Luùm 7:14 - WƆŊ FƐ̀Ì EBÒ SÌÀŊ DAYÀA

¹⁴ Èiŋ nyìmàŋ kɛ̀ maŋ Sàwà maŋ yewe wo Jìnàŋ Dayàa sìwè. Kɛɛ mìŋ yaà nɔŋ wo nyuùŋkpùuŋ, yèè mìŋ yaà wo ɗo koɓɛ̀ maŋ jùumù.

Luùm 7:14 ပူးပေါင်းရင်းမြစ်များ

Maafiù 16:23

Kɛɛ wo Jisɛ̀ naŋ kìlè yèè wò naŋ wòò wo Pììlɛ wààŋ, “Kɛ̀ɛ̀im maŋjɛ̀wɛ, Sɛ̀tanàaŋ! Ɓɔ̀ mùŋ kiliàim kùàŋ feìŋ. E gòngo mɔ̀ɛ̀ yiwià koɓɛ̀ Dayài, kɛɛ è yewe ke nyɛ̀nɛ̀ŋ nyuùnkpùuŋ sùà.”

Maafiù 18:25

Kɛɛ wo ɓɔìjɔ̀àa wo kùwà wa è nɛɛnɛŋ wèè wo pààwà è kpàauŋ nɛ̀. Kpeiŋ wo kanaà naŋ woò wààŋ aŋ maàuŋ e ɗo dìì, e hààwè wo jàwè yèè aŋ jɔ̀àuŋ nyàŋ e kpùlìà e nɛ̀ɛŋ gbiŋ wò kuwa wa lɛ̀ wèè wo paawà e kpàaŋ.

Maafiù 5:22

Kɛɛ tɔ̀ miŋ woòiŋ naàŋ kɛ̀, sèè maŋ tùù wo dàwi mɔɔ̀ŋ sìwè wèè foo, àŋ doum nàŋ hìɛ̀ŋ ke sàwà fɛɛ̀feìŋ. E kìlà sèè maŋ wòò wo nyùùŋ gbiŋ mààŋ, ‘Wò siaŋ nɔŋ wèè foo!’ Àŋ doum nàŋ kɔ̀ɔ̀ ko sààŋ sàwà. Yèè sèè maŋ wòò wo nyùùŋ gbiŋ mààŋ wò yaà wo nyuùŋ kpàna, mùŋ do wa nàwèè nàŋ nɔ̀ŋ e keì nyìnga dìì e hmɔ̀ɔ̀ŋ jàhamaàŋ sùà.

Maafiù 5:28

Kɛɛ tɔ̀ miŋ woòiŋ naàŋ e tɔ̀ɔ̀nyaàaŋ kɛ̀, sèè wo nyùùŋ gbiŋ wo yɛ̀mɛ̀ wo jɔùŋ maŋjɛ̀wɛ, yèè wouŋ mànàŋ ke jiiuŋ nɛɛ̀ŋ sùà wèè wo nɔ̀ŋ wo jawèuŋ, kɛ̀ wo nyùùŋ wii wò nyìnìàŋ wo jɔùŋ wii hmɔŋtu ke jiiuŋ nɛɛ̀ŋ sùà.

Luù 5:8

Nààŋ wo Saimɔ̀ŋ Piilɛ̀ naŋ yɛ̀mɛ̀ aŋ kɛ̀ì nyaŋ, wò naŋ dè maŋ gɛ̀ɛ̀nùuŋ màŋ dìì wo Jisɛ̀ fɛɛ̀feìŋ yèè wò naŋ woò wààŋ, “Kanaà, ɓɔ̀ mùŋ gbɛ̀ɛ̀im, esaɓù kɛ̀ mìŋ yaà wo nyùùŋ maŋ jùumù.”

Luù 7:6

Kpeiŋ wo Jisɛ̀ naŋ nyiŋ dè maŋjɛ̀wɛ àŋ naŋ kɔ̀. Nààŋ wo Jisɛ̀ yaà wa gbɛ̀ɛ̀ sùà ko gbooì, wo kààlòòɗùàa naŋ tùɔ̀ŋ aŋ dàwi mɔ̀ɔ̀nɔuŋ nyàŋ bà wèè aŋ woò wo Jisɛ̀ nyààŋ, “Kanaà, ɓɔ̀ mùŋ mɔɔnɛ̀ŋ muàŋ bi. Miŋ fè tɛ̀ɛ̀ wèè maŋ hnàŋ maŋ jɔ̀à kè saaŋ miɛ̀ŋ dìì.

Luùm 3:9

Kiìŋ tɛɛ̀ gbiŋ naŋ fasàì? Tɛɛ̀ ɓɛ̀nɛ̀ŋ tɔ̀ɔ kɛ̀ yàwi nààŋ Juùù nyaŋ tuwàìŋ tɛ̀ɛ̀ e nìàŋ anyùùŋ nyaŋ fè àŋ Juùù nyaŋ? Kpele, e fè yɛi! Aŋ Juùù, e kpùlìà anyùùŋ nyaŋ fè àŋ Juùù nyaŋ, aŋ gbiŋ àŋ yaà e gààŋ maŋ jùumù dìì, màànààŋ nɔŋ mìŋ naŋ woò lɛ.

Luùm 6:6

Èiŋ nyìmàŋ kɛ̀ nààŋ wo Jisɛ̀ Kulaì naŋ wa fɔ̀ɔ̀yɛ̀ wɔŋ vènèkpaaà diɛŋ, yaà maŋ kpùnàŋ jùumù wi màŋ naŋ wa fɔ̀ɔ̀yɛ̀ koɓɛ̀ guùŋ. Tɛɛ̀ naŋ wa kaaìŋ wèè e nyɛ̀nɛ̀ŋ e gààŋ maŋ kpùnàŋ jùumù wi màŋ nɔ̀ŋ pɔ̀ɔ̀pɔɔ niŋ, wèè e go wi ɓɛìŋ nàŋ nyɛ̀nɛ̀ŋ eiŋ nɔ̀ŋ aŋ ɗo wèè maŋ jùumù nyɛ̀nɛŋ.

Luùm 7:18

Kà nyìmàŋ kɛ̀ e gààaŋ wèè ka nyɛ̀nɛ̀ŋ e keì è yèɛ yaà tɛ̀ɛ̀ lɛ e fè kè kpùnaŋ miɛ̀ŋ sùà. Sèè pɛɛ ka kɛ̀ɛ̀nɛ̀ŋ ɗèwe wèè ka nyɛ̀nɛ̀ŋ e tɔ̀ɔ̀nyaàŋ, miŋ fè niŋ ɓɛ̀nɛ̀ŋ nyɛ̀nɛŋ.

Gàla 4:3

E ɗèwè guùŋ nɛɛ̀ sùà, yàwi pɛɛ è yààìŋ aŋ ɗo koɓɛ̀ ke sàwà e gààŋ aŋ jìnàŋ ɗuunyaàŋ lɛɛ̀, pangàà è doiŋ nàŋ kɛ̀ɛ̀nɛ̀ŋ ke jiikɛ̀ɛ kɛ̀ kiìŋ nàŋ yaà e tɔ̀ɔ̀nyaàaŋ.

Ɛfesɔ̀ 3:8

Miàŋ nàŋ yaà wo tòloòɔ anyùùŋ nɛɛmaŋ nyàŋ gbiŋ sùà, yɛi nɔŋ è yaà wo Dayà naŋ nɔ̀ŋ tɛ̀ɛ̀ ko nɛ̀ɛ̀ŋ miìŋ, yèè wò naim tàeɗùù wèè ka wòò ke mìè gbìàŋ Ebò Siaàŋ koɓɛ̀ anyùùŋ nyaŋ fè àŋ Juùù nyaŋ e nyaàiŋ dè e bànè nɛ̀ɛ̀màŋ Jisɛ̀ Kulaìɛ e kpùlìà maŋ yè maŋ nyùùŋ fè ɓɛ̀nɛ̀ŋ kpɛ̀nɛŋ màŋ,

Hiɓu 4:12

Ke mìè gbòà Dayàa kè yaà wɔŋ nyiiŋ gèe sùà yèè kè kuwa gààŋ. Kè nɔ̀ŋ ke nìàŋ e kòyà fòò maŋ nyààŋ tìyèe. Kè kɛɛ ke hàì koɓɛ̀i wo jinàaŋ yaà wɔŋ nyììŋ jinàaŋ deenàŋ lɛ, ko yèi maŋ sunosuno màŋ yaà e bù lɛ maŋ gòà maŋ hnàŋ koɓɛ̀ guùŋ lɛ. Kè fulià janjai e gòngò nyuùŋkpùuŋ nɛ̀ e kpùlìà e yèɛ wò naŋ ɗewè ke jiiuŋ nɛɛ̀ŋ sùà lɛ.