Juù 1:20 - WƆŊ FƐ̀Ì EBÒ SÌÀŊ DAYÀA

²⁰ Kɛɛ sèè è nɔ̀ŋ wèè nyɛ̀iŋ nààŋ dàwi mànaim nyàŋ, kùnoìŋ nɔŋ nyɛ̀nɛ̀ŋ nyɛ̀iŋ bi wèè niŋ nyìngà sùà wèè e hààwè nɛɛmaàŋ nìŋ kuwa lɛ̀. Zòòloìŋ e gààŋ Jìnàŋ Dayàa sùà,

Juù 1:20 ပူးပေါင်းရင်းမြစ်များ

Nyɛ̀nɛ̀ŋ 15:9

Wo kuwà è tɛɛ gòòno yàwi nyiŋ è fèemàŋ. Àŋ naŋ sìè e hààwe nyiŋ nɛ̀ wo Dayà sùà, yèè wò naŋ nyɛ̀nɛ̀ŋ maŋ jii nyiŋ màŋ maŋ zɛ̀nɛ̀ŋ.

Nyɛ̀nɛ̀ŋ 26:18

Mìŋ manaŋ maŋ yìlè le fɛɛ̀ nyiŋ nɛ̀, wèè kɛ̀ aŋ yèwà ke nyìwìɛ sùà aŋ ka koɓɛ̀ e gbolòùŋ lɛ, e kìlà maŋ nyiŋ gè e gààŋ Sɛ̀tanàaŋ dìì aŋ kìlà anyùùŋ nɛɛmaŋ koɓɛ̀ Dayài. Kpeiŋ kɛ̀ maŋ jùumù nyiŋ màŋ nɔ̀ŋ hakɛ̀ jùùya miŋ, yèè sèè àŋ kɛɛnɛ̀ìm e hààwe sùà àŋ do nàŋ nɔ̀ŋ aŋ bà nyiŋ bà anyùùŋ nɛ̀ɛ̀màŋ Dayà nyaŋ tɛɛ.’ ”

Nyɛ̀nɛ̀ŋ 6:7

Kpeiŋ ke mìè Kanaà Dayà naŋ wa ɓaayè. Ke gbòò anyuùŋ hààwe nyàŋ ko Jùlusɛ̀làm naŋ wa dɛ̀kɛ̀ sùà gbee, e kìlà ke gbòò aŋ sìèfèìŋ zòòlo zimgbe naŋ wa jàà e hààweɛ̀ kùàŋ dìì.

Nyɛ̀nɛ̀ŋ 9:31

Anyùùŋ hààwe nyàŋ gbiŋ ko Jùdià, ko Galaliì, yèè ko Sàmilià naŋ wa ngàà nɔ̀ŋ ke jii fàa sùà yèè àŋ naŋ kpèènè e zòòlo nyiŋ nɛ̀ maŋjɛ̀wɛ e dèè Kanaà sùà. Wo Jìnàŋ Nɛɛmaàŋ naŋ wa kìɛ̀ŋ jii nyingè yèè wò naŋ kpùùmò ke gbòò anyuùŋ hààwe nyàŋ ke dɛ̀ɛ̀ò sùà yèè wò naŋ nyiŋ kìɛ̀ŋ e gààŋ wèè aŋ kɛɛnɛ̀ŋ ɓɛ̀ɛ̀jàa wo Kanaà sùà.

Luùm 15:2

Gòngò wiìŋ wèè e tuwò nyiŋ tɛ̀ɛ̀ wèè e kèì sìàŋ nyiŋ bi lɛ̀, wèè kɛ̀ è naiŋ nyiŋ ɓɛ̀nɛ̀ŋ kpùùmaŋ wèè e nyɛ̀nɛ̀ŋ e hààwe nyiŋ nɛ̀ nyìngà sùà.

Luùm 8:15

Wo Jinàaŋ wo Dayà naŋ wi kiɛ̀ŋ wɔ, wo fè wi mììnè àŋ ɗo, yèè wo fè wi sìà jùù. Kɛɛ wò nyɛ̀nɛ̀ŋ wì eiŋ nɔ̀ŋ aŋ jɔ̀àuŋ yèè euŋ nyààŋ wo Dèda wiɔ̀.

1 Kɔliìŋ 1:8

E kìlà wò doiŋ nàŋ yɛ̀mɛ̀ diɛŋ wo nyɛ̀nɛ̀ŋ naŋ nyìngà sùà e jèèsùà naŋ hàì ko dìaì, e wèè e tɔ̀mɛ goiŋ nàŋ nɔ̀ŋ kè ɗɔ̀ɔ̀ è hnàŋ Kanaà Jisɛ̀ Kulaìɛ diɛŋ.

1 Kɔliìŋ 10:23

“È yààìŋ nyaàŋ gè diɛŋ wi wèè eiŋ nyɛ̀nɛ̀ŋ e nɛ̀ŋ gbiŋ,” tii àŋ woà. Tɛɛ̀ yaà tɔɔɓaa, kɛɛ e nɛ̀ɛŋ gbiŋ nààŋ fè tɛ̀ɛ̀. “È yààìŋ nyaàŋ gè diɛŋ wi wèè eiŋ nyɛ̀nɛ̀ŋ e nɛ̀ŋ gbiŋ,” kɛɛ e nɛ̀ɛŋ gbiŋ nààŋ fè kpuumàŋ.

1 Kɔliìŋ 14:15

Kɛ̀ kiìŋ mìŋ nyɛnɛŋ naàŋ? Yàwi jinàŋ miɔ̀ŋ do nàŋ zoolò, e kìlà yàwi jii miɛ̀ŋ e zoolò. Yàwi jinàŋ miɔ̀ŋ do nàŋ gbeemè, e kìlà yàwi jii miɛ̀ŋ e gbeemè.

1 Kɔliìŋ 14:26

Nyɛiŋ nààŋ wùìyaim nyàŋ, e nɛ̀ɛŋ mìŋ yaà woo lɛ̀ tiŋ tɛɛ̀. Sèè nìŋ deenàŋ wèè zòòlo, wo nyùùŋ guùŋ nɔ̀o wò kuwa wɔŋ nùŋ wèè dàa, wo bàa kuwa e kàa wèè wo kaà, wo bà kuwa ebò dààne e yìwìà Dayà sìwè, wo bà kuwa ke miè gbìaŋ maŋ kaìŋ joo sùà, yèè wo nyùùŋ gɔ̀ì maŋ kaìŋ joo bi sùà nɔ̀o. Tii gbiŋ e nɔ̀ŋ kpùùmaŋ koɓɛ̀ ke gbòò anyuùŋ hààwe nyàŋ.

Gàla 4:6

Kɛɛ nààŋ è yààìŋ aŋ jɔ̀à Dayà lɛ, wo Dayà naŋ tùɔ̀ŋ wo Jìnàŋ Jɔ̀àfelaauŋ nɔɔ̀ŋ maŋ jii wi màŋ sùà. E kìlà wo Jìnàaŋ naŋ gòlò wààŋ, “Dèda miɔ̀ŋ, Dèda miɔ̀ŋ wɔ.”

Ɛfesɔ̀ 4:12

Wò naŋ tɛɛ̀ nyɛ̀nɛ̀ŋ wèè wo bànèbànè anyùùŋ nɛɛmaŋ nyàŋ gbiŋ wèè e tòmò Dayàa nyɛ̀nɛŋ, e wèè aŋ nyɛ̀nɛ̀ŋ anyùùŋ màŋjɛ̀wɛ̀ Jisɛ̀ Kulaì nyaŋ aŋ kɛɛnɛ̀ŋ gààŋ ke kpùnàŋ guùŋ sùà.

Ɛfesɔ̀ 4:16

E yìwìà e gaàuŋ nɛ̀ dìì, manɛ̀ŋ è kɔ̀ɔ̀ ke kpùnaàŋ gbiŋ màŋ naŋ ɓɛ̀ɛ̀nɛ̀ŋ koɓɛ̀ guùŋ. Yèè maŋ sunosuno màŋ wo Jisɛ̀ Kulaì naŋ fè ke kpùnaàŋ sùà maŋ, naŋ jàànè ke kpùnaàŋ gbiŋ koɓɛ̀ guùŋ. Wèètii sèè e nɛ̀ŋ è kɔ̀ɔ̀ ke kpùnaàŋ bà gbiŋ nyɛnɛŋ e tòmo nyiŋ nɛ̀ nààŋ è kanaŋ lɛ̀, ke kpùnaàŋ gbiŋ kè dɛɛ̀ ke nyɛ̀nɛ̀ŋ kiŋ bi ke nyìngà sùà esàɓù e mànaŋ.

Ɛfesɔ̀ 4:29

Maŋ mìè gbòa naanààŋ ɓɔ̀ màŋ fòlàiŋ nyààŋ kòɓɛ̀ ànyuùŋ kpùuŋ dàwiiŋ nyàŋ, sɔɔ̀ maŋ yè maŋ kuwa e kpùùmaŋ, wèè maŋ nyɛ̀nɛ̀ŋ wo nyùùŋ nyìngà sùà e kìlà maŋ hìàŋ e nɛ̀ɛŋ wo nyùùŋ manaŋ lɛ̀, kɛ̀ e nɛ̀ɛŋ mùŋ woà lɛ è do nàŋ nɔ̀ŋ e keì sìàŋ koɓɛ̀ anyùùŋ nyaŋ komo e nɛ̀ɛŋ nìŋ woà lɛ.

Ɛfesɔ̀ 6:18

Nyìniaìŋ tɛɛ̀ gbiŋ e zòòlo sùà, nìŋ yaà dààwè Dayà wèè e kpùùmaŋ. Zòòloìŋ ke nyɛ̀nɛŋ gbiŋ sùà, nààŋ nɔŋ wo Jinàaŋ siàìŋ feìŋ nɛ. E wèè esaɓù lɛɛ̀, nɔ̀ɔìŋ fɛɛ̀ wòwò yèè e bɔ̀mɔ̀ŋ ɓɔ̀ è wùìyàiŋ, zòòloìŋ e teenga gbiŋ wèè anyùùŋ nɛɛmaŋ nyàŋ.

Kòlo 2:7

Nyùaìŋ e gulòiŋ nɛ̀ wo Jisɛ̀ Kulaì ko sùà, e kìlà niŋ kɛɛnɛ̀ŋ gààŋ e hààweiŋ nɛ̀ sùà, màànààŋ àŋ naiŋ wa kaà lɛ. Kɛ̀ɛ̀nɛìŋ ke sɛ̀ gèe e teenga gbiŋ koɓɛ̀ Dayài.

1Tɛsè 5:11

Wèètii fèeìŋ aŋ dàwiiŋ nyàŋ maŋ jii nyingè, yèè niŋ kpuumàŋ e fèemàŋ màànààŋ nìŋ yaà yɛi nɔŋ nyinie le.

1Time 1:4

Wòò nyiŋ aŋ hɔanè pɔ̀ɔ̀ e teenga nyiŋ nɛ̀ maŋ kàɓanè gò kùwìè jiikɛ̀ɛ màŋjɛ̀wɛ, e kìlà aŋ dangè maŋ dèè aŋ nèwàènèwe gò kɛ̀ɛ̀nɛ̀ŋ dìa nyiŋ màŋ sìnga, maŋ yè maŋ hiàŋ e nyaàŋ kpàànè kpaane anyùùŋ e fèemàŋ. Maŋ fè tòòmò è ɗèwè Dayàa, è yèɛ nyaàiŋ naŋ dè è hààwe lɛ̀.

2Time 1:5

Mìŋ naŋ jàà e hààwè tɔ̀ɔ̀nyaàaŋ mùŋ kuwa lɛ̀ ke jii, e hààwè guùŋ bi nɔŋ wo màmaŋ mɔɔ̀ŋ Luì yaà wo yèye mɔɔ̀ŋ Yunè nyiŋ pɛɛ àŋ kuwa wa. Mìŋ kuwa e hààweɛ̀ kɛ̀ e hààwe kɛnɛ bi nɔŋ mùŋ kuwa.

Taitɔ̀ 1:1

E yìwìà miàim Pɔɔ̀ sìwè, wo ɓɔ̀ìjɔ̀à Dayàa, yèè wo keela tàeɗùù wèè Jisɛ̀ Kulaì nàŋ yaà sìngìè wɔŋ fɛi wɛɛ̀ŋ. Wo Dayà naim tàeɗùù yèè wò naim tùɔ̀ŋ e wèè ka kpùùmàŋ e hààwè anyùùŋ Dayà nyaŋ wò naŋ tàeɗùù nyaŋ, e kìlà ka nyiŋ kɔ̀à koɓɛ̀ e gòngò tɔ̀ɔ̀nyaàaŋ e Dayà hùmaŋ kii wilɛ̀ sùà,

Jìiiŋ 2:22

Muŋ fè yɛmɛ̀ kɛ̀, e hààweuŋ nɛ̀ yaà ke kpèè siauŋ nɛɛ̀ŋ toomàŋ wa koɓɛ̀ guùŋ? Esàɓù e tòmo lii sùà tiŋ naŋ nyɛ̀nɛ̀ŋ e hààweuŋ nɛ̀ naŋ wa jùò jɛ̀wɛ̀ gbɛlɛiŋ.

2Pììlɛ 1:1

E yìwìà miàim Saamɔ̀ŋ Pììlɛ sìwè, nàŋ yaà sìngìè wɔŋ fɛi wɛɛ̀ŋ. Mìŋ yaà wo ɓɔìjɔ̀à yèè wo yèɔ yaà keela tàeɗùù wèè Jisɛ̀ Kulaì. Mìŋ yaà sìngìè koɓɛ̀ anyùùŋ nyaŋ aŋ yè nyaŋ esàɓù e tɔ̀ɔ̀nyààŋ Dayàa sùà yaà wo Nyuùŋ Jòèyeɔ̀ Jisɛ̀ Kulaì, àŋ naŋ nyiŋ fè e hààwè jii nyiŋ nɛ̀ mààŋ e je wilɛ̀ nyaŋ.

1Jɔ̀ɔŋ 5:4

Wo jɔ̀à Dayà gbiŋ ɓɛ̀nɛ̀ŋ ɓùlà e ɗuunyaàŋ. Yèè e hààwe wilɛ̀ nàŋ kiɛ̀ŋ wì e gààŋ bi.

Juù 1:3

Nyɛiŋ nààŋ dàwi mànaim nyàŋ, tɔɔɓaa mìŋ yaà wa zoolo sɛmɛ e wànàŋ gbee sùà wèè ka sìngà ko nɛ̀ɛ̀iŋ niìŋ e nyaàiŋ dè e jòèyè nɛɛmaàŋ è naiŋ gòònò e fèemàŋ lɛ. Kɛɛ sɔɔ̀ ka sìngà kaiŋ dawè wèè naŋ dè e hààwe bi gòlò jɛwɛ e yèɛ wo Dayà naŋ kìɛ̀ŋ anyunùuŋ nyàŋ yèè e bà gbiŋ gò jòò jɛ̀wɛ̀ lɛ.

Maŋ kèì nyɛɛnɛŋ 13:10

Wo nyùùŋ nɛɛmaàŋ bà gbiŋ wo yèɔ wo Dayà naŋ sɔ̀ dèè wèè aum kùwà wɔ, àŋ doum nàŋ kùwò. Wo yèɔ naŋ sɔ̀ dèè wèè auŋ jìwìà e koya wɔ̀, àŋ douŋ nàŋ jìwìè koya. Tɛɛ̀ naŋ tɔɔ̀ kɛ̀ anyùùŋ nɛ̀ɛ̀màŋ Dayà nyaŋ kuwa aŋ gbèè e ɗèwè e keì nyìnga kùwa ke jii tɔumtɔ̀ùm sùà, e kìlà aŋ jèè e hààwe sùà.”