Jɔ̀ɔŋ 15:4 - WƆŊ FƐ̀Ì EBÒ SÌÀŊ DAYÀA

⁴ Jèeìŋ e jààneiŋ ko nɛ̀ɛ̀ŋ miìŋ, yèè miàŋ pɛɛ mìŋ do nàŋ jèè e jààneim ko nɛ̀ɛ̀iŋ niìŋ. Màànààŋ nɔŋ ke kuù kpee fè ɓɛ̀nɛ̀ŋ kòmaŋ kùàŋ kiìŋ bi sɔɔ̀ nɔŋ ke jèè e jààne nyiŋ koɓɛ̀ ke kuùkpù gbeeɛ̀ lɛ, e ɗèwè guùŋ lɛɛ̀ sùà, nyɛ̀iŋ nààŋ nyùùŋ màŋjɛ̀wɛ̀im nyàŋ fè ɓɛ̀nɛ̀ŋ nyɛ̀nɛ̀ŋ è keì gbiŋ wɔ̀ŋ kùàŋ wùùŋ maiŋ sɔɔ̀ naŋ jèè aŋ bàiŋbà nɔ̀ɔŋ ko nɛ̀ɛ̀ŋ miìŋ.”

Jɔ̀ɔŋ 15:4 ပူးပေါင်းရင်းမြစ်များ

Maafiù 12:33

“Ke kuù bɔ̀u nàŋ komo ke kuù kòmàŋ siaŋ, e kìlà ke kuù naanààŋ nàŋ komo ke kuù kòmàŋ naanààŋ. Nìŋ do nàŋ nyìmè e ɗèwè e nɔ̀ŋ kìì ke kùlɛ̀ɛ e yìwìà ke komàŋ nyiŋ nɛɛ̀ŋ.

Luù 8:15

Manɛ̀ŋ koei màŋ naŋ sɔ̀ɔ̀ e diì sìàaŋ diɛŋ lɛ̀, nàŋ yaà anyùùŋ nyaŋ komo ke mìè Dayàa, aŋ nyiŋ jàà kùàŋ dìì e jɔ̀ɔ̀lɔ yèè ke jìì tɔ̀ɔ̀nyaàŋ sùà. Yèè àŋ jeeà nìŋ sùà e jèèsùà aŋ ɓuù, màànààŋ manɛ̀ŋ jè ɓù komo lɛ.

Jɔ̀ɔŋ 14:20

Sèè e teenga lii hnàŋ wa nàwèè yèè ka kɛ̀ɛ̀ wɔŋ nyiiŋ gèeɔ̀ sùà, nìŋ do nàŋ nyìmè kɛ̀ kòò mìŋ yaà wo Dèda miɔ̀ŋ ko sùà yèè kɛ̀ nyɛ̀iŋ pɛɛ nìŋ yààìm ko sùà, màànààŋ nɔŋ mìŋ yààìŋ ko sùà lɛ.

Jɔ̀ɔŋ 17:23

Mìŋ yaà nyiìŋ ko sùà, yèè mùŋ yààìm ko sùà, wèè kɛ̀ aŋ gbiŋ aŋ nɔ̀ŋ anyùùŋ guùŋ aŋ dàwi nyiŋ nyàŋ sùà, wèè kɛ̀ anyùùŋ nyaŋ e ɗuunyaàŋ aŋ nyìmàŋ kɛ̀ muàŋ naim tùɔ̀ŋ yèè kɛ̀ mùŋ mànàŋ nyiìŋ màànààŋ nɔŋ mùŋ mànàìm lɛ.

Jɔ̀ɔŋ 6:56

Anyùùŋ nyaŋ do nàŋ gbìlè e kenìŋ mɛ̀ yèè aŋ tìà maŋ sɛnìim màŋ nyaŋ, àŋ doim nàŋ nyìnìè wɔŋ nyiiŋ gèe nyiŋ nɔɔ̀ŋ ko sùà, yèè wɔŋ nyiiŋ gèe miɔ̀ŋ do nyiŋ nàŋ nɔ̀ŋ ko sùà.

Jɔ̀ɔŋ 8:31

Wo Jisɛ̀ naŋ ɓɛìŋ wòò Juùù nyaŋ nauŋ haawè nyaŋ wààŋ, “Sèè nìŋ haawà yèè nìŋ jɔɔlɔ̀ e yèɛ mìŋ naiŋ woò lɛ dìì, kɛ̀ tɔɔɓaa nìŋ yaà anyùùŋ màŋjɛ̀wɛ̀im.

Nyɛ̀nɛ̀ŋ 11:23

Ke jii naŋ wa fɔ̀ wo Bànaŋɓà nààŋ wò nao wa haì yèè wò naŋ yɛ̀mɛ̀ e ɗeweɛ̀ wo Dayà naŋ wa kpùùmò anyùùŋ nyaŋ lɛ̀. Kpeiŋ wò naŋ nyiŋ dawè wèè aŋ kɛɛnɛ̀ŋ maŋ jii nyingè e kìlà aŋ jeè e hààwe yaà e tɔ̀ɔ̀nyaàŋ maŋ jii nyiŋ màŋ sùà koɓɛ̀ wo Kanaà.

Nyɛ̀nɛ̀ŋ 14:22

Àŋ naŋ wa kìɛ̀ŋ anyuùŋ hààwe nyàŋ maŋ jii nyingè yèè àŋ naŋ nyiŋ pɔwɔ̀ wèè aŋ jeèè tɔ̀ɔ̀nyaàŋ e hààwe nyiŋ nɛ̀ sùà. Àŋ naŋ nyiŋ woò nyààŋ, “È kuwa eiŋ kà e keì nyìnga zimgbe dìì pangàà è kɔ̀àìŋ e Kànà Dayàa sùà.”

2 Kɔliìŋ 13:5

Tùaìŋ nyɛ̀iŋ bi maŋ nɔnɔŋ niŋ yɛmɛ̀ sèè mààŋ nìŋ kuwa kai e hààweɛ̀ màŋ nyiiŋ gèeiŋ màŋ sùà. Tɔɔɓaa nàŋ nyìmàŋ kɛ̀ wo Jisɛ̀ Kulaì yaà maŋ nyiiŋ màŋ sùà? Sɔɔ̀ nɔŋ naŋ nɔŋ soò kpɛlɛmɛɛŋ.

Gàla 2:20

Jòòpɛɛ kà naàŋ fà, kɛɛ wo Jisɛ̀ Kulaì yaà wɔŋ nyiiŋ gèe miɔ̀ŋ sùà. E kìlà mìŋ yaà naàŋ wɔŋ nyiiŋ gèe e hààwe wo Jɔ̀àfelàà Dayàa sùà, wo yèɔ naim mɔ̀nɔ̀ŋ yèè wò naŋ kìɛ̀ŋ wɔŋ nyiiuŋ nɔɔ̀ŋ e weèim wɔ̀.

Ɛfesɔ̀ 3:17

Mìŋ humo Dayà wèè wo Jisɛ̀ Kulaì nɔ̀ŋ maŋ jiiiŋ màŋ sùà esàɓù e hààweiŋ nɛ̀. E kìlà mìŋ humo Dayà wèè naŋ kɛ̀ɛ̀nɛ̀ŋ e gulòiŋ nɛ̀ yèè ko tɔɔtuiŋ niìŋ e mànaŋ sùà.

Fèle 1:11

Maŋ nyiiŋ gèeiŋ màŋ do nàŋ dìè maŋ kèì tɔ̀ɔ̀nyaàŋ kɛnɛ, maŋ yè maŋ wo Jisɛ̀ Kulaì doiŋ nàŋ kpuumò wèè naŋ nyɛ̀nɛ̀ŋ, wèè e jòòwò yèè e tɛ̀nɛŋ koɓɛ̀ Dayài.

Kòlo 1:23

Nìŋ kuwa naŋ jèè hààwe sɛmɛ sùà, e kìlà naŋ bànè ko tɔɔtu siaŋ. Ɓɔ̀ nìŋ dangè nyɛ̀iŋ bi nìŋ do mɛɛmɛ̀ɛ̀ŋ e yìwìà kè jii tùliaà nìŋ naŋ wa yɛmɛ̀ yɛ, e teengaà nìŋ naŋ wa kòmò Ebò Siaàŋ e yìwìà ko àìjɛnɛ̀ŋ lɛ. Wèè esàɓù Ebò Siaŋ lɛɛ̀, miàim Pɔɔ̀, naŋ nɔ̀ŋ wo ɓɔìjɔ̀à tòmo, yèè mìŋ naŋ wa gbòò ke mìè Dayàa koɓɛ̀ anyùùŋ nyaŋ gbiŋ e ɗuunyaàŋ.

Kòlo 1:27

Wo Dayà naŋ wa ɗewè wèè wo tɔ̀ɔ̀ ke gbùnuuŋ nɛɛ̀ŋ koɓɛ̀ anyùùŋ nɛɛmauŋ nyàŋ, ke gbùnu kɛ̀ɛ̀nɛ̀ŋ bàne yaà e jòòwo yɛɛ̀, ke yèɛ wò kuwa wèè anyùùŋ nyaŋ gbiŋ nyàŋ. Ke gbùnu bi zà nàŋ yaà kɛ̀, wo Jisɛ̀ Kulaì joàìŋ ko sùà, yèè wuŋ nàŋ yaà ke jii tùliaiŋ nɛɛ̀ŋ wèè naŋ nɔ̀ŋ aŋ bàiŋbà e jòòwò Dayàa sùà.

Kòlo 2:6

Nààŋ nìŋ naŋ jàà wo Jisɛ̀ Kulaì kùàŋ dìì wèè wo nɔ̀ŋ wo Kanaiŋ nɔɔ̀ŋ lɛ, nìŋ kuwa naŋ nɔ̀ŋ aŋ bàiŋbà wɔŋ nyiiŋ gèeuŋ nɔɔ̀ŋ sùà.

1Tɛsè 3:5

Miŋ gò niŋ ɓɛ̀nɛ̀ŋ dìì, wèètii mìŋ naŋ tùɔ̀ŋ wo Timetè. Mìŋ nauŋ tùɔ̀ŋ wèè wo nyɛ̀nɛ̀ŋ maŋ nɔnɔŋ tùaŋ e nyaàiŋ dè e hààweiŋ nɛ̀. Tɔɔɓaa tiŋ e fè ɓɛ̀nɛ̀ŋ nɔ̀ŋ kɛ̀ wo Dɛwìɔ wòiŋ gɛ̀ɛ̀ jɛ̀wɛ̀ e tòmo wilɛ̀ gbiŋ nɔ̀ŋ wèè foo.

Hiɓu 10:39

E fèìŋ mààŋ ànyùùŋ nyaŋ naŋ fè è hààwe nyiŋ nɛ̀ jɛwɛ yèè àŋ naŋ fɔ̀ nyaŋ. È doiŋ nàŋ jèè e hààwe maŋ nyiiŋ gèe wi màŋ sùà e jèèsùà wo Dayà wo wi joeyè .

1Jɔ̀ɔŋ 2:6

Wo nyùnɔ̀ɔŋ gbiŋ naŋ woò wààŋ wò naŋ hààwè wo Dayà wɔ, wò kuwa wo dè e tɔ̀ɔ̀màŋsèì ke kpèè Jisɛ̀ Kulaìɛ maŋjɛ̀wɛ.

2Jɔ̀ɔŋ 1:9

Wo nyùnɔ̀ɔŋ gbiŋ gò jèè è kàà kìì Kulaì lɛɛ̀ diɛŋ wɔ̀, kɛɛ wo nììnyàŋ e kàà kii bi wɔ̀, wo kuwà Dayà kè jiiuŋ nɛɛ̀ŋ sùà. Wo nyùnɔ̀ɔŋ gbiŋ naŋ jèè e kàa kii lɛɛ̀ diɛŋ wɔ̀ wò kuwa wo Dèdaà yèè wo Jɔ̀àfelaauŋ nɔɔ̀ŋ ke jiiuŋ nɛɛ̀ŋ sùà.