀ wèè aŋ jeèè tɔ̀ɔ̀nyaàŋ e hààwe nyiŋ nɛ̀ sùà. Àŋ naŋ nyiŋ woò nyààŋ, “È kuwa eiŋ kà e keì nyìnga zimgbe dìì pangàà è kɔ̀àìŋ e Kànà Dayàa sùà.”

Nyɛ̀nɛ̀ŋ 14:3

Wo Pɔɔ̀ yaà wo Bànaŋɓà naŋ wa nɔ̀ŋ aŋ seì e hààwe nyiŋ nɛ̀ wo Kanaà Jisɛ̀ sùà, yèè àŋ nao nɔ̀ŋ wèè e teenga kpàa bà, àŋ yaà gbùùyè ke mìè Dayàa ke jii nyingèò sùà koɓɛ̀ anyùùŋ nyaŋ. Wo Kanaà Jisɛ̀ naŋ nyiŋ wa kìɛ̀ŋ e gààŋ wèè aŋ nyɛ̀nɛ̀ŋ maŋ kèè mèè e kìlà aŋ tɔ̀ɔ̀ maŋ tɔ̀ɔ̀màŋsèì keì. Wo Kanaà naŋ wa tɔɔ̀ kɛ̀ ke miè gbìaŋ nyiŋ nɛɛ̀ŋ e nyaàiŋ dè ke kpèè siauŋ nɛɛ̀ŋ kè yaà wa tɔ̀ɔ̀nyaàŋ.

Nyɛ̀nɛ̀ŋ 16:14

Wo nìeɔ̀ àŋ nyaaŋ wo Leɗià wɔ nàŋ yaà wa wo nyùnɔ̀ɔŋ bà guùŋ naŋ wi wa kumìè wɔ. Wò yewe wa ko jawa gbeeì aŋ nyaaŋ Tàyatilà, wò yaà wa wo nyuùŋ mààŋ maŋ dèè sɛ̀ìŋ tɔɔ nyìngà ɓaà titi, yèè wò hewa zòòlò Dayà. Wo Kanaà naŋ wa yìlè ke jiiuŋ nɛɛ̀ŋ wèè wo kumiàŋ e yèɛ wo Pɔɔ̀ yaà wa woo lɛ̀.

Nyɛ̀nɛ̀ŋ 17:17

Wò naŋ wa kɔ̀ ko sààŋ zòòlò aŋ Juùù nyaŋ wèè wo gbòà ke mìè Dayàa koɓɛ̀ wo nyùùŋ nyaŋ nààŋ fè àŋ Juùù nyaŋ yèè aŋ Juùù nyaŋ yè nyaŋ yaà nyiŋ zoolà koɓɛ̀ guùŋ nyaŋ. Ke ɗɔɔ gbiŋ wò hewa gbòà koɓɛ̀ anyuùŋ mààŋ dòmaŋ nyàŋ kɔɔ aŋ yè nyaŋ wò mɛɛ̀ŋ wa e bòliɛ̀ sùà nyaŋ.

Nyɛ̀nɛ̀ŋ 17:34

anyùùŋ nyaŋ bà nyiŋ naŋ wa hààwè wo Kanaà yèè aŋ naŋ dè wo Pɔɔ̀ maŋjɛ̀wɛ. Wo bà guùŋ nàŋ yaà wa wo felaaà àŋ nyaaŋ wo Dieninsɔ̀, wo màmàŋkùmɛɔ̀ŋ bà guùŋ, yèè wo nìe bà àŋ nyaaŋ wo Dàmalì yèè aŋ zimgbe nyiŋ naŋ wa kìlè koɓɛ̀ wo Kanaà e hààwe sùà.

Nyɛ̀nɛ̀ŋ 17:4

Aŋ Juùù nyaŋ bà nyiŋ naŋ wa haawè yèè àŋ naŋ mààŋ wɔŋ fàà Pɔɔ̀ɔ yèè wo Silà. Eɓìèmàŋjɛ̀wɛ̀ nyiiŋ, anyuùŋ zimgbe aŋ Guliì nyuuŋ nyàŋ sùà yèè aŋ jɔùŋ ɓììɓìì nyaŋ zoolà Dayà nyaŋ naŋ mààŋ wɔŋ faà nyiŋ nɔɔ̀ŋ nyiŋ pɛɛ.

Nyɛ̀nɛ̀ŋ 18:7

Wo Pɔɔ̀ naŋ nyiŋ jòò yèè wò naŋ kɔ̀ wèè wo jòò ko gbòò wo felaa bà àŋ nyaaŋ wo Taitɔ̀ Jɔtù. Wo felaa wɛɛ̀ fè wa wò Juùù, kɛɛ wò hewa zòòlò Dayà yèè ko gboouŋ niìŋ naŋ wa gbɛ̀ɛ̀ ke sààŋ zòòlò aŋ Juùù nyaŋ.

Nyɛ̀nɛ̀ŋ 2:10

wɔŋ fùɔ̀ŋ Fɛgìàa yaà wɔŋ fùɔ̀ŋ Pàŋfelìàa, wɔŋ fùɔ̀ŋ Ijèɔ yaà wɔŋ fùɔ̀ŋ Leɓìàa e gbɛ̀ɛ̀ ko Sàlinìŋ. Yàwi nààŋ bà nyiŋ è yààìŋ anyùùŋ ko Luùm,

Nyɛ̀nɛ̀ŋ 28:23

Nààŋ àŋ naŋ tɔ̀ɔ̀ e teenga wèè aŋ mɛ̀ɛ̀ŋ wo Pɔɔ̀, aŋ zimgbe nyiŋ naŋ wa hnè ko gbooì wò joà lɛ ke ɗɔɔ yii. Wo Pɔɔ̀ naŋ gbòò ko nɛ̀ɛ̀ŋ nyiŋ niìŋ e nyaàiŋ dè e Kànà Dayàa e yìwìà maŋ nyiìŋ tɛ̀tɛ̀ e jèèsùà e gɔɛɛ hàì ko ɗìò tɛɛ. Wò naŋ gbòò ko nɛ̀ɛ̀ŋ nyiŋ niìŋ e yìwìà maŋ Sàwà maŋ wo Dayà naŋ wa kìɛ̀ŋ wo Mòòze màŋ yèè maŋ keì wòo màŋ e yìwìà maŋ fɛ̀ì aŋ Wɛ̀ijì nyaŋ sùà wèè wo kamè ɗewe aŋ kɛɛnɛ̀ŋ e hààwe wo Jisɛ̀ sùà.

Nyɛ̀nɛ̀ŋ 6:5

Ke jii naŋ wa fɔ̀ ke gbòòɛ gbiŋ wèè e keìɛ aŋ keela nyàŋ naŋ wa woò lɛ. Anyùùŋ nyɛɛ̀ŋ àŋ naŋ wa tàeɗùù, wo Siiwììŋ, wo yèɔ kuwa wa e hààwè gbee e kìlà wo Jìnàŋ Nɛɛmaàŋ yàaùŋ wa sùà, yaà wo Felè, wo Pɔchɔlɔ̀, wo Ninkanɔ̀, wo Timɔ̀ŋ, wo Pamɛnà, yèè wo Nikolà, wo nyùùŋ e yìwìà ko Aŋtiɔ̀. Wo fè wa wò Juùù nyuuŋ, kɛɛ wò naŋ wa naàŋ kìlè koɓɛ̀ e zòòlò aŋ Juùù nyaŋ wèè zòòlo.

Luùm 11:6

E kèì jìì Dayàa wò naŋ nyɛ̀nɛ̀ŋ esàɓù e tɛ̀ɛ̀tɛ̀ɛ̀uŋ nɛ̀ lɛ, e fè wèè è tòmo gbiŋ è yèɛ anyùùŋ naŋ nyɛ̀nɛ̀ŋ lɛ. Sèè e kèì jìì Dayàa e weè nɔ̀ŋ esàɓù tòmoɛ̀ anyùùŋ nyɛnɛŋ lɛ̀, kɛ̀ e tɛ̀ɛ̀tɛ̀ɛ̀uŋ nɛ̀ e naàŋ weè nɔ̀ŋ è tɛ̀ɛ̀tɛ̀ɛ̀ kɛnɛ.

Luùm 3:24

Wo Dayà naŋ tɔ̀ɔ̀ e tɛ̀ɛ̀tɛ̀ɛ̀uŋ nɛ̀ koɓɛ̀ anyùùŋ nyaŋ gbiŋ, yèè esàɓù Jisɛ̀ Kulaìɛ sùà, wo Dayà naŋ wi jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ yèè wò naŋ wi jùùyè hakɛ̀ wèè maŋ jùumù wi màŋ.

Luùm 5:2

Wò wi hiàŋ e yìwìà e hààwe sùà koɓɛ̀ e tɛ̀ɛ̀tɛ̀ɛ̀ Dayàa è yèɛ e gòiŋ tomo weè niŋ lɛ̀, e kìlà e yèɛ è joàìŋ naàŋ sùà lɛ. Weètii e zɔlɔ̀ yaà wì, nààŋ è kùwàìŋ ke jii tùlia wèè eiŋ nɔ̀ŋ aŋ bàwibà e jòòwò Dayàa sùà.

Luùm 5:21

Kpeiŋ sèè è nɔ̀ŋ yɛi, màànààŋ nɔŋ e jùumù kuwa gààŋ esàɓù e fàa lɛ̀, yɛi nɔŋ pɛɛ è yaà e tɛ̀ɛ̀tɛ̀ɛ̀ Dayàa kuwa gààŋ esàɓù e tɔ̀ɔ̀nyaàŋ, esaɓù kɛ̀ wò wi jàà kùàŋ dìì esàɓù wo Kana wiɔ̀ Jisɛ̀ Kulaì. Tɛɛ̀ naŋ tɔɔ̀ kɛ̀ è doiŋ nàŋ kɛ̀ɛ̀nɛ̀ŋ wɔŋ nyiiŋ gèe gò jùà wèè julɔfɔ.

2 Kɔliìŋ 5:11

Èiŋ nyìmàŋ kɛ̀ kiìŋ nàŋ yaà e fasàìɛ wèè e jùù nɔ̀ŋ nyùùŋ kɔɔ sùà wèè Kanaà, wèètii è fɛɛ wèè eiŋ kpàà anyùùŋ ɗì wèè aŋ haawè. Wo Dayà wò wi nyìmàŋ è jùà jɛ̀wɛ̀ gbɛlɛiŋ. Mìŋ yààìŋ yɛ̀ɛ̀mɛ̀ dòmaŋ wèè naim nyìmàŋ maŋ jiiŋ màŋ sùà miàŋ pɛɛ.

2 Kɔliìŋ 6:1

E tòmò koɓɛ̀ guùŋ wilɛ̀ sùà yàwi nààŋ Dayà, è yààìŋ dàwe sùà nyɛiŋ nyàŋ nìŋ naŋ yɛ̀mɛ̀ e kèì sìàŋ Dayàa nyàŋ, ɓɔ̀ nìŋ dangè niŋ è doò pɔɔ̀ wèè foo.

Gàla 5:1

Wo Jisɛ̀ Kulaì naŋ wi gèe e ɗo dìì! Tɛɛ̀ naŋ tɔɔ̀ kɛ̀, èiŋ kaì fòlà e ɗo dìì. Nààŋ wo Jisɛ̀ Kulaì naŋ wi bilɛ̀ŋ e yìwìà e ɗo dìì lɛ, jàà wiìŋ e bìlɛŋ bi kùàŋ dìì, yèè ɓɔ̀ è nɔ̀iŋ ɓɛìŋ è dìkia kè Sàwà àŋ ɗo dìì.

Gàla 5:4

Nyɛ̀iŋ nyàŋ nìŋ kamàŋ ɗewe wèè naŋ nɔ̀ŋ anyùùŋ tɔ̀ɔ̀nyaàŋ koɓɛ̀ Dayài esaɓù kɛ̀ nìŋ naŋ nyɛ̀nɛ̀ŋ e yèɛ ke Sàwàa naŋ woò lɛ, nàŋ gòò nyiìŋ bi wo Jisɛ̀ Kulaì kɔɔ. Yèè niŋ fè ɓɛìŋ e tɛ̀ɛ̀tɛ̀ɛ̀ Dayàa dìì.

Ɛfesɔ̀ 2:8

E yìwìà e tɛ̀ɛ̀tɛ̀ɛ̀ Dayàa sùà wò naiŋ joeyè, esàɓù e hààwe sùà. Niŋ gò nyɛ̀nɛ̀ŋ è nɛ̀ŋ bà gbiŋ weè niŋ, e wèè wo nyùùŋ gbiŋ go nàŋ kɛ̀ɛ̀ màŋ nyòngà, esaɓù kɛ̀ è yaà e nɛ̀ŋ kìɛŋ wo Dayà naiŋ niŋ kiɛ̀ŋ.

Fèle 3:16

E ɗewe gbiŋ è do nàŋ nɔ̀ŋ, kùùnò wiìŋ kà ko feìŋ e nyaàiŋ dè maŋ kpèè guùŋ miiŋ è naiŋ wa gbeè maŋ e jèèsùà e hàì nàaŋ.

Fèle 4:1

Nyɛ̀iŋ nààŋ wùìyaim nyàŋ, mìŋ mànàiŋ zimgbe, yèè nìŋ naŋ nyɛ̀nɛ̀ŋ e zɔlɔ̀ naim diè zimgbe. Nyɛ̀iŋ nàŋ yaà mààŋ ke ɓɔ̀ɗì kana miɛ̀ŋ. Jèeìŋ e hààwe sùà koɓɛ̀ wo Kanaà.

Kòlo 1:23

Nìŋ kuwa naŋ jèè hààwe sɛmɛ sùà, e kìlà naŋ bànè ko tɔɔtu siaŋ. Ɓɔ̀ nìŋ dangè nyɛ̀iŋ bi nìŋ do mɛɛmɛ̀ɛ̀ŋ e yìwìà kè jii tùliaà nìŋ naŋ wa yɛmɛ̀ yɛ, e teengaà nìŋ naŋ wa kòmò Ebò Siaàŋ e yìwìà ko àìjɛnɛ̀ŋ lɛ. Wèè esàɓù Ebò Siaŋ lɛɛ̀, miàim Pɔɔ̀, naŋ nɔ̀ŋ wo ɓɔìjɔ̀à tòmo, yèè mìŋ naŋ wa gbòò ke mìè Dayàa koɓɛ̀ anyùùŋ nyaŋ gbiŋ e ɗuunyaàŋ.

Kòlo 1:28

Weètii, è daanàìŋ ebò Jisɛ̀ Kulaìɛ koɓɛ̀ anyùùŋ nyaŋ gbiŋ. È toomàìŋ e jiikɛ̀ɛ wilɛ̀ gbiŋ wèè eiŋ kìɛ̀ŋ e gòo yèè eiŋ kàà anyùùŋ nyaŋ gbiŋ, e kìlà wèè e hìàŋ wo bà guùŋ gbiŋ ko fɛ̀ɛ̀fèìŋ Dayài, mààŋ wo nyuùŋ kàmaiŋ wo yèɔ yaà wo bàuŋbà wo Jisɛ̀ Kulaì sùà wɔ.

Taitɔ̀ 2:11

Wo Dayà dàànè ebò tɛ̀ɛ̀tɛ̀ɛ̀uŋ nɛ̀ wèè wo jòèyè nyuùŋkpùuŋ gbiŋ.

Hiɓu 12:15

Yɛ̀mɛìŋ nyɛ̀iŋ bi diɛŋ, wèè niŋ go nàŋ fè e tɛ̀ɛ̀tɛ̀ɛ̀ Dayàa jɛwɛ. Ɓɔ̀ nìŋ dangè wò nyùùŋ gbiŋ wò do nɔ̀ŋ mààŋ e kùù gùlò kè kuù fiìì, yèè wo nyɛ̀nɛ̀ŋ anyuùŋ zimgbe aŋ nɔ̀ŋ è keì nyìnga sùà.

Hiɓu 13:9

Ɓɔ̀ nìŋ nyimèè wèè ànyuùŋ joo àŋ doiŋ kàà màŋ keì joo, maŋ yè maŋ yà è gbà èɓìèmàŋjɛ̀wɛ̀ Èbò Siaàŋ. È yaà tɛ̀ɛ̀ wèè wo Dayà woiŋ kìɛ̀ŋ e gààŋ maŋ jiiŋ màŋ sùà e yìwìà e tɛ̀ɛ̀tɛ̀ɛ̀uŋ nɛ̀ sùà, kɛɛ e fè wèè naŋ nɔ̀ŋ kùwìè maŋ gbàŋ manɛ̀ŋ je. Yèè ngèè, manɛ̀ŋ je mɛɛ̀ŋ fè kai kpùùmàŋ ànyùùŋ nyaŋ jè mìŋ nyaŋ.

1Pììlɛ 5:12

Wo Sailɔ̀ naim kpuumò mìŋ naŋ sìngè wɔŋ fɛi kpuu wɛɛ̀ŋ ko nɛ̀ɛ̀ŋ niìŋ, wo yèɔ mìŋ naŋ ɓemè wèè wo nɔ̀ŋ wo wùìya hààwè tɔ̀ɔ̀nyaàŋ wɔ. Mìŋ yààìŋ sìa sùà ke di kɛ̀ tɛɛ̀ nàŋ yaà e kìɛ̀ŋ tɔ̀ɔ̀nyààŋ Dayàa nyììneìŋ sùà niŋ nɔ̀iŋ sùà.

2Pììlɛ 3:14

E wèètii nyɛ̀iŋ nààŋ wùìyaim nyàŋ, nààŋ nìŋ yaà fùlìè ke ɗɔɔ bi, nyɛ̀nɛìŋ e yèɛ gbiŋ nìŋ naŋ ɓɛnɛ̀ŋ lɛ wèè niŋ zɛ̀nɛ̀ŋ, yèè e tɔ̀mɛ ɓɔ̀ è nɔ̀iŋ fɛ̀ɛ̀fèìŋ Dayà, e kìlà naŋ nɔ̀ŋ jii fàa sùà koɓɛ̀ Dayài.

1Jɔ̀ɔŋ 2:28

Nyɛ̀iŋ nààŋ jɔ̀àim nyàŋ, jèeìŋ aŋ bàiŋbà wo Jisɛ̀ Kulaì sùà, e wèè sèè wo hnàŋ wa nàwèè eiŋ kɛ̀ɛ̀nɛ̀ŋ ke jii tùlia yèè e naìŋ nyɛ̀ɛ̀nɛ̀ŋ è sàngè sùà kè ɗɔ̀ɔ̀ hnàauŋ nɛɛ̀ŋ diɛŋ.

2Jɔ̀ɔŋ 1:9

Wo nyùnɔ̀ɔŋ gbiŋ gò jèè è kàà kìì Kulaì lɛɛ̀ diɛŋ wɔ̀, kɛɛ wo nììnyàŋ e kàà kii bi wɔ̀, wo kuwà Dayà kè jiiuŋ nɛɛ̀ŋ sùà. Wo nyùnɔ̀ɔŋ gbiŋ naŋ jèè e kàa kii lɛɛ̀ diɛŋ wɔ̀ wò kuwa wo Dèdaà yèè wo Jɔ̀àfelaauŋ nɔɔ̀ŋ ke jiiuŋ nɛɛ̀ŋ sùà.