Luù 24:44 - WƆŊ FƐ̀Ì EBÒ SÌÀŊ DAYÀA

⁴⁴ Kpeiŋ wò naŋ nyiŋ woò wààŋ, “Maŋ kèì guùŋ mɛɛ̀ŋ mìŋ naiŋ woò e teengaà mìŋ yààìŋ wa e tɛɛ lɛ̀. Maŋ keì maŋ gbiŋ yaà sìnga miŋ maŋ Sàwà Mòòze màŋ sùà, maŋ fɛ̀ì aŋ wɛ̀ijì nyaŋ sùà, yèè wɔŋ fɛ̀ì Saàaŋ sùà, màŋ kuwa maŋ hɛɛnɛ̀ŋ.”

Luù 24:44 ပူးပေါင်းရင်းမြစ်များ

Maafiù 1:22

Tɛɛ̀ gbiŋ naŋ wa kaaìŋ wèè e nyɛ̀nɛ̀ŋ e yèɛ wo Kanaà naŋ wa woò lɛ, màànààŋ wò naŋ wa gbùùyè wo wɛ̀ijìɔ sùà lɛ e hɛɛnɛ̀ŋ.

Maafiù 16:21

E yìwìà e teenga lii wo Jisɛ̀ naŋ tɔ̀ɔ̀tù anyùùŋ màŋjɛ̀wɛ̀uŋ nyàŋ wòo janyai wààŋ, “Mìŋ yaà kɔ̀ɔ̀yɛ̀ ko Jùlusɛ̀làm yèè mìŋ do nàŋ kɔ̀ e nìmìlà maŋ keì zimgbe dìì e yìwìà aŋ màmànkùmɛ̀ŋ fuɔŋ nyàŋ, aŋ kànà sìèfèìŋ zòòlo nyàŋ, yèè aŋ kààmɔ̀ɔ̀ŋ maŋ Sàwà Dayà nyaŋ. Àŋ doim nàŋ jìwè, yèè sèè e gɔ̀ɛ̀ɛ̀ taai maaŋ, ka yèwà e fàaà dìì wɔŋ nyiiŋ gèeo sùà.”

Maafiù 26:54

Kɛɛ sèè tii kaaìŋ yɛi weè, kɛ̀ dièsɔa e yèɛ wɔŋ fɛ̀ì Dayàa naŋ woò lɛ do nàŋ hɛɛnɛ̀ŋ, tiŋ zà tɛɛ̀ kuwa e kaaìŋ?”

Maafiù 26:56

Kɛɛ e nɛ̀ɛŋ wɔŋ fɛ̀ì Dayàa naŋ woò lɛ kuwa e hɛɛnɛ̀ŋ nààŋ aŋ wɛ̀ijì nyaŋ naŋ niŋ wa sìngè lɛ.” Kpeiŋ anyùùŋ màŋjɛ̀wɛ̀uŋ nyàŋ gbiŋ nauŋ ɓàà e kɔɔ aŋ dùàŋ auŋ jòà.

Luù 21:22

Esaɓù kɛ̀ maŋ ɗɔɔ miiŋ do wa nàwèè nàŋ nɔ̀ŋ maŋ ‘Ɗɔ̀ɔ̀ keì nyìnga gbee,’ wèè e nyɛ̀nɛ̀ŋ e nɛ̀ɛŋ yaà sìnga niŋ maŋ fɛ̀ì Dayà maŋ sùà lɛ e hɛɛnɛ̀ŋ.

Luù 22:37

Esaɓù, tɔ̀ miŋ woòiŋ naàŋ kɛ̀ è yaà sìnga niŋ wɔŋ fɛ̀ì Dayàa sùà wààŋ, ‘Àŋ nauŋ wa nyààŋ wo nyuùŋ gò nɔ̀ŋ sàwà dìì’ Tɛɛ̀ àŋ naŋ wa sìngè e nyaàiŋ eim dè, è do nàŋ hɛɛnɛ̀ŋ e teenga kpuu sùà.”

Luù 24:46

yèè wò naŋ nyiŋ woò wààŋ, “Tɛɛ̀ nàŋ yaà sìnga niŋ wɔŋ fɛ̀ì Dayàa sùà, kɛ̀ wo Kulaìɔ, wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, kuwa wo kà e keì nyìnga dìì, yèè sèè e gɔ̀ɛ̀ɛ̀ taai è maaŋ wo yèwà e fàaà dìì wɔ̀ŋ nyiiŋ gèeo sùà.

Luù 9:22

Wo Jisɛ̀ naŋ nyiŋ ɓɛìŋ woò wààŋ kɛ̀, “Miàim wo Jɔ̀àfèlàà Nyuùŋ Kpùnɔɔ̀ŋ do nàŋ kɔ̀ e nìmìlà maŋ keì zimgbe dìì e kìlà aŋ màmànkùmɛ̀ŋ fuɔŋ nyàŋ, aŋ kànà sìèfèìŋ zòòlo nyàŋ, yaà aŋ kààmɔ̀ɔ̀ŋ maŋ Sàwà Dayà nyaŋ aim gbàŋ. Àŋ doim nàŋ jìwè, sèè e gɔ̀ɛ̀ɛ̀ taai maaŋ, ka yèwà e fàaà dìì wɔŋ nyiiŋ gèeo sùà.”

Luù 9:44

“Ɓɔ̀ nìŋ nyɛɛnɛ̀ŋ è yèɛ mìŋ yaà hinie kaiŋ woò lɛ! Miàim wo Jɔ̀àfèlàà Nyuùŋ Kpùnɔɔ̀ŋ àŋ doim nàŋ gè kùàŋ aim fè koɓɛ̀ e gààŋ anyuùŋ kpùuŋ nyàŋ.”

Jɔ̀ɔŋ 3:14

“Màànààŋ nɔŋ wo Mòòze naŋ wa dìkìè wo kaì bàànè maŋ kàìɔ ke kùù yèè wò nauŋ jòòwò fùùŋ ke fòùngà e diì wòaà diɛŋ lɛ̀, yɛi nɔŋ miàim wo Jɔ̀àfèlàà Nyuùŋ Kpùnɔɔ̀ŋ do nàŋ nɔ̀ŋ jòòwoim e ɗèwè kìì guùŋ nɛ sùà.

Jɔ̀ɔŋ 5:39

Nìŋ kpɛnɛŋ wɔŋ fɛ̀ì Dayàa, esaɓù nìŋ naŋ gongò kɛ̀ maŋ fɛi bi sùà nìŋ do nàŋ yɛ̀mɛ̀ wɔŋ nyiiŋ gèe gò jùà. Yèè wɔŋ fɛ̀ì guùŋ bi naŋ kìɛ̀ŋ ke mìè seì ko nɛ̀ɛ̀iŋ niìŋ e nyaàiŋ eim dè.

Jɔ̀ɔŋ 5:46

Sèè naŋ wa weè kɛ̀ɛ̀nɛ̀ŋ e hààwe wo Mòòze sùà, nìŋ heim weè nàŋ kɛ̀ɛ̀nɛ̀ŋ e hààwe ko sùà, esaɓù kɛ̀ wò naŋ wa sìngè wɔŋ fɛi e nyaàiŋ eim dè.

Nyɛ̀nɛ̀ŋ 13:33

Wò niŋ naàŋ nyɛ̀nɛ̀ŋ weè wi, nààŋ wò naŋ gè wo Jisɛ̀ e fàa dìì wɔŋ nyiiŋ gèeɔ̀ sùà. È yaà nɔŋ màànààŋ è yaà sìnga niŋ wɔŋ fɛ̀ì dìà tìyèè Saààm sùà lɛ wààŋ, ‘Muàŋ nàŋ yaà wo Jɔ̀àfelaa miɔ̀ŋ, esaɓù kɛ̀ kà nàaŋ kìlà wo Dèda mɔɔ̀ŋ.’

Nyɛ̀nɛ̀ŋ 13:40

Weètii, yɛ̀mɛìŋ nyɛ̀iŋ bi diɛŋ, wèè kɛ̀ e yèɛ aŋ wɛ̀ijì nyaŋ naŋ wa woò lɛ ɓɔ̀ è kaaìŋ kò nɛ̀ɛ̀iŋ niìŋ.

Nyɛ̀nɛ̀ŋ 2:27

Muàum Dayà muŋ naàŋ dàngè wɔ̀ŋ nyììŋ jinàŋ miɔ̀ŋ wɔŋ jèè kò nyùùm koɓɛ̀ e ɗùùnyàŋ anyuùŋ fàa nyàŋ, miàŋ nàŋ yaà wo ɓɔ̀ìjɔ̀à nɛɛmaŋ mɔɔ̀ŋ, muŋ naàŋ nyimèè wèè kè kpùnaŋ miɛ̀ŋ ke hèwà kè hùaàŋ sùà.

Nyɛ̀nɛ̀ŋ 3:18

Wo Dayà naŋ wa gbùùyè aŋ keela nyàŋ gbiŋ sùà e teenga gɔu kɛ̀ wo Keela tàeɗùùuŋ nɔɔ̀ŋ kuwa wa wo kà e mɔ̀ɔ̀nɛ̀ŋ dìì, yèè wo Dayà naŋ nyɛ̀nɛ̀ŋ è naŋ hɛɛnɛ̀ŋ wɔŋ dòmanyaaŋ wɛɛ̀ŋ.

Nyɛ̀nɛ̀ŋ 7:37

Wo Mòòzè naŋ wa wòò aŋ wùìyauŋ nyàŋ, anyùùŋ Ezɔ̀ɛ̀ nyaŋ wààŋ, ‘Wo Dayà doiŋ nàŋ tùɔ̀ŋ wo keela, màànààŋ nɔŋ wò naim wa tùɔ̀ŋ lɛ, yèè wò do nàŋ nɔ̀ŋ wo wùìyaiŋ nɔɔ̀ŋ bà guùŋ.’

Hiɓu 10:1

Maŋ Sàwà maŋ wo Dayà naŋ wa kìɛ̀ŋ aŋ Juùù nyaŋ màŋ, màŋ yaà mààŋ wɔŋ mììmììŋ manɛ̀ŋ kɛnɛ màŋ do nàŋ hnè maŋ. Maŋ sàwà miiŋ nàŋ fè wa mànɛ̀ŋ kɛnɛ màŋ gbiŋ wò Dayà naŋ wa jɔ̀ɔ̀ e ɗààhiì wèè wo kiɛ̀ŋ maŋ. Àŋ gè maŋ saaà mɛɛ̀ŋ pɛɛpɛɛ ke ɗɔɔ gbiŋ yèè wɔŋ doa gbiŋ. Kpeiŋ, dièsɔa anyùùŋ nyaŋ hnàŋ koɓɛ̀ Dayài nyàŋ naŋ ɓɛ̀nɛ̀ŋ nɔ̀ŋ zɛ̀nɛŋ nyiŋ nààŋ àŋ kuwo maŋ sàwà maŋ naŋ tɔ̀ɔ̀ e ɗewe kiiɛ̀ àŋ gè maŋ saaà mɛɛ̀ŋ lɛ?

Hiɓu 3:5

Wo Mòòze yaà wo ɓɔ̀ìjɔ̀à tùlìà jii koɓɛ̀ anyùùŋ Dayà nyaŋ, yèè wò naŋ wa kìɛ̀ŋ ke mìè seì e nyaàiŋ dè e yèɛ wo Dayà do wa nàŋ woò wèè ko dòmànfeìŋ lɛ.

Hiɓu 7:1

Wo Mɛ̀kisiɗɛ̀ yaà wa wo kana wèè ko jawa gbeeì àŋ nyaaŋ Salɛ̀m, e kìlà e tèèngà guùŋ bi wò yaà wo sìèfèìŋ zòòlo wèè wo Dayà Gaàŋ Gbeeɔ̀. Wo Mɛ̀kisiɗɛ̀ naŋ wa mɛ̀ɛ̀ŋ wo Eɓulɔhɛɛ̀ŋ yèè wò nauŋ gbìɛ̀ŋ zòòlo maŋjɛ̀wɛ, e teengaà wo Eɓulɔhɛɛ̀ŋ naŋ wa jìwè aŋ kànà tiinàŋ nyàŋ, yèè wò yaà wa naàŋ kɛ̀ɛ̀ sùà maŋjɛ̀wɛ lɛ̀.

Hiɓu 9:8

Wo Jìnàŋ Nɛɛmaàŋ kaà wì janjai e yìwìà e ɗeweɛ̀ lɛɛ̀ sùà kɛ̀, ko tààmàiŋ wèè ko Nɛ̀nɛ̀ŋ Nɛɛmaŋ Gbeeì wèè Dayà kòò kò nɔ̀ŋ weè yìle, e teengaà ke vààyàa kè yaà wa weè nɔŋ koɓɛ̀i àŋ zoolà lɛ.

1Pììlɛ 1:11

Àŋ naŋ fɛ̀ɛ̀ wèè aŋ nyìmàŋ kɛ̀ kiìŋ nàŋ do nàŋ nɔ̀ŋ e teengaà, yèè dièsɔa è do nàŋ hnè. Tɛɛ̀ nàŋ yaà wa e teengaà, e yèɛ wo Jìnàŋ Jisɛ̀ Kulaìɔ yàà nyiìŋ sùà wɔ, yaà wa tɔ̀ɔ sùà kiiyò, nààŋ wò yaà nyiìŋ wa wòò e kèì ko dòmàŋfeìŋ e nyaàiŋ dè e keì nyìngaà wo Jisɛ̀ Kulaì kuwa wèè wo kà dìì yèè e jòòwo gbeeɛ̀ doiŋ nàŋ dè maŋjɛ̀wɛ lɛ̀.

Maŋ kèì nyɛɛnɛŋ 19:10

Mìŋ naŋ dè maŋ gɛ̀ɛ̀nìim màŋ ko dììnaŋ wèè kauŋ zoolò, kɛɛ wò naim woò wààŋ, “Kpele, ɓɔ̀ mùŋ nyɛ̀nɛ̀ŋ niŋ! Mìŋ yaà wo ɓɔìjɔ̀à mààŋ muàŋ bi yèè anyuùŋ hààwe gbànaŋ nyàŋ, aŋ yè nyaŋ gbiŋ naŋ haawè yèè àŋ naŋ kìɛ̀ŋ mìè seì e nyaàiŋ dè e tɔ̀ɔ̀nyaàŋ wo Jisɛ̀ naŋ gɔ̀àì sùà lɛ. Zòòloò wo Dayà wuŋ guùŋ!” E tɔ̀ɔ̀nyaàŋ wo Jisɛ̀ naŋ gɔ̀àì sùà lɛ naŋ yaà e yèɛ sie aŋ wɛ̀ijì nyaŋ ke di wo jinàaŋ sùà.