Jɔ̀ɔŋ 3:11 - WƆŊ FƐ̀Ì EBÒ SÌÀŊ DAYÀA

¹¹ Mìŋ yààùm wòò sùà e tɔɔɓaaà kɛ̀, è yààìŋ gbùùyè koɓɛ̀ nyɛ̀iŋ nààŋ gbiìŋ e nyaàiŋ dè e yèɛ è naiŋ nyìmè yèè è naiŋ yɛmɛ̀ yàwi nààŋ bi lɛ̀. Nyɛ̀iŋ nààŋ bà gbiŋ kòò nìŋ nyìmèè wèè naŋ hààwè kè mìè seìɛ è naiŋ kiɛ̀ŋ lɛ.

Jɔ̀ɔŋ 3:11 ပူးပေါင်းရင်းမြစ်များ

Maafiù 11:27

“Wo Dayà wo Dèda miɔ̀ŋ wòim kìɛ̀ŋ manɛ̀ŋ maŋ gbiŋ. Wo nyùùŋ bà gbiŋ nyimààŋ miàim wò Jɔ̀àfelaaà sɔɔ̀ nɔŋ wo Dèdaà wuŋ guùŋ, yèè wo nyùùŋ bà gbiŋ nyimààŋ miàim wo Jɔ̀àfelaaà sɔɔ̀ nɔŋ wo Dèdaà yaà aŋ yè nyaŋ miàim wo Jɔ̀àfelaaà naŋ tàeɗùù nyaŋ wèè ka nyiŋ tɔɔ̀ kɛ̀ ɓòò nàŋ yaà wo Dèdaà.”

Maafiù 23:37

Wo Jisɛ̀ wààŋ, “Kuoo nyɛ̀iŋ nààŋ nyùnòò Jùlusɛ̀làm nyaŋ! Anyunùiŋ nyàŋ naŋ wa jìwè aŋ wɛ̀ijì nyaŋ yèè àŋ naŋ hɔ̀wɔ̀ aŋ keela nyàŋ wo Dayà naŋ wa tùɔ̀ŋ ko nɛ̀ɛ̀iŋ niìŋ nyaŋ. E teenga zimgbe mìŋ naŋ nyɛ̀nɛ̀ŋ wànàŋ wèè kaiŋ gbònògbònò koɓɛ̀ guùŋ, màànààŋ wo tɔɔ boolìɔ gbonàŋ aŋ tɔɔ jɔauŋ nyàŋ maŋ gbauŋ màŋ dìì lɛ. Kɛɛ niŋ gò wa nyimèè wèè mìŋ doiŋ gbònò kòɓɛ̀ guùŋ.

Luù 10:22

“Wo Dayà wo Dèda miɔ̀ŋ wòim kìɛ̀ŋ manɛ̀ŋ maŋ gbiŋ. Wo nyùùŋ bà gbiŋ nyimààŋ kɛ̀ ɓòò nàŋ yaà miàim wò Jɔ̀àfelaaà, sɔɔ̀ nɔŋ wo Dèdaà wuŋ guùŋ, yèè wo nyùùŋ bà gbiŋ nyimààŋ kɛ̀ ɓòò nàŋ yaà wò Dèdaà sɔɔ̀ nɔŋ miàim wo Jɔ̀àfelaaà yaà aŋ yè nyaŋ miàim wo Jɔ̀àfelaaà naŋ tàeɗùù nyaŋ wèè ka nyiŋ tɔɔ̀ kɛ̀ ɓòò nàŋ yaà wo Dèdaà.”

Jɔ̀ɔŋ 1:11

Wò naŋ wa hnè koɓɛ̀ anyùùŋ wuŋ bi nyàŋ, kɛɛ anyùùŋ wuŋ bi nyàŋ gòuŋ wa jàà kùàŋ dìì.

Jɔ̀ɔŋ 1:18

Wo nyuùŋkpùuŋ bà gbiŋ kòò wò yɛ̀mɛ̀ wa wò Dayà. Wo nyùnɔ̀ɔŋ nɔŋ nauŋ yɛmɛ̀ wɔ wuŋ nàŋ yaà wo Jɔ̀àfèlàà gunɔ̀ɔŋ wo yèɔ nauŋ gbɛ̀ɛ̀ e kɔɔ fɔ̀ɔ̀ yèè wò naŋ wi tɔ̀ɔ̀ e ɗeweɛ̀ wo Dayà yaà lɛ.

Jɔ̀ɔŋ 12:49

Miŋ fè gbòà è gààŋ miàŋ biɛ̀ sùà. Mìŋ woà nɔŋ e yèɛ wo Dèdaà naim tùɔ̀ŋ wɔ wò manaŋ wèè ka woò lɛ.

Jɔ̀ɔŋ 14:24

Kɛɛ anyùùŋ nyaŋ yè nyaŋ aŋ manàìm nyaŋ aŋ naàŋ nyɛ̀nɛ̀ŋ è yèɛ mìŋ naŋ nyiŋ woò wèè aŋ nyɛ̀nɛ̀ŋ lɛ. E yèɛ zà àŋ naŋ kòmò mìŋ naŋ woò lɛ gò e yìwìà è gaàŋ mɛ̀ sùà, kɛɛ è yewe e gààŋ Dèdaà naim tùɔ̀ŋ wɔ sùà.”

Jɔ̀ɔŋ 3:12

Sèè mùŋ go hààwè è yèɛ mìŋ naum woò lɛ è nyaàiŋ dè maŋ keì maŋ kaaìŋ e ɗuunyaŋ lɛɛ̀ maŋ, kɛ̀ dièsɔa mùŋ doim nàŋ haawè sèè kaum wòò e kèè maŋ keì maŋ kaaìŋ ko àìjɛnɛ̀ŋ maŋ?

Jɔ̀ɔŋ 3:13

Wo nyùùŋ bà gbiŋ kòò wò jòwò wa kò àìjɛnɛ̀ŋ, kɛɛ sɔɔ̀ nɔŋ miàim wo Jɔ̀àfèlàà Nyuùŋ Kpùnɔɔ̀ŋ wo yèɔ naŋ dèyè e yìwìà ko àìjɛnɛ̀ŋ wɔ.

Jɔ̀ɔŋ 3:3

Wo Jisɛ̀ naŋ fasàì yèè wò nauŋ woò wààŋ, “Mìŋ yààùm wòò sùà e tɔɔɓaaà kɛ̀ sɔɔ̀ nɔŋ wò nyùùŋ wo ɓɛìŋ nɔ̀ŋ e kòmauŋ jɛ̀ì paŋgàà wò nɔ̀ŋ wo bàuŋbà e Kànà Dayàa sùà.”

Jɔ̀ɔŋ 3:5

Wo Jisɛ̀ naŋ fasaì wààŋ, “Miŋ woòum e tɔɔɓaaà kɛ̀, wo nyùùŋ gbiŋ fè ɓɛ̀nɛ̀ŋ nɔ̀ŋ wò bàuŋbà è Kànà Dayàa sùà sèè wo gò nɔ̀ŋ kòmauŋ e yìwìà è wùìyè yaà wo Jìnàŋ wo Kanaà Dayà.

Jɔ̀ɔŋ 5:43

Mìŋ naŋ hnè ɓɔɔɓɔɔ mààŋ wo yèɔ wo Dèda miɔ̀ŋ naŋ tɔ̀ùŋ wɔ wèè ka dè e bɛ̀uŋ, kɛɛ nìŋ naŋ gè maŋhɛɛ wèè naim jàà kùàŋ dìì. Yèè sèè wo nyùùŋ bà wò hnàŋ wo yèɔ gboo e gààŋ wuŋ biɛ̀ sùà wɔ, nìŋ douŋ nàŋ jàà kùàŋ dìì.

Jɔ̀ɔŋ 7:16

Yèè wo Jisɛ̀ naŋ nyiŋ fasàì wààŋ, “E yèɛ mìŋ kaà lɛ e fè kè nyɛ̀nɛ̀ŋ miàŋ bi, kɛɛ è yewe wo Dayà sìwè, wo yèɔ naim tùɔ̀ŋ wɔ.

Jɔ̀ɔŋ 8:14

Wo Jisɛ̀ naŋ nyiŋ fasàì wààŋ, “Sèè pɛɛ ka kìɛ̀ŋ ke mìè seì wèè miàŋ bi, e yèɛ mìŋ woà lɛ è yaà e tɔ̀ɔ̀nyaàŋ. Kà nyìmàŋ kɛ̀ kòò mìŋ yewe, yèè kà nyìmàŋ kɛ̀ kòò mìŋ yaà kɔɔyɛ. Niŋ nyimààŋ kɛ̀ kòò mìŋ yewe ɔ̀ɔ̀ kòò mìŋ yaà kɔɔyɛ.

Jɔ̀ɔŋ 8:26

Mìŋ kuwa e zimgbe niŋ wèè ka weè woò wèè kaiŋ jèè e keì, kɛɛ miŋ naàŋ tii woò. Nààŋ wo yèɔ naim tùɔ̀ŋ wɔ wò yaà e tɔ̀ɔ̀nyaàŋ, yèè mìŋ woàìŋ nyɛ̀iŋ nààŋ anyùùŋ nyaŋ e ɗuunyaŋ lɛɛ̀ e yèɛ mìŋ naŋ kòmò lɛ e yìwìà wo yèɔ naim tùɔ̀ŋ wɔ sìwè.”

Jɔ̀ɔŋ 8:38

Mìŋ yààìŋ wòo sùà e kèè e yèɛ wo Dèda miɔ̀ŋ naim tɔɔ̀ lɛ, màànààŋ nɔŋ nìŋ nyɛnɛŋ e yèɛ wo dèdaiŋ nɔɔ̀ŋ naiŋ kaà lɛ.”

Nyɛ̀nɛ̀ŋ 22:18

e gɔ̀à gò e jɛ̀ì bi sùà mìŋ naŋ yɛ̀mɛ̀ wo Kanaà, yèè wò naim woò wààŋ, ‘Biào sùà muŋ yèwà ko Jùlusɛ̀làm! Wò naŋ woò wààŋ esaɓùɛ nàŋ yaà kɛ̀, anyùùŋ nyaŋ naàum kumiè sèè maŋ nyiŋ kìɛ̀ŋ ke mìè seì gbiŋ e nyaàiŋ eim dè.’

2 Kɔliìŋ 4:4

E wèè wɔŋ fàà anyuùŋ gò kɛ̀ɛ̀nɛ̀ŋ è hààwe nyàŋ, wo dàyà ɗuunyaŋ lɛɛ̀ naŋ nyiŋ dììyè le fɛ̀ɛ̀ wèè ɓɔ̀ àŋ yɛmɛ̀ è gbolòùŋ nɛ yewe kè mìè gbìàŋ Èbò Siaàŋ sùà e nyaàiŋ dè e jòòwò Jisɛ̀ Kulaìɛ, wo yèɔ naŋ tèènè Dayà wɔ.

Maŋ kèì nyɛɛnɛŋ 1:5

e yìwìà wo Jisɛ̀ Kulaì sìwè, wo sèì tɔ̀ɔ̀nyaàaŋ, wo jiɛ̀jiɛ̀ɔ wo yèɔ wo Dayà naŋ gè e fàaà dìì wɔ. Wuŋ nàŋ yaà wo sìèfèìŋ aŋ kana nyàŋ gbiŋ e ɗuunyaàŋ diɛŋ. Wo Jisɛ̀ Kulaì mànàŋ wì, yèè e yìwìà maŋ sɛnùuŋ màŋ wò naŋ wi gè maŋ jùumù wi màŋ sùà,

Maŋ kèì nyɛɛnɛŋ 3:14

Wò naŋ ɓɛìŋ woò wààŋ, “Tɛɛ̀ mùŋ kuwa maŋ sìngà koɓɛ̀ wo màikàa wèè anyuùŋ hààwe nyàŋ ko Làòdisià. “Ke miè gbìaàŋ kɛɛ̀ e yìwìà wo yèɔ àŋ nyaaŋ Àmiinàaŋ, wo nyuùŋ hààweɔ̀ yèè wo sèì tɔ̀ɔ̀nyaàaŋ, wo yèɔ yaà ko tɔɔtuì yèè saɓùuŋ nɛ̀ sùà wo Dayà naŋ wa bànè manɛ̀ŋ maŋ gbiŋ wɔ̀.